Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> پائپ لکھاری:ایٹگر کیرٹ(A Short Story by Etgar Keret)

پائپ لکھاری:ایٹگر کیرٹ(A Short Story by Etgar Keret)

ُلتھا : عامر بٹ I
December 1st, 2016

جدوں میں ستویں جماتے چڑھیا ، تد اوہناں چت سار(سائکالوجی) دے اک ماہر نوں سکول سدیا تے پڑھاکواں دے ڈھیر سارے ذہنی ٹیسٹ کیتے۔۔اوہنے مینوں اک اک کر کے وکھو وکھ ویہہ طراں دے فلیش کارڈز وکھائے تے پچھیا ایہناں فوٹواں وچ کیہ خرابی اے؟او ساریاں مینوں ٹھیک لگیاں ، پر اوہنے میتھوں فیر پچھیا تے پہلے والی فوٹو ۔۔جدے وچ اک ایانا سی مڑ وکھائی۔’’ایس فوٹووچ کیہ مسئلہ اے؟اوہنے تھکی جیہی واج وچ میرے توں پچھیا۔میں اوس نوں دسیا کہ فوٹو بالکل ٹھیک پئی جاپدی اے۔او ڈاڈھے ے غصے وچ آگیا تے آکھیا’کیہ تینوں دسدا نہیں کہ فوٹووچ بال دے کن نہیں نیں؟‘‘سچی گل تاں ایہہ وے ،جد میں اوس فوٹو نوں مڑ تکیا تاں مینوں دس پیا سی کہ بال دے کن نہیں ، پر فیر وی فوٹو مینوں ٹھیک لگ رہی سی۔چت سار دے ماہر نے مینوں سچججے ڈھنگ نال شیواں نوں نہ سیہانن دا ڈاڈھا روگی قرار دتا تے مینوں ترکھانے سکول گھل دتا گیا۔جد میں اوتھے اپڑیا ، تاں پتہ لگا بھئی مینوں تاں بورے توں الرجی ہوجاندی اے، ایس واسطے اوہناں میری لوہارے کم والی کلاس وچ بدلی کر دتی۔ میں اوتھے چنگی طراں کم کرداں ساں،پر مینوں اوتھے کوئی خاص سواد نہیں سی آوندا۔ سچی گل دساں ،مینوں کسے وی کم وچ چس نہیں سی آوندی۔
جدوں میری سکول دی پڑھائی مکی، میں اک ٖکرخانے وچ کم کرنا شروع کر دتا ،جتھے پائپ بندے سن۔میرا افسر ایک انجینئر سی،جنھے اک اُگے ٹیکنیکل کالج توں ڈپلومہ کیتا ہویا سی۔اک سیانا بندہ۔اگر تسی اوہنوں کسے اجیہے بال دی فوٹو وکھاؤ جدے کن نہ ہون یا ایسے طراں دی کوئی ہور کسر ہوؤے تاں اوہنوں ترت پتہ لگ جائے گا۔چھٹی توں بعد میں کرخانے رہنا ساں تے انوکھڑی طراں دے پائپ بنانا ساں،مڑے تڑے،ولیویں کھادے ہوئے جیوٰیں سپ کنڈلی مار کہ بیٹھا ہوؤے،تے میں ایہناں پائپاں وچ کینچے ریڑھنا ساں۔میں جاننا آں کہ ایہہ سنن وچ مورکھتا والی گل جاپدی اے،اتے مینوں انج کرن وچ کوئی چس وی نہیں سی آوندی پرفیر وی میں انج کردا ررہندا سی۔
اک راتیں میں بڑا اوکھا جیہا پائپ بنایا جدے وچ ڈھیر سارے ول ولیویں تے موڑ سن ۔میں ایہدے وچ اک کینچا ریڑھیا ، پر اوہ پائپ دے دوجے پاسیوں نہ نکلیا۔پہلے میں سوچیا اے پائپ دے وچ کار کدھرے پھس گیا ہوؤے گا ،پرجد میں ویں کینچیاں نال وی ہور اجیہا آھر کر لیا تاں مینوں سمجھ لگی بھئی ایہہ سارے تاں غیب ہوندے جاندے پئے نیں۔مینوں پتہ اے کہ میں جو وی آکھ رہیا واں اوہ سنن وچ مورکھتاوالی گل لگدی اے۔میرا مطلب ایہہ بھئی ساریاں نوں پتہ ہے کینچے ایویں غیب نہیں ہو سکدے،پر جد میں ویکھیا کہ کینچے اک پاسیوں وڑدھے نیں پر دوجے پاسیوں نکلدے نہیں پے ،تاں وی مینوں رتا کو وی اے کوئی انہونی گل نہیں سی لگی۔بلکہ اصلوں ایہہ مینوں بالکل ٹھیک پیا لگدا سی۔ایہہ سی اوہ ویلا جدوں میں اپنی لئی اک ایسے آکار دا وڈا سارا پائپ بناون دا ٹیچا متھیا۔جدے وچ میں رڑھ سکاں جدتیکر کہ غیب نہیں ہو جاندا۔جدوں ایہہ خیال میرے چیتے وچ آیا تاں میں ایڈا خوش ساں کہ میں اچی اچی ہسنا شروع کر دتا۔میرے خیال وچ ایہہ میری پوری حیاتی وچ پہلی واری سی جد میں کھل کہ ہسیا ساں ۔
اوس دن توں بعد میں اپنے وڈھے سارے پائپ تے کم کرنا چھوہ دتا ۔روز شامیں میں اوہدے اتے کم کردا ساں تے دن ویلے میں اوس دے ٹوٹیاں نوں سٹور روم وچ لکا دینا ساں۔مینوں ایس نوں بناون وچ ویں دن لگے۔اخیرلی رات مینوں اوس نوں جوڑن وچ پنج گھنٹے لگے تے پائپ نے ورکشاپ دے فرش دا ادھا حصہ ملیا ہویا سی۔جد میں اوس نوں اک تھاں تے جڑے ہوئے اپنی اُڈیک کر دیاں ویکھیا تاں مینوں اپنا سوشل سٹڈی دا ماسٹر یاد آ گیا ، جنھے اک واری آکھیا سی بھئی جس بندے نے سبھ توں پہلاں سوٹا ورتیا سی، اوہ ٹابری دا سب توں زیادہ تگڑا یا سیانا بندی نہیں سی۔گل صرف اینی سی بھئی دوجیاں نوں سوٹے دی لوڑ نہیں سی ، جد کہ اوہنوں سی۔اوہنوں زندہ رہن لئی تے ماڑا ہون دے کارن کسے توں وی ودھ اوس سوٹے دی لوڑ سی۔مینوں نہیں لگدا کہ پوری دنیا وچ کوئی اجیہا بندہ ہوؤے گا ،جیہڑا میرے توں ودھ کے غیب ہو جاون دا چاہوان ہوؤے گا۔ایہو کارن اے کہ ایہہ پائپ میری کاڈ اے۔میری ، اوس سیانے انجینئر دی نہیں ، جنھے ٹیکنیکل کالج توں ڈگری لتی اے تے فیکٹری چلاندا اے۔
میں ایس گویڑ توں اڈ کہ دوجے پاسے کیہ اے اوس پائپ دے اندر رڑھناشروع کر دتا۔ہورے دوجے پاسے بغیر کناں والے بال کنچیاں دے ڈھیر اتے بیٹھے ہوون۔تھی سکدا اے۔ میں چنگی طرح کجھ آکھ نہیں سکدا کہ کیہہ ہویا ، جد میں پائپ دے اندر اک خاص تھاں توں لنگیا۔میں بس اینا جاننا واں کہ میں ہن ایتھے آں۔
مینوں لگدا اے میں ہن اک فرشتہ ہاں۔میرے آکھن دا مطلب اے ہن میرے پر نیں تے میرے سر دے دوالے نورانی گھیرا اے،اتے ایتھے میرے ورگے سینکڑیاں لوکی نیں۔جدوں میں ایتھے اپڑیا ،اوہ سارے اوہناں کنچیاں نال کھیڈے پئے سن جیہڑے میں کئی ہفتے پہلاں پائپ وچ ریڑھے سی۔میں ہمیشہ انج سوچنا ساں بھئی جنت اوہناں لوکاں لئی اک اجیہی تھاں ہے جیہڑے حیاتی وچ چنگے کم کردے نیں، پر انج نہیں اے۔رب اجیہے فیصلے کرن وچ بہت رحم کرن والا تے مہربان اے۔جنت اصلوں اوہناں لوکاں لئی اک تھاں ہے جیہڑے دنیا وچ ڈھڈوں سکھی نہیں وس سکدے۔ایتھے لوکاں مینوں دسیا بھئی جیہڑے بندے جی ہتھیا کر لیندے نیں ،اوہناں نوں دوبارہ نویں سرے توں جیون واسطے دنیا وچ گھل دتا جاندا اے، کیونجو اصل گل اے وے کہ اگر اوہناں نوں پہلی واری دنیا چنگی نہیں لگی تاں ایہدا ایہہ مطلب نہیں بھئی اوہ دوجی وار اوتھے رہنا پسند نہیں کرن گے۔پر جیہڑے اصلوں دنیا وچ سکھاویں نہیں ہوندے اوہ ایتھے آ جاندے نیں۔ہر کسے دی جنت اپڑن دی اپنی کہانی اے۔
ایتھے اوہ پائلٹ وی نیں جیہڑے برمودا تکون دے گرد چکر لاندیا ہوؤے اک خاص تھاں توں ایتھے اپڑ گئے۔کجھ گھروکی جنانیں وی نیں جیہڑیاں اپنے باورچی خانے دیاں الماریاں دے پچھلے پاسیوں ایتھے اپڑیاں، تے اجیہے حسابی کتابی (ریاضی دان) وی نیں جنھاں نوں آکاش وچ اجیہا ں گنجلاں سہی ہوندیاں نیں ،جنہاں وچوں بڑی اوکھت نال لنگھیا جاندا اے۔
جے تسی واقعی دنیا وچ ڈاڈھے دکھی ہو، تے ہر طراں دے لوگ تہانوں ایہہ آکھدے پئے نیں بھئی تہانوں شیواں نوں سچججے ڈھنگ نال نہ سیہانن دا روگ ہے ، تاں تسی ایتھے اپڑن لئی اپنا رستہ آپ لبھو، تے جدوں تہانوں ایہہ رستہ لبھ جاؤے تے تہاڈی بڑی مہربانی آوندی واری تاش دی اک گڈی پھڑی لیاونا ، کیونجو اسی سارے ایتھے کینچیاں نال کھیڈ کھیڈ کے اک گئے ہاں ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels