Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> ناول >> گھٹے رُلدے لوک >> گھٹے رُلدے لوک ۔ قسط پنجویں

گھٹے رُلدے لوک ۔ قسط پنجویں

فیودرد ستوئیفسکی
November 20th, 2007
5 / 5 (2 Votes)

تیجا مُکھ


نکولائی سر گئیچ اخمنیف اُنج تاں اشرافیہ تے اُچے ٹبر توں سی پر چوکھے چر توں ایہہ ٹبر غریبی دا شکار سی۔فیر پیو دے مرن مگروں اوس نوں اک وڈی جاگیر ورثے وچ لبھی جیہدے تے کوئی ڈیڑھ سو کمّی کم کردے سی ۔ویہہ ورھیاں دی حیاتی وچ اوہ اُچیچے شاہی فوجی دستے وچ رلتی ہو گئے۔ سبھ چنگا چلدا رہیا پر فوج وچ بھرتی دے 6 ورھیاں مگروں اپنی ساری جاگیر اوہناں اکّو رات تاش دی بازی وچ ہار دتی۔

ساری رات نیندر نہ پئی تے دوجی رات فیر اوسے تاش دے اڈے تے اپڑے۔ ایتکاں اوہناں اپنا گھوڑا وی داء تے لا دتا۔لے دے کے اکو گھوڑا ای کول رہ گیا سی، اوہ بازی جت لئی فیر دوجی ،تیجی ایتھوں تائیں جو اپنا ہاریا ہویا اک پنڈ وی مُڑ جت لیا۔ایہہ نکی جہی بستی اخمنیف جیہدی پچھلی آبادی گنتری 50 نفر دی سی۔

بس ایس توں مگروں پھیر تاش توں ہتھ کھچ لیا، اپنے کاغذ پتر ولھیٹے تے دوجے دن نوکریوں جواب دے دتا۔ اوہناں دی جاگیر وچوں 100کمّی اوہناں دے ہتھوں کُھس گئے سی ۔2 مہینیاں باجھوں اوہناں نوں لیفٹیننٹ دے عہدے توں چھڈن دی سرکاری اجازت لبھ گئی تے اوہ پنڈ پرت آئے۔ بازی ہرن دی ایہہ واپری اوہناں ساری حیاتی کسے نوں وی نہیں سُنائی ۔ جےکدے اوہناں نوں کسے نے ایہہ واپری چیتے وی دوا دتی تے اوہ اپنے ٹھنڈے سبھاء دے ہُندیاں وی اوس نال لڑ پئے ۔

پنڈ اپڑ کے اوہ اپنی جاگیر دے کار ویہار وچ چنگی طراں رُجھ گئے تے 35 ورھیاں وچ اوہناں اک شریف ٹبر دی غریب تے نمانی کُڑی آننا اندرئیونا شومیلووا نال ویاہ کر لیا۔ آننا نوں ایس ویاہ تے کوئی داج نہ ڈھیجا پر اوس نے فرانسیسی دیس نکالا دتے ہوئے مون رویش دے اُچیچے بورڈنگ سکول وچ اپنی پڑھائی کیتی سی جیس تے اوس نوں ساری حیاتی مان وی رہیا ، حالانجو جگ وچ کوئی بندہ وی ایہہ گویڑ نہیں سی لا سکدا جو اوس دی پڑھائی کیہڑے مضمون وچ ہوئی سی۔ نکولائی سر گیئچ چنگا سربندھی سی تے آل دوالے دے زمینداراں اپنیاں جاگیراں دا سربندھ کرنا اوس کولوں سکھیا سی۔

واہوا چر انجے ای لنگھ گیا تے اچن چیتی اک بوہت وڈا جاگیردار پرنس پیوتر الیکساندرووچ والکوفسکی پیٹرسبرگ شہر توں نیڑلی جاگیرواسی لیفسکوئے وچ وچ آیا۔ایہہ جاگیر 9 سو کمیریاں دی سی۔آل دوالے ہر پاسے اوس دے آؤن دیاں دُھماں پے گئیاں۔ ایہہ پرنس ہجے جوان ای سی بھاویں شروع والی نوجوانی دے کجھ دن ہنڈورت لئے سی۔ وڈے عہدیاں تے رہن پاروں اثر تے رعب ودھیرا تے اُتلی گل ڈھیر پیسہ وی اوہدے کول سی۔ مُڈھلی تے اخیرلی گل ایہہ جو اوس دی تیویں مری ہوئی سی تے ایس گل نے سونے تے سہاگے دا کم کیتا جیہدے پاروں آل دوال دیاں کنواریاں تے دوجیاں زنانیاں وچ اوس دی کھچ ہور ودھ گئی۔ لوکاں وچ بڑی کھپ پئی جو گورنر اوس دا دُراڈا ساک اے تے اوس پرنس نوں اُچیچا جی آیاں نوں آکھیا تے خوشی وکھالا کیتا۔جدوں اوہ شہر وڑیا تے گورنر دے نیڑلے دھڑے وچوں وی کئی زنانیاں اوس تے وِچھ گئیاں ۔ چھیکڑلی گل ایہہ جو اوہ اشرافیہ دے اوس دھڑے دی ہستی سی جیہڑے پہلاں تے پینڈو لوکائی وچ آؤندے ای نہیں تے جے آجاون تے چوکھا بھڑتھو پا دیندے نیں۔

پرنس دی اوتھے کوئی آدربھاء نہ ہوئی جنھاں نوں پرنس دی کوئی لوڑ نہیں سی جاں جنھاں نوں پرنس اپنے توں ہینا جاندا سی۔ اپنے آہنڈ گواہنڈ والیاں وچ وی اوس بوہتا ملن ورتن نہ شروع کیتا جیہدے پاروں کئی لوکی تُرت اوس دے ویرودھی بن گئے تے ایسے کارن لوکاں دے کن کھڑو گئے جو اچن چیتی پرنس نوں نکولائی سر گئیچ نال ملن دا سُفنہ کتھوں کُد پیا۔ ایہہ گل وی سچی اے جو نکولائی سر گیئچ اوس دے سبھ توں نیڑلے گواہنڈی زمیندار سی۔ اخمنیف دے ٹبّر اُتے پرنس دے کردار دا ڈھیر اثر ہویا تے دویں رنّ خصم نوں اوس وساہ لیا۔ آننا اندریؤنا تے اوس دی اُچیچی مُریدنی ہو گئی کجھ دیہاڑ لنگھن نال ای اوہناں دا بِلپّا (بھرپّا) سِخر تے اپڑ گیا۔ پرنس نت اوہناں دے گھر جاندا جاں اوہناں نوں اپنے گھر روٹی تے سد لیندا۔ اوہ اوہناں نال چٹکلے ،قصّے کہانیاں تے چھیڑ چھاڑ کردا اتے اوہناں دا نصیباں ماریا پیانو گاؤندا وجاؤندا رہندا۔

اخمینف رن، خصم نوں ایہہ گل سمجھ نہ آؤندی جو پرنس ورگے بیبے تے نمانے بندے بارے لوکی انج کیوں کہندے نیں جو اوس نوں غرور اے تے اوہ آپ پسند تے سدھے مُنہ گل نہ کرن والا اتے چھڑا اپنا چنگا سوچن والا بندہ اے۔ آہنڈ گواہنڈ دے سارے لوکی اکٹھیاں اوس نوں انج کیوں آکھدے ہین؟ بوہتا چر نہ لنگھیا جو ایہہ ماملہ وی صاف ہو گیا۔ہویا انج جو پرنس والکوفسکی اپنی جاگیر وچ ایہہ پک کر کے آیا سی جو اپنی جا گیر دے مینیجر توں جان چھڈا لوے۔ اوس دا مینیجر اک آوارہ مزاج جرمن تے واہی بیجی دا ڈھیر سیانا سی۔ اوس دے کھچڑی والاں توں بزرگی دا جھاکہ پیندا، اکھاں تے عینک تے نک نوک دار سی۔ اوس نے پرنس دی جاگیر وچ لوٹی پائی ہوئی سی تے بھیڑی گل ایہہ جو اوس نے کئی واہی واناں نال مار کُٹ کیتی تے اوہناں نوں جانوں مُکا دتا۔ اخیری اوس جرمن کارلووچ دیا حرکتاں پھڑیاں گئیاں تے اوس دی سونہہ پے گئی ۔ جرمن منیجر نے اپنی ایمانداری دے گھنے ترلیاں نال پرنس نوں لوہن دے جتن کیتے پر اوس دی اک نہ چلی تے اوس نوں گندیاں کر کے کڈھ دتا گیا تے اوہناں دی چونویں تک نکولائی سر گیئچ تے پئی جیہڑا آپ اک بوہت سیانا تے اُچیچا سربندھی سی تے نہ اوس دی ایمانداری تے کسے نوں کوئی جھاکا پے سکدا سی۔ انج جاپیا جو پرنس نوں آپ ایس چنتا وچ ویکھ کے نکولائی سر گیئچ نے اپنے آپ نوں ایس سیواداری لئی اگے کیتا پر ایہہ سچ نہیں سی۔ اخیری اک دیہاڑ پرنس نے بڑی یاری تے مان پُنے نال ایہہ سُجھاء نکولائی سرگیئچ اگے کیتی۔ اوس پہلاں تے مناہی کر دتی پر تنخواہ دی مڈی اینی ودھ سی جو آننا دے مُنہ وچ پانی آ گیا۔ نالے پرنس ہوراں جیہڑا اینا چر اوہناں نال شرافت تے چنگے سبھا نال ویلا بِتایا اوس مگروں نکولائی وچ ڈاڈھی مناہی دا حوصلہ وی نہ رہیا۔ پرنس دے دل دی مُراد پوری ہو گئی، ایس توں ایہہ سِٹّہ وی کڈھیا جا سکدا اے جو اوس وچ بندے نوں سُنجانن تے پرکھن دی چنگی کار سی۔اخمینف ٹبّرنال تھوڑے چر دی ملنی وچ ای اوس نے ٹھوک وجا کے ایہہ نتارا کر لیا سی جو کیہڑے سبھاء دے بندے نال واسطہ پیا اے تے اوس نوں کِنج قابو کیتا جا سکدا اے اتے ایہہ متھ لیا جو چھڑا شرافت، گرم جوشی تے چنگے ویہار نال ای اوس دا روح جتیا جا سکدا اے کیونجو اکلّا روپیہ تے مڈی وی کم نہیں دے سکدی سی۔ پرنس نوں اجیہا منیجر لوڑیدا سی جیس تے اکھاں میٹ کے بھروسہ کیا جا سکے تے اوس نوں فیر واسی لیفسکوئے نہ آؤنا پوے۔ اوس نوں اجیہا بندہ ای لوڑیدا سی جیہدے پاروں اوس نکولائی سر گیئچ نوں وساہ لیا تے اوہ وی اوس دا اعتبار کرن لگ پئے۔

نکولائی سر گیئچ اوہناں بیبے تے پیار کرن والیاں لوکاں وچوں اک سی جیہڑے ساڈے روسیاں وچوں بڑے من کھچویں کردار دے مالک ہُندے ہین بھاویں لوک اوہناں بارے جو وی آکھی جاون اک واری ایہہ جیہدا وساہ کر لین تے اپنا تن من اوس تے لُٹا دیندے نیںبھاویں اوہناں دا جان واروُ سبھاء بھیڑے حالاں تائیں ای اپڑ جاوے۔

ورھے لنگھدے گئے تے پرنس دی جاگیر ودھدی پُھلدی گئی جاگیر دار تے مینجر دے آپسی ویہار وچ بھورا وی تریڑ نہ آئی تے اوہ پہلے طراں ای چنگے رہے۔ دوہاں دھراں وچ کاروباری پترکاری وی چلدی رہی ،بھاویں پرنس نے اپنے مینیجر دے کم وچ کوئی دخل نہ دتا پر کدی کدھار اوہ چنگے سُجھاء گھلدا رہیا جنھاں دی ویہاری تے کاروباری اہلیت اُتے نکولائی سر گیئچ نوں وی حیرانگی ہُندی رہی۔ ایہہ گل بڑی صاف سی جو نہ چھڑا اوہ روپئے دے انھے ورتاء نوں چنگا نہیں جاندا سی ہتھوں اوہ روپئیہ بناؤنا وی جاندا سی۔ پرنس دے واسی لیفسکوئے وچ آؤن نوں 5 ورھے ای لنگھے ہون گے جو اوس نے نکولائی سر گیئچ نوں ایس گل دا حق دتا جو اوہ 400کمیریاں دی اک جاگیر ہور مُل لے لوے۔ نکولائی سر گیئچ ایس تے بوہت خوش ہوئے۔ پرنس دی سپھلتا دیاں خبراں، ترقی تے عہدیاں دا ودھا سر گیئچ ہوراں لئی اینا ای پیارا سی جیویں اوہناں دا سگا بھرا ہووے۔ اک دیہاڑے اوہنا دی خوشی دا کوئی ٹکانہ نہ رہیا جدوں پرنس نے نکولائی سر گیئچ دی ذات تے پورے یقین دا وکھالا کیتا۔

ہُن میں تہانوں دسناں جو اوہ کیہ واپری سی جنے ۔۔۔۔۔۔۔۔۔۔۔۔۔۔۔۔ پر ہجے ایہہ گل چنگی نہیں جے میں پہلاں تہانوں پرنس والکوفسکی دی حیاتی دا کجھ ویروا نہ دسّاں کیونجو ایہہ ہستی میری ایس کہانی دا اُچیچا پاتر اے۔


اُلتھا :محمد علیم چوہدری

Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels