Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> ڈاکٹر حمیدہ کھوڑو:اک عہد، اک ویلے دا خاتمہ

ڈاکٹر حمیدہ کھوڑو:اک عہد، اک ویلے دا خاتمہ

February 18th, 2017

ڈاکٹر حمیدہ کھوڑو 81 ورہیاں دی عمر وچ ٹر گئے اتے 12 فروری دا دیہاڑ سندھ دی تواریخ وچ یاد رکھیا جائیگا۔ اوہ سندھ دے منے پرمنے سیاسی آگو ایوب کھوڑو دی دھی رانی سن۔ انہاں اپنے مگر اک دھی نوحہ ماروی الزبتھ چھڈی ہے جیہڑی ہُن امریکہ رہندی ہے۔ حمیدہ کھوڑو تعلیمی ماہر وی سن، لکھاری وی، سیاستدان وی اتے سب توں ودھ اوہ ایوب کھوڑو دی نشانی سن۔ انہاں دے مرن بعد ایس پچھوکڑ نوں یاد کون رکھ سی، ایہہ سوال کھلوتا سب دا منہ ویکھدا ہے۔ انہاں دی سیاستاں دی مخالفتاں ہو سکدیاں نیں، حمیدہ کھوڑو تے ایوب کھوڑو دیاں سیاسی ترجیحاں بارے وی گل بات ہوسکدی ہے، انہاں دی لکھتاں بارے سوال چکے جا سکدے نیں پر ایس گل توں کوئی انکار نہیں کرسکدا پئی اوہ سندھ لئی اپنا سب کجھ دان کیتا اتے انہاں نوں اپنی وھرتی نال پیار سی۔ کھوڑو خاندان لاڑکانے دا وسینک سی اتے لاڑکانے دے شاہنواز بھٹو تے ذولفقار علی بھٹو نوں تے اساں سب جاندے ہاں۔ پر ایہہ دونوں دریا لاڑکانے دے آسے پاسیوں بغیر ملے وگدے رہے۔ 1901 وچ جمے ایوب کھوڑو 1930 دے دہاکے بعدوں ہون والی سندھی سیاست دے وڈے تھماں وچوں سن۔1923 دی صوبائی چوناں وچ اوہ، شاہنواز بھٹو تے کریم بخش جتوئی سنے تریجے سیاستدان سن جہیڑے بمبئی دی صوبائی اسمبلی لئی چنے گئے سن۔سندھ نوں بمبئی توں وکھ کرن دے حق وچ اتے سندھ وچ مسلم لیگ نوں اگے ودھان وچ انہاں دا وڈا کردار رہیا۔ اوہ پاکستان وچ سندھ دے پہلے وزیر اعلیٰ سن اتے جداں کراچی نوں پاکستان دا عارضی مرکز بناون دا فیصلہ ہویا تے انہاں نوں کراچی سندھیاں کولوں گھسدا لگیا۔نرے اٹھ مہینیاں بعدوں انہاں نوں وزارت چھڈنی پئی۔1951 تے 1954وچ اوہ دو وار پھیر صوبے دے پردھان بنے پر ہر وارسال توں گھٹ ویلہ ہی لنگھایا۔وزیراعظم فیروز خان نوں وی وزارت وچ کھوڑو ہوری وفاقی وزیر دفاع وی سن تے داخلہ دے وزیر وی۔ایوب نوں انہاں تے غصہ سی پر جداں بھٹو استعفی دے کے سیاستاں وچ آیا تے ایہہ اوس نال نہ رل سکے۔کراچی مرکزنہ رہیا پر سندھیاں نوں واپس وی نہ ملیا کہ ایہہ سیاستاں بہوں کجھ ہڑپ کر گیاں۔ انہاں دی دھی رانی حمیدہ کھوڑو ہوراں لندن یونیورسٹی توں جنوبی ایشیائی تواریخ وچ پی ایچ ڈی کیتی سی اتے اوہ جاندے سن پئی کدی انہاں دے خاندان دی سیاستاں دا طوطی بولدا سی پر ہن شاہنوازبھٹودے پتر نے اوس پرانی سیاستاں نوں قابو کر لتا ہے۔تاں مارے حمیدہ کھوڑو نے علم توں سیاستاں ول دا سفر کیتا۔ایس سفر وچ اوہ بہوں کامیاب تے نہ ہوئیاں پر ا نہاں دی لکھتاں ہمیشہ انہاں دی یاد نوں مہکا ندیاں رہن گیاں۔ اوہ دو وار وزیرِ تعلیم وی سن اتے 1990 تے 2004 وچ انہاں وزارت دے حلف لتے سن۔ مشرف دور وچ وزیر بنن نال انہاں دے مرتبے تے علم بارے سوال ہوئے۔ انہاں دا سب توں ودھیا کم اوہ ہے جداں انہاں نے بچیاں لئی لکھنا شروع کیتا۔ ساڈے وڈے وڈے عالم اتے تریخ دان سمجھدے نیں پئی بچیاں لئی لکھنا کوئی ہینہ تے کوڑکم ہے پر حمیدہ کھوڑو نے سندھ، پنجاب، خیبر پی کے تے بلوچستان بارے بچیاں لئی لکھتاں لکھیاں۔ انہاں دی نظر آن والے کل تے رہندی سی اتے سندھ انہاں دی لکھتاں تے سیاستاں وچ پہلا تے اخیری پڑاؤ سی۔ انہاں اپنے والد دی جگ بیتی وی لکھی جس نوں فیروز سنز لہور چھایا سی۔سندھ دی سیاستاں نوں سمجھن لئی ایہہ کتاب اک اہم دستاویز جے۔ اختلافاں دے باوجود انہاں دے مقام اتے کم بارے ہمیشہ گل ہوندی رہے گی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels