Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> ناول >> گھٹے رُلدے لوک >> گھٹے رُلدے لوک۔ قسط چھیویں

گھٹے رُلدے لوک۔ قسط چھیویں

فیودرد ستوئیفسکی
November 25th, 2007
5 / 5 (2 Votes)
مُکھ٤
نتاشا تے پرنس دے مُنڈے دا چکر


ایہہ تے میں پہلاں ای دس چُکاں ہاں کہ پرنس دی تیویں مرچکی سی۔ اوہنے نوجوانی وچ پیر پاؤندیاں ای ویاہ کر لیا سی تے ویاہ روپئے واسطے کیتا سی۔ اوہدے ماپے ماسکو وچ اپنی ساری دولت کھوا چکے سن تے اوہناں توں پرنس نوں وراثت چوں خورے ای کجھ لبھا ہووے۔ واسی لیفسکوئے دی جاگیر وار وار رہن رکھی گئی تے فیر اوہدے تے قرض وی بوہتا چڑھ گیا سی۔ ٢٢ ورہے دی عمر وچ پرنس دا حال ایہہ سی پئی مجبور ہو کے اوہنوں ماسکو وچ سرکاری ملازمت کرنی پئی تے ہتھ وچ پیسے اُکا ای نہیں سن۔ اوہ اپنی زندگی دا مُڈھ ایویں بنھ رہیا سی جیویں وڈے گھراں دے کنگلے وارث کردے نیں۔

ویاہ نے پرنس نوں بچا لیا۔ اک بیوپاری دی وڈی عمر دی دھی نال اوہنے ویاہ کر لیا۔ حالانجے بیوپاری نے داج دے ماملے وچ اوہدے نال دھرو کیتا پر فیر وی اینا ضرور ہتھے لگا کہ پرنس نے تیویں دیاں روپئیاں توں رہن رکھی جائیداد چھڈا لئی تے اپنے پیراں تے کھلون جوگا ہو گیا۔ بیوپاری دی دھی کول کول ان پڑھ سی، خورے دو چار لفظ جوڑ سکدی ہووے، مونہہ مہاندرے دی وی بھیڑی سی۔ پر اوہدے اندر کجھ سُچیاں باتاں وی سن۔۔۔۔۔۔۔۔۔پئی اوہ نیک نیت تے بے زبان عورت سی۔ ا یس وجہوں جیہڑا بوہتے توں بوہتا فیدہ ہوسکدا سی اوہ پرنس نے چُکیا۔

ویاہ دے پہلے سال مگروں اوہنے تیویں نوں اوہدے پیو کول ماسکو چھڈ دِتا، تے آپ''۔۔۔۔۔۔۔'' صوبے وِچ اپنی نوکری تے چلا گیا۔ ایس وچکار اوس توں اک نیانا ہو چکیا سی۔ اوہنے پیٹرز برگ وِچ اپنے اک کھرپینچ رشتے دار راہیں بوہت اہم عہدہ حاصل کرلیا سی۔ اوہدی روح بے چین سی کہ جیویں تیویں اُچے عہدے تے اپڑے، اگے ودھے، اپنا مستقبل بناوے،تے ایہہ گویڑ لاؤنداکہ موجودہ سوانی نال ناں تے اوہ ماسکو وِچ رہ سکدا ہے ناں اِی پیٹرزبرگ وِچ، اوہنے فیصلہ کیتا کہ جد تیک حالات پلٹی ناں مارن گے اوہ دور دور دے ضلعیاں وچ رہوے گا۔کہندے نیں کہ شادی دے پہلے سال وِچ اِی اوس نے تیویں نال جو بے رحمی دا ورتا کیتا اوہ اوس نوں قبرے پاون لئی ودھیر سی۔

نکولائی سرگینچ ایس افواہ تے بوہت بھخدے سن تے پرنس وَلوں صفائی دِیندے سن تے کیہا کردے سن کہ پرنس جیہا بندہ بھیڑے ورتا کدی کر اِی نہیں سکدا۔ بہرحال کوئی ست ورہیاں مگروں پرنس دی تیویں چلانا کر گئی تے سوگی خاوند چھیتی پیٹرز برگ آ گیا۔ ایہہ وی وقوعہ ہے کہ اوس بندے نے پیٹرز برگ اندر سنسنی جیہی پھیلا دِتی۔ دولت کول سی، صورت چنگی بھلی سی، جوانی وی سی، ودھیر چنگیاں خوبیاں وی سن۔ گلاں وِچ چٹخارہ سی، شوق وی ستھرا سی ہور فیر ہمیشاں ہشیار رہندا سی، ایہو سبھ گلاں اِنج سن کہ اوہنوں پیڑزبرگ وچ کوئی قسمت جوگ نہیں سگوں اجیہا شخص سمجھاگیا جیہڑا صاحب حیثیت سی۔
 
کیہا جاندا ہے کہ پرنس وِچ سچی کوئی ایہو جیہی شے سی جیہڑی دِل نوں کھچ پاؤندی سی، لوکاں تے چھا جاندی تے طاقتور سی۔ عورتاں نوں ایہہ شخص بوہت بھاؤندا سی۔ کوئی وِی مٹیار جیہڑی سوسائٹی وِچ چوکھی مشہور ہُندی اوہدا ماملہ پھس پیندا تے اوہدے بارے طرحاں طرحاں دے چرچے ہون لگ پیندے۔ حالانجے سانبھ تے دور اندیشی دا مادہ اوہدی فطرت وِچ سی تے کنجوسی دِیاں اخیراں تیک اپڑ چکیا سی، فیر وی اوہنے چوکھا رُپئیہ ویہایا۔ خاص خاص لوکاں توں جوئے وِچ موٹیاں موٹیاں رقماں ہاریاں پر متھے کوئی وَٹ پائے بغیر رُپئیا دِیندا رہیا۔ لیکن اوہ پیٹرزبرگ ایس واسطے نہیں آئیا سی پئی ایتھے سیر سپاٹے کرے۔ اوہ ایس تے جُٹیا سی کہ ایتھے اپنا کیریئر تے اَگا بنائے گا تے اوڑک اپنی پوزیشن تگڑی کرے گا۔ ایہہ ٹیچا اوہنوں حاصل ہوگیا۔

اوہدا اک معزز رشتے دار کاؤنٹ نالنسکی، جیس کول اوہ کسے ملازمت دے سلسلے جایا کردا سی تے خورے ایس حالت وِچ اوہنوں پُچھدا تک نہیں سی ،پر اَج سماج وِچ اوہدی اُچچ حیثیت توں اِینے مُرید ہوچکیا سی کہ اوہدے اُتے واری واری جاندا تے جی جی کرن لگ پیا۔ ایتھے تیک کہ پرنس دے ستاں ورہیاں دے نیانے نوں وِی پالن لئی اپنے کول رکھ لیا۔ میں واسی لیفسکوئے وِچ پرنس دا آؤنا تے اخمنیف ٹبر نال گھُل مل جانا جیہڑا میں دَسیا ہے ایہہ وِی اوسے ویلے دی گل ہے۔ اوڑک کاؤنٹ صاحب دے اثر تے پہنچ پاروں اوہنوں سفارتخانے وچ بہوں اہم عہدہ مل گیا تے فیر ملکوں باہر چلا گیا۔

ایس دے مگروں پرنس دے بارے بھیڑیاں بھیڑیاں خبراں آؤن لگیاں۔ مثال دے طور تے ایہہ خبر پھیلی کہ بدیس وِچ کوئی بڑی بھیڑی واپری ہوئی اے لیکن حقیقت دا کسے نوں پتہ نہیں سی۔ لوکاں نوں صرف اینا پتہ سی کہ اوہنے اپنی جاگیر وِچ چار سو کمیریاں دا ہور علاقہ شامل کرلیا ہے۔ کئی ورہیاں مگروں کِتے اوہ بدیس توں پرتیا۔ اوس ویلے اوہ بوہت اُچے عہدے تے سی نالے آؤندیاں اِی اوس نوں پیٹرزبرگ وِچ اک بہوں اُچیچ پدھر لبھ گئی۔ اخمنیفکا تعلقے وِچ ایہہ خبر زوراں تے سی کہ پرنس چھیتی دوجا ویاہ کرن والا ہے تے دوجا ویاہ ایویں ہووے گا جیہڑا اوس نوں اک دولتمند، معززتے زبردست خاندان نال گنڈھ دیوے۔ ''خاص درباریاں وِچکار تھاں بنا لئی، سمجھو'' نکولائی سرگینچ نے خُشی نال دونویں ہتھ مَلدے ہوئے کیہا۔

میں اوس سَمے پیٹرزبرگ وِچ اِی سی تے یونیورسٹی وِچ پڑھدا سی۔ مینوں یاد ہے کہ نکولائی سرگینچ نے مینوں اک پتر لکھیا سی کہ جیہڑی افواہ پرنس بارے پھیلی ہوئی اے اوہدی تصدیق کرکے لکھاں۔ اوہنے میرے بارے وِی پرنس نوں لکھیا کہ اوہ میرے تے خاص عنائت کرن لیکن اوس پَتر دا کدی کوئی جواب نہیں دِتا۔ مینوں تے صرف اینا پتہ سی کہ پرنس دے صاحبزادے جیہناں دی پہلے کاؤنٹ صاحب دے گھر پالناں ہوئی تے مگروں کالج وِچ، اوہ ہُن اُنی ورہیاں دی عمر وِچ پڑھائی پوری کر چکے ہین۔ میں اخمنیف ٹبر نوں ایہدی خبر دِتی تے لکھیا کہ پرنس نوں پُتر نال گوڑھا پیار ہے، اوہدے لاڈ چاء نے مُنڈے نوں وِگاڑ دِتا ہے تے ہُنے توں اِی پرنس اوہدی اگانہہ دی زندگی بارے منصوبے بنا رہیا ہے۔ایہہ سبھ سُوہاں مینوں سنگی پڑھنہاراں توں لبھیاں نیں جیہڑے پرنس دے بال شریف نوں چنگی طرحاں جانندے نیں۔ اوہناں دِناں دی گل اے کہ اک دِن نکولائی سرگینچ نوں پرنس والکوفسکی دا اک پتر ملیا جیہنے اوہنوں بھمبل بھوسے وِچ پادِتا۔

پرنس، جیویں میں پہلے آکھ چکیا ہے ہُن تائیں صرف خشک کاروباری جیہے پتر لکھیا کردا سی، ہُن اوہنے نکولائی سرگینچ نوں خاندانی مسئلیاں بارے کھُل کے پترلکھ دِتا۔ پتر وِی اِنج دا، جیہڑا بڑا کھُلا ڈُھلا تے یارانے والا سی۔ پتر وِچ اپنے پُتر دی شکائت کیتی تے لکھیا کہ صاحبزادے وِگڑدے جارہے نیں، ایہہ ویکھ کے اوہناں دِلوں ہرکھ ہُندا ہے۔ اِینا ضرور اے اوہ اجے چھوکرا اے، اوہدی آوارہ گردی نوں بوہتا تے نہیں لینا چاہیدا (یعنی اپنے پُتردا پکھ وی مارنا ایں) لیکن اوہنے سوچ لیا اے کہ مُنڈے نوں سزا ضرور دیوے گا تے اِنج دا سبق دیوے گا کہ اوہ یاد رکھے۔

ایہدا طریقہ ایہو اے کہ کجھ سَمے لئی شہروں کڈھ کے پنڈ اخمنیف ٹبردے چارج وِچ دے دِتا جاوے۔ پرنس نے پتروِچ لکھیا سی کہ اوہنوں ''مہربان، نیک دل، شریف نکولائی سرگینچ تے خاص کر آننا اندریؤنا دی ذات تے بہوں مان ہے۔'' تے اوہنے اِیہناں دونواں بندے بُڈھی توں بینتی کیتی سی کہ مُنڈا اوتھے آوے تے اوس آوارہ نوں اپنے ٹبر وِچ تھاں دیون'' ایہدے دماغ چوں شہر دے نخرے کڈھ دیون تے سیانف سکھاون۔ ہو سکے ایہنوں پیار کرنا، سبھ توں ودھ کے ایہہ پئی اوہدے اندر جیہڑا من موجی پُنا پُنگر گیا ہے اوہنوں دور کرکے ''ایہدے وچ سخت تے کڑرے قاعدے اصول دا پابند بناوو جیہڑے انسانی حیاتی واسطے بوہت ضروری ہین۔'' باباجی نکولائی سرگینچ نے ایس فرض نوں سر متھے لیا۔

نکولائی سرگینچ نوں تھوڑیاں دِناں وِچ ایس مُنڈے نال اِینا پیار ہوگیا جِناں اپنی اولاد نتاشا نال سی۔ اک سَمے مگروں فیر جد نکولائی سرگینچ تے پرنس دا تعلق ٹُٹ بھج گیا ، تد وی اوہنے اوس مُنڈے جیس دا اصلی ناں پرنس الکسی پترووچ سی۔۔۔۔۔۔ سوہنا سُنکھا مہاندرہ، نازک تے زنانیاں ہار گل گل تے رُس جاون والا پر ایہدے نال نال ہشاش بشاش تے بھولا بھالا۔ اوہنے طبیعت اِی اِنج دی پائی سی جو ہر ویلے بوہت شریف جذبات قبول کر سکدا سی۔۔۔۔محبت کرن والا، دل، پاکیزہ تے شکر گزار۔۔۔۔۔سارے ٹبر وِچ اوہدی پوجا ہوون لگی۔ حالانجے اوہدی عمر ١٩ نوں اپڑ چکی سی پر فیر وی اجے بالکل بالڑا سی۔ ایہہ خیال کرنا وی اوکھا سی کہ اوڑک اوہ کیہڑا جرم ہووے گا جیہدی پیو سزا دینا چاہندا سی۔ حالانجے کیہا جاندا سی کہ اوہ پُتر توں بوہت محبت کردا سی۔

افواہ پھیلی ہوئی سی کہ صاحبزادے ہوراں دی حیاتی پیٹرزبرگ وِچ وڈی ناکارہ تے بے لگامی سی۔ اوہنے نوکری توں انکار کردِتا سی تے ایس توں باپ نوں بوہت مایوسی ہوئی سی۔ نکولائی سرگینچ نے وی الیوشا توں ایس بارے کجھ ناں پُچھیا کیونجے اوہناں نوں اندازہ سی کہ آپ پرنس اپنے پتر وِچ ایس سوال توں کَنی مارگئے ہین۔ سنن وچ آؤنداہے کہ پرنس دے صاحبزادے نے کوئی ناں معافی جوگ شرارت کیتی سی، کسے عورت نال کہانی ٹُری سی، فیر کِتھے پستول چُک لئی، تاش دی بازی وِچ موٹی رقم ہار گیا سی ۔۔۔۔ایہہ وی کیہا جاندا ہے کہ اوہنے دوجیاں دا رُپئیا اُڈا دِتا۔۔۔۔۔۔۔ایہہ وی افواہ سُنن وچ آئی کہ پرنس نے کسے قصور پاروں پُتر نوں اپنے توں وَکھ نہیں کیتا سی سگوں ایس وِچ پرنس دی اپنی مرضی شامل سی۔

نکولائی سرگینچ نے نموشی نال ایہناں ساریاں افواہاں نوں رَد کردِتا۔ خاص کر ایس دی وجہ ایہہ سی کہ پُتر نوں اپنے پیو نال بڑا پیار سی، بچپن تے لڑکپن اندر جیس نوں باپ نال رہنا نصیب نہ ہوئیا ہوئے اوہدا اوہ اِینا چاہیوند سی۔ الیوشا اپنے پیودا ذکر بڑی چاہت، تعریفاں نال کردی سی تے صاف جاپدا سی کہ پیو دی شخصیت اوہدے تے چھائی ہوئی اے۔ کدی کدی الیوشا نال گپ شپ کردا سی تے اک پرنس دا ذکر وی سناؤندا سی کہ پیو پُتر دونویں اوہدے نال عشق لڑاؤندے سن۔ اوہنے آپ اِی دَسیا کہ اوڑک پُتر ہتھوں پیو نوں ہار پئی تے پیو نوں ایس تے سخت غصہ آئیا۔ اوہ ہمیشاں ایہہ قصہ چسکے لے لے سُنایا کردا سی، بالاں دی سادگی دے نال چوکھے کھُل کے قہقہے لائیا کردا سی۔ لیکن نکولائی سرگینچ فورن روک دِیندا۔ الیوشا دی زبانی ایس خبر دی تصدیق ہوگئی کہ پرنس ویاہ رچاون والا ہے۔

الیوشا دے دیس نکالے نوں نیڑے تیڑے اک ورہا لنگھ گیا سی۔ ایس دوران اوہ پیو نوں آدر نال شرافت تے سمجھداری دے پتر لکھدا رہیا سی۔ اوہنوں آپ واسی لیفسکوئے توں اِینی لگن سی کہ جد پیو موسم گرما وِچ ایتھے آئیا تے دیس نکالے پُتر نے آپے اِی پیو توں بینتی کرن لگا کہ اوہنوں واسی لیفسکوئے وِچ اِی بوہتے توں بوہتا چررہن دِتاجاوے کیونجے پنڈ دی حیاتی ہی اصل کھیڈہے۔ الیوشا دے من وِچ جو کجھ پے جاندا سی، اوہدے جیہڑے فیصلے ہوئیا کردے سی، اوہ سبھ وِچالے توں ودھی دماغی حالت، گرم جوشی، تے انج دی غیر ذمے واری جیہڑی بوہت بے خیالی تے لاپرواہی تیک اپڑچکی سی تے ہر قسم دے باہرلے اثرات دا چھیتی شکار ہوجاون والی طبیعت تے قوت ارادی دے بالکل گواچ جاون دا نتیجہ ہندے سن۔

پرنس نے اوہدی بینتی نوں اک طرحاں شک وشُبے نال سُنیاں۔۔۔۔۔۔۔۔ہوندے ہوندے ایہہ ہوئیا کہ نکولائی سرگینچ اپنے پرانے ''دوست'' نوں اوکھت پچھان سکے۔ پرنس والکوفسکی ہُن بالکل بدل چکیا سی۔ اکدم نکولائی سرگینچ دے نال اوہدا ورتا اندر نکتہ چینی خاص کر ودھ گئی۔ ہور جد جاگیر دا حساب کڈھیا گیا تے حساب دی سُجھاء ہوون لگی تاں پرنس وَلوں حرص، کنجوسی تے اک بھیڑی قسم دی بے اتباری ظاہر ہوئی۔ ایس ورتا نال نیک دِل اخمنیف دے دِل نوں بڑی سَٹ لگی۔ بڑے چر تائیں اوہناں نوں یقین ناں آئیا کہ اوہ ٹھیک گویڑ لارہے ہین یاں نہیں۔

چوداں ورہے پہلاں جد پرنس پہلی وار اپنی جاگیر تے آئیا سی، اوس ویلے اوہدے ورتا تے ہُن دے طور طریقیاں وِچ زمین اسمان دا فرق پے گیا سی۔ ہُن دی وار پرنس نے آلے دوالے دے تعلقے داراں یعنی خاص خاص لوکاں نال میل جول ودھایا۔ اوہ اک وار وی نکولائی سرگینچ نوں ملن ناں آئیا تے اوہدے نال کامیاں جیہا ورتا کیتاتے مگروں اجیہی واپری جیہدی کوئی وجہ سمجھے نہیں آؤندی۔ پرنس تے نکولائی سرگینچ وِچکار بغیر کسے سبب دے تیز ترکھا جھیڑا اُٹھ کھلوتا۔ دونواں پاسیوں گرماگرم ہتک دِیاں باتاں ہوون لگ پئیاں۔ اخمنیف غصے دے ماریاں واسی لیفسکوئے چلاگیا۔

لیکن ماملہ اجے مُکیا نہیں سی۔ سارے آنڈھ گوانڈھ کرودھ بھریاں سُوہاں پھیل گئیاں۔ گلاں ہون لگ پئیاں کہ نکولائی سرگینچ نے الہڑ الیوشا دے طور طریقےاں توں چنگی طرحاں جانوں ہوکے ایہو چال چلی سی کہ اوہدیاں کمزوریاں توں فیدہ چک کے اپنا اُلو سِدھاکرے۔ خبر گرم سی کہ نکولائی سرگینچ دی دھی نتاشا، جیہدی عمر ہُن ستاراں ورہے سی، جال وِچھا رہی سی کہ ٢٠ ورہیاں دے ایس نوجوان نوں اپنی محبت وِچ پھسا لوے۔ ہور ماپیاں ظاہرا انجان بن دے سن لیکن اوہناں ایہہ آپ جال بُنیا سی۔ ہور ایہہ کہ چالباز تے ''بد چلن'' نتاشا ایس نوجوان نوں بالکل اپنی مُٹھی وِچ لے چکی سی، ایہہ اوہدی کوششاں دا کارن سی کہ آنڈھی گوانڈھی شریف، باعزت زمیندار ٹبراں جتھے ودھیر الہڑ مٹیاراں دی جوانیاں پھُٹ رہیاں سن، ایس نوجوان نوں دور دور رکھیا گیا۔

اوڑک ایہہ دَسیا جاندا کہ نتاشا تے پرنس دے صاحبزادے ہوراں نے آپسی وعدے تے توڑ نبھاون متھ لیا ہے کہ واسی لیفسکوئے توں باراں کوس دور گری گورئیوہ پند وچ جاکے ویاہ رچالین گے جیہدا مقصد ظاہرا ایہہ وکھالا سی کہ نتاشا دے ماپیاں نوں خبر ناں ہون پائے لیکن اصل وِچ اوہناں نوں نِکی نِکی گل وِی پتہ سی تے صرف ایہو نہیں سگوں اپنی دھی نوں اوہ وِس بھرے مشورے تے شہہ دِیا کردے سن۔ بس ایہہ کہ آلے دوالے دے مرداں تے سوانیاں وِچکار ایس ماملے بارے طرحاں طرحاں دِیاں افواہاں گھڑیاں گئیاںسن اوہ کتاب وِچ پوری نہیں آ سکدیاں۔ پر ایہناں گل گوہ گوچری ایہہ سی کہ آپ پرنس نوں ایہناں ساریاں افواہاں دا پک سی۔ تے جد اوہنوں اپنی جاگیر توں اک گمنام پتر ایس بارے مِلیا تے اوہ ایسی غرض واسطے واسی لیفسکوئے آئیا۔

خورے کوئی سوچے کہ جیہڑا بندہ نکولائی سرگینچ نوں تھوڑا وی جانندا ہووے اوہ اُنہاں خلاف انج دے الزاماں تے کیہ یقین کرے گا، لیکن جیویں ہمیشاں توں ہندا ہے، ہر بندہ جوش وِچ سی۔ ہر بندہ جو مونہہ آؤندا، کہہ رہیا سی اوہ سِر ہلاندا تے نکولائی سرگینچ نوں اِی قصووار متھدا۔ نکولائی سرگینچ اِینے غیرت مند سن کہ اوہناں سوہاں کڈھن والیاں دے ساہمنے اپنی دھی دی صفائی پیش کرنا وی پسند ناں کیتا تے بُڈھی تک نوں سختی نال روک دِتا کہ گوانڈھیاں نال ایس ماملے وِچ ناں پیا جاوے۔ نتاشا جیہڑا آپ ایہناں دوشاں دا شکار ہوئی سی ایہناں ساریاں افواہاں توں بے خبر سی تے سال تائیں بے خبر رہی، بوہت سانبھ سنبھال نال ایس ساری واپری نوں لُکایا گیا تے اوہ ایویں کھیڈدی ٹَپدی پھردی جیویں باراں سالاںدا بالڑا۔

ایسے سمے جھیڑا ہور ودھ گیا۔ ودھدا چلاگیا۔ شوشے چھڈن والیاں نے وی کوئی گھٹ نہیں کیتی۔ مخبراں تے گواہاں توں ودھ کے آئے تے اوڑک پرنس نوں ایہہ پک کروان وِچ کامیاب ہوگئے کہ واسی لیفسکوئے وِچ جد تک نکولائی سرگینچ دی مینیجری قائم رہی، ایمانداری نال اوہدا دور دا وِی واسطہ نہیں سی۔ سبھ توں ودھ کے ایہہ کہ نکولائی سرگینچ نے تِن سال پہلاں جد جنگل ویچیا سی تے اوس وِچ ١٢ ہزار روبل ایدھر اودھر کیتے سن تے ایہدی ناقابلِ انکاری شہادت عدالت ساہمنے لیائی جا سکدی ہے، خاص کر انج دے حالات وِچ جد کہ پتہ اے کہ نکولائی سرگینچ نے پرنس توں اجازت لِتے بغیر جنگل ویچیا، اپنی تھانویں آپ فیصلہ کیتا، مگروں پرنس نوں سمجھا دِتا کہ جنگل ویچنا ضروری سی تے جِنی رقم ویچن توں لبھی سی اوس توں کتے گھٹ کھاتے وِچ درج کرا دِتی۔

ایہہ ساریاں گلاں، ایہناں بارے کوئی شک نہیں سی پئی ہے تے گھڑیاں ہوئیاں تے مگروں ثابت وی ہوگیا لیکن اوس ویلے پرنس نوں ایہناں ساریاں تے یقین آ گیا تے اوس نے گواہاں دی حاضری وِچ نکولائی سرگینچ نوں چور کیہا۔ اخمنیف ایہنوں جر نہیں سکدے سن۔ اوہناں نے مونہہ توڑ جواب دِتا تے بوہت سخت جنگ چھِڑ گئی۔ چھیتی اوہناں خلاف مقدمہ درج کر دِتا گیا۔ نکولائی سرگینچ دے کول سارے کاغذات نہیں سن۔ ناہیں اوہناں دی کنڈ تے زورآور لوکاں دا ہتھ سی تے ناہیں اوہناں نوں مقدمے بازی دا تجربہ سی۔ اوہناں مقدمے وِچ پیندے اِی جاپ لیا اوہناں دے پیراں ہیٹھ زمین کمزور اے۔ اوہناں دی جائداد تے پابندی لگ گئی۔ بَوندل پُنے وِچ وِچارے بُڈھڑے دے ہتھ پیر پھُل گئے تے اوہناں نے سبھ کجھ ایس داء تے لاکے فیصلہ کیتا کہ پیٹرزبرگ اپڑ کے آپے مقدمے دی پیروی کرن تے جاگیر تے کسے تجربہ کار بندے نوں ویکھ بھال لئی لا دِتا۔

جاپدا ہے کہ پرنس نوں وِی چھیتی احساس ہوگیا کہ اوس نے نکولائی سرگینچ دی بغیر وجہ توہین کیتی ہے۔ لیکن توہین دونواں پاسیاں وَلوں اِینی سخت ہوئی سی کہ ہُن صلح صفائی دا کوئی راہ نہیں رہ گیا سی۔ اگ وانگوں بھخیا پرنس ایس تے چڑھیا ہوئیا سی کہ پورا زور لاکے قصے پاک کردے یعنی اپنے وَیری سابق مینیجر نوں ٹُکڑاں دا مُتھاج کرکے چھڈے۔

اُلتھا: جیوے پنجاب

Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels