Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> امریکہ نوں خش کرن لئی تحریک پاکستان وچوں کیمونسٹ حمائیتاں کڈہیاں گیاں۔92سالہ کامریڈ رؤف ملک

امریکہ نوں خش کرن لئی تحریک پاکستان وچوں کیمونسٹ حمائیتاں کڈہیاں گیاں۔92سالہ کامریڈ رؤف ملک

وچار ڈیسک
January 2nd, 2018

ہر جمعرات نوں چار توں چھ وجے ریڈیو مست ایف ایم103تے چلن والے ہفتہ روزہ پروگرام لوک لہر وچ92سالہ کامریڈ عبدالرؤف ملک انہاں کیمونسٹاں وچ رلتی نیں جو تحریک پاکستان وچ کیمونسٹ پارٹی آف انڈیا(سی پی آئی) دے فیصلیاں پاروں رلتی رہے، جلسیاں، جلوساں وچ جاندے رہے اتے نظریہ پاکستان ٹرسٹ ولوں انہاں نوں کجھ سال پہلے ایوارڈ وی دتا گیا۔انہاں اپنے پرانے یار اتے پاکستان سوشلسٹ پارٹی وچ سی آر اسلم نال رہن والے راجہ ولائیت دے نال لوک لہر ریڈیو پروگرام وچ رلت کیتی۔پاکستان بنن بعدوں کنج جناح تے اقبال دی گلاں نوں توڑیا مڑوڑیا گیا اتے مذہبی قوم پرستیاں دا بیانیہ بنایا گیا اوس دی کہانی ملک ہوراں سنائی۔انہاں دا آکھنا ہے پئی جے کانگرس کابینہ مشن دی سفارشاں نوں من لیندی سیاسی مسلہ وی حل ہوجاندا اتے دھرمی گھلو گھاڑا وی نہ ہوندا۔1942توں پورے پنج سال کیمونسٹ مسلم اکثریتی صوبیاں دے حق خود اختیاری لئی کم کردے رہے اتے پارٹی نے1943 دی پہلی پارٹی کانگرس وچ ادھیکاری تھیسس دی منظوریاں دتیاں۔دو قومی نظریے تے مسلم اکثریتی صوبیاں دے حق خود اختیاری وچ بہوں فرق سی اتے خطبہ الہ آباد اتے قرارداد لہور وچ مسلم اکثریتی صوبیاں دی گل کیتی گئی سی۔کیمونسٹ پارٹی وچ تے وڈی اکثریتاں غیر مسلماں دی سی اتے جے پاکستان دی لہر دھرمی ہوندی تاں سیکولر کیمونسٹ کیوں اوس دی سپورٹ کردے؟ مسلم اکثریتی صوبیاں دے حق خوداختیاریاں دی گل کردے ہوئے پارٹی نے کدی وی دھرمی بنیاد تے ونڈ دی گل نہیں کیتی اتے نہ ہی کدی مسلم لیگ نے پنجاب تے بنگال دی دھرمی ونڈ دا مطالبہ کیتا سی۔پر کانگرس مارچ1947وچ پنجاب د ی دھرمی ونڈ دا کوڑ مطالبہ کیتا سی۔انہاں دسیا پئی انہاں سالاں وچ کانگرس مسلم لیگ ہی نہیں سگوں کیمونسٹ پارٹی تے تنقیداں کردی رہی جداں کہ کیمونسٹ پارٹی اپنے رسالیاں وچ کانگرس نوں جواب دیندی رہی اتے کیمونسٹ سیاسی کارکن مسلم لیگ نوں عوامی پارٹی بناون وچ رجھے گئے۔ایہہ سب ریکارڈ دا حصہ ہے اتے میں اپنی ہڈ بیتی اپنی کتاب’’سرخ سیاست‘‘ وچ لکھ دتی ہے تے حوالیاں لئی دستاویزاں وی چھاپیاں نیں۔ایہہ کتاب لہور دے جمہوری پبلشر چھاپی ہے۔
پاکستان بنن ویلے قائداعظم11اگست 1947دے اسمبلی اجلاس وچ دس دتا سی پئی پاکستان کنج دا ملک ہوئے گا اتے ایس وچ سب واسی بربر دےسٹیزن ہون گے۔ہندواں، سکھاں دی جداداں نوں ہڑپ کرن لئی تیار گروہ اتے امریکہ اگے حاضریاں دین والیاں رل مل کے لوکاں نوں کراہے پایا اتے اسلام، کیمونسٹ مخالفت ، بھارت مخالفت تے مادری زباناں دی مخالفتاں دا گھما بنایا۔تحریک پاکستان وچ کیمونسٹاں جیہڑا پنج سال کم کیتا سی اوس نوں بھل گئے اتے ایس نوں تریخ توں کڈ دتا۔کیمونسٹاں نوں رب دا ویری،اسلام ویری، بھارت نواز تے غدار آکھن والیاں نومبر1949وچ لہور دے لارنس گارڈن وچ ہون والی پہلی کل پاکستان ترقی پسند کانفرنس خلاف گھٹیا پروپیگنڈا کیتا تے قتوئے وی دلوائے۔کیمونسٹاں نوں غدار آکھن والیاں وچ شورش کاشمیری ورگے وی رلتی سن جیہڑے 1947تک پاکستان دے بنن اتے تحریک پاکستان ہی دے خلاف سن۔اردو تے اسلام دا بیانیہ بناون والیاں وچ اردو دے ادیب محمد حسن عسکری تے انتظار حسین ورگے بہوں ناں رلتی سن جنہاں بارے ملک جی نے کھل کے گل کیتی ہے۔1954تک پاکستان وچ کیمونسٹاں خلاف سازش دا جھوٹا کیس بنایا گیا،کیمونسٹ پارٹی آف پاکستان تے پابندی لا دتی گئی تے پاکستان امریکی اتحاداں وچ رلتی ہو گیا۔کیمونسٹ مخالفت نوں ٹیک دین لئی ایہہ بیانیہ بنایا گیا کہ پاکستان اسلام لئی بنایا گیا سی۔مسلم اکثریتی صوبیاں دی سیاست دے سوال تے ہون والی بحثاں نوں بھلا دتا گیا۔پاکستانی نصابی کتاباں وچ تحریک پاکستان بارے ایہہ وی نہیں دسیا جاندا کہ مسلم لیگ نے تے کدی پنجاب تے بنگال دی دھرمی ونڈ دی گل کیتی ہی نہیں سی۔پنجاب تے بنگال دی دھرمی ونڈ دے خلاف تے قائداعظم بیان دیندے ہوئے آکھیا سی پئی مینوں کٹا پھٹا پاکستان دتا گیا ہے۔ایس دھرمی بیانیہ اتے امریکی اتحاداں پاروں جنگی جنونیت پیدا ہوئی اتے انتہا پسندیاں ودھیاں تے انتہا پسند گروپاں نوں پالیا گیا۔اج ٹرمپ دی ٹوئیٹاں توں بعدوں پاکستان وچ امریکی اتحاداں خلاف تے گل ہورہی ہے پر اوس کوڑ بیانیہ بارے گل نہیں ہو رہی جس نوں پاکستان بنن توں بعد اساریا گیا سی۔
92سالہ کامریڈ عبدالرؤف ملک ایہہ سب بدلدے اکھیں ویکھیا اتے فیر ایس نوں ٹٹدے وی ویکھیا۔ پاکستان وچ جیہڑے لوک نواں بیانیہ بناون دی گل کردے نیں انہاں نوں تحریک پاکستان دے گواچے بیانیے توں گل چھونی پئے گی۔اوہ ایہہ پروگرام سنن اتے ملک ہوراں دی کتاب پڑھن۔لنک تھلے دے رہے ہاں۔وچار تے اساں ملک ہوراں دی کتاب دے ٹوٹے چھاپدے رہے ہاں اوس دا لنک وی ایس وچ ہی ہے۔
Link of reviews, extracts, radio recording, video clip and more
https://punjabpunch.blogspot.com/2018/01/genesis-of-misleading-religious.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels