Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> اکبر کہانیاں >> اکبر کہانی : ڈنڈا پیر

اکبر کہانی : ڈنڈا پیر

اکبر کہانی
March 19th, 2008

ڈنڈا پیر

ساڈے پنڈوں چوکھا نیڑے پہاڑ اتے اک نویکلا پنڈ اے۔ اوتھے لوک اک انوکھے پیر دی مانتا کردے نیں نیں دے کنڈھے اک وڈے بوڑھ تھلے اک تھڑے اتے گھٹو گھٹ چھ ہتھ لما کھونڈا گڈیا ہویا اے ۔ ایس کھونڈے دے سرتے پھلاں دے ہارتے دوالے ساوی ریشمی چولی چاڑھی ہوئی اے۔ مراد وند لوک ایتھے روز دیوا بتی کردے نیں۔ اٹھوارے دے اٹھوارے میلہ لگدا اے۔ چورمے تے کھیراں ، پیسیاں دے روپیاں دے چڑھاوے چڑھدے نیں۔ ورھے دے ورھے وڈا میلہ لگدا اے۔ میلے دے دن اوس کھونڈے دی برکت نال ساڈے پنڈ نوں امن چین دا وردان ملیا ہویا اے۔
ورھے پچھوں جیہڑا میلہ لگدا اے اوہدے وچ آوندے ورھے لئی منتاں تے سکھناں سکھیاں جاندیاں نیں۔ جس لویری نوں دھاراں کڈھدیاں چھڑاں مارن تے اٹک جان دی وادی ہووے، اوہدا امالک کھونڈا اوہدے لک نال چھوہاندا اے تے ایہہ آہندا اے پیرا ! ایہدی بھیڑی وادی جاندی رہے تے میں اگلے میلے اوہدے ددھ دی کھیر
پکا کے ایتھے چاڑھاں گا۔ جیہڑے منڈے نوں کم کار دی عادت نہ ہووے یاں ڈنگڑاں مگر لگیاں وگ سنجا چھڈکے ماسی دے پنڈنس جاندا ہووے ، کھونڈا اوہدے موہراں نال چھہا کے ماں منت مندی اے جے منڈے دی ایہہ بھیڑی وادی چھٹ جائے تے میں اگلے میلے تے چورما چاڑھاں گی۔
زنانی بلار ہووے تے سس سوہرے دے واک وچ نہ ہووے تے کھسم نوں وی پلے نہ بنھے تے اوہدی سس ، کونت کھونڈا اوہدے لک نال چھہاندے نیں تے منت مندے میں پئی آوندے میلے تے پنج روپے نقدتے گڑدی روٹی کھونڈے پیردی نظر گزاراں گے تاں جے بھاگوان وسن دے چالے پھڑلوے۔
لوک ایس کھونڈ نوں ڈنڈا پیر کہندے نیں تے دنو دن ڈنڈے پیر دی مانتا ایس پنڈوں نکل کے شہراں تیک وی اپڑدی جاندی اے۔ آہندے نیں کئی اڑک ویڑھکے ، کنی مونہہ زور گھوڑے تے کئی کوراہے بندے ایس پیر دی ظاہرا کرامت نال تکلے وانگوں سدھے ہوگئے تے اکھیں پایاں نہیں دکھدے۔
سیانیاں کولوں پچھیاپئی ڈنڈے پیردے ڈیرے ایتھے کدوں دے لگے نیں؟ تے اوہناں دسیاپئی اک گرو پیر کئی ورھے پہلاں ایتھے آیاسی۔ وڈے برچھ رکھ جیڈا جناتے شینہہ ورگا جوان سی۔ اوہ رب دی یاد والا بندہ سی تے نویکلے بہن والا فقیر سی۔ اودوں ایس بستی مشہور ایس بستی دے لوک آپو وچ لڑائی تے نت ہوندے رہن والیاں ہنگامیاں پاروں دور دور تک مشہورسن ۔ کوئی دن نہیں سی جاندا جدوں نکیاں گلاں توں ایہناں وچ وڈے وڈے فساد نہ ہوندے ہون۔ پکیاں فصلاں ایہناں دی دبھتا کران اجڑ جاندیاں سن تے مانواں دے لاڈلے گبھرو جوانی چڑھدیاں ای مکئی دے ٹانڈے وانگوں کپ کے سٹ دتے جاندے سن۔ ایس نکرمے پنڈ وچ کسے دی آس پجدی کسے دی مرا د توڑ چڑھدی تے کسے دی بیڑی بنے لگدی نظریں آوندی ، چڑھدی جنج نوں ڈکن والے، مڑدؤوی ڈولی نوں روک لین والے سجی بنی ووہٹی نوں ڈولیوں کڈھ لین والے ہرل ہرل کردے پھردے سن۔ فقیر نویکلا بیٹھا ایہناں لڑائیاں ہنکامیاں نوں ویہنداسی تے اندرے اندر تپدا رہندا سی۔ اک دن اوہدے من وچ کرے کیہ آئی پئی جدوں پنڈ دیاں دو ڈھانیاں دے بندے پرانی وادی تے نت دے وسب پاروں ڈھول ماردے تے ڈانگاں چھویاں تے کہاڑیاں ہلاردے نکلے۔ فقیر کھونڈا پھڑکے اپنے تھاؤں ٹرپیا تے پہلاں ڈھانیاں دے آگوواں نوں دھونوں پھڑکے اوہناں دیاں سریاں آپو وچ ٹکرائیاں تے اوہناں دے کھنے کھول دتے تے مڑ سارے پنڈتے کھونڈا انج ورھایا جویں مکئی دے سٹے کٹیندے نیں۔ اوہ بندہ سی کہ دیو۔ جس پاسے گیا لڑن بھڑن والیاں نوں گاجر مولی وانگوں ڈکرے کر کے رکھ دتا۔ کئیاں دے سر پاٹ گئے، کئیاں دے لک ٹٹ گئے۔ کئی ساری عمر منجی نال منجی ہوگئے۔ فقیر اپنا کم کرکے کسے دا ول مونہہ کر گیا۔ اوہدا کھونڈا ایتھے ای رہ گیا۔ ایس کھونڈے دی برکت نال پھیر ایس پنڈ دے وسنیکاں وچ نہ کوئی دنگا فساد ہویا، نہ ہنگامہ۔ فصلاں پکدیاں رہیاں تے دانیاں نال کوٹھیاں بھردیاں رہیاں۔ گبھرو جوان ہوندے رہے تے جوانیاں ماندے رہے تے مانواں ایہناں دیاں مراداں دیندیاں رہیاں تے ہر پاسے سکھ دا راج ہوگیا۔
لوکاں فقیر دی تھاں ڈنڈے پیر نوں اپنا گورو مرشد من لیا۔ اوہدی ایس پنڈ وچ بڑی مانتا اے تے ہن دور دور تک ڈنڈے پیر دی مانتا اپڑ گئی اے۔
بڑے بڑے سیانے لوک تے دگڑ تگڑے بندے تے وڈیاں وڈیاں اگانہہ ودھیاں قوماں ڈنڈے نوں اپنا گورو پیر من کھلوتیاں نیں۔ ایس پیر دے دوارے کھیراں ، چورمے تے روپیاں پیسیاں دے چڑھاوے چڑھدے نیں۔ ریشمی چولی نال سجایا تے ہاراں نال لدیا ڈنڈا پیر ایس بستی اتے اپنی چھاں کیتی کھلوتا اے تے انج جاپدا اے پئی اوہدی چھتر چھاں ہیٹھاں کسے فسادی تے کسے اپرادھی نوں دھون چکن دی درڑھتا نہیں ہونی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels