Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> ناول >> گھٹے رُلدے لوک >> گھٹے رُلدے لوک - مُکھ١٤

گھٹے رُلدے لوک - مُکھ١٤

فیودور دوستوئیوسکی
February 24th, 2008
5 / 5 (2 Votes)

میں نتاشا ول کویل نال اپڑیا، دس کُو وج چُکے سن۔ایہنیں دنیں اوہ سیمونوفسکی پُل دے نیڑے فونتانکا روڈ تے رہ رہی سی۔ایہہ مکان چوتھی منزل تے سی فلیٹاں دے اک گندے بلاک وچ جیہڑا کسے بیوپاری کلوتوشکن دی ملکیت سی۔ جدوں اوہ شروع شروع وچ گھروں نٹھی سی اوہنے تھوڑا چِر الیوشا نال اک چنگے جیہے فلیٹ وچ لنگھایا۔ایہہ چھوٹا تے سی پر خوبصورت تے آرام دائیک لیٹنسنایا روڈ تے اک عمارت دی تیجی منزل تے سی۔ پر کیہ نوجوان صاحبزادے ہوراں دے کماؤن دے راہ بند ہون لگے۔ اوہ سنگیت دا اُستاد تے ناں بنیا پر پیسے اُدھار چُک چُک کے تھوڑے چر وچ مقروض ہوگیا۔ اوہنے فلیٹ شنگھارن تے نتاشا نوں تحفے تے چڑھاوے دیون وچ سارا روپیہ اُڈا دتا حالانجے نتاشا ایہناں فضول خرچیاں نوں روکن دے جتن کردی رہندی سی، اوہنوں دبکے ماردی تے کدی کدی رو وی پیندی سی۔

الیوشا جذباتی تے بے اثرا سی۔ اوہ ہفتے ہفتے ایہناں سُفنیاں دا چس مانندا رہندا پئی اوہ ہُن نتاشا نوں کیہڑا تحفہ دیوے گا اوہ ایہنوں کیویں قبول کرے گی۔ اوہ ایس معاملے نوں سواد لے لے دسدا تے پہلاں ای میرے کَنیں پا دیندا پئی اوہنے کیہ منصوبہ سوچ رکھیا اے اوہدے دل وچ کیہ اے۔ لیکن جدوں نتاشا مونہہ بناؤندی، رُسدی تے اتھرو کیرنے شروع کردیندی تے اوہ وچارا انج دا کھسیانا ہوجاندا پئی ویکھن والے نوں اوس تے ترس آجائے۔ جیویں جیویں ویلا لنگھدا گیا ایہہ تحفے تحائف آپسی بدکلامی، رنجش تے جھیڑے دا کارن بنن لگے۔ ایس توں وکھ الیوشا نے نتاشا نوں دسے بناں ڈھیر روپیہ روہڑ دتا۔ یاراں بیلیاں وچ جی لاؤندا رہیا۔نتاشا دا حق دوجیاں تے واریا۔ طرحاں طرحاں دیاں جوزفین، منناواں دی آواجائی ہون لگی پر فیروی اجے اوہنوں نتاشا نال گوڑھی محبت سی۔ ایس محبت وچ اک طرحاں دا درد تے ٹھیس لُکی سی۔

اوہ بتھیری وار مینوں ملن آیا تے اُداسیاں سیاپیاں وچ پیا ہُندا تے آکھن لگدا پئی میں تے اپنی نتاشا دی چیچی جوگا وی نہیں۔ میں بہوں اُجڈ، بد نیت بندہ آں، ناں تے اوہنوں سمجھنا میرے وس وچ اے، ناہیں اوہدی محبت دی شان مطابق اے۔ ایہدے وچ ماسہ بھر سچائی ضرور سی۔ اوہناں دونواں وچکار برابری نہیں سی۔ نتاشا ساہمنے اوہ بالڑا لگدا تے نتاشا وی اوہنوں بالڑا ای سمجھدی سی۔ اوہنے ہنجھو بھریاں اکھیاں نال کسے جوزفین نال اپنے گنڈھ جوڑ بارے دس پائی نالے میتھوں سونہہ لئی کہ میں نتاشا نوں ایس بارے کجھ ناں دساں گا لیکن جدوں ساریاں سونہاں قسماں مگروں اوہ جد نتاشا ساہمنے کنبدا ہوئیا واپس پرتیا تے نتاشا نے پہلی نظر وچ سمجھ لیا معاملہ کیہ اے۔ نتاشا وچ رقابت دی اگ بوہت سی۔ میری عقلے نہیں پیندا اوہ اوسدیاں ساریاں بھُلاں چُکاں نوں معاف کیویں کردیندی سی۔

عام طور تے انج ہندا الیوشا میرے نال گھر اندر وڑدا، بوہت ڈردے ڈردے نتاشا نال گل کیتی، بوہت کن اکھیاں نال نتاشا نوں تکیا۔۔۔۔۔اوہ ویکھدیاں ای تاڑ گئی کہ الیوشا توں کوئی غلط حرکت ہوگئی اے پر جان بُجھ کے انجان بن جاندی۔ اوہ کدی ایس سوال نوں چھیڑن وچ پہل ناں کردی سی، ناں ای پُچھ گِچھ کردی سی سگوں دُونی محبت نال اوہنوں گل نال لا لیندی، اوہدے ناں ہور ودھ پیار محبت کردی تے ہسدی کھیڈدی ۔۔۔۔۔۔ایہہ اوہدی پہلے توں سوچی سمجھی چال یاں اداکاری ناں ہندی۔ نہیں، اوہدی نیک سیر ت نوں چوکھا سکون تے مزا اودوں ای لبھدا اوہ اپنی غلطی توں نموشی کرے تے بھُل جاوے۔ ایویں الیوشا نوں معاف کردیون دا عمل اپنے اندر کجھ خاص جیہی کھچ ہُندی۔ ایہہ ٹھیک اے کہ ہُن تیک معاملہ صرف جوزفین جیہیاں عورتاں دی ذات تائیں سی۔

جدوں الیوشا ویکھدا پئی نتاشا ایویں اُلری اے تے معاف کرن تے تُلی ہوئی ہے تے فیر بھید نوں سینے وچ دب ناں سکدا تے چھیتی کھل کے کسے دے پُچھے بناں ای سارا قصہ کہہ سُناؤندا تانجے ضمیر دا بھار ہولا کرلوے تے بقول اپنے ــ''پہلے جیہا'' ہوجاوے۔ نتاشا جدوں معاف کردیندی تے الیوشا نوں بڑا چس آؤندا ، کدی کدی تے انج وی ہُندا کہ ایدھر نتاشا نے بخشیا اودھر اوہ خُشی دے مارے رون لگدا، ہور نتاشا نوں خُشی تے پیار نال چُمن تے سینے نال لگاون لگ پیندا فیر اوہنوں نیانیاں ہار کھرے ہون دا جوش چڑھدا تے جوزفین نال اپنا سارا کیتا کرایا سُنا دیندا تے خوب ہاسے ماردا، نتاشا نوں شاباشیاں دیندا تے ہور اوہدیاں خوب بھلائیاں کردا انج ادھی رات ہس کھیڈ وچ لنگھ جاندی۔ جدوں ساری رقم ہتھوں نکل جاندی تے فیر شیواں ویچن دی واری آؤندی۔

نتاشا دے زور تے فونتانکاروڈ تے گھٹ بھاڑے دا سستا جیہا مکان لے لیا۔ ایہدے مگروں گھر دا سامان ویچ ویچ کے کم چلدا رہیا ایتھے تیک نتاشا نوں اپنا لیڑا وی ویچنا پے گیا تے کم لبھنا شروع کردتا۔ جدوں الیوشا نوں ایس دی خبر ہوئی تے ہرکھ دی کوئی حد ناں رہی۔ اوہنے اپنے آپ تے لعنت پھٹکار کیتی تے چیکیا تے کرُلایا میں آپ اپنیاں کیتیاں دا ذمے وار آں، پرایس جھٹ وچ حالت بھورا وی نہیں سنبھلی۔ ایس سمے تائیں اوہدے اپنے اخیرلے دال دلیئے دے کارن وی مٹ چُکے سن۔ ہُن نتاشا دے ہتھ کجھ وی نہیں سی اڈ ایس دے پئی اوہ کم کرے پر آمدنی تھوڑی جیہی سی۔

شروع شروع وچ جدوں نتاشا تے الیوشا اکٹھے رہیا کردے سن تے الیوشا اپنے پیو نال ایس گل سے سخت جھیڑا کردا سی۔ پرنس والکوفسکی نے اپنی پُتر دی کاتیرنا فیودورونا فیلیمونوا یعنی کاؤنٹیس دی مترئی دھی نال ویاہ کرواؤن دا ٹھانیا ہوئیا سی اوہ اجے منصوبے تیک سی۔ لیکن اوہناں دا زور بوہت ودھیا ہوئیا سی۔ پیو پُتر نوں لے کے جاندا تانجے اوہناں دی مُلاقات کرائی جاوے۔ ایس توں وکھ دلیلاں نال، سختی نال اوس سمجھاون وی کوشش وی کیتی پرکاؤنٹیس پاروں ایہہ منصوبہ ناکام ہوگیا۔ اوہنے ٹال دتا پئی تھوڑا کُو ویلا لنگھ جان دیوو۔۔۔۔ اوہنوں چنگی طرحاں خبر سی پئی پُتر ہوریں دماغ دے کمزور تے ارادیاں دے کچے ہین اوہنوں آس سی ایہہ محبت دا جنون چار دناں دی چاندنی اے۔ الیوشا کتھے نتاشا نال ویاہ ناں کرلوے ایس معاملے پرنس نے سرکھپانا چھڈ دتا سی۔

ایس جوڑے نے آپ وی ویاہ دے معاملے نوں اوس دیہاڑ تیک چھڈ سُٹیا سی جد تائیں پیو پُتر وچکار صلح صفائی نہیں ہوجاندی یاں حالات ناں بدل جاندے۔ بہرحال نتاشا آپ وی ایس تے راضی نہیں سی کہ گل کیتی جاوے۔الیوشا دے اپنے مونہوں میرے ساہمنے گل نکل گئی پئی ابے ہوریں ایس ساری کہانی توں بڑے خُوش لگدے ہن کیونجے انج اخمنیف نوں نیواں ہونا پئے گا۔وکھاوے واسطے پرنس نے اپنے پُترنال ناراضگی دا ویہار کرلیا تے جیب خرچ وی گھٹ کردتا سی( پُترہوراں نوں جیب خرچ دی بڑی شکایت سی) تے ہُن بالکل بند کرن دی دھمکی دیندے سن۔ کجھ ویلا ناں لنگھیا تے کاؤنٹیس دے پچھے پچھے پرنس وی پولینڈ چلا گیا۔ کاؤنٹیس ایتھے کسے کم لئی گئی سی۔ پرنس ایس واری منگنی دی صلاح لے کے گیا سی۔

ایہہ ٹھیک اے پئی اجے الیوشا دی عمر ویاہ دی نہیں سی پر ایہدا کیہ علاج پئی کُڑی بڑی مالدار سی تے انج دے موقعے نوں ہتھوں نہیں جان دینا چاہیدا سی۔اوڑک پرنس دی اپنی منت وچ کامیابی ہوئی۔ ایہہ خبر سانوں اُڈدی اُڈدی اپڑی پئی ایہہ معاملہ اپنی منشا مطابق چل رہیا اے۔ جیہناں دناں دی میں گل کررہیا آں اوہنیں دنیں پرنس پولینڈ توں پیٹرز برگ پرت چکیا سی۔ اوہ بڑے پیار نال اپنے پُتر نوں ملیا لیکن جدوں اوہنے ویکھیا پئی الیوشا نے اجے تائیں نتاشا نال تعلقات رکھے ہوئے نیں، اوہنوں ایہہ بوہت بھیڑا جاپیا تے حیرانگی ہوئی۔ اوہ شک کرن لگا تے تھوڑا کُوگھابریا وی۔ اوہنے سختی کیتی تے پُتر تے بھار پایا کہ ایہناں گنڈھ جوڑاں نوں مُکا دیوے پر چھیتی ای اک چنگا ناٹک ہتھ آیا تے اپنے پُتر نوں کاؤنٹیس ول لے گیا۔ پہلے کھسم توں کاؤنٹیس دی مترئی دھی نے اجے بال پُنے دیاں بروہاں توں باہر پیر کڈھیا ہووے لیکن بوہت سوہنی سی، نک سک درست، شاداب، ذہین، ہوشیار، سنکھی، بے مثال، شریف دل تے دِن ہار چِٹی پاک روح دی مالک۔۔۔۔۔۔۔۔

پرنس نے گویڑ لایا چھے مہینے ہوچکے ہین، اینے چِر دا کجھ تے اثر ہویا ہووے گا۔ ہُن الیوشا نوں نتاشا وچ کسے نویں پن دی کھچ تے نہیں پیندی ہووے گی، ہُن اوہ پیو دی صلاح مطابق منگیتر بارے چھے مہینیاں توں وکھرا سوچے گا۔ اوہ اپنے گویڑاں توں اک حد تیک ضرور ٹھُکواں سی۔۔۔۔۔۔الیوشا واقعی ہُن ایدھر نوں کھچیاہوئیا سی۔ ایناں ضرور چیتے کروادیواں ہُن پیو نے اپنا ورتارا بدل لیا سی پُتر نال شفقت تے محبت کرن لگ پیا سی (پر اجے وی اک رُپیہ دیون نوں تیار نہیں سی)۔ الیوشا نوں جاپیا پئی پیو نے اپنا پیار وکھا دتا ہے پر ایہدے پچھے اوہناں دی اوہی ضد تے ارادہ لُکیا اے۔

الیوشا نوں ایس گل تے ہرکھ ہویا لیکن ایناں نہیں جِناں اوہنوں کاتیرنا فیودوروونا نال روزانہ ملاقات ناں ہون دا دُکھ ہندا۔ مینوں پتہ سی کہ الیوشا نوں نتاشا کول گئے اج پنج دن ہوچکے سن۔ ہُن اخمنیف وچ اوہدے گھر جاندیاں مینوں پریشانی ہون لگ پئی سی کہ بھلا اوہ مینوں کیہڑا سوال پُچھے گی اجے میں گھر توں دور ای سی مینوں نتاشا دی باری توں روشنی نظر آؤن لگی۔ ساڈے وچکار چراں توں طے سی کہ جد نتاشا نوں میری سخت لوڑ ہووے گی تے مینوں بلاون تے مجبور ہووے گی تے باری وچ دیوا رکھ دیوے گی تانجے میں جیکر اوتھوں لنگھاں ( میں اوتھوں ہرشام لنگھدا ساں) تے دیوا ویکھ مینوں پتہ لگ جاوے کہ مینوں اُڈیک رہی اے تے نتاشا نوں میری لوڑ اے۔ ایدھر کجھ دناں توں باری وچ ہروار روشنی رہن لگ پئی سی۔۔۔۔۔۔۔۔۔۔۔۔

(چلدا)
اُلتھا: جیوے پنجاب

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels