Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> ایوب مخالف لہر تے ترقی پسند: جام ساقی دی کتاب توں ٹوٹے(تریجی لڑی)

ایوب مخالف لہر تے ترقی پسند: جام ساقی دی کتاب توں ٹوٹے(تریجی لڑی)

وچار ڈیسک
April 26th, 2017

این ایس ایف دی ونڈ،طلبا دی گرفتاریاں،سرکاری بلڈنگاں نوں ساڑنا، سکول کالج بند،جنرل یحی دے جنرل ایوب نوں تے جنرل کیانی دے جنرل مشرف نوں فارغ کرن وچ مماثلتاں، سوات تے بسنت،مار دھاڑ تے توڑ بھن ،لیل و نہار دی رپورٹنگ،نویں سندھ این ایس ایف،ویروا

7 نومبر 1968 نوں راولپنڈی وچ پولی ٹیکنیک دے 17 سالہ طالب علم عبدالحمید دی شہیدی پورے ملک دی طالباء برادری وچ آگ لادتی۔ ایس توں تِن مہینے پہلاں اگست 1968 وچ (ایوبی) سرکارکاغذی ترقی تے اصلاحواں دا دہاکہ منان وچ مصروف سی۔(لگدا ہے انہاں دناں وچ ہی جنرل یحی خان نے ایوب نوں فارغ کرن لئی کجھ جرنیلاں نال پکیاں کر لتیاں سن۔) حیدر آباد سٹوڈنس فیڈریشن نے فوری ردِعمل دا اظہار کردے ایہہ سوال چکیا کہ اصلاحواں کدوں تے کتھے ہوئیاں؟ عوام دی زندگی وچ کیہڑیاں تبدیلیاں آئیاں۔ فوجی آمریت تے ون یونٹ دی لعنت بدستور ملک تے مسلط ہے۔ فیڈریشن نے انقلابی اصلاحواں دے ڈھونگ نوں بے نقاب کردے ہوئے آکھیا ملک دے ذرائع پیداوار تے سامراج دے پچھلگ اجارہ دار سرمایہ کاراں تے نویں پرانے جاگیرداراں دی گرفت اوسے طراں تگڑی ہے۔ نیشنل سٹوڈنس فیڈریشن کراچی وی ایس جنگ وچ کود پئی۔’لیل و نہار‘‘ 2تا 8 نومبر دی اشاعت پاروں 7 اکتوبر 1968 نوں طلباء لہر شروع ہوئی۔ محنت کشاں دے جذبے جیہڑے اندر ہی اندر گھُٹ رہے سن، راہ ملدیاں نال ہی پُٹھ پئے۔ عوام نے طلباء دا ساتھ دتا۔ اس تحریک نوں کچلن لئی انتظامیہ پوری طرح حرکت وی آگئی۔(نال نال یحی خانی ایجنڈاوی چل رہیا سی) 13 تے 14 اکتوبر نوں پُلس نے نہتے طلبا تے عوام نوں پھنٹیاں چاڑھیاں اتے آنسو گیس وی چھڈی۔*
8 نومبر نوں کراچی وچ تقریباً 60لوک گرفتار کرلتے گئے جہناں وچ طالب علم تے مزدور رہنما وی شامل سن۔ مشتعل ہجوم نے بساں تے کاراں جلا دتیاں۔ 8 نومبر نوں ہی کراچی تے حیدر آباد دے سارے سکولاں تے کالجاں نوں بند کردتا گیا تے ایہہ وی نہ دسیا گیا کہ سکول کدوں کھلن گے ۔ اُدھر راولپنڈی دے واقعات ہور وگڑگئے ۔ شہردی پلس عوامی جذبیاں نوں کچلن وچ ناکام رہی۔؂*
لیل و نہارلکھداہے، لہور وچ طلباء تے پلس دے درمیان جگہ جگہ جھڑپاں ہورہیا سن۔ کسٹم ویگن تے دو سرکاری بساں ساڑ دتیاں۔ مشتعل ہجوم نے کمرشل بینک، نیشنل بینک، ہاؤس بلڈنگ فنانس کارپوریشن تے سنٹرل پوسٹ آفس دی عمارتاں تے حملہ کرکے نقصان پہنچایا۔ ایس دے جواب وچ وڈے پیمانے تے گرفتاریاں ہوئیاں۔ لہور دے سارے سکول کالج بند کردتے گئے۔ 9 نومبر نوں راولپنڈی دے کرفیو وچ مزید وادھا کردتا گیا۔ ایس دے باوجود طلبا نے جلوس کڈھیا۔ پلس نے اک وار فیر سنگ دلانہ اقدام دا مظاہرہ کردے ہوئے فائرنگ کیتی جس دے نال دو افراد مر گئے۔ ایس دے جواب وچ پھپرے لوکاں نے 13 گڈیاں تے بعض نجی املاک ساڑ دتیاں۔ لہور وچ ریلوے ٹیشن نوں نقصان پہنچایا گیا۔ اک بس ساڑ دتی گئی تے کجھ سڑکاں تے ٹریفک سگنل توڑ دتے گئے۔ طلبہ دی تحریک دے جواب وچ پشور تے لیل پور دے سکولاں تے کالجاں نوں وی بند کردتا گیا۔ 10 نومبر نوں پشور وچ پلس فائرنگ نال 12 بندے مرے، نوشہرہ نوں فوج دے حوالے کردتا گیا۔ چارسدہ وچ شکر دے کارخانے دے مزدوراں تے فائرنگ کیتی گئی جس وچ اک بندہ مر گیا۔*
(انہاں)حالات تے جام ساقی اتے انہاں دے ساتھی ویکھ رہے سن۔ 3 نومبر1968 نوں انہاں نے سندھ این ایس ایف دی نیہاں رکھیاں جس بارے کتاب وچ پہلاں لمیری گل ہو چکی ہے۔جا م ساقی لکھدے نیں کہ 1968-9 دی لہر اْتے سوشلسٹ خیلاں دا وڈا اثر سی۔13نومبر نوں بھٹو وی میدان وچ وڑ آئے۔بھٹو تے کھبے پکھ دے دوجے لیڈراں دی گرفتاریاں پاروں کم چکیا گیا۔دسمبر1968دا میہنہ کربلائی ثابت ہویا۔
ویروا: ذرا غور کرو ،1957 وچ کراچی دے درباری پروفیسراں این ایس ایف بنائی اتے ایہہ ڈھاکہ وچ وی بنی۔کراچی دی این ایس ایف وچ کامریڈ وڑ گئے تے لہور وچ بنائی گئی انٹر کالجیٹ باڈی نال جڑ کے استاداں تے سٹوڈنٹس دا وڈا اتحاد بنایا گیا۔این ایس ایف دی ٹہانیاں کراچی توں اڈ لہور، پنڈی وی بن گیاں۔1966وچ این ایس ایف روسی تے چینی جھگڑیاں پاروں ونڈی گئی اتے ہن جام دی کتاب توں پتہ چلیا کہ اک سندھ این ایس ایف نازش گروپ نومبر1968 وچ کھڑی کیتی۔ڈھاکہ دی این ایس ایف بارے حسین نقی لکھ چکے نیں کہ اوہ سرکاری درباری ہی رہی۔ ہن این ایس ایف دی ٹٹ بھج دی کہانی دسے بغیر گل گواچ جاندی ہے۔ ایہو حال کیمونسٹ پارٹی دی تریخ دا وی ہے۔ایتھے کڈیاں ہی کیمونسٹ پارٹیاں چلدیاں سن، پرایہہ گلاں لکائیاں جاندیاں نیں جس پاروں بیانیے وچ گھاٹے آنا لازم جے۔
جے تساں جماعت اسلامی دا لٹریچر پڑھو تے اینج لگدا ہے پئی انہاں ترے سالاں وچ جماعت والیاں وی ایوب مخالفتاں وچ جلوس کڈے، گرفتاریاں دتیاں،ریاست سوات دی آزادی دے لہر اینٹی ایوب تحریک وچ اوہی مقام رکھدی سی جنج بسنت مخالفت دی لہر اینٹی مشرف تحریک نوں ٹیک دتا سی۔جماعت دے لٹریچر وچ سوات دی ریاست مکاون والی لہر دا ذکر وادھو پئی سوات دے والی دا منڈا جنرل ایوب دا جوائی سی۔ ایس تحریک نوں جس جماعتی لیڈر کھڑا کیتا اوس دا جنرل عمر نال کیہہ تعلق سی ایس بارے اک توں ودھ کتاباں تے انٹرویوز آچکے نیں۔سوات دے وڈے محقق تے تریخ دان سلطان روم اپنی کتاب وچ اندر دی کہانی لکھی ہے۔ ایہہ اوہی جنرل عمر سن جیہڑے جنرل یحی خان دے وزیر بنے اتے اج انہاں دے اک پتر پی ٹی آئی دے اسد عمر نیں تے دوجے سندھ دے گورنر۔اک توں ودھ لوکاں نیں اینٹی ایوب لہر وچ ترقی پسنداں تے جماعتیاں دے رل کے جلسے کرن دا وی ذکر کیتا ہے پرایس گل نوں دوناں پاسے دے دانشور لفٹ نہیں کرانا چاہندے۔انہاں لہراں وچ محلاتی سازشاں دا کیہہ کردار سی ایس بارے وی گل کرنی منع جے۔
Link of Part 2
http://www.wichaar.com/news/153/ARTICLE/32834/2017-04-25.html



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels