Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> میلہ بھگت سنگھ، 86 ویں برسی، اک دن، دو اہمیتاں، سانجھ۔ آزادی

میلہ بھگت سنگھ، 86 ویں برسی، اک دن، دو اہمیتاں، سانجھ۔ آزادی

وچار ڈیسک
March 18th, 2017

بھگت سنگھ اک پنجابی سپوت جس نوں 1931 وچ مارچ دے مہینے انگریزاں تے مہاتما رل مل پھاہے چڑھایا۔ اوس وی پھانسی توں نرے 18 دن پہلے 1931 نوں مہاتما گاندھی تے برٹش انڈیا دے وائسرے لارڈ ارون وچ اک معاہدہ ہویا جس وچ سیاسی قیدیاں نوں چھڈن تے اتفاق ہویا۔ پر انگریزاں بھگت سنگھ تے اوس دے ساتھیاں نوں سیاسی قیدی منن توں انکار کر دتا اتے مہاتما گاندھی نے دروٹ لتا۔حیران نہ ہونا، اگلے سال 1932 وچ مہاتما ہوری بھگت سنگھ دی پہلی برسی دی صدارتاں کررہے سن۔ بھگت سنگھ دے حق وچ قائداعظم مرکزی اسمبلی وچ تقریراں کیتیاں اوہ وی ریکارڈ تے ہے۔ بھگت سنگھ دی 86 ویں برسی لیل پور وچ منائی جارہی ہے تے اوس تے سانوں ایہہ گلاں یاد رکھنا لوڑی دیاں نیں پئی کس دا،اوس ویلے، کیہ کردار سی۔ ہرش پوری دی تیار کردہ بھگت سنگھ بارے کتاب ’’جیل نوٹ بک‘‘ وچ لکھیا ہے پئی بھگت سنگھ دے نوٹس وچ جہناں شاعراں توں متاثر ہون دا ذکر ہے انہاں وچ وڈز ورتھ، ٹیگور، عمرخیام، غالب، ملٹن تے علامہ اقبال رلتی سن۔ جے اوس ویلے مہاتما بھگت سنگھ تے اوس دے سجناں لئی کھلو جاندا تاں بھگت سنگھ نوں پھاہے چاڑھنا ایڈا سوکھا نہ ہوندا۔
پچھلے سال جون دی چھ تریخ نوں ہندوستان ٹائمز والیاں ’’نرو پاما دتا‘‘ ہوراں دا اک مضمون چھاپیا سی۔ ایہہ مضمون اک کتاب دی مکھ وکھالی بارے سی جیہڑی سیریز وچ نرے بھگت سنگھ بارے ہے۔ 300 صفحیاں دی ایہہ جلد ’’بھگت سنگھ دی جیل نوٹ بک‘‘ ہرش پوری ہوراں لکھی ہے اتے ایہہ کتاب ایس سریز دی 5 ویں جلد ہے۔ ایس سریز دے ایڈیٹر ملویندر جت سنگھ وڑائچ نیں اتے پبلشر یونی سٹار۔ ایس نوٹ بک وچ ستمبر 1929 توں مارچ 1931 تیک دیاں بھگت سنگھ دی لکھتاں نیں۔ کتاب وچ بھگت سنگھ بارے کیتے گئے دعویاں دی کاٹ وی ہے پئی لکھیا ہے جیل وچ بھگت سنگھ 46 کتاباں پڑھیا سن۔ پہلے ایہہ دعوٰی 500 کتاباں دا سی۔ ہرش دا آکھنا ہے پئی جیہڑے لکھاریاں تے شاعراں نوں بھگت سنگھ پڑھدا سی اوس توں ہی پتہ چلدا ہے پئی اوس دے خیالات کیہ سن۔
لندن پوسٹ وچ 2014 وچ اک مضمون 23 مارچ دے دیہاڑ چھاپیا گیا جس وچ مرکزی اسمبلی دے اجلاس دی کہانی ہے جیہڑی شملہ وچ رلی سی اتے ایس وچ قائداعظم محمد علی جناح نے بھگت سنگھ تے اوس دے سجناں حق وچ تقریر کیتی سی۔اخبار لکھدا ہے پئی بھگت سنگھ تے جناح دے نظریات وکھو وکھ سن پر دوناں وچ اک سانجھ وی سی اتے ایہہ سانجھ سی ’’آزادی، انگریزاں توں آزادی‘‘۔
لیل پور والے 23 مارچ نوں ایہہ میلہ بھگت سنگھ دی جنمی تھاں چک 105، ’’بنگے‘‘ وچ شامی چار وجے کررہے نیں۔ انہاں نوں یاد رکھنا چاہیدا پے پئی 23 مارچ دی دوسیاسی اہمیتاں نیں اتے دوناں وچ سانجھ ہے ’’انگریزاں توں آزادی‘‘۔آزادی لئی وکھو وکھ لوکاں، وکھو وکھ سفنے ویکھے ،پر ٹیچا سب دا انگریزاں توں آزادی ہی سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels