Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> بائیں بازو ولوں قومیتی سیاستاں بارے اک تنقیدی کتاب(نویں کتاباں دی انفارمیشن)

بائیں بازو ولوں قومیتی سیاستاں بارے اک تنقیدی کتاب(نویں کتاباں دی انفارمیشن)

وچار ڈیسک
March 21st, 2017
5 / 5 (1 Votes)

بائیاں بازو اک لمیرے چر توں قومیتی سیاستاں نال سانجھ رکھدا سی پر ایس وچ اجہے لوگ وی سن جیہڑے قومیتی سوال نوں طبقانی سوال پاروں نہیں منیندے سن اتے قوم پرستیاں نوں سرمایہ داری بندوبست دا اک پکھ منیندے سن۔ ایس بارے بحثاں جاری نیں البتہ 18 ویں ترمیم بعدوں قومیتی سوال دی شکل وگڑ چکی ہے سگوں ایہہ آکھنا غلط نہ ہوئے پئی ایس ترمیم بعدوں پاکستان وچ قوم پرستیاں دی سیاستاں کرن والے ایکسپوز ہو گئے نیں۔ کجھ لوک اج وی قومیتی سیاست دے پرانے بیانیے چلارہے نیں پر ایہہ نویں کتاب وچ پرانے بیانیے دی ٹٹ بھج نمایاں ہے تے ایس دے سارے لکھاری کھبے دی سیاست دے کردار نیں۔ البتہ پرانے بیانیے دی تھاں کیہڑا نواں بیانیہ آسی، ایس بارے ایہہ زیادہ گل بات کتاب وچ رلتی نہیں۔ اینج لگدا ہے پئی ایہہ کتاب رشید ڈھولکہ، محمد سلیم شیخ اتے عرفان چوہدری دی رلویں کوششاں دا رزلٹ ہے۔تناں دا پچھوکڑ مزدور کسان پارٹی تے کھبے دے ’’چینی پکھ‘‘ نال جڑیا ہے پر جیہڑے سوال انہاں چکے نیں اوہ اج کھبے دے بہوں سارے اوہ دانشور وی کردے نیں جیہڑے پچھلے دور وچ کھبے دے ’’روسی پکھ‘‘ نال جڑے سن۔ کتاب وچ گیارہ مضمون شامل نیں اتے ایس کتاب دا ناں ہے، ’’کیا ہم علیحدہ ہوسکتے ہیں‘‘۔ اک زمانے وچ کھبے دے پرانے استاد اتے اک کمیونسٹ جتھے بندی ’’پروفیسر گروپ‘‘ دے پردھان پروفیسر عزیز الدین احمد کتاب لکھی سی جس دا ناں سی ’’کیا ہم اکٹھے رہ سکتے ہیں‘‘۔ پروفیسر ہوری ’’چینی پکھ‘‘ دے اوہ دانشور سن جنہاں بنگلہ دیش بنن بعدوں قومیتاں دے حوالے نال پرانی لین وچ ترمیماں کیتیاں سن اتے 1980 دے دہاکے وچ قومیتی سیاستاں دے عشق وچ مبتلا سن ۔جداں انہاں اوہ کتاب لکھی سی اوس ویلے اوہ کھبے دی جتھے بندیاں تے کجھ قوم پرستاں دے اتحاد ’’عوامی نیشنل پارٹی‘‘ وچ رہے۔ پر فیر انہاں نوں ولی خانی سیاست دا چانن ہوگیا پر انہاں اپنا تھیس مڑ نہ لکھیا۔ لگدا ہے اوس کتاب وچ کیتی بحث نوں اگے چلاون لئی ہن ایہہ کتاب لکھی گئی ہے۔ کتاب وچ 10 مضمون نیں کجھ پرانے تے کجھ نویں۔ ویکھیا جائے تاں بائیں بازو تے قومیتی سیاستاں وچ تال میل بارے کوئی سائنسی بحث ہلے شروع نہیں ہوئی، جے ایہہ کتاب ایس مسئلہ تے گل اگے ودھا سکی تے ایہہ اک وادھا ہوسی۔ تعارفی مضمون محمد سلیم شیخ لکھیا ہے تے باقی دے مضموناں وچوں دو،دو مضمون عرفان چوہدری تے رشید ڈھولکہ دے نیں۔ دلتاں تے مصلیاں دے حوالے نال سندھ توں گنپت رائے بھیل دا اک مضمون ہے اتے حیدر آباد دے شاداب مرتضیٰ سندھ دے حوالے نال تصوف، قوم پرستی تے سوشلزم دی تکونی سیاستاں تے بحث کیتی ہے۔ کراچی توں عبدالستار ہوراں نے قوم پرستی دی بنیاداں بارے مڈھلے سوال چکے نیں۔
ڈاکٹر مقبول اختر تے میجر اسحاق محمد ہن ایس دنیا وچ نہیں پر ایس کتاب وچ دوناں دے اک اک مضمون نوں تھاں دتی ہے۔ میجر صاحب دے مضمون دا عنوان ہے ’’نیا پاکستان‘‘ اتے ایہہ 1972 وچ لکھیا گیا سی۔میجر ہوراں نوں کیہہ پتہ سی پر انہاں دے مرن توں بعد ایس ’’عنوان‘‘ نال اوہ کھلواڑ ہوے گا کہ رہے رب دا ناں۔ اک مضمون مزدور کسان پارٹی دی 1990 دی کانگرس دی دستاویز ہے جس دا ناں ’’قومی سوال‘‘ ہے۔ رشید ڈھولکہ ہوراں قومی تے طبقانی مسئلہ دے عنواناں نال دو مضمون لکھے نیں جداں کہ عرفان چوہدری ہوراں نے اک مضمون شناخت بارے لکھیا ہے تے دوجا پاکستان وچ قومی سوال بارے۔
کتاب وچ نہ تے مضمون لکھن والیاں دا کوئی تعارف دتا ہے اتے ناہی کوئی حوالہ جات رلتی نیں۔ اشاریہ نہ بناکے وی کوئی چنگا کم نہیں کیتا گیا۔ کتاب جس مسلہ تے لکھی ہے اوس دی اہمیتیاں وادھو نیں پر ایس نوں جدید دور دی انگریزی کتاباں وانگ تیار کرنا چاہیدا سی۔ کتاب وچ مصنف دی تھاں پاکستان اسٹڈی فورم لکھیا ہے اتے لیل پور دا پتہ وی لکھیا ہے۔لیل پور وچ سٹڈی نوں ’’اسٹڈی‘‘ کون کہندا ہے ایس بارے نہ ہی پچھو۔ لیل پور دے روشن پبلی کیشنز تو چھاپی ایس کتاب نوں تاج پلازہ، کوتوالی روڈ، فیصل آباد فون:(0333-6597998) توں منگوایا جاسکدا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels