Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> اِک ایماندار آدمی (اطالوی کہانی)

اِک ایماندار آدمی (اطالوی کہانی)

ایتالو کالوینو
December 23rd, 2016

ایہہ اک اجیہے دیس دی گل اے جتھے سبھ دے سبھ چور سن۔
ترکالاں ہوندیاں ای ہر کوئی نقلی چابیاں تے مدھم بلدیاں لالٹیناں نال گھروں نکلدا تے کسے گواہنڈھی ول سنھ لا لیندا۔ چوری دے مال نال لدے پھدے سویرے جدوں اوہ اپنے گھریں پرتدے تاں ویکھدے کہ اوہناں دا اپنا گھر وی لُٹیا پیا اے۔ ایسے طرحاں سبھے خُش باش رہ رہے سن۔ کسے نوں کوئی گھاٹا نہیں سی۔ کیونجو پہلا دُوجے دی چوری کر رہیا سی، دُوجا تیجے دی تے تیجا چوتھے دی، انج تسیں اوس اخیرلے بندے تیک اپڑ سکدے سو جیہنے سبھ توں پہلے گھر اُتے ہتھ صاف کیتا ہووے۔ اوس مُلکھ دے ونج وپار وچ مُل لین تے ویچن والے، دوناں ولوں دھوکھا لازمی شرط سی۔ اوس دیس دی سرکار اِک مُجرمانہ گٹھ جوڑ سی جیہڑی آپ لوکائی نال سر عام ڈکیتی کردی سی۔ تے اپنے ولوں دیس واسی وی سرکار نوں چونا لاؤن توں باج نہیں سن آؤندے۔ ایس طرحاں سبھ دا جیون بیت رہیا سی۔ نہ کوئی امیر سی تے نہ ہی کوئی غریب۔
اک دن، سانوں نہیں پتہ کیویں پر ہویا ایہہ کہ اک ایماندار بندہ اوس مُلکھ وچ رہن لئی آ گیا۔ رات نوں تھیلے، کنجیاں تے بتی لے کے نکلن دی بجائے اوہ سگریٹ پین تے ناول پڑھن لئی گھر وچ ہی ٹھہردا سی۔
چور آئے اوس گھر وچ چانن ویکھیا تے اندر وڑے ہی نہیں۔
کجھ دناں تیک ایہہ سلسلہ چلدا رہیا۔ پھر سبھے رل کے اوس اوپرے بندے نوں سمجھاؤن گئے کہ جے اوہ بِناں کجھ کیتے دھرے جینا چاہوندا اے تاں جیوے، پر ایہہ تاں کوئی وجہ نہ ہوئی کہ دُوجیاں نوں وی اپنا کم کرن توں روکیا جاوے۔ ہر راتیں اوہدے گھر رہن دا اِک مطلب ایہہ وی سی کہ اگلی بھلک کوئی اِک پریوار بُھکھا رہندا۔
اجیہیاں دلیلاں ساہمنے اوہ ایماندار آدمی ڈھیر ہو گیا۔ رات نوں باہر رہن تے تڑکے واپس آؤن والی گل تاں اوس من لئی پر چوری کرن توں نانہہ کر دتی۔ اوہ ایماندار سی ایس وچ میری تے تہاڈی کیہ غلطی اے۔ حد توں حد اوہ پُل تیک جاندا تے ہیٹھوں وگدے پانی نوں ساری رات ویکھدا۔ ساجھرے اوہ گھر پرتدا تے ویکھ لیندا کہ چوری ہو گئی ہوئی اے۔ ہفتے توں وی گھٹ وقت وچ اوہ بندہ پائی پائی دا متھاج ہو گیا۔ سارا گھر ایس طرحاں خالی ہویا کہ اوس کول کھان لئی وی کجھ نہ بچیا۔
پر ایہہ کوئی مسئلہ نہیں سی کیونجو ایہہ سبھ اوسے دا کیتا دھریا سی۔ اصل مشکل ایہہ سی کہ اوس دے ورتارے نال سارا دھندہ اُلٹ پُلٹ گیا۔ اوہنے آپ کجھ چوری کیتے بِناں اپنا سارا مال چوری ہون دتا تاں ہر سویر اِک نہ اِک بندہ اپنے حصے دی چوری کرکے گھر پرتدا تے ویکھدا اوس دے گھر دا سامان ان چھوہیا پیا اے۔ ایہہ اوہ گھر ہوندا جیہدے وچ اصلوں اوس بندے نے سنھ لائونی ہوندی سی۔ ہُن جیہدے گھر چوری نہیں ہوئی اوہ اوسے پل دوجیاں نالوں امیر ہو جاندا۔ اوس نویں امیر دی چوری والی سدھر وی جاندی رہندی۔ معاملے اودوں وگڑے جدوں اوس ایماندار دے گھر چوری کرن گئے بندے خالی ہتھ مُڑن لگے۔ ہُن اوہ غریب ہوندے جا رہے سن۔
ایسے وچکار جیہڑے نویں نویں امیر ہوئے سن اوہ ایماندار آدمی وانگوں رات نوں پُل اُتے جان لگ پئے سن۔ تے چِراں تیک اوہدے تھلیوں وگدے پانی نوں ویکھدے سن ۔ ایہناں حرکتاں نال شک شُبہے ودھدے گئے کیونجو ایس دا مطلب ایہہ سی کہ بہت سارے لوک امیر ہوندے جا رہے سن تے بہت سارے غریب ۔
تے امیراں نوں جاپیا کہ ہر رات اوہ پُل اُتےجاندے رہے تاں چھیتی ہی اوہ غریب ہو جان گے۔ پھر اوہناں سوچیا کہ کجھ غریباں نوں نوکر رکھ لینا چاہیدا اےجیہڑے ساڈے لئی چوری کرن۔ اوہناں رل مِل کے لیکھا کیتا ، تنخاہاں مِتھیاں، حصے طے کیتے ۔ پر چور تاں اوہ ہُن وی سن ایس لئی اِک دوجے نوں رگڑا دین دے جتن وچ رُجھے رہے۔ پھیر وی جیویں کہ ہوندا آیا اے جیہڑے امیر سن اوہ ہور امیر ہوندے گئے تے غریب ہور وی غریب ہوندے گئے۔
کجھ امیر تاں اینے امیر ہو گئے کہ امیر بنے رہن لئی اوہناں نوں نہ چوری کرن دی آپ لوڑ سی تے نہ چوری کروان دی ۔ پر جے اوہ چوری بند کر دیندے تاں اوہ غریب ہو جاندے کیونجو باقی دے غریب تاں لگا تار چوری کر رہے سن۔ ایس لئی اوہناں نے سبھ توں ودھ غریب لوکاں نوں تنخاہاں دینیاں شروع کر دتیاں تاں جو اوہ دوجے غریباں توں اوہناں دی جیدات دی حفاظت کر سکن۔ ایس دا اثر ایہہ ہویا کہ تھانیاں تے جیلاں دی اُساری شروع ہو گئی ۔
ایس طرحاں اوس ایماندار آدمی دے ساہمنے آئون توں کجھ ہی سالاں پچھوں حال ایہہ ہو گیا کہ لوک ہُن لُٹن تے لُٹائون دی گل کرنا چھڈ کے بس امیر تے غریب دی گل کرن لگے۔ پر اجے وی اوہ سبھے چور ہی سن۔
اکلا ایماندار اوہی سی جیہڑا شروع شروع وچ ایتھے آیا سی تے چھیتی ہی اوہ بُھکھ نال مر گیا سی۔

(انگریزی توں ترجمہ : خالد فرہاد دھاریوال)




ایتالو کالوینو
ایتالو کالوینو دے والد ماریو کالوینو اٹلی توں 1909 وچ میکسیکو اُچالا کر گئے سن۔ اوتھے اوہناں کھیتی باڑی دی وزارت وچ اُچ پدھر تے کم سنبھالیا ۔ ماریو کالوینو گرم علاقیاں دی پینڈو معیشت تے واہی بیجی دے ماہر سن ۔ایہی اوہناں کیوبا وچ چوکھا چر پڑھایا وی۔ 1917 وچ اوہ میکسیکو توں کیوباآ وسے سن تاں جو ایتھے سائنسی تجربے کر سکن۔ ایتھے ای ایتالو کالوینو دا جنم 1923 نوں ہوانا شہر دے مضافاتی علاقے اندرہویا ۔ ماریو کالوینو اِک پکا اُتھل کار سی۔ ایتالو کالوینو دی ماں ایک ماہر نباتات تے یونیورسٹی پروفیسرسی۔ ایتالو کالوینو دے جنم توں 2 سال بعد ایہہ ٹبر مُڑ اِٹلی پرت آیا۔اٹلی اندر 1941 وچ ایتالو کالوینو نے تیورن یونیورسٹی دے زرعی شعبے وچ جتھے کدی اوس دے پیو نے پڑھایا سی، داخلہ لیا پر مگروں سلیکھ دی پڑھائی لئی کھیتر بدل لیا۔ ایتھے تیورن وچ ایتالو کالوینو کمیونسٹ پارٹی دا رُکن بنیا۔ تے کامیاں دی لہر نال خود نوں اصلوں جوڑ دتا۔ کمیونسٹ اخبار تے رسالے لئی لکھدا رہیا۔
ایتالو کالوینو اپنیاں کہانیاں تے ناولاں لئی دُنیا بھر وچ مشہور اے۔ایہہ سوجھوان لیکھک 61ورھیاں دی عمر وچ 19 ستمبر 5 198 نوں ایس جہان نوں خیرا ٓباد کہہ گیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels