Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> روسی 1971 وچ پاک بھارت جنگ نہیں چاہندے سن۔ سی آئی اے خفیہ ریکارڈ

روسی 1971 وچ پاک بھارت جنگ نہیں چاہندے سن۔ سی آئی اے خفیہ ریکارڈ

January 29th, 2017

عام طور تے ایہو سمجھیا جاندا ہے پئی سویت یونین تے بھارت دا پاکستان توڑن وچ وڈا ہتھ سی۔پاکستانی میڈیا وچ ’’روسی بھارتی لابی‘‘ دا ناں لے کے صفحے دے صفحے کالے کیتے گئے سن۔ پر سی آئی اے جیہڑیاں فائلاں 46 سالاں بعدوں پبلک کیتیاں نیں انہاں وچ الٹ گلاں لکھیاں نیں۔اندرا گاندھی وی گومگو وچ سی پر بھارتی ریاست دے اصل مالک اتے سیکورٹی ادارے جنگی جنون نوں ودھانا چاہندے سن۔ دوجے پاسے یحیٰ خان تے اوس دا فوجی ٹولہ وی ڈھاکہ نوں فوجی ایکشن پاروں سبق سکھانا چاہندا سی۔ جولائی 1971 وچ نکسن نوں گھلی اک فائل وچ سی آئی اے لکھیا پئی روس 1965 وانگ اک ہور پاک انڈیا جنگ دے خلاف ہے۔ اک ہور فائل وچ امریکی صدر نکسن نوں دسیا گیا پئی مدراس وچ روسی قونصلیٹ بھارتی سیاستداناں نوں دسیا ہے پئی روس اج کل پاکستان تے بھارت وچ جنگ نوں خطہ لئی چنگا نہیں سمجھدا۔سمجھ نہیں آوندا پئی اوس ویلے ماسکو وچ کم کرن والا پاکستانی سفارتخانہ کیہہ کر رہیا سی؟ ہورے سفیر ہوراں تے دس دتا ہوئے پر یحی خانی ٹولے وچ رلے کجھ جرنیلاں تے بیوروکریٹاں ’’بنگالیاں توں جان چھڈاون‘‘ ورگے فیصلے کیتے ہون۔
2 مارچ 1971 دی فائل وچ نکسن نوں دسیا گیا پئی جنرل یحیٰ خان اسمبلی دا سیشن ملتوی کردے گا اتے ایس نال یحیٰ سرکار دی اوکڑاں ہور ودھر جاسن۔ جنرل یحیٰ خان مغربی پاکستان دی سب توں وڈی پارٹی نوں نال رلاون وچ ناکام ہے۔ یحیٰ خان سمجھدا ہے پئی اوہ طاقتاں نال پاکستان نوں ٹٹن توں بچا سکدا ہے۔ کڑوڑاں مشرقی پاکستانیاں نوں قابو کرنا بہوں مشکل کم ہے اتے ایہہ فوجی ایکشن انہاں وچ وکھرے ہون دی لہراں نوں تگڑا کرے گا۔
ایہہ اوہ گلاں نیں جنہاں توں پاکستانی سیکورٹی سرکار دا وڈا حصہ انکارری رہیا ہے۔ سی آئی اے دے ریکارڈ نوں جے بھارتی کمیونسٹ اتے بنگالی دانشور موہیت سین دی کتاب نال رکھ کے پڑھو تاں گل ہور زیادہ سمجھ آندی ہے۔ موہیت سین بھارتی کمیونسٹ پارٹی (CPI) نال سن اتے سینئر کمیونسٹ رہنما راجیشور راؤ دے ساتھی سن۔ راجیشور راؤ نوں اندرا گاندھی ماسکو گھلیا سی پئی بھارتی کمیونسٹ روس نوں بھارت نال دفاعی معاہدے لئی مناون۔ روس دی کمیونسٹ پارٹی وچ ایس معاہدے خلاف وڈی اکثریتاں سن۔ایہہ گلاں بھارتی کمیونسٹاں دے وفد نوں ماسکو جا کے پتہ چلیاں۔روسی کمیونسٹاں تے روسی وزیر خارجہ گرومیکو نال ہون والی گل بات نوں موہیت سین لکھیا ہے۔ فوجی ایکشن دا فیصلہ کرن والے یحیٰ خانی جرنیلی ٹولہ نے غلط فیصلے کیتے پر بعد وچ الزام بھٹو تے لاندے رہے۔ کدی روسی بھارتی لابی نوں رگیدے تے کدی سیاستداناں نوں، پر اپنی غلطیاں اج تک اوہناں قبولیاں نہیں۔گرومیکو آکھیا پئی جے بھارت ایس جنگ وچ وڑیا اتے پاکستان ترٹ گیا تاں ایہہ پورا خطہ ہی برباد ہو جا سی۔پچھلے دناں اک انٹرویو وچ کسنجر آکھیا سی پئی جنرل یحی خان نومبر وچ ایس گل تے راضی ہو گیا سی کہ مشرقی پاکستان نوں مارچ 1972وچ وکھرا کر دتا جائے گا۔پھیر بھارت کولوں دسمبر وچ پاکستان تے حملہ کس کروایا؟ ایہو اوہ کنڈی ہے جہیڑی بھٹو ہوراں نوں3فروری1972تیک سمجھ آگئی سی تاں مارے انہاں دولت مشترکہ توں نکلن دا آہر کیتا سی۔چین مخالف ، بھارت برطانیہ گٹھ جوڑ دی کہانی ہلے پاکستان وچ لکھی نہیں گئی۔جے ایہہ کہانی لکھی جائے گی تاں ایہہ وی پتہ چل جائے گا پئی مارچ دے فوجی ایکشن دا فیصلہ کروان وچ سول ملڑی بیوروکریسی داکون کون ہرکارہ رلتی سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels