Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> ناول >> لڑھدی پئی نسل >> لُڑھدی پئی نسل (پنجویں قسط)

لُڑھدی پئی نسل (پنجویں قسط)

منیر احمد مانک
December 23rd, 2007

اوہنے روٹی دا اک بھورا تروڑ کے مونہہ وچ پایا۔اوس ویلے بے بی رڑھدی ہوئی منجی دے پاوے دے کول اپڑی، اوہ پاوے نوں پھڑ کے کھلوون دے جتن کررہی سی۔اوہ ڈگ گئی۔''ہائے نی! جے تیری ٹنڈ پاٹ جاندی۔''اوہنے انج آکھدیاں بے بی نوں چُکیا۔''چھی۔ گندی!'' اوہدا نک وگ کے مونہہ تیکر اپڑیا ہویا سی۔اوہنے بے بی نوں ویکھ کے بھیڑا مونہہ بناؤندیاں آکھیا۔ اینا بھیڑا مونہہ،جیہدے وچ دکھاوے دا غصہ وی ہے اتے سچا پیار وی۔پھیر اوہنے مسکاؤندیاں ہویاں اپنے دیور ول تکیا،اوہنوں اپنی بھرجائی دی اوہ گل سمجھ نہ آئی، اوہنوں سب کجھ بڑا عجیب لگدا ہے۔اجیہا عجیب، اتے اوہ کجھ وی سمجھ نہیں سکیا، اوہدے پلے ککھ وی نہیں پے رہیا سی۔

اوہ چھیتی چھیتی روٹی کھاکے اوتھوں اُٹھ کھلوتا اتے اوہ ہتھ مونہہ دھوکے کمرے وچ ٹرگیا۔لیڑے بدلدیاںہویاں سوچدا ہے کہ''کیہہ سچ مچ میری بھرجائی میرے تے ڈورے سُٹدی پئی ہے اتے اوہ مینوںامپریس کرنا چاہوندی ہے؟'' اوہ سوچدا ہے، کیہہ انج ہوسکدا ہے، کیہہ پتہ اوہ میرے وڈے بھرا کولوں جنسی طور تے مطمئن نہ ہووے، کیہہ پتہ میرا وڈا بھرا اوہدی جنسی تاہنگ پوری نہ کرسکدا ہووے ایس لئی اوہ میرے نال وی جنسی ملاپ رکھنا چاہوندی ہووے۔ میں اک گل نوٹ کیتی سی کہ میرا وڈا بھرا وی بھرجائی دے نال اوکھا بولدا ہے اتے اوہدا سبھاء وی اجکل بدلدا جارہیا ہے۔ پتہ نہیں لگدا کہ اوہناں دے سانگے نوں کیہڑا ناں دتا جاوے،مکینکل سانگا۔ کنا رسمی! اوہ صرف اک دوجے دا رشتہ نبھاؤندے پئے نیں، اوہ اک فارمیلٹی پوری کررہے نیں۔کیہہ ایہہ سچ ہے یاں مینوں بھلیکھا لگا ہے۔

دبی ہوئی تاہنگ دا وکھرا روپ نظر آؤندا ہے۔کیہہ میں اپنی بھرجائی دے نال اوہ سب کجھ کرسکدا ہاں؟ کیہہ میں اوہدے نال جنسی واسطہ رکھ سکدا ہاں؟'' سوال دا جواب نہ، ہاں وچ، نہ، نہ وچ آرہیا سی۔ اتے اچن چیتی اوہنوں یاد آیا جدوں تھوڑا کُو چر پہلاںاوہدی بھرجائی کسے دے ویاہ توں واپس آئی سی۔اوس ویلے اوہدی بھرجائی نے سوہے رنگ دا ریشمی جوڑا پایا ہویا سی اتے اوہ بڑی سوہنی لگدی پئی سی۔اوہنے اپنے گلاں تے پاؤڈر تے لالی(سُرخی) لائی ہوئی سی۔

اوہدے پنڈے توں آون والی خوشبو بڑی من کھچویں سی۔ اوہ گھور گھور کے اوہنوں تک رہیا سی۔اوہدی انوکھی ٹور، اتے ٹور وچ سمائی ہوئی مستی ویکھ کے اوہدا دل پھٹڑ ہوگیا سی اوہدیاں شوخ اداواں اتے نخرے اوہدے دل وچ تیر وانگوں لگدے سن۔اتے اوہنوں اپنی بھرجائی دا چہرہ اینا بھا گیا سی، اوہنوں اپنی بھرجائی دے نین نقش اینے چنگے لگدے سن کہ اوہدا دل کردا سی کہ اوہ اپنی بھرجائی نوں جپھی مارے اتے اوہدیاں چُمیاں لیندا رہوے، اتے اوس دیہاڑے اوہ شدائی خورے کیہہ کیہہ سوچدا رہیا اخیر ایہہ ہویا کہ اوہنے سفنے وچ اوسے راتیںاپنی بھرجائی دے نال اک رات لنگھائی سی۔

''اوہ ! میں وی کنا
Frustedآں۔'' اچن چیتی اوہنے دل ہی دل وچ آکھیا ''ہائے۔۔ہن کیہہ کیتا جاوے''اوہنے وچاریا کہ ہن گھروں باہر نکلنا ہی چنگاہووے گا، ہن مینوں گھروں باہر ٹرجانا چاہیدا ہے۔اوہدے ذہن وچ اک دو تھاواں تے جاون لئی وچار آئے: اوہ سوچ رہیا سی کہ یونیورسٹی، یونین کمیٹی، لائبریری یاں امریکن سینٹر جاوے۔(جتھے رکھے ہوئے رسالیاں وچ جوان مُٹیاراں دیاں ننگیاں تصویراں ہوندیاں ہین)۔ اوہ سوچ رہیا سی کہ کیوںنہ ون یونٹ بلڈنگ جاکے اوتھے نوکری دی عرضی دتی جاوے۔ بوریت، ذلت، اوہدا دل نہ منیا۔ پھیر اوہنے یونیورسٹی جاون لئی وچاریا: پلین کندھاں تے لکھے ہوئے جیئے سندھ اتے ہاسٹل دیاں باریاںتے لکھے ہوئے نعرے۔ٹیبل ٹاک دے عام فقرے:''ایہہ مکوڑے(سیاستدان) کدی وی سندھ دے نال سچے نہیں ہوون گے۔

جی ایم سید ہوریں سندھ دے ہیرو ہین۔بھٹو پنجابیاں دے نال ہے، اوہ پنجابیاں دا ساتھ دیندا ہے، اوہ پنجابیاں دا پٹھو ہے، فوجیاں دا ایجنٹ ہے ۔ کمیونسٹ غدارہین۔ اوہ پہلاں تے مہاجر پنجابی ہین، پھیر انٹرنیشنلسٹ سندھی کمیونسٹ مورکھ ہین،پناہ گیراں دے پٹھو۔ پنجی ورہیاں تیکر جی ایم سید نے کیہہ کیتا ہے؟ وڈیراں دی سیاست، اوہ تے ذوالفقار علی بھٹو ہوریں ہی ہین، جنہاں نے سندھ دا ناں جیوندہ رکھیا ہے۔ ذوالفقار علی بھٹو مہان سیاستدان ہین، میاں جی! اوہ بھٹو ہوریں ہین، جنہاں نے ایس مُردہ قوم نوں نیندر وں جگاکے اپنے پچھے ٹوریا ہے۔ایہہ مخول نہیں۔ پہلاں نیشنلزم پھیر سوشلزم۔ بھائی بھائی والے غدار ہین۔۔۔۔'

''یونیورسٹی وچوں ہن قوم پرستاں دا اثر مُکدا جاوے گا،'' اوہ وچاردا ہے، ''بنگال توں مگروں ایتھے سندھ دی واری ہے۔ بنگال نوں تے بڑی سوکھت نال تباہ کردتا سی، ہن سندھ نوں برباد کرن وچ اوہناں نوں کناکُو چر لگنا ہے۔ بنگالی پھیر وی لڑن گے ،اتے ایتھے وی؟؟
ذہن خالی۔ اوہدے ذہن وچ اک سوالیہ نشان بن گیا۔
مورکھ۔ نعرے باز۔ اوپلی پدھر دے۔ صرف نعرے۔ ہونہہ۔۔۔ تھوڑے چر توں مگروں، سندھ یونیورسٹی وچ نیشنلسٹ رولا پاون لگ پئے۔'' دل کردا ہے، دل کردا ہے کہ ۔۔۔۔۔۔اچراں نوں اوہنوں اک گل چیتے آئی، اوہنوں اوہ یونیورسٹی والی گل یاد آئی:

اک گل کن کھول کے سنو، جے تساں سندھیاں نوں ووٹ نہیں دتا تے اسیں تہاڈی (فلانی) ماراں گے۔۔۔''
وڈیرے دا اک پُتر، اک مہاجر کُڑی(اسٹوڈنٹ) نوں آکھ رہیا سی۔پھیر اچن چیتی ا ک منڈے نے سُجھا پیش کیتا،''اوئے جے توں آکھیں تے ایہنوں کمرے وچ لے جاکے ایہنوں (فلانا ڈھمکنا) کردیئے۔بے وساہی شرم اتے غیرت نال بھریاں ہویاں اوس وچاری کُڑی دیاں اکھاں ویکھن والیاں سن، اوہدی لاچاری ویکھن والی سی۔''بھرا ۔ اوہ میرے بھرا۔''

نعرہ سندھ۔ جیئے سندھ۔ نعرہ سندھ۔ جیئے سندھ۔۔۔
''نیشنلزم یاں وڈیرا ازم!'' دل وچ آکھدا ہے، ''اجے ایتھے صحیح نیشلزم دے وچار وی پیدا نہیں ہوئے۔صرف نعرے بازی اوپری جذبے موقعہ پرستی۔ اتے وڈیریاں دی خوشامد کیتی جاندی ہے۔''
اوہ یونیورسٹی کیمپس جاون دا پروگرام کینسل کردیندا ہے۔

''اوہ یار اج پھیر بھل گیاں یار میں تے کنگی نہیں کیتی، میں وی کنا مُورکھ آں، کدی کدی نکے نکے کم وی بھل جانا واں۔''اچن چیتی اوہنوں خیال آیا۔ کندھ تے ٹنگے ہوئے شیشے دے ساہمنے کھلوکے، کنگی کررہیا ہے۔اتے اوہدی بھرجائی اجے وی بھانڈے دھوندی پئی ہے۔کدی کدی اوہ اپنے دیور ول تکدی ہے۔اوہ ہو، ہن شیشے دے ساہمنے کھلوتا ہویا اے۔ اتے اوہ وی شیشے وچوں اپنی بھرجائی نوں تکدا ہے: اوہ گھور گھور کے تکدا ریہندا ہے۔اوہدی بھرجائی دا مونہہ پتلا، اوہدیاں گلاں باہرنوںاُبھرےاں ہویاں ہین۔

اکھاں دے تھلے کالے رنگ دے نشان۔''بھرجائی!'' اوہ بھرجائی نوں بھل جاندا ہے اتے اوہنوں اپنی بھرجائی وچ اک انجان زنانی نظر آؤندی ہے۔ انجان زنانی! اوس انجان، اجنبی احساس وچ، کدی کدی بڑے نیڑے رہون والے یاں اپنے بندے ہی اوپرے لگدے نیں! اتے انج کدی کدی ، جدوں اپنے آپ نوں وی بندہ غیر سمجھدا ہے،اتے پھیر اوہ اک سوال کردا ہے؟''میں کون آں؟ میں؟ مینوں اپنا آپ ہی کنا وکھرا اتے عجیب لگدا ہے!!''

کمرے وچوں باہر نکل کے، باہرلا بوہا کھولدیاں سوچدا ہے:یونین کمیٹی دی لائبریری۔

لائبریری: اوہ لائبریرین دے ساہمنے بیٹھا ہویا اے۔اوہدے ساہمنے ڈھیر ساریاں کتاباں پیاں ہویاں نیں۔ اوہ اوہناں کتاباں نوںپھرول پھرول کے تک رہیا ہے۔ اتے پھیر کجھ لکھنا شروع کردا ہے۔شاید لسٹ بنارہیا ہے۔اخباراں والی لمی میز تے چار جنے بیٹھے ہوئے نیں، اوہناں وچوںدو بُڈھے ہین اتے دو جوان، بُڈھیاں دی حالت اتے اوہناں دی گل بات سن کے اوہ گویڑ لالیندا ہے، اوہنوں پتہ لگ جاندا ہے کہ اوہناں وچوں اک ریٹائرڈ ماسٹر ہے اتے دوجا پُلس دا حولدار۔باقی دو بندے نویں ہین ، اوہناں دے بارے اوہ کجھ وی نہیں جان دا۔ ریٹائرڈ ماسٹر نوں ویکھدیاں ہی اوہنوں بڑے وٹ چڑھدے نیں۔ اتے اوہدا کارن ایہہ ہے کہ جدوں وی اوہ اخبار پڑھدا ہے تے پھیر کسے ہور نوں اخبار پڑھن دا موقعہ نہیں لبھدا۔سب توں پہلاں آکے اخباراں تے مل ماردا ہے۔

سارے اخبار اک دوجے دے اُتے رکھ کے، دوہاں ہتھاں نال پھڑ لیندا ہے، اتے گول فریم والے موٹے کچ دا چشمہ نک تے رکھ کے اپنے سلیپر لاہ کے گوڈے اندر نوں موڑ کے، دوہیں پیر کرسی تے رکھ لیندا ہے اتے بالکل بالم بن کے اخبار پڑھدا ریہندا ہے، اوہ لائبریری وچ بہہ کے انج اخبار پڑھدا ہے کہ جیویں اوہ اخبار اوہدا ذاتی اخبار ہے۔اوہ بندہ کدی وی اپنے اتے دوجےاں دے ویلے دا خیال نہیں کردا، اوہ سارا دن بہ کے اپنا ویلاتے برباد کردا ہی ریہند اہے سگوں دوجیاں نوں وی تنگ کردا ریہندا ہے۔اوہنوں ویکھ کے لگدا ہے کہ اوہ اپنا سارا دن اوتھے لنگھاون لئی آؤندا ہے، اوہنوں اپنے گھر والیاں دی یاں اپنی چنتا نہیں۔اوہ بوہتا کرکے ریٹائرڈ پُلس جمعدار تے تھوڑی بوہت مہربانی کردا ہے۔

اوہ اخبار دا پہلا ورقعہ پورا پڑھن تیکر اندرلا ورقعہ اوہنوں دے دیندا ہے۔اخباراں دی میز دے کول آکے تکدا ہے: صبح دے اخبار عبرت دا خبراں والا ورقعہ ماسٹر دے ہتھاں وچ ہے اتے وچکارلا ورقعہ حولدار پڑھ رہیا ہے۔باقی دو بندے پچھلے دیہاڑے دے انگریزی اخبار نوں پھرولدے پئے نیں۔کدی کدی، حیران نظراں نال، اوہ دوہیں منڈے اوہناں بُڈھیاں نوں تکدے ریہندے نیں۔اتے کسے ویلے مونہہ تھلے کرکے بُڈھیاں دے ہتھاں وچ پھڑے ہوئے اخباراں وچوں سُرخیاں پڑھن دے جتن کردے نیں۔اتے بُڈھے بے پرواہ ہوکے اخباراں چٹدے پئے نیں۔

اوہ بہ جاندا ہے۔پرانے رسالے پھرول کے تکدا ریہندا ہے۔ اتے اندر ہی اندر اوہناں بُڈھیاں کولوں عبرت اخبار لینا چاہوندا ہے، اوہ وچاردا ہے اتے سوچدا ہے کہ ہن کیویں اوہناں بُڈھیاں کولوں عبرت اخبار منگیا جاوے:''سائیں دو منٹ اخبار تے دینا۔'' پر اوہ اوہناں نوں آکھ نہیں سکدا۔ اوہدے اندر جھاکا ہے، اوہ اخبار منگن توں ڈردا ہے۔ رسالے پھرولن توں مگروں حسرت بھری نظراں نال اک واری اوہناں بُڈھیاں دے کول عبرت اخبار نوں تکدا ہے۔

اوہناں دے نال بیٹھے ہوئے جوان مُنڈے بڑے چر تیکر اوتھے بیٹھے ریہندے نیں اتے جدوں اوہ بہ بہ کے اُک گئے تے اوہناں نے اک دوجے نال کھسر پُسر کیتی اتے اخیر اوہ دوہیں منڈے اُٹھ کے ٹرجاندے نیں۔ اوہ شام دی انگریزی اخبار چُکدا ہے۔پہلے ورقعے تے دو بڑے ہی ودھیا پوز ہین جیہدے وچ کُڑیاں کھلوتیاں ہویاں ہین جنہاں نے بڑے نکے نکے لیڑے پائے ہوئے نیں، اوہناں دے پوز ویکھ کے اوہنوں بڑا سواد آرہیا سی۔ مگروں اوہدی نظر وڈیاں اکھراں وچ اُلیکی ہوئی خبر تے پئی جیہدے وچ لکھیا ہویا سی(
Rape) پنج یاں چھے ورہیاں دی اک کُڑی نال زوری زنا کیتا گیا سی۔ اتے رپورٹ وچ دسیا گیا سی کہ اسپتال وچ ڈاکٹر اوس کُڑی دا رت بند کرن وچ ناکام ہوگئے اتے اوہ کُڑی تڑف تڑف کے مرگئی۔ اوہدے ذہن نوں جھٹکا لگا،اوہنوں بڑا دُکھ ہویا پر اوہ کیہہ کرسکدا سی۔تڑفدی ہوئی وچاری معصوم کُڑی۔ رت وگ رہیا سی۔''حیوانیت'' اوہ وچاری تڑفدی ہوئی کُڑی، اوہدے بارے سوچ کے اوہدا لوں لوں کمب گیا۔ اک وحشیانہ زوری عمل وچ تڑفدی ہوئی ننگم ننگی کُڑی۔ وحشی بھیانک شکل والا ننگم ننگا مرد۔

(چلدا)


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels