Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> میری گل سُنو

میری گل سُنو

پروفیسر عاشق رحیل
November 29th, 2014

تسیں ٹُردے ٹُردے کیوں رُک گئے او جناب عالی!’’میری گل سُنو‘‘ میں تہانوں نہیںآکھیا۔ میں تہانوں اپنی کوئی گل نہیں سناؤن لگا۔ مینوں گل سناؤنی ای نہیں آوندی، گل سناؤنا وی اک آرٹ ہوندا جیہڑا ہر کسے دے وس دا روگ نہیں۔ ایس فن توں میں وی کورا ہاں۔ تُسیں اپنی منزل کھوٹی نہ کرو ٹُردے جاؤ۔ میں تاں گلاں سُنن دا عادی ہاں تے جدوں دا پیدا ہوئیاں بس سُندا ای آرہیاں۔ پہلاں اپنے ماں پیو، بھیناں بھراواں، رشتے داراں تے آنڈھ گوانڈھ والیاں دیاں کوڑیاں کسیلیاں گلاں، سکول تے کالج جان توں بعد اپنے اُستاداں دیاں گلاں جیہناں دی کھٹی میں عمر بھر کھاندا رہیاں تے ہن تائیں کھا رہیاں۔
’’میری گل سُنو‘‘ کہہ کے تاں میں اپنے اِک بزرگ دوست دی گل سناؤن لگیا ساں جیہڑے گل سنا وی رہے ہون تاں وچ وچ کہندے جاندے نیں’’ میری گل سُنو،میری گل سُنو‘‘ حالانکہ اوہناں دی گل سنن والا بڑے دھیان نال سن رہیا ہوندا اے پر فیر وی اوہ شرمندہ جیہا ہو جاندا اے تے سوچدا اے کہ شاید اوہدی توجہ اوہناں دی گل سُنن توں ہٹ گئی ہووے گی۔
ایس لئی اوہ ہور سوادھان ہوجاندا اے۔ حالانکہ اوہ بزرگ تاں اپنی عادت دے مطابق کہہ رہے ہوندے نیں۔’’گل سُنو‘‘ اوہناں دا تکیہ کلام بن چکیا اے۔ شروع شروع وچ مینوں وی اوہناں دی ایس عادت دا پتہ نہیں سی۔ پہلی واری مینوں ملن آئے تاں اوہناں بیٹھدیاں ای آکھیا۔ ’’میری گل سُنو‘‘ میں سوچیا کہ شاید ایہہ مینوں روکن لگے نیں کہ میں ایہناں لئی چاء پانی دا بندوبست نہ کراں۔ میں آکھیا میں ’’تہاڈی گل ہُنے ای سنداں‘‘ اوہناں آکھیا’’ٹھیک اے، ٹھیک اے۔ تُسیں تکلف کرن لگے او۔ میری گل سنو، چاء وچ مِٹھا ذرا ودھ پاؤنا تے گل سنو، بسکٹ نمکین لیاؤنا۔۔۔‘‘ ایناں ای سُن کے میں اندر ول نوں دوڑ لا دتی کہ کدھرے اوہناں دے ایہہ مطالبے ودھدے ای نہ جان۔
اوہ چاء وچ بسکٹ ڈوب ڈوب کے کھاندے وی جان تے نال نال گلاں وی سناوندے جان تے ہر تیجے فقرے توں بعد اوہناں دا چوتھا فقرا ہوندا ’’میری گل سُنو‘‘ جدوں میں ایہہ سُندا تاں پریشان ہوجاندا تے آکھدا’’جناب عالی میں تہاڈی گل ای تاں سُن رہیاں‘‘ پر تھوڑے چر مگروں ای مینوں اندازہ ہوگیا کہ ایہہ ’’گل سُنو‘‘ اوہ آپ جان کے نہیں کہندے اوہناں دے اندروں آپو آپ نکل آؤندا اے۔پتہ نہیں ایہہ فِقرا کدوں دا اوہناں دے اندر دبیا ہویا سی۔ شاید لوک اوہناں دی گل نوں اہمیت نہ دیندے ہون تے اوہناں دی گل نہ سُندے ہون۔ ایس طرح فیر میں ایس فقرے نوں بے ضرر سمجھ کے شرمندہ ہونا چھڈ دِتا۔
گل سناؤنا اِک آرٹ ہوندا اے تے گل سُننا بڑے حوصلے دی گل اے۔ کئی واری تاں گل سنن سناؤن والیاں وچ لڑائی وی ہوجاندی اے۔ اکثر بزرگ نصیحت دے طور تے نوجواناں نوں آکھدے ہوندے سن۔ ’’گلاں نہ کرو۔ ہتھ ہلا کے کجھ کرکے وکھاؤ‘‘ اوہ بزرگ بھولے ہوندے سن تے اوہناں نوں پتہ ای نہیں ہوندا سی کہ ہتھ تے ہتھ رکھ کے بیٹھن والے تے صرف گلاں دی کمائی کھان والے زیادہ فائدے وچ رہندے نیں، زبان ہلاون والیاں نوں وڈیرے خان، ملک، اعوان تے ہتھ ہلاون والیاں نوں کمی کمین!
’’گل سناون والے‘‘ سبھ توں چھوٹے درجے دے لوک مجمع بازیاں گڈیاں بساں وچ چڑھ کے اپنیاں گلاں دے زورتے اجیہاں شیواں ویچدے نیں جیہناں وچ اوہ کجھ ہوندا ای نہیں جیہدے اوہ دعوے کر دے نیں۔ہاں گلاں اوہ اجیہاں کردے نیں کہ سبھ توں ودھ عقل مند انسان وی اپنیاں سوچاں چھڈ کے اوہناں دیاں گلاں سنن تے مجبور ہوجاندا اے ۔ اوہ ’’ساڈی گل سُنو‘‘ وی نہیں آکھدے پر اوہ اجیہے حربے ورتدے نہیں کہ لوک اوہناں دی گل سنن تے مجبور ہوجاندے نیں تے اوہناں دیاں جیباں وی خالی کرواکے بس چوں اُتر جاندے نیں۔
میں اُتے لکھیا اے کہ کئی واری گل سناون تے سُنن والیاں وچ لڑائی وی ہوجاندی اے۔ ساڈے گھر دے کول ای دو بھیناں رہندیاں نیں تے دوویں گلاں سُناؤن دیاں شوقین۔ اک بھین دوجی نوں کوئی گل سناون لگدی تاں نہ رکن والی ٹرین وانگوں اوہدی زبان چلدی ای رہندی اے۔ پر دوجی وی اوہدی ای بھین سی ۔ اوہ اوہنوں چُپ کران دی کوشش کردی کیوں جے اوہدے اندر وی گلاں کلبلا رہیاں ہوندیاں ۔ جد پہلی چپ نہ کردی تاں دوجی اوہدے مونہہ تے ہتھ رکھ کے کے زبر دستی چپ کرادیندی تے آپ شروع ہوجاندی۔ دوجی وی اودوں تائیں گلاں سناوندی رہندی جد تائیں پہلی اوہدا ہتھ ہٹا کے اپنا ہتھ اوہدے مونہہ تے نہ رکھ دیندی۔ ایس طرح مونہاں تے ہتھ رکھن رکھاؤن دا سلسلہ بہت دیر تائیں چلدا رہندا تے اخیر ایہہ نظارا اک ’’دنگل ‘‘ دی صورت اختیار کر لیندا۔
مغربی ملکاں وچ جان والے جاندے نیں کہ اوتھے ’’گل سناون‘‘ دا رواج ای نہیں۔ کوئی نہیں کہندا کہ ’’میری گل سُنو‘‘ اوتھے نہ گل سناون والیاں کول ٹائم ہوندا تے نہ گل سنن والیاں کول۔بلکہ جیہدے نال تعارف نہ ہووے اوہنوں مخاطب کرنا ای بُرا سمجھیا جاندا اے ۔ گل سناونا تاں فطری گل اے۔ اوہناں ملکاں وچ وی گل سنن والے انسان ویلا تے تھاں لبھ ای لیندے نیں۔لندن دے ہائڈ پارک وچ اک تھاں اے سپیکرز کارنر(بولن والیاں دا گوشہ) ایتھے اوہ لوک آؤندے نیں جیہڑے اپنی گل سناؤن لئی بے تاب ہون۔ اوہ آلو بخارے یاں امباں دی اک خالی پیٹی لے آوندے نیں اوہنوں اک مناسب جیہی تھاں رکھ کے سٹیج بنالیندے نیں تے اوہدے اتے کھڑے ہوکے جو مونہہ وچ آوے بولدے جاندے نیں۔ اوتھے کوئی پابندی نہیں ہوندی اوہ ملکہ الزبتھ دے خلاف وی گلاں سُنا سکدے نیں۔ ساڈا اک دوست فلم ویکھ کے آوندا تاں اوہنوں فلم دی سٹوری مع ڈائیلاگ دے سناون دا شوق ہوندا سی۔ اسیں اوہدے تے پابندی لاوندے کے سانوں پہلے ادھا ادھا سیر ٹھنڈا ددھ پلا اسیں فیر تیری کہانی سُناں گے۔ اوہ تیار ہوجاندا تے فلم دے ٹکٹ توں ودھ پیسے خرچ کے سانوں سٹوری سناؤن دا جھس پُورا کردا۔
وڈے لوک وی گل سناوندے نیں پر اوہناں نوں ’’میری گل سُنو‘‘ کہن دی لوڑ نہیں پیندی۔ اوہناں دی گل سنن لئی لوک اوہناں دے پچھے پچھے پھردے نیں تے اوہناں کولوں سُن کے اگے سناؤندے نیں تے پیسے کماوندے نیں۔ وڈے لوکاں نے جے کوئی بہت ای ضروری گل سناؤنی ہوندی اے تاں اوہ سُنن والیاں نوں گھر ای سد لیندے نیں تے گل سناؤندے نیں تے جِناں چاہون سناوندے نیں۔ جیہنوں اوہ ’’پر یس کانفرنس ‘‘ دا ناں دیندے نیں۔ ایسے طرح ہن ٹی وی چینل وی بہت ہوگئے نیں جیہڑے گلاں سناؤن دا بندوبست کردے نیں۔ کسے ویلے تاں اکو بندہ اک توں بعد دوجے تے دوجے توں بعد تیجے چینل تے گلاں سُنا رہیا ہوندا اے۔ ایہناں چینلاں تے وی گلاں سناون والے اک دوجے توں ودھ کے آکھدے نیں ’’میری گل سُنو‘‘، میری گل سُنو‘‘ تے پروگرام دا ویلا مک وی جاوے تاں اوہناں دی گل جاری رہندی اے۔
عقل مند، فہم و فراست تے زرخیز دماغ رکھن والے سوجھوان گلیاں بازاراں وچ ٹھوکراں کھاندے پھردے نیں جیہناں دی کوئی گل ای نہیں سُندا، بھاویں اوہ اپنیاں گلاں وچ حکمت دے موتی رولن۔پر اوہ کیویں بولن اوہناں دیاں جیباں جو خالی ہوندیاں نیں بھاویں اوہناں دے دماغ عقل دیاں گلاں نال بھرے ہوئے ہون۔ پر کیہ کیتا جاوے دماغ توں پہلاں جیب ول ویکھیا جاندا اے ، اوہ تاں کسِے نوں روک کے ایہہ وی نہیں کہہ سکدے’’میری گل سُنو‘‘ ایہدے لئی اُچے سٹیٹس دی لوڑ ہوندی اے پر ایہو جیہے لوکاں دے گھر دی تاں چھت وی اُچی نہیں ہوندی۔ اوہ جھگیاں وچ نیویں چھت ہیٹھ ای گزارہ کر لیندے نیں۔ اوہ پاٹے پرانے کپڑے پاکے پھردے نیں بھاویں اوہ اندروں ’’افلاطون‘‘ دے چاچے ای ہون۔ اوہ ’’میری گل سُنو‘‘ ، میری گل سُنو‘‘ دی گردان کردیاں ای مونہاں نوں چپ دیاں موہراں لا دیندے نیں۔
حالانکہ شروع وچ میں تہانوں ایہہ نہیں آکھیا سی کہ ’’میری گل سُنو‘‘ پر میں تہانوں گلیں لاکے اپنی گل سُنا ای دِتی اے تے ’’میری گل سُنو‘‘ کہن دا جھس پورا کر ای لیا اے ورنہ تُسیں میرے چھوٹے جیہے بندے دی گل کیوں سُندے ۔ تہاڈا بہت بہت شکریہ!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels