Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> امر جلیل >> ''زندگی''

''زندگی''

امر جلیل
December 20th, 2006
5 / 5 (1 Votes)
کینجھر دے کنڈھے چلدے چلدے، سندھو نے آ کھیا '' زندگی دا پندھ بھیتاں بھریا اے''۔
میں کھلوتا رہیا، سندھو ول ویکھیا، ایہہ کجھ قدم چک کے کھلو گئی تے مینوں ویکھن لگ پئی۔
سندھو نے پچھیا ''کیہ ویکھنا ایں؟''
میں آ کھیا، ''تقدیر دا فیصلہ۔''
اوہنے پچھیا '' تقدیر تے بھروسہ اے تینوں؟''
میں جواب دتا۔ ''نہیں وی تے ہے وی۔''
اوہنے پچھیا، ''سبب؟''
میں جواب دتا ''میں تیرا آں، تیرے لئی آں، پر فیر وی تیرے کولوں دور آں، ایس وچ تقدیر دا دخل نہیں اے تے فیر کیہدا اے؟''
سندھو نے پچھیا، ''تیرے حال نال ملدی جلدی شاہ لطیف دی اک بیت دی لائین سناواں؟''
ہاں کہندیاں میں سر نوں جھکایا۔
سندھو شاہ لطیف دے بیت دی اک لائین گنگناؤندیاں آکھیا۔
ترجمہ: ''کجھ دور رہ کے وی دل دے بڑے نیڑے ہوندے نیں۔''
میں آ کھیا، ''شاہ لطیف نے ایہہ بیت میرے لئی آ کھیا اے''
اوس نے پچھیا، ''اینا یقین اے؟''
میں جواب دتا، ''میرے کول ہُندے ہوئے وی توں دور نہ ہویں، تے میرے توں دور ہندیاں وی مینوں کول محسوس نہ ہوویں تے میں شاہ دے بیت دے بارے وچ ایڈا وڈا دعویٰ نہ کردا۔
سندھو دے متھے تے تیوڑیاں چڑھیاں تے اوہ منہ پھیر کے کینجھر دے کناریاں دے نال چلن لگی۔
میں اوہدے قدماں نال قدم چکدیاں آ کھیا۔ میں تیرے پچھلے فقریاں نال سہمت نہیں آں''
اوس نے آکھیا ''کیہڑا فقرہ؟''
میں آ کھیا ''توں آ کھیا سی 'زندگی دا سفر پر اسرار اے'۔''
اوہنے پچھیا، ''تے کیہ زندگی دا پندھ بھیتاں بھریا اے؟''
میں جواب دتا، ''نہیں! زندگی دا سفر بے اعتبارا اے۔''
فیر پچھیا۔ ''بے اعتبارے توں تیری کیہ مراد اے؟''
میں جواب دتا ''میرے ورگے بندیاں دا سفر ادھ واٹرا رہ جاندا اے ''۔
اوہنے پچھیا ''کیوں؟''
میں جواب دتا ''اسیں وقت دے ہتھوں دغا کھا بیٹھے آں۔''
فیر کافی دیر تیک اسیں چپ چان کینجھر دے کنڈھیاں دے نال نال ٹر دے رہے۔
سندھو نے میرے توں پچھیا، ''نوری تے جام تماچی دے بارے وچ کیہ رائے اے؟''
میں جواب دتا، ''نوری مظلوم سی''
حیرت وچ پچھیا ''کیویں؟''
میں آ کھیا، ''اک بادشاہ نے اوہدے نال ویاہ کر لیا، اوس ویاہ وچ نوری دی مرضی دا کوئی وی دخل نہیں سی۔''
سندھو نے آکھیا، ''جام تماچی نے اوہنوں ریشم دی رانی بنایا سی، دولت نال دل دا ویران ویہڑا آباد نہیں ہُندا اے۔''
''سندھو!'' میں آکھیا ''نوری حال توں مطمئن نہیں سی۔ ایہہ اپنے ماضی نال ناطہ جوڑن لئی نویاں پوشاکاں تے زیور چھڈ کے اپنے پرانے پاٹے ہوئے کپڑے پاؤندی سی، جیہدے نال محبت سی اوہنوں بُھل نہ سکی۔ اوہدے توں جدا ہون توں مگروں وی اوہنوں یاد کر دی رہی سی۔ نوری دا حال ماضی لئی ماتم کر دے گزریا سی۔''
سندھو نے پچھیا ''سُکھ دیندیاں شیواں محبت دی محرومی نوں بھر نہیں سکدیاں؟''
اوہدیاں ڈوہنگیاں اکھاں وچ ویکھدے آ کھیا ''چاہتاں دے پالن ہار اک محبت تے ہزاراں سکھ قربان کر دیندے نیں۔''

Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels