Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> نویں پنجابی کتاب ’سیجل‘ دی مُکھ وکھالی

نویں پنجابی کتاب ’سیجل‘ دی مُکھ وکھالی

وچار ڈیسک
March 28th, 2017

22 اکتوبر دی شامی پنجاب انسٹیٹیوٹ آف لینگوئج آرٹ اینڈ کلچر (پلاک) وچ محمود اعوان دی نویں چھپی کتاب’سیجل‘ دی مُکھ وکھالی ہوئی۔ ایس اکٹھ دے پردان مشہور سُوجھوان تے شاعر مشتاق صوفی سن۔ ایس پروگرام دے بُلارے افضل ساحر سن۔ سبھ توں پہلاں اوہناں نے کتاب دا فلیپ پڑھیا جو امر جیت چندن نے لکھیا اے۔ چندن پنجابی دے منّے پرمنّے شاعر تے کومل لیکھاں دے لکھاری نیں تے لندن وچ رہندے نیں۔ اوہناں لکھیا کہ۔’’ خوشاب دی وادی سُون سکیسر دے گراں پدھراڑ دے جم پَل محمود اعوان دی شاعری لہندے پنجاب دی سرزمین،تواریخ، ایہدی بولی دا مرقع ہے۔ایس ورثے دے مالی ساڈے وڈیرے پیلو اور حافظ برخودار نیں تے باغ دے پکھوواں دیاں اعوان کاری،شاہ پوری، جانگلی، دھن پوٹھوہاری تے چھاچھی وچ کڈھیاں واجاں محمود دیاں ایہناں نظماں چ سُنیدیاں نیں۔
ایہدیاں کئی نظماں وچ کوئی سپ ہے جو پنجاب دی دھرتی تے میہلدا پھردا ہے۔ایہو سپ ایہدی رومانٹک شاعری وچ وی ہے جیہڑا دھرتی تے جسم دے وجوگ تے تواریخ نوں جوڑدا اے۔
بابے نانک نے نیک بندیاں نوں اُجڑ جان دی دُعا دتی سی، تاں کہ نیکی دا پسارا ہووے ۔ کئی شہر، مَلک گاہ کے ہن پدھراڑوں ست سمندر پار رہندے محمود دی،پردیسی کامے تے شاعر دی ایہ کمائی ہوئی نیک کھٹی اے۔ماں بولی دی جھولی وچ پایا نذرانہ۔‘‘
امرجیت چندن دے ایہناں سوہنے اکھراں نال سبھ توں پہلے رائے ناصر خان کھرل نے گل بات کیتی۔ اوہناں نے محمود دی شاعری نوں رج سلاہیاتے ایس کتاب نوں پنجابی شاعری وچ انملا وادھا آکھیا۔ نین سُکھ نے زبانی محموددیاں نظماں پڑھ کے ساریاں نوں حران کر دتا۔ اپنی گل اوہناں ایہناں سطراں توں چھوہی۔
’’میں سڑکیں کھڑیا موتیا
میں کنکیں سُتی بُھکھ
میں بھاگ بھری دا بالکا
میرے دھیاں ورگے دُکھ‘‘
اوہناں آکھیا محمود نوں اپنی بولی اُتے بڑا مان اے تے ایہہ اوس نوں لفظاں دی گھنی چھاں آکھدا اے۔اوس نوں اکھر آوندے نیں تے اوس نوں پتہ اے ایہناں نوں کیویں ورتنا اے۔ اوس پردیس وچ وی اپنی بولی نہیں بُھلی۔
اوہناں نے اُچیچے پکھوں اوہدیاں پریت دیاں نظماں نوں سلاہیا تے سپ دی رمز نوں ودھیا شاعری آکھیا۔ اوہناں نے محمود دی پریت شاعری نوں خالص محبت دی شاعری آکھیا جیہڑی پنجابی دی محبت نال جُڑی ہوئی اے۔ زبیر احمد نے شاعر دی جانکاری کرائی تے اوس نال اپنی پرانی جُڑت دا ذکر کیتاجیہڑا اوس دی پہلی کتاب توں لا ’سیجل‘ تیک ٹردی رہی اے۔ محمود دی پہلی کتاب ’رات،سمندر، کھیڈ‘2002 ، وینی لکھیا دِن2012، وچ چھپی سی۔اوہناں نے کتاب وچوں کجھ نظماں دا حوالہ دے کے دسیا کہ شاعر کنج پیار دیاں نظماں نال اک جہان لے کے آوندا اے۔ ایس طرحاں اوس دیاں نظماں پوری وسوں دی گل کردیاں نیں تے ایس وچ رُکھ،پکھیرو، موسم،دھرتی دے سارے رنگ سماجاندے نیں۔ پر ایس کہانی دا کھچ اصلوں اوہ پیار دا تعلق اے جس دوالے سارا جہان ولیا ہویا اے۔
ایس توں مگروں راجہ صادق اﷲ نے گل کیتی۔ اوہناں نے زبیر احمد دی سلاہنا کیتی جو پردیس وچ وسن والے شاعراں تے لکھاریاں نوں ملاندے نیں تے اِنج سانوں پردیسیاں دی شاعری ملدی اے ۔ محمود دی شاعری دی سلاہنا کردیاں اوہناں نے پردیس دے دوجے شاعراں جس وچ امرجیت چندن،مظہر ترمذی،عرفان ملک جیسے شاعر وی ہن اوہناں ساریاں دا ذکر کیتا۔ ایس توں پچھوں محمود نے اپنیاں کجھ نظماں سُنایاں جیہناں دی رج سلاہنا ہوئی۔
پردھان مشتاق صوفی نے لکھیار اور پڑھیار وچکار ودھدی ہوئی وتھ توں گل چھوہی تے میاں محمد بخش دے اک شعر دا حوالہ دتا۔
’مرمر اک بناون شیشہ،مار وٹا اک بھندے
دُنیا اُتے تھوڑے ہوندے قدر شناس سُخن دے‘۔
اوہناں آکھیا میں شاعری کرنی چھڈ دتی اے پر محمود دی شاعری پڑھ کے ہن شاعری کرن نوں دل کردا اے۔
ایس دے نال ایہہ سوہنی مجلس مُک گئی۔



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels