Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> شہزادیاں دے خون دی ہولی:تخت یا تختہ والے فارمولے اتے راج نیتی

شہزادیاں دے خون دی ہولی:تخت یا تختہ والے فارمولے اتے راج نیتی

January 28th, 2017

جمہوری بندوبست اقتدار دی ٹرانسفراں اتے لوکائی دی رلت د ارستہ، ہلے دنیا ہولے ہولے ایس ول ودھ رہی جے۔پر ایس توں پہلاں ،نرا سو سال پہلے،ہرتھاں، یورپ، افریقہ اتے ایشیا سب تھاواں تے تخت یا تختہ والی پالیسیاں ہی چلدیاں سن۔اج انہاں پرانی پادشاہتاں وچوں دھرمی تے قومیتی تفاخر لبھے جاندے نیں پر تخت یا تختہ دا فارمولا ہی چلدا سی۔ شہنشاہ جہانگیر دے مرن تے شاہ جہان دے سوہرے تے ملکہ نور جہاں دے بھرا آصف خاں نے مل کے چالاں چلنیاں شروع کیتیاں۔ راجوڑی (کشمیر) وچ خسرو دا پُتر’’ داور بخش‘‘ شاہی لشکر دے نال سی۔ آصف خان نے سیاسی چال چلی تے ارادات خاں نال مل کے 12 نومبر1627 نوں شہزادہ داور بخش دی پادشاہت دا اعلان کردتا تے بھمبر دے نیڑے نمازِ ویلے مولوی کولوں داوربخش دے ناں تے خطبہ پڑھوایا۔ اِدھر نور جہاں اپنے پہلے کھسم دی دھی لاڈلی بیگم دا ویاہ جہانگیر دے پُتر شہزادہ’’ شہریار‘‘ نال کرواچکی سی۔ اوہ ہُن شہریار نوں تخت تے بٹھانا چاہندی سی۔ذرا غور کرو،پیو دے مرن تے،ہورے بمار ہون توں ہی، تخت دا کھیڈ تیز ہو جاندا سی جس وچ بہن، بھرا،پیو،پتر، نکے وڈے درباری سب رلتی ہوندے سن۔جہیڑا جت گیا اوہ پادشاہ جہیڑا ہار گیا اوہ کجھ لئی غدار تے کجھ لئی شہید یا ہیرو۔ شہریار نوں لہور وچ اپنے پےؤ دے مرن دی خبر ملی تے اس نے ایتھے لاڈلی بیگم دی صلاح نال آپدی پادشاہت دا اعلان کردتا تے اپنے ناں دا سکہ وی جاری کیتا۔ شہریار نے دریا دے کنڈے تے آپدی فوج کھلار دتی۔ اس نے شاہی خزانیاں دے منہ امراء واسطے کھول دتے۔ فوج دی حمایت حاصل کرن لئی اس نے وادھو پیسہ خرچ کیتا۔ صرف اک ہفتے وچ ستر لکھ دے نیڑے پیسہ فوج تے خرچ کردتا۔
آصف خاں نے ایہہ خبر سُنی تے شہزادہ’’ داوربخش‘‘ نوں شاہی ہاتھی تے بٹھا کے لہور ول نوں ودھیا۔ شہر توں تن کوس دے فاصلے تے گجرات ول جان والی سڑک تے شہر یار دی فوج نال اس دا مقابلہ ہویا تے پہلے ہی حملہ وچ شہریار دی فوج دوڑ گئی۔ شکست دی خبر سُن کے شہریار گھابر کے قلعہ وچ جا وڑیا۔ اگلے دن شاہی لشکر لہور دے قلعہ وچ داخل ہویا تے شہریارجیہڑا حرم وچ لُکیا سی اوس نوں اک کُھسرا پھڑ یچ کے داوربخش دے کول لے آیا۔ شہریار نوں نظر بند کردتا گیا تے دو تن دن بعد اوہنوں انا کردتا گیا۔ تھوڑے دناں بعد شہریار تے اس دے ساتھی شہزدیاں نوں تہہ قتل کردتا گیا۔ آصف خاں نے انہاں ساریاں واقعات دی رپورٹ خفیہ طور تے لہور توں شاہجہاں نوں گھل دتی۔ ایہہ کہانی نقوش دے لہور نمبر وچ لکھی ہے۔ ایس نوں پڑھ کے پتہ چلدا ہے پئی مادھولعل حسین ’’تخت نہ ملدے منگے‘‘ والی گل صحیح کرگیا سی۔ جیہڑے بھراواں، پُتراں تے پیواں نوں نہیں چھڈ دے سن انہاں نوں اج اسلام پسند تے قوم پرستاں نے ہیرو بنا دتا ہے۔ایس کہانی توں ایہہ وی پتہ چلدا ہے پئی فوج نوں رقماں لاون دا کم وی پرانا ہے اتے اقتدار دی کھیڈ وچ ہر طاقتور گروہ نوں یا رلتی کیتا جاندا سی یا ماریا جاندا سی۔رلن والیاں نوں انعام دتے جاندے سن۔ ایس نوں ہی راج نیتی یعنی پاور پالیٹکس آکھدے نیں۔ طاقت دے کھیڈ نوں نظریاتی خانیاں وچ واڑنا اک کوڑ کم ہے پر انگریز ویلے توں سانوں انہاں گمراہیاں والی تریخ ہی پڑھائی جارہی ہے۔تخت یا تختہ والی پالیسیاں توں بچن لئی بندیاں اقردار دی ٹرانسفراں دا نواں راہ چوناں پاروں کڈھیا پر کجھ منچلے اج وی ایس نویں رستے نوں تخت یا تختہ پاروں چلانا چاہندے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels