Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> وارث شاہ نال مَن دِیاں گلاں

وارث شاہ نال مَن دِیاں گلاں

غلام مصطفی بسمل
September 29th, 2014

وارث شاہ نال مَن دِیاں گلاں
وارث شاہ!
اج جی کردا اے
سُتّے درد جگاواں
محرم راز سمجھ کے تینوں
الّھے زخم وکھاواں

وارث شاہ!
اسیں پھٹّاں جائے
کِکراں نال ویاہے
جیہڑے بنے مسیحا اوہناں
ساڈے بکرے لاہے

وارث شاہ!
کیہ پُٹھیاں پئیاں
اڈّے نیں مُونہہ گوراں
سادھ سمے دے ہوکے وی اسیں
مِتھّے گئے وچ چوراں

وارث شاہ!
لُڈّن وس بیڑی
ڈوب دوے یا تارے
چھلّاں دا مونہہ زور سمندر
مولا خیر گزارے

وارث شاہ!
اسیں وِکنے آئے
تے نِت وِکدے رہنا
جد تک نہ کوئی دُلا جمیا
ایہہ جُولا نہیں لہنا

وارث شاہ!
تیری ونجھلی سُتّی
سُتّا تیرا رانجھا
کلّا کیدو جاگ رہیا اے
جِنّے پایا لانجھا
وارث شاہ!
اساں اگ پرائی
اپنے ویڑھے بالی
کندھاں بُوہے، باریاں اُتّے
نچّے لہو دی لالی

وارث شاہ!
اج جِیون بنیا
سُول پُرچّی تِتلی
یاں اوہ گلشن جِس تے ڈِگّی
اتھری جیہی اِک بجلی

وارث شاہ!
فیر کیدو، قاضی
دوویں اِک مِک ہوئے
رانجھن ہیر، وراگی ہوئے
نہ جیندے نہ موئے

وارث شاہ!
اج سُنجے بیلے
سُنجیاں نیں سبھ جُوہاں
جُثّے پھٹو پھٹ نیں ساڈے
نِیلیاں کچ نیں رُوحاں

وارث شاہ!
اتہاس سَمے دا
خود نُوں پیا دُہراوے
کیدو مکردا چون پا کے
گھر گھر اگّاں لاوے

وارث شاہ!
اسیں جوگی ہوئے
ٹِلیوں کن پڑوائے
ہیر سیالن لبھدے لبھدے
انگ بھبھوت رُمائے

وارث شاہ!
اج سپّاں وانگوں
ہتھ دِیاں ریکھاں ڈنگن
پَیراں دے چھالے وی اپنا
لیکھا جوکھا منگن

وارث شاہ!
اساں اپنے ہتھیں
خود نوں ناگ لڑائے
اگ بارود دی کھیڈ دے اندر
اپنے بال ونجائے

وارث شاہ!
اج حرف گواچے
وِسر گئے نیں شجرے
ایسا قمری سورج چڑھیا
سُک سڑ گئے پھُل سجرے

وارث شاہ!
ساڈا چیتر مویا
رُتّاں نوں سنھ لگّی
اُڈنوں پہلاں کونجاں موئیاں
لال انھیری وگّی

وارث شاہ!
ایس دردی رُتّے
کیہڑا درد سنجاپے
ماواں نوں پَے دندلاں گئیاں
بھیناں کرن سیاپے

وارث شاہ!
اساں پڑھیو پڑھی
آپ غلامی بھوگی
لُوں لُوں زہری وساں چڑھیاں
تن من ہویا روگی

وارث شاہ!
اسیں دِل دے محرم
لے کے نِکلے بنّے
ایہناں چوں فتیا نہ کوئی
دھون برکلے بھَنّے

وارث شاہ!
اوہ اپنی رُت دے
دریا اندر تریا
ویلے دے کربل وچ جِنّے
سچ دا ہوکا بھریا

وارث شاہ!
نِت جیون جیہناں
ہس ہس جاناں دِتیاں
اوہناں زخم اُجالے، جیہناں
فجر اذاناں دِتیاں


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels