Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> لیفٹ پالیٹیکس تے قوم پرست : کھبے والے کنج کراہے پئے۔اک پختون ترقی پسند دا ’’سچ‘‘

لیفٹ پالیٹیکس تے قوم پرست : کھبے والے کنج کراہے پئے۔اک پختون ترقی پسند دا ’’سچ‘‘

کتاب ویروا: محمد عرفان (انجینئر)
March 15th, 2017

جمعہ خان صوفی ہوری اک پختون قوم پرست توں کمیونسٹ ہوئے اتے فیر امام علی نازش تے جمال نقوی دی کراچی والے کمیونسٹ گروپ وچ رہے۔افغانستان وی رہے تے پاکستانی قوم پرستاں نوں نیڑے نال ویکھیا اتے پختون قوم پرستاں دے اندر دے جانو۔ایہہ کتاب ترقی پسنداں دے قوم پرستاں توں مات کھاون دی کہانی وی ہے اتے لیفٹ دی اندرونی ٹٹ بھج دی داستاں وی۔ محمد عرفان وی کھبے دی لہر دے اج دے نمیندے نیں اتے انہاں ایس تبصرے نال اپنی پہلی پنجابی سیاسی لکھت وی لکھی ہے۔ اوہ ایس کتاب بارے اک توں وادھو مضمون لکھن گے۔

افغانستان دا انقلاب تے افغانستان وچ روسیاں دی آمد پاکستان دے سجے تے کھبے دیاں حلقیاں وچ ہمیش توں بحث دا موضوع رہی ہے۔ مینوں یاد اے 2011 وچ ایمبسڈر ہوٹل وچ ایک مذاکرہ ہویا۔ایس مذاکرے وچ افغانستان تے پاکستان دیاں بائیں بازو دی پارٹیاں رلتی سن۔ مذاکرہ اوس ویلے تکرار وچ بدل گیا جدوں افغانستان توں آون والے لوکاں نے افغان انقلاب تے خاص طورتے پرچمی ڈھڑے اتے بائیں بازو دے آخری صدر ڈاکٹر نجیب نوں تنقید دا نشانہ بنایا۔ افغانستان توں آون والے سارے مہمان ڈاکٹرنجیب بارے اپنے خیالات وچ اک مٹھ سن تے کم و بیش ایہو صورتحال پاکستان دے میز باناں دی وی سی۔ افغان دھڑا ڈاکٹرنجیب نوں انقلاب تے افغان عوام دا قاتل آکھدا سی پر انہاں دے پاکستانی میزبان ڈاکٹر نجیب نوں افغان عوام دا ہیروسمجھدے سن۔
جمعہ خان صوفی دی کتاب ’’فریب ناتمام‘‘ اک واری فیر ایس بحث نوں تازہ کیتا اے جیہڑی بہت چر پہلے پاکستان دی کھبے دیاں پارٹیاں وچ بھن توڑ دا سبب بنی سی۔ جمعہ خان صوفی دی یاداشتاں تے بنی کتاب پڑھن توں بعد ایہہ اندازہ ہوندا ہے کہ پاکستان دے اندر بائیں بازو دے مختلف گروہ کیوں ’’افغان انقلاب‘‘دے حمائیتی بنے تے ایس انقلاب توں انہاں کس طرح دیاں امیداں لایاں سن۔ افغانستان دے اندر بیٹھ کے کس طرح بائیں بازو دے گروہ اپنے اپنے مفاداں واسطے سرگرم سن ۔اوہ پاکستان اندر ترقی پسندسوچ تے پاکستان دے لوکاں دے مفاداں دی تھاں اپنے ذاتی مفاداں نوں پورے کرن کیوں وچ جتھے ہوئے سن۔
محلاتی سازشاں دا شکار ہوکے پاکستان تے افغانستان وچ ترقی پسنداں وچ پاڑ پانا بائیں بازو دے انہاں گروہاں دا ہی کم سی اتے ایہہ اج تیک ترقی پسند سیاست لیے سوالیہ نشان بنیا ہویا ہے۔افغانستان دے وچ روسی فوجاں دی آمد انقلاب دی مدد واسطے کڈی کار آمد سی تے کڈی نقصاندہ، ایہو او سوال نیں جہناں دا جواب اج وی نہیں دتا گیا۔ گند نوں قالین تھلے کرن وچ اساں وی کسے کولوں گھٹ نہیں۔ افغانستان وچ روسی فوجاں دی آمد توں متاثر ہوکے پاکستان وچ وی ایہو تاثر دیون دی کوشش نے پاکستان وچ انقلابی سیاست نوں کڈا فیدہ پہنچایا تے کڈا کوں نقصان، ایس دا ویروا کرن دی دی لوڑ ہے۔ کمیونسٹ پارٹی آف پاکستان ولوں ’’چھینو چھینو پاکستان جیسے چھینا افغانستان‘‘ جہے پمفلٹ دی اشاعت تے انقلاب دی تریخ دا اعلان کرنا اک بچگانہ عمل سی۔
افغانستان دا انقلاب ایس حوالے نال اہم سی کہ اوتھے پارٹی نے حکمراناں دی آپسی لڑائی توں فائدہ چکدیاں ہوئے اقتدار تے قبضے دا فیصلہ کیتا سی۔ بغیر تیاری اقتدار تے قبضہ کرنا چاہیدا سی یا نہیں ایہہ بحثاں وی نہیں ہوئیاں اج تیک۔ کابل توں دور دراز دی تھاواں وچ پارٹی دے نظریات دے پھیلاؤ وچ گھاٹے انقلاب دا سب توں وڈا ’’کھپا‘‘ بن کے سامنے آیا۔ سامراجیاں تے مخالفاں نے دور دراز دی تھاواں تے قصبے کیتے اتے اپنے پروپیگنڈہ نال کابل دے انقلاب نوں گھیرا پالیا ۔اجہیاں بہوں ساریاں خامیاں تے ایس طراں دے بہت سارے انکشافاں نال جمعہ خان صوفی دی کتاب نکونک ہے۔ افغانستان دے اندر انقلابی پارٹی دی اندرونی دھڑے بندیاں نے وی انقلاب نوں تگڑا نہ ہون دتا۔ ایس توں اڈ پاکستان دے انقلابیاں تے قوم پرستاں دی مفاداتی سیاست نے افغانستان وچ بنی نویں نویں انقلابی حکومت نوں سازشاں وچ الجھائے رکھیا۔ افغان انقلاب تے عیاشی کرن والیاں انہاں انقلابی بھگوڑیاں دی اکثریت ویلہ آن تے اس طراں غائب ہوئی جس طراں کھوتے دے سِر توں سینگ۔

افغان انقلاب تے صوفی ہوراں دی لکھیاں ہوئیاں یاداشتاں پڑھ کہ افغانستان دے بائیں بازو دے ڈھڑے شعلہ جاوید نال منسلک اوہناں سیاسی پارٹیاں دے خدشے کسے حد تائیں درست جاپدے نیں۔ کسے دی سماجی تبدیلی تے انقلاب دے اصل محافظ اوس ملک دے عوام ہوندے نیں۔ کسے دوجے ملک دیاں فوجاں دی مداخلت کسے وی طراں انقلاب دی حفاظت دی ضمانت نہیں ہوسکدی۔ ایس دے نال نال کسے وی دوجے ملک دی انقلابی جتھے بندیاں نوں اپنے ملکاں وچ ورتنا کسے وی طراں انقلابیاں نوں شہبہ نہیں دیندا۔
محمد عرفان انجینئر نیں اتے ماحولیات تے پانی دے مسلیاں بارے کھوچ لاندے نیں۔ مزدور کسان پارٹی نال عشق انہاں نون وڈکیاں توں ملیا پئی انہاں  دے والد بشیر صنوبر لیل پور وچ میجر اسحاق دی اک نشانی۔عرفان این ایس ایف وچ وی رہے تے عوامی ورکرز پارٹی تک سفر کیتا۔انہاں اک پرانے سیاسی ورکر سرگودھے دے رشید دھولکہ نال مل کے قوم پرستی دی سیاست بارے مضموناں دی چون ’’کیا ہم اکٹھے رہ سکتے ہیں؟‘‘ لکھی ہے۔وچار لئی اوہ لکھتاں گھلدے رہن گے۔
 more about the book
http://punjabpunch.blogspot.com/2016/09/pukhtoon-politics-in-afghanistan.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels