Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> حلالہ

حلالہ

نادر علی
November 11th, 2014

میں دُلّا تے جلّا تِنے جماعتی تے بیلی ساں تے اکٹھے ہاکی کھیڈ دے ساں۔ پر میں ڈاکٹر، چوہدری جلال اکبر نہراں دا وڈا افیسر تے دُلا مولبی عبداللہ ہویا۔ ہاکی وی چُھٹ گئی پر انج نہیں جوں پاکستان دی ہاکی چھُٹی اے۔ گوجرہ اجے وی پاکستان دی ادھی ٹیم پیدا کردا اے۔ دُلاّ اجے وی کدے پگ لاہ کے دو منٹ ہاکی آلیاں نال کھیڈے تے ہور دا ہور بن جاندا اے۔ پر ایہہ کہانی ہور دا ہوربنن دی اِک اچرج کہانی اے۔
میں دُکان آکے گوجرے پالئی۔ چوہدری جلال وی کدی کدائیں آوے تے پُرانی تگڑم رل بہندی اے۔ پر دولت جیہڑا دو پھاڑ پاندی اے اوہ سنگتاں دے ای نہیں بھراواں، ماپیاں دے پیار وی مُکا چھڈ دی اے۔ دُلا بھاویں جامعہ مسجد دا مولبی میری ہٹی کدی آپنا تے بڈھی دا علاج کروان آنودا سی۔ نماز پڑھن میں نہیں جاند ا۔ سو کدی کدائیں ملن ہوندا سی۔ جلال ہوری انج وی میرے تے دُلّے ہار اک مربعے آلے نہیں پنجاں مربعیاں آلے وڈے چوہدری باگے آلے چوہدری سن۔ جلال نہر دی وڈھی نال لکھ پتی تے امیر بڈھی نال ویاہ کرکے کروڑ پتی ہوگیا۔
نوکری چھڈ کے کاروبار لگا تے ارب پتی ہوگیا۔ کدی کدائیں سردیاں وِچ باگے آلی کوٹھی آونا میں ملن تے دُلے سلام کرن ٹر جانا۔ پر دُلّا کہندا سی اِسلام دا مولبی آں سلام دا مولبی نہیں!
جلال اکثر گرمیاں وچ ولیت ٹُر جاندا سی۔ ولیت وی گھر آھیا سُو۔۔۔جلال تے کدے کدائیں جانا پر بیگم جلال ہر گرمیاں ٹُر جانا۔ ایتھوں کُج وِگاڑ پیا۔ پوند ایہہ وی دُھمی پئی اوس کسے انگریز نال ویاہ کر لیا اے۔ مُڑ کوئی ہور خرابی ہوئی تے طلاق ہوگی۔ پر بھلے مانساں راٹھاں لئی طلاق اجے وڈا مہنا آھی۔ پیسے تے جائیداد نوں طلاق دینا وی اوکھا اے اک دن سُنیا چوہدری تے بیگم دووے آئے نیں۔ میں ملیا تے اوہناں دسیا مڑ کے وسن دا آہر پئے کردے نیں۔ دُلا سلام کرن آیا تے اوہنے پُچھیا طلاق توں مُٹر کے چوہدری کنج نِکاحیا گیا؟ چوہدری کہیا یونین کونسل دا معاملہ اے کُج ہو جائیدا پیسے نال ہرشے جوڑی جاسکدی اے۔ دُلا مولبی عبداللہ بن گیا۔اُس کہیا حلالے دے بغیر دُوجی واری نِکاح نہیں ہوسکدا۔ جلالے کہیا کسے نال پڑھا کے طلاق لے لینے آں۔ دُلا نکاح طلاق دا بندوبست کرے گا۔ دُلا اڑگیا اُس کہیا نہیں نکاح نہیں جماع نال شادی پوری ہوندی اے۔ ایہہ جلالے دا مسئلہ اے۔ مُڑ چوہدری لہوروں فتویٰ لیایا’’ حلالہ ضروری نہیں بلکہ ہے ای نہیں اسلام میں! پر گوجرے تے مولبی دُلے دا اسلام تے آخری فتویٰ ہوندا سی۔ شہر وچ وی گل دُھم گئی۔ دو تن دفعہ مولبی دُلے دی بیگم نال وکھری گل کیتی ہوئی۔ فیر بیگم اسلام آباد ٹر گئی۔۔۔۔۔۔ تے نکاح وِچے رہ گیا۔ بیگم فون کیتا ’’مولبی دُلا ٹھیک کہندا اے‘‘۔ امیر بھاویں رب نال پُھٹی دا بھا ودھان لئی گل کرن کُج رب نال کاروبار چلائی رکھدے نیں۔ جلالے کہیا’’ میری بیوی وھمی اے۔ پر ایہہ میں کُج برداشت کراں پئی اپنی زنانی نال فعل کرواواں؟‘‘
گل وچوں گل نکلدی اے۔ دُلے کہیا میں نکاح کرلیناں تے طلاق وی دے چھوڑ ساں۔ بیگم نوں اسلام آباد توں بُلوایا۔ پرفیر گل اڑگئی۔ شامی چوہدری منوں بلایا۔ ’’سُن ایہہ بکواس ڈاکدارا مولبی کہندا اے رات بی بی میرے نال رہوے گی۔ فر طلاق ہووے گی فرعدت پوری کرن دے بعد نکاح ہووے گا۔‘‘ فرلمیاں صلاحاں تے لمیاں بحثاں ہوئیاں۔ بیگم نال مولبی دی صلاح چوہدری نالوں وی لمی ہونی۔
اخیر ایہہ مُکی۔۔۔۔۔۔ مولبی رات باگے آلی کوٹھی رہوے گا۔ میں تے جلالا گواہ ہوواں گے نکاح دے، مولبی نال بیگم دے نکاح دے۔ اگلے دن وڈے ویلے طلاق ہووے گی۔ یونین کونسل نکاح تے طلاق دے کاغذ بھیجاں گے۔ عدت بیگم ولیت گزارے دی۔ فِراوتھوں نکاح پڑھا کے آجان دے۔ میں وی تسلی دتی۔’’مولبی ساڈا بھراواں ہار اے بے غیرتی تے نہیں کر سکدا۔۔۔‘‘
نکاح آلی رات مولبی کوٹھی سُتا تے میں تے جلال میرے گھر۔ جلال ساری رات نہ سُتا۔ دو ڈبیاں سِگرٹاں دیاں پی گیا پر وڈے ویلے اک عجیب بپتا پئی۔
چوہدری دیاں جگراتے نال اکھاں سجیاں پئیاں سن تے چنتا ودھیری۔۔۔ اوس منوں پاسے بُلا کے دسیا۔’’مولبی تے بیگم دوویں غیب نیں! کِسے نوں پُچھ دس وی نہیں سکدا‘‘۔
چوہدری کار تے لہور ٹُر گیا کوئی خبر نہ لبھی تے اِسلام آباد گیا۔ کوئی کھڑا نہ لبھا۔ ہولی ہولی گل گوجرے دُھم گئی۔ ’’چوہدرانی مولبی دُلے نال نس گئی اے‘‘۔
مہینے بعد پتہ لگا ۔ نکاح توں اگلے دن دونویں ہوائی جہاز تے ولیت ٹُر گئے سن۔ دو مہینے بعد ولیتوں منوں دُلے دا خط آیا۔ نکاح توں کجھ دن اگدوں مولبی تے بیگم دی صلاح کجھ ہور بن گئی۔ بیگم مولبی دا پاسپورٹ ویزا بنوالیائی۔ چنگے دِن سن ویزا لبھ جاندا سی۔
’’ڈاکدارا عشق بادشاہ اے جگ دا‘‘ مولبی لکھیا۔ ’’تے رب ای جوڑیاں بناندا اے‘‘ مولبی تے بیگم رات دی چناب تے اسلام آباد تے اگلے دن ولیت ٹر گئے سن۔ ہن گلاسگو ہوندے نیں۔ ’’چوہدری لندن باہلے پاکستانی ملدے نیں۔ دُنیا جیون نہیں سی دیندی۔ ہن گلاسگو آرام اے‘‘ آپنا مربع مولبی بیوی نوں دین دا مختیار نامہ تے طلاق بھیج دِتی۔ اللہ بڑا بے پروا اے۔

کہانی دا خلاصہ:
جلّا۔ جلالا۔ جلال اکبر۔ باتشاہی۔ دُلّا۔ مولبی دُلّا۔ مولوی عبداللہ۔ باغی۔ نابر۔ بیگم۔ بیگم جلال اکبر۔ رعیت لوکائی۔ ڈاکٹر۔ ڈاکدار۔ کہانی بیان کرن والا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels