Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> مُلا کہانیاں >> مُلا کہانیاں

مُلا کہانیاں

December 3rd, 2007
4.5 / 5 (10 Votes)
مرن جیون دا اخیر
ہک دیہاڑے مُلا نصرالدین نوں ہک بندہ ملیا تے آکھن لگا، مولوی جی، تہاڈے کولوں ہک نکی جہی گل پچھنی سی۔ اجازت اے؟ ملا آکھیا، جے پچھ لیں تے اجازت اے جے نہ پچھیں تے کوئی اجازت شجازت نہیں۔اوہ بندہ آکھن لگا، مولوی جی! ایہہ لوکی کدوں تائیں انجے جمدے تے مردے ریہن گے؟ ملا آکھیا، جواناں صبر کر۔ جدوں تائیں دوزخاں تے جنتاں بھر نہیں جاندیاں ، اودوں تیکرایہہ جمدے تے مردے ہی ریہن گے۔

ویاہ کیہ شے ہے؟
ہک جوان جہے مُنڈے ملا نصرالدین کولوں پچھیا، مولوی جی، ایہہ ویاہ کیہ ہوندا اے۔
ملا آکھیا، اوئے جھلیا ساری دیہاڑی لتر پولا تے گاہل مندا تے راتین رل کے گھراڑے مارن دا ناں ویاہ ای ۔ سمجھیا ایں؟

گواچے کھوتے دی خوشی
ہک واری ملا نصرالدین دا کھوتا گواچ گیا۔ اوہ کھوتا لبھن نکلے تے بڑے خوش خوش سیٹیاں ماردے تے ٹپوسیاں ماردے شہر وچ پھردے اپنے کھوتے دا پتہ پچھدے رہے۔ لوکاں سوچیا، کھوتا کواچ گیا سو پر ملا ایڈا خوش کیوں اے۔ اوہناں ملا کولوں پچھیا ، تہاڈا کھوتا کھڑیچ گیا اے تے تسیں بڑی موج نال سیٹیاں ماردے وتدے ہو ۔ کیوں؟
ملا آکھیا، میں ایس لئی خوش ہاں جو کھوتے دے کھڑیچن ویلے میں کھوتے دے اُتے نہیں ساں چڑھیا ہوئیا، نہیں تاں میں وی نالے ہی گواچ جانا سی۔

وکھو وکھ اُمتاں
ہک دن ملا نصرالدین دیاں بیلیاں ملا کولوں ہک بڑا ای بے سوادا جیہا سوال پچھ لیا۔آکھن لگے، ملا جی تسی اوہناں لوکاں نال بیہہ کے خوش ہُندے او جیہڑے تہاڈے توں پہلے ویاہے گئے سن یاں اوہناں نال جیہڑے تہاڈے مگروں ویاہے گئے سن۔
ملا آکھیا، کسے نال وی نہیں۔
اوہ کیوں ، بیلیاں پچھیا۔
اوہ ایس لئی جو جیہڑے تاں میرے کولوں پہلے ویاہے گئے سن اوہ میرے نال نہیں کھلدے تے جیہڑے میرے توں بعد ویاہے گئے ہین اوہناں نال میں نہیں کھُلدا۔اسیں ترے وکھو وکھ اُمتاں ہائیں جیہناں جنت وچ جا کے وی اکدوجے توں اوہلا ای رکھنا اے۔

میوزک
ہک رات ملا اپنے دو شاگرداں نال کسے وعظ دی مجلس توں واپس آ رہیا سی۔ رستے وچ اوہناں ویکھیا جو کجھ چور ہک گھر دا جندرا پئے بھن دے نیں۔ ملا سوچیا جو ایہناں نوں للکریا تاں ایہہ کائی شے کڈھ ای نہ مارن۔ اوہناں کول ہتھیار جاپدے ہین۔ ملا مُنڈیاں نوں آکھیا جو چپ کر کے نکل چلو۔
پر ایہہ کردے کیہ پئے ہین ،ملا جی!؟ ہک مُنڈے پچھیا۔
اوئے ایہہ میوزک وجا رہے ہین۔ مُلا آکھیا
پر واجیاں دی آواز تاں کوئی نہیں پئی آؤندی۔ مُنڈے آکھیا
پُتر ایس قسم دے واجیاں دی اواز سویر نوں آؤندی ہُندی اے۔ ، ملا ہوراں جواب دتا

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels