Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> دادا جی دی ڈائری (لڑی وار سلسلہ ) : لڑی : 1

دادا جی دی ڈائری (لڑی وار سلسلہ ) : لڑی : 1

نین سکھ
November 25th, 2016

حسین تے جیوں گھُن لگا رُکھ جیہڑا بھٹی دے آسرے کھلوتا، ٹیکی نہ رہی تے کھادھا کاٹھ بِسترے تے جا پیا۔ حسین نوں لہور ہُن غیر محفوظ لگے، اوہنوں محبو ب الحق دی فکر رہوے۔ بہوں اوکھا محبوب الحق سوشل ورک دے ڈپلومے لئی کینیڈا جان لئی راضی ہویا۔ ایس ڈپلومے لئی کینیڈین سرکار سکالرشپ انائونس کیتا، شہزاد مغل دی گرِین اینڈ کلین سِٹی (GACC) دی کوشش نال محبوب نوں ایہہ سکالرشپ مِلیا۔
بھٹی دا وچھوڑا جردیاں بمار حسین لمّا پیا محبوب الحق دے دادا جی دِیاں ڈائرِیاں آہرے لگا رہوے جیہناں تے اوہنے نشان لائے، اوہ ایہہ:

بُدھوار، 13 اگست 1947
پچھلے اگست وِچ اسیں سارا ٹبّر تے میرے سالے دے بال چُھٹِیاں وِچ شِملے گئے، میرے وڈے پُتر اقبال دا دوست منوہرلال وی ساڈے نال۔ اوتھے اساں ریڈیو تے خبراں سُنِیاں تے نہ اخبار دی طلب ہوئی۔ بالاں وِچ ایہہ ای بحث ہووے کہ وڈا فلم ایکٹر کیہڑا، چنگا کرکٹر کون تے سِنگر کیہڑا وڈا۔ اوتھے ای اگلے ورھے ڈلہوزی دا پروگرام بنیا، لہوروں پٹھانکوٹ تے پٹھانکوٹوں ڈلہوزی۔ ایہہ اگست 1946 دی گل جیہنوں پُورا ورھا گزر گیا۔
میں اج گھروں نِکلیا ای نہیں، باہر کیہ ویکھنا! ماردھاڑ، چِیکاں، نعرے تے سڑاند بند بُوہے بارِیاں دِیاں وِرلاں راہِیںمینوں چھیک رہے۔ ریڈیو تے تازہ خبر کہ اج پاکستان دی پہلی دستورسازاسمبلی دا اِکٹھ ہویا۔ پہلی کارروائی ایہہ کہ محمد علی جناح نوں سرکاری پدھر اُتے قائداعظم منیا گیا۔

اتوار، 21 دسمبر 1947
پھول بلڈنگ، گوالمنڈی لہور وِچ مولانا مودودی اسلامی جمعیت طلبہ دا اعلان کیتا۔ پھول بلڈنگ اوہ جتھے شمس العلماء مولانا ممتاز علی دا دارالاشاعت پنجاب، ایتھوں بالاں لئی ’’پھول‘‘ تے عورتاں لئی ’’تہذیبِ نسواں‘‘ چھپے۔
جیہڑِیاں مسلمان ماواں ’’تہذیبِ نسواں‘‘ پڑھیا، اوہناں آپنے بالاں لئی ’’پھول‘‘ ضرور خریدیا۔ ایہناں گھراں چوں بال مولوی دے مدرسے نہ گئے، اوہ سکولاں کالجاں وِچ پڑھدے مولانا مودودی دی اسلامی اِنشاء پردازی پڑھن لگ پئے۔
اسلامی جمعیت طلبہ اج جیہڑا نعرہ ماریا اوہ نویں ڈھنگ دا۔ میرا میواتی مُنشی مُشرف خاں پھول بلڈنگ دے نیڑے ای ہندوواں دے گھر اُتے قابض، اوہ وی پاکستان نوں تُرت اسلامی بنانا چاہوے، متے لہوروں نِکلے ہندو پرت نہ آون۔ اوہنے اج جیہڑا نعرہ تکبیر سُنیا، اوہ قدم قدم جہادی پریڈ، نع - رہ- تک - بِیر تے اِنج ای اللّہ - ہُ - اک - بر۔ پہلاں روایتی نعرے وِچ لفظ نعرہ ہوکدیاں لمکاندے، رُکے بِنا تکبیر تے اِنج ای اگوں سِدھے سائو ڈھنگ وِچ اللہ اکبر۔
ہفتہ، 27دسمبر 1947
بھاء جی مینوں مبارک دِتی، ’’آپنے چودھری صاحب پاکستان دے وزیرِ خارجہ بن گئے!‘‘ سُن کے مینوں چودھری سرظفراللہ دِیاں گلاں چیتے آئِیاں جیہڑیاں اوہ کدی ہندو ججاں دے مسلماناں نال مندے ورتارے بارے پرچاردے۔ اکھے جے اک پارٹی ہندو تے دُوجی مسلمان، فیصلہ ہندو دے حق وِچ۔ جے دوویںپارٹیاں مسلمان، جیہڑی پارٹی دا وکیل ہندو، فیصلہ اوہدے حق وچ۔ خاص کر کے چودھری صاحب لہور چیف کورٹ دے چیف جسٹس سرشادی لال، جسٹس بخشی ٹیک چند تے جسٹس مہرچند مہاجن نوں نِنددے۔ بھاویں چیف جسٹس سرشادی لال چودھری شاب دین کولوں چیف کورٹ دی ججی لئی چودھری ظفراللہ منگدا رہیا۔
چودھری صاحب سیالکوٹوں چودھری شاب دین دے رسالے ’’انڈین کیسز‘‘ لئی سب ایڈیٹر بن کے لہور آئے۔ بازار جج لطیف وچ اوہناں کرائے تے مکان لیا۔ وکالت اِنج چمکی کہ اوہ ااندرون لہور دے تنگ مکان چوں نِکلے تے ڈیوس روڈ دی وڈی کوٹھی وچ جا رہے۔ ممبر پنجاب لیجسلیٹو اسمبلی بن گئے۔ ایس توں مگروں نسبت روڈدا مجیٹھیا ہائوس، اوہناں دا گھر بنیا۔ گورنر پنجاب نال ملاقاتاں تے وائسرائے ہِند تائیں رسائی۔
چودھری صاحب دے سوہریاں چوں ماڈل ٹائون دا رہائشی حمیداللہ خاں میرا دوست جیہڑا چودھری صاحب دے سِکھر تائیں پَوڑی پَوڑی چڑھن دا گواہ۔ حمیداللہ خاں میرا کار ڈرائیونگ وچ اُستاد جیہنے آپنی اوپل وچ کشمیری لیڈر شیخ عبداللہ نوں وی ماڈل ٹائون وچ کار چلانی سکھائی۔

سیاست وِچ چودھری صاحب نوں چودھری شاب دین لے کے آیا تے چودھری صاحب اگوں سر مراتب علی دے پُتر سیّد امجد علی نوں سیاست وِچ تھاپڑ رہے۔
جاری جے
ایہہ ’’مادھو لعل حسین: لہور دی ویل‘‘ (ناول) دا اک حصّہ ہے جیہڑا لڑی وار ’’وچار‘‘ لئی لکھاری آپوں دتای جے۔ ایس ناول نوں ڈھاہاں انٹرنیشنل ایوارڈ وی لبھا ہے۔ ناول نیو لائن، لہور چھاپیا ہے اتے ریڈنگز(Readings) بکس گلبرگ، لہور ایس دا ویچن ہار(Distributor) ہے۔ تسی گھر بیٹھے ایس نوں ویب سائٹ (www.readings.com.pk) توں آن لائن خرید سکدے ہو۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels