Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> جام ساقی بارے اک نویں کتاب

جام ساقی بارے اک نویں کتاب

وچار ڈیسک
April 22nd, 2017

نزہت عباس اوہ کم کیتا جس دی لوڑ اج بہوں زیادہ ہے۔ انہاں جام ساقی دے منڈے سارنگ نوں نال رلا کے جام ساقی دے انٹرویوز کیتے تے انہاں انٹرویواں تے مشتمل کتاب ہن جمہوری پبلیکشنز توں چھاپے چاڑی گئی ہے۔ کتاب وچ احمد سلیم ہوراں دی کھوج وی رلتی ہے۔ 31 اکتوبر 1944 وچ تھرپار کر دی تحصیل چھاچھرو جمے جام دی کہانی سندھ ہی نہیں سگوں پاکستان وچ ترقی پسند لہر اتے ڈکٹیٹر شپاں خلاف جدوجہداں دی کہانی وی ہے۔ 1962 وچ میٹرک کرن والے جام ساقی کراچی دے کمیونسٹ گروپ وچ رلتی ہوئے جس نوں امام علی نازش تے جمال نقوی چلاندے سن۔ حیدر آباد دے گورنمنٹ کالج کالی موری وچ پڑھے جام ساقی نوں کالج وچ ترقی پسنداں ناں واہ پئے گیا۔ انہاں حیدر آباد سٹوڈنس فیڈریشن بنائی تے 1966 دے دسمبر وچ بھٹو ہوراں دا جلسہ وی کروایا۔ اوہ جس کمیونسٹ گروپ نال سن اوہ معاہدہ تا شقند دا حامی سی پر جام تاشقند معاہدے دے مخالفاں نال جلسے کردے رہے۔ایس دا حوالہ وی کتاب دا حصہ ہے۔جے ایس کتاب وچ مغربی پاکستان کیمونسٹ پارٹی تے پابندی اتے فیر انڈر گروانڈ پارٹی دے مختلف ٹہانیاں وچ ونڈے جان دی کہانی وی ہوندی تاں پڑھن والیاں نوں کراچی کیمونسٹ گروپ دی شان نزول سمجھن وچ آسانیاں ہوندیاں۔ ایہہ کتاب 1960، 1970 تے 1980 دے دہاکیاں دی سیاست بارے اک بھرواں کمنٹ ہے اتے اک نکے ترقی پسند گروپ دی اندرونی کہانی وی۔ ماسکو نال جڑے ایس گروپ نے افغان چوہٹے وی بڑے لتے اتے گروپ مال آن بعدوں اندروں وی ٹٹیا، ایس دے لوک جیلاں وچ وی گئے۔ویکھو ’’جمعہ خان صوفی دی فریب ناتمام‘‘ بعدوں چھپی ایس کتاب وچ کیہڑیاں گلاں نیں۔ اساں ایس کتاب دے ٹوٹے وی چھاپاں گے۔
کتاب دے ست باب نیں جس وچ جام دے بچپن دے حالات، حیدر آباد وچ طلبا لہر نال جڑت، کراچی دے کمیونسٹ گروپ نال سانگا، نذیر عباسی، ڈی ایس ایف اتے ضیا مخالف لہر دی گلاں، جیل، رہائی، پنجاب وچ استقبال، کمیونسٹ گروپ وچ توڑ بھن سب رلتی ہے اتے 1991 دا استعفیٰ وی جداں امام علی نازش دی ’’ہڈ دھرمی‘‘ پاروں انہاں گروپ نوں خیر آباد آکھ دتا۔
’’جداں میں 1990 وچ روس گیا تے میں اوہ تھاں وی ویکھی جتھے لینن نوں اخیری دناں وچ رکھیا گیا سی۔ بیورو کریسی نے لینن نوں پارٹی تے باقی دنیا توں وکھ کر چھڈیا سی..... لینن نے اخیری دناں وچ سٹالن نوں پارٹی توں کڈن دی بہوں کوشش کیتی‘‘
پاکستان دی کمیونسٹ پارٹی یا کراچی والے کمیونسٹ گروپ جس وچ انہاں 40 ورہے گذارے بارے انہاں دا تجزیہ ہے کہ ایس گروپ کدی وی اک عوامی پارٹی بنن دی کوشش ہی نہیں کیتی۔ اس توں بعد جام لال خاں گروپ دے نیڑے آن بارے وی لکھیا ہے اتے فیر بے نظیر بھٹو نال سیاسی رشتہ بنان بارے وی۔ 1994 وچ اوہ پی پی پی وچ رل گئے تے عبداللہ شاہ وزیراعلیٰ سندھ دے دور وچ مشیر بن گئے۔ بے نظیر حکومت دے خاتمے تیک اوہ انہاں دے نال رہے۔ ایہہ کہانی تسی وی پڑھو تے سوچو کہ جد تیک اجہی کتاباں وڈی گنتری وچ نہیں آن گیاں تد تیک کھبے نال جڑے لوکاں تے لہراں دی تریخ گواچی رہے گی۔
کتاب جمہوری پبلیکشنز چھاپی ہے اتے 264 صفحیاں دی کتاب دی قیمت پورے 800 روپے ہے۔ پبلشر دا فون نمبر 04236314140 ہے اتے ای میل Info@jumhooripublications.com ہے۔ دفتر -2 ایوان تجارت روڈ نزد لارنس گارڈن ،لہورتے ہے۔
جمہوری پبلکیشنز ترقی پسنداں بارے کتاباں چھاپ رہے نیں اتے مشہور ترقی پسند تے پیپلز پبلشنگ ہاؤس دے روف ملک دی سوانح ’’سرخ سیاست‘‘ وی اک دو ہفتیاں تیک مارکیٹ وچ آجاسی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels