Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> ناول >> گھٹے رُلدے لوک >> گھٹے رُلدے لوک - قسط تیجی

گھٹے رُلدے لوک - قسط تیجی

فیودرد ستوئیفسکی
November 1st, 2007
5 / 5 (1 Votes)

قسط تیجی


''ایہنوں تُوڑی بھرواکے رکھیا جا سکداہے۔'' رحمدل ملرنے آکھیا، اوہنوں فکر سی پئی کسے طرحاں بُڈھے نوں حوصلہ دِتا جاوے ''تُسیں چاہو تے ایہنوں چنگی طرحاں تُوڑی بھروا کے سانبھیا جا سکدا ہے۔ فیودر کارلووچ کاریگر ایہہ کم بہوں چنگا کردا ہے۔ تُوڑی بھرن دے کم وِچ کارلووچ نوں بڑی مہارت ہے۔'' ملر نے بُڈھے دی سَوٹی بھوئیں توں چُک کے اوہدے پھڑاؤندے ہوئے ایہہ گل فیر دُہرائی۔

''ہاں ہاں میں بہوں چنگی طرحاں ایہہ سیوا کر سکدا آں جناب'' کاریگر نے آپ اگے ودھدے ہوئے بڑے آدر نال کیہا،۔ اوہ لمے قدتے اکہرے جُثے دا شریف جرمن سی۔ اوہدے وال گنجلے ہوئے تے لال رنگ دے سن تے ترِکھی نَک اُتے عینک چڑھی ہوئی سی۔

''فیودر کارلووچ ہر قسم دی چنگی بھرائی دے ماہر کاری گر نیں'' ملر نے اپنے وِچار تے خُش ہوکے جملے دا وادھا کیتا۔
''جی ہاں' میں ہر قسم دی ودھیا درجے دی بھرائی کر سکدا آں جناب'' کاریگر نے ملر دے وچاراں دی تصدیق کردِتی۔'' ہور میں تہاڈے کتے دا ایہہ کم مفت وِچ کر دیواں گا'' کاریگر نے بے غرض سیوا راہیں اپنی وڈیائی جتاون دی کوشش کردے ہوئے ایناں ہور کہہ دِتا۔
'' نہیں انج نہیں۔ اسیں تہانوں تُوڑی بھرائی دے پیسے دیواں گے!'' ایڈم ایوانچ شوتس نے جیویں چیکدے ہوئے کیہا سی۔ اوہ دُونا لال ہو گیا۔ ہُن جوش وِچ آکے دِیالو پُنے دے وِکھالے دی واری سی۔ اپنی نیک نیتی نال اوہ سمجھ رہیا سی پئی ایس واپری دا ذمے وار اوہی اے۔
بُڈھا چپ چپیتے ایہہ سارا کجھ سُن دا رہیا جیویں کجھ وی سمجھ ناں آرہیا ہووے، اوہدا سارا سریر پہلے وانگوں ہُن وی تھرتھرکنب رہیا سی۔
'' صبر کرو! فسٹ کلاس برانڈی دا اک جام لاؤندے جاوو!'' ملر نے زور نال آکھیا۔ اوہنے ویکھیا پئی مشکوک پروہنا ہٹی توں نکلن دی اُڈیک وِچ اے۔
برانڈی دا جام لیاندا گیا۔ بُڈھے نے غیرارادی طور تے جام نوں ہتھاں وچ پھڑیا پر اوہدے ہتھ کنب گئے فیرایس توں پہلے کہ اوہ جام نوں بُلھاں تائیں لیجاندا، ادھی شراب ڈُلھ گئی۔ اوہنے گھُٹ لائے بِناں اِی جام نوں تھالی وِچ رکھ دِتا۔ فیر اک اوپری ٹُٹی بھجی مسکراہٹ نال بُڈھا اوتھوں تیز تیز پر ڈُلھدی پھردی چال نال باہر نکل گیا تے ازورکا نوں اوتھے ہٹی دے فرش تے پیا چھڈ گیا۔ ہر بندہ سُن ہو گیا وِچ سی تے کَن پھُوسیاں ہوون لگ پئیاں۔

''افسوس ہے، کِنی بھیڑی گل ہوئی'' جرمن گول گول اکھاں گھُماؤندے ہوئے اک دوجے نوں آکھ رہے سن۔
پر میں بُڈھے دے مگرے مگر ٹر پیا۔ ہٹی توں کجھ قدم اگانہہ ودھ کے سَجے ہتھ تے اک پرچھانویں گلی سی سوڑی تے کالی ہنیر تے وڈیاں وڈیاں حویلیاں وِچ پھسی ہوئی۔ کسے شے نے میرے کن وچ پھُوک ماری پئی بڈھا ایسے وَل مُڑیا ہووے گا۔ موڑ توں دوجی عمارت اجے بن رہی سی تے اوہدے تے واڑ لگی ہوئی سی۔ عمارت دے آلے دوالے جیہڑی واڑ سی اوہ نیڑے نیڑے رستے وِچکار تائیں ودھی ہوئی سی تے واڑ دے چونہہ چفیرے پیدل چلن والیاں لئی تھڑی بنا دِتی گئی سی۔ واڑ تے بن دی عمارت وچکار اک گھُپ ہنیری نُکڑ جیہی نگل آئی سی اوس وِچ مینوں بُڈھا نظر آئیا۔ اوہ لکڑ دی تھڑی دے کنڈے بیٹھا سی تے سِر نوں دوہاں ہتھاں وِچ پھڑیا ہوئیا سی۔ کہنیاں گَوڈیاں تے لائیاں ہوئیاں سن میں اوہدے برابر جا بیٹھیا۔
'' گل سُنناں!'' میں آکھیا '' مینوں سمجھ نہیں سی آؤندی پئی گل کتھوں شروع کراں'' '' ہُن تُسیں ازورکا دا ہرکھ نہ کرو۔ چلو میں تہانوں گھر چھڈدِیاں۔ صبر کرو۔ میں ہُنے اِی گڈی سَدداں ہاں۔ تُسی کتھے رہندے او؟''
بابے ہوراں میری گل دا کوئی جواب ناں دِتا۔ مینوں سمجھ ناں آیا ہُن کیہ کیتاجاوے۔ گلی وِچ لنگھن والیاں دا وی پتہ نہیں سی۔ اکدم بُڈھے نے میری بانہہ پھڑن دی کوشش کیتی۔
''ساہ گھٹ جاندا اے'' اوہنے گھٹی گھٹی بھری ہوئی آواز وِچ آکھیا جیہڑی اوکھےاں ہو کے ہی سُنی جا سکدی سی'' ساہ گھٹ جاندا اے۔''
''چلو تہانوں گھر لے چلاں!'' میں زور نال کیہا۔ میں آپ اُٹھ کھلوتا تے اوہنوں دھگانے اُٹھاون لئی بولیا ''تہانوں چاء پینی چاہیدی ہے، بسترے تے آرام کرنا چاہیدا ہے ۔۔۔۔۔۔ میں گڈی لیاؤناں۔۔۔ڈاکٹر سَددیواں گا۔۔۔۔۔اک ڈاکٹر نال میری جان پچھان ہے۔۔۔۔۔۔''
چیتے نہیں پئی اوس نے ہور کیہ آکھیا۔۔۔ اوہنے اُٹھن دی کوشش کیتی پر فیر بھوئیں تے ڈِھ گیا۔ اوہنے اوسے دَبی دَبی آواز وِچ کجھ کیہا۔ میں ہور نیڑے موندھا ہوئیاں تے اوس دے اکھراں تے کَن لادِتے۔
    
''واسی لیفسکی(٦) جزیرے وِچ۔۔۔۔۔'' بُڈھے نے کھڑکھڑ کردی آواز وِچ آکھیا ''چھیویں سڑک۔۔ چھے ۔۔۔۔ ویں۔۔۔ س ۔۔سڑ۔۔۔۔سڑک۔۔۔۔''
اوہ بالکل چُپ ہو گیا۔
'' تے کیہ تُسی واسی لیفسکی جزیرے وِچ رہندے او؟ تد تے تُسی اودھر نہیں مُڑے۔۔۔۔ کھَبے بَنے نوں مُڑنا چاہیدا سی' سَجے نوں نہیں۔ کوئی گل نہیں۔ میں تہانوں اودھر اِی لے چلداں۔۔۔۔''
بُڈھے نے کوئی ہِل جُل نہیں کیتی۔ میں اوہدا ہتھ پھڑیا۔ پر اوہ اِنج ڈِگا جیویں مُردے دا ہتھ ہووے۔ میں اوہدے مونہہ تے گوہ کیتا، اوہنوں چھوہ کے ویکھیا۔۔۔۔۔اوہ دنیا توں چلانا کر چکیا سی۔ مینوں اِنج لگا جیویں ایہہ سبھ خاب وِچ ویکھ رہیا ہوواں۔
ایس واپری نے مینوں بوہت پریشان کردِتا تے اوسے ویلے میری تَپ تے کنبنی جاندی رہی۔ بابے ہوراں دے مکان دا پتہ لگ چکیا سی۔ پتہ چلیا پئی اوہ واسی لیفسکی جزیرے وِچ نہیں سگوں ایتھے اِی تھوڑے کُو پینڈے تے رہندا سی۔۔۔۔۔۔۔۔۔کلون بلڈنگ دی پنجویں منزل دی سِدھی چھت ہیٹھاں۔ بُڈھے دا اک وکھرا فلیٹ جیس وچ چھوٹی جیہی ڈیوڑھی تے نیویں چھت سی۔ کمرے وِچ تِن تِن نکیاںنکیاں باریاں دی تھاں رکھی گئی سی۔ ایتھے اوہنے بڑی غربت دے دِن لنگھائے سن۔

فرنیچر وِچ اک میز سی' دو کرسیاں تے اک بہت اِی پُرانا صوفہ سی جیہڑا پتھروانگوں کَیڑا ہوچکیا سی تے اندرلی بھرائی باہر نوں اُلر رہی سی۔ پتہ لگیا پئی ایہو شیواں وِی بُڈھے دِیاں نہیں سگوں مالک مکان ہوراں دِیاں سن۔ چُلھے نوں ویکھن توں اِنج لگدا سی پئی ورہیاں توں ایس وِچ اَگ نہیں بَلی تے پورے گھروِچ بَتی دا ناں نشان تک نہیں سی۔

ہُن میں سنجیدگی نال سوچدا ہاں تے ایہہ اندازہ ہُندا اے پئی بابے ہوریں ملر دی ہٹی ایس واسطے جاندے ہوون گے ہور کجھ نہیں تے اک روشن کمرے وِچ بیہہ کے تھوڑا بوہتی اگ سیک لین۔ میز تے مٹی دا اک خالی ڈوہنگا پیا ہویا سی تے اوہدے کول روٹی دا بہیا ٹُکڑا۔۔۔بس۔۔۔ کتھوں رُپیا نہیں نکلیا۔ اک کوپک تک نہیں ملیا۔ لیڑیاں دی اک لیر وِی اِنج دی نہیں سی جیہدے وچ ایس مہاتڑ نوں لہویٹ کے دفن کردِتا جائے۔

کسے بندے نے اپنا جھگا دان کیتا تانجے اوہ پَوا کے دفن کیتا جاوے۔ گل نتری سی پئی اِنج بالکل کلم کلے بڈھے نے حیاتی تے نہیں لنگھائی ہووے گی' اوہدی ویکھ ریکھ واسطے کوئی ناں کوئی تے ویلے کویلے نال آؤندا ہی رہیا ہووے گا۔ میز دی دراز چوں مرحوم دا پاسپورٹ پیا ملیا جیہنوں ویکھن توں جاپیا پئی بھانویں اوہ روسی بندہ سی پر اوہدی پیدائش غیر ملکی سی۔ اوہدا ناں جریمی اسمتھ تے اوہ مکینکل انجینئر سی۔۔ عمر٧٨ سال ہوئی۔۔۔ میز تے دو کتابڑیاں پیاں سن۔ اوہناں چوں اک خلاصہ جغرافیہ تے دوجی نویں بائبل( نیو ٹیسٹامنٹ) دا روسی اُلتھا' جیہدے حاشیئے تے تھاں تھاں پنسل دے نشان تے نونہاں دی کھُڑچاں لگیاں سن۔ ایہہ دونویں کتاباں میں اپنے ہتھاں وِچ لے لئیاں۔

مالک مکان تے دوجے گوانڈھیاں توں پچھ پرتیت کیتی۔ اُنہاں چوں کسے نوں وی اوہدے بارے کجھ خاص پتہ نہیں سی۔ مکان وِچ بہت کرائے دار رہندے سن۔ نیڑے نیڑے سبھ دے سبھ یاں تے کاریگر لوک سن یاں جرمن سوانیاں سن جیہڑیاں لوکاں نوں کھاون، رہن تے ویکھ بھال دِیاں سیواواں پیش کردیاں سن۔ ایس بلاک دے نگران توں، جیہڑا شریف خاندان توں سی، پچھیا گیا تے اوہ وی اپنے گذریل کرائے دار بارے کجھ ناں دَس سکیا سوائے ایس دے پئی اُپرلا فلیٹ ٦ روبل مہینے وار کرائے تے دِتا گیا سی تے مرحوم ایس وِچ صرف ٦ مہینیاں توں رہندے سن پر اوس نے پچھلے دو مہینیاں توں اِک کوپک وی نہیں دِتا سی۔ ایسے لئی بُڈھے نوں کیہا گیا سی پئی اوہ مکان خالی کردیوے۔

پچھیا گیا پئی کیہ کدی کوئی بندہ اوہنوں ملن لئی آئیا' پر ایس دا کوئی وی کوئی تسلی بخش جواب نہیں مل سکیا۔ ایہہ کافی وڈی عمارت سی۔ اِنج کشتی نوح وِچ آون جاون والیاں دا کیویں پتہ لگد سکدا سی۔ جو دربان ایس عمارت وچ پنجاں ورہیاں توں ملازم سی اوہ وی کوئی دو ہفتیاں پہلاں اپنے دادکے پِنڈ گیا ہویا سی' اوہی بندہ ہو سکدا جو خؤرے کجھ اتا پتہ دے سکے ہُن دربان دی تھاں اوہدا بھتیجا کم کررہیا سی۔ ایہہ نواں مُنڈا سی جیہڑا آپے ادھے کرایہ داراں نوں نہیں جان دا سی۔ مینوں یقینی طور تے پتہ نہیں پئی ایہناں سبھ کاہڈاں دا اوڑک نتیجہ کیہ نکلیا سبھ قصے مگروں بابے نوں قبر وِچ لاہ دِتا گیا۔ اوہناں دِناں وِچ ایہہ وی ہوئیا پئی جتھے مینوں ہوراں جھیڑیاں وِچ پَیناپیا اوتھے میں واسی لیفسکی دی چھیویں سڑک تے پہنچیاں۔ جد میں اوتھے اپڑیاں تے اپنے اُتے ہَسیاں بِناں ناں رہ سکیا کیونجے اوس سڑک تے سوائے مکاناں دی نمانی جیہی قطار دے ہور کیہ لبھ سکدا سی۔ اچھا تے، حیرانگی ایس تے ہوندی سی پئی بابے واسی لیفسکی جزیرے دی اوس چھیویں سڑک دا پتہ کیوں دَسیا مرن توں پہلاں۔ کیہ اوہدے سِرنوں تاء چڑھیا سی؟

میں جریمی اسمتھ دے ایس ٹُٹے بھجے مکان تے نظر پائی۔ مینوں ایہہ تھاں پسند آئی۔ میں ایس نوں اپنے لئی پسند کر لیا۔ ایس مکان دی خاص گل ایہہ سی پئی کمرا وڈا سی' بھانویں ایہدی چھت نیویں سی پر پہلاں تے اِنج جاپدا سی جیویں میرا سِر ایس نال کھیہ جاوے گا۔ پر چھیتی ہی ایس توں جانوں ہوگیا۔ ٦ روبل مہینہ کرائے تے فیر ایس توں ودھ چنگی تھاں نہیں مل سکدی سی۔ جیس خوبی تے میرا جی آیا اوہ سی ایہدا اِکلاپا۔ ہُن صرف ایناں کرنا سی پئی جھاڑ پُونجھ تے کم کاج کرن والے دا پربندھ۔ کسے ملازم بِناں میں بالکل نہیں رہ سکدا۔ ایسے ویلے گھر دے دربان نے وعدہ کر لیا پئی اوہ دِن وِچ اک وار چکر لایا کرے گا تانجے ضرورت وِچ ہتھ وٹاندرا ہو جاوے۔ تے فیر میں ایہہ وی سوچیا: کیہ خبر، کوئی بندہ بابے دی خیر خبر لین لئی آجاوے۔ اِنج اِی بابے دی موت نوں پنج دِن لنگھ گئے پر کوئی ناں آیا۔
(چلدا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels