Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کتاباں >> پردیسی

پردیسی

احمدشہباز خاورؔ
September 25th, 2014

سردار نے سراج دی شیو کر دیاں حماموں باہر جھاتی ماری تے اِک ادھکڑ جہی عمر دا اُچا لما بھارے جہے جُثے والا بندہ حمام اگے اپنی ای عمر جینا پرانا موٹر سائیکل کھلار کے اوہدے ول آرہا سی۔ اندر آ کے اپنی واری دی اڈیک وچ بیٹھے ہوئے تن چار بندیاں ول گوہ نال ویکھدے ہوئیاں اوہنے سردارے نوں پچھیا، شیو کرانی سی، کوئی ٹائم ہے جے؟ سردار نے ’’آؤ جی بسم اللہ ٹائم ای ٹائم اے‘‘ آکھ کے اوہنوں سجے رکھے ہوئے لکڑ دے بنچ تے بیٹھن دا اشارہ کیتا تے شیو کراندے ہوئے سراج نوں آکھن لگا۔’’سنا فیر بھاؤ نکے دا کجھ کیتا ای یاں حالے او سراں ای کملیاں وانگوں تُریا پھر دااے۔‘‘ سراج نے آکھیا‘‘، اوہ کہڑی حالے ایہنی کالھ اے، پہلوں اپنے پیراں سر تے ہو جائے، فیر اوہدا وی کجھ سوچ لاں گے، حالے تے ساڈے تے ای بھار بنیا بیٹھا اے۔ سردار نے اوہدے مونہہ تے دوجی واری صابن لا کے استرے وچ نویں بلیڈ دا ادھا ٹوٹا اڑنگ دے ہوئے ہس کے آکھیا ’’سولہ آنے گل کیتی اے توں بھائی سراج، اُوہ میرے والا اُلّوروز چپ کر کے غلے چوں پیسے کڈھ کے لے جاندا اے جے میں ذرا جھڑکنا واں تے اوہدی ماں ایہہ آکھ کے میرے گل پے جاندی اے بھئی ہویا کیہ، ایہناں واسطے ای کمائی دے نیں ناں، منڈا کھنڈا اے حالے کیہڑا ایڈا سیانا ہو گیا اے، توں ہر ویلے ایہدے مگر ای پیا رہنا ایں کوڑھیا۔ میں بتھیرا سمجھانا واں بھئی کپتئیے بڈھئیے ستاراں سالاں دا ہو کے وی حالے اُوہ سیانا نئیں ہویا تے فیر کدوں ہونا ایں، ؤ کر لو گل، اگوں آکھ دی اے، توں چالھیاں سالاں دا ہو کے وی حالے سیانا نئیں ہویا اوہ وی تے تیرا پتر اے۔ ہن دسو بندہ کیہ گل کرے۔’’بنچ تے بیھٹے دوجے بندیاں نوں شیشے تھانیں ہسدیاں ویکھ کے اوہنے نویں آؤن والے بندے ول ویکھیا۔ اوہ کسے ڈوہنگی سوچ وچ ڈبیا ہویا سی، سراج ولوں ویہلا ہو کے اِک ہور بندے نوں اٹھ کے کرسی والے آؤندے ویکھ کے اوہنے آکھیا’’چاچا توں حالے منٹ کو کھلو، میں ایہہ بھائی ہوراں نوں فارغ کرلاں، نالے مینوں تیرے نال اک کم وی اے، اک ضروری مشورہ کرنا ایں‘‘ تے فیر اوس بندے نوں آکھن لگا ’’آؤ جی بسم اللہ‘‘۔ کرسی تے بٹھا کے اوہدے کُرتے دا کالر پٹھا کر کے گل وچ تولیا پا کے داڑھی نوں صابن لاندے ہوئے اوہنے اوہدے ول گوہ نال ویکھیا۔ پکی سڑک کنڈھے پنڈ دے نِکے جہے سٹاپ تے تِن چار سال توں حمام کھولی بیھٹے سردارے نوں اوہ بندہ کجھ اوپرا جیہا لگا۔ استرے وچ نویں بلیڈ دا ٹوٹا اڑنگ دے ہوئے آخر اوہنے پچھ ای لیا’’بھاجی کتھے رہندے او، ایس علاقے وچ اج تہانوں پہلی واری ویکھیا اے‘‘شیو کران والے نے اوازار جیئی آواز وچ آکھیا ’’راجہ صاحب میں بڑی کالھی وچ آں، تہاڈی مہربانی مینوں ذرا چھیتی فارغ کر دئیو، میں پہلوں ایں بڑا لیٹ ہو گیا واں۔‘‘ سردارے نے شرمندہ جیہا ہو کے آکھیا’’بسم اللہ جی، ہُنے شیو ہوئی لو‘‘ تے فیر جانے ول ویکھدے ہوئے آکھن لگا’’چاچا جانیا نہ تے توں پہلی گڈی دی مٹھیائی کھوائی سی، تے نہ ہن ای تیرا کوئی موڈ لگ دا اے، ویسے ماشاء اللہ گڈی چنگی اے نویں کڈھائی اے۔‘‘
’’باہر کھلوتے ہوئے اپنے نویں موٹر سائیکل ول ویکھدے ہوئے جانے نے آکھیا’’نویں تے نئیں، بس اینویں مہینہ کو چلی اے، بندہ لوڑوند سی ایس لئی ویچ گیا، باقی پُتر میں تیرے کولوں کوئی بھجیا ہویا واں توں میرے یار دا بچہ ایں، مٹھیایاں بڑیاں، جدوں جی کیتا کھالویں۔‘‘
سردار اوس بندے دی شیو کر کے پانی والا پھوارا مار کے نال اوہدا مونہہ صاف کرن لگا تے حمام چہ بیھٹے اِک ہور بندے نے شیو کران والے نوں گھبرائی ہوئی اُچی ساری اواز وچ آکھیا’’بھائی اوہ اِک کالا جیہا منڈا تیری موٹر سائیکل لے کے بھج گیا ای۔‘‘ شیو کران والا گھبرا کے کرسی توں اٹھ کے باہر ول بھجیا تے فیر اوہناں دے کول آکے رون ہاکا جہیا ہو کے آکھن لگا’’بھراؤ میری کوئی مدد کرو میں اک دکھی پر دیسی آں، گڈی وچ تیل مکن ای والا اے، اوہ بوہتی دور نئیں جا سکدی، جے اسیں اوہدا پچھا کرئیے تے اوہنوں پھڑ سکنے آں۔‘‘ اچانک جانے نے اپنی نویں گڈی اسٹارٹ کر کے اوہنوں آکھیا ’’آمیرے پچھے بیٹھ، اوہ بے غیرت بچ کے نئیں جا سکدا‘‘ سخر دوپہر وچ اوہدا پچھا کر دے کردے اوہناں نوں گڈی جاندی ہوئی نظر آرہی سی، جانے نے سپیڈ ہور ودھا دتی، فاصلہ گھٹ رہیا سی، پچھے بیھٹے ہوئے بندے نے ہوکا بھر دے ہوئے جیویں اپنے آپ نوں آکھیا’’ ربّ سوہنیا کرم کر دے اج تے مصیبت تے مصیبت پیندی جاندی اے۔‘‘ تے فیر جانے نوں آکھن لگا ’’میرا اِکو اِک پُتر اے تے اج اٹھواں دن ایں اوہنوں گواچیاں، میں اوہنوں لبھ لبھ کے پاگل ہوگیا واں، ایسے پریشانی وچ چابی وی موٹر سائیکل وچ لگی رہ گئی۔‘‘جانے نے اوہنوں تسلی دیندے ہویاں آکھیا ’’بھراوا فکر نہ کر، رب چنگیاں کرے گا۔‘‘
پکی توں کچی ول موڑ مڑ دیاں اوہناں ویکھیا، اگے جان والا موٹر سائیکل لما پا کے اوہنوں ہلا رہیا سی، جانے نے بڑے جوش وچ آکھیا’’لگدا اے تیل مک گیا اے‘‘ اوہ حالے دور ای سن کہ اوہنے موٹر سائیکل سدھا کر کے فیر نسانا شروع کردتا، پر تھوڑا جیہا اگے جا کے اِک چو رستے کول گڈی بند ہو گئی۔ اوہ اوہناں نوں لاگے آؤندیاں ویکھ کے موٹرسائیکل اوتھے ای سٹ کے گلی پیلی دے سنگھنے کماد دے وچ جا وڑھیا، اُوہ اپنی موٹر سائیکل پھڑ کے ترن لگا تے جانے نے اوہنوں روک دے ہوئے آکھیا۔ ٹھہر جا بھائی ایہنوں اینویں نئیں چھڈنا، ایتھے میرا بھتیجا تھانیدار لگا ہویا اے، توں کماد دے دوجے پاسیوں دی آ تے میں ایدھروں جانا واں، بچ کے کتھے جاوے گا۔ اوہ اوہنوں لبھدے لبھدے کماد دے وچکار جہے اپڑے تے باہر موٹر سائیکل اسٹارٹ ہون دی آواز آئی، اوہ دونویں بھج کے باہر آئے تے اوہ کالا جیہا منڈا جانے دی نویں موٹر سائیکل پکی ول بھجائی لئی جا رہیا سی۔ جانا رولا پاندا ہویا اوہدے مگر بھج دا بھج داجدوں پکی دے لاگے اپڑیا تے اوہنے بڑی تسلی نال لک نال لوہیٹی تیل نال بھری ہوئی موٹر سائیکل دی ٹیوب دا وال کھول کے تیل موٹر سائیکل دی ٹینکی وچ سٹیا تے گڈی اسٹارٹ کردتی۔ اوہدے بُلہاں تے نمی نمی مسکان سی، گڈی بڑی تیزی نال استاد بالے دی اوس ورکشاپ ول بھجی جا رہی سی۔ جتھے اوہدا بھتیجا نویں موٹر سائیکل دی نمبر پلیٹ بدل کے اوہنوں اڈیک رہیا سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels