Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> بھٹوبارے پھیلائیاں گمراہیاں: بھٹو دا جواب انہاں دی لکھتاں وچوں

بھٹوبارے پھیلائیاں گمراہیاں: بھٹو دا جواب انہاں دی لکھتاں وچوں

بھٹو دی 89ویں سالگرہ تے کاشف بخاری دی پڑچول
January 5th, 2017

ساڈی سیاست لوکائی دی سیاست ہے اتے ایہہ کھلی سیاست ہے۔۔۔جے جمہوریت اسلام دے خلاف نہیں تے برابری کس طراں اسلام دے خلاف ہوسی؟ انگریزی وچ برابری ہی سوشلزم ہے۔۔ پاکستان نوں تبدیلی دی لوڑ ہے، اک بنیادی تبدیلی دی۔ ایس توں بناں اسی لوکاں تے ملک دی خدمت نہیں کر سکدے۔۔۔اک پاسے تے چھ نکات نوں پاکستان دے خلاف دسیا جا رہیا ہے، اسی وی ایہو کہندے ہاں مگر فیر کراچی دے رہن والے اک وزیر دا اخبار چھ نکات نوں چک رہیا جے۔۔میں شیخ مجیب نوں مبارکباد دیناہاں۔۔ اسی اکثریت دی عزت کردے ہاں۔ مشرقی تے مغربی پاکستان دی برابری دا اصول ہن مک گیا ہے۔ اسی اکثریت دے اصول نوں جمہوری پکھ تے منیندے ہاں۔سندھ تے پنجاب طاقت دے تھم نیں۔ اسی مرکز وچ حکومت بنائیے یا نہ بنائیے پر پنجاب اسمبلی دی چابیاں میرے بوجے وچ نیں۔ میرے اک بوجے وچ پنجاب تے دوجے وچ سندھ اسمبلی دیاں چابیاں نیں۔۔میرے دل وچ انڈیا خلاف کوئی گل نہیں۔ میں دکھ دی حالت وچ گل کردا ہاں۔ ویکھو بھارتی سوچدے نیں کہ اوہ مشرقی پاکستان وچ جت گئے نیں، مگر اوہ نہیں جاندے اوہناں بنگال دی اگ وچ ہتھ پایا ہے۔۔شیخ مجیب اک نسل پرست ملک چاہندا ہے تے اوہ غیر بنگالیاں دے لہو دا پیاسا جے۔ ’’کل نوں اوہ بدھاں نوں کڈ دے گا کیوں جے اوہ چٹاگانگ وسن والے چکمہ قبائل دے وی خلاف ہے۔ ایس طراں اوتھے نرے بنگالی ہی رہ جاسن۔ فیر اوہ بنگالیاں وچوں وی آپدے مخالفاں نوں چنے گا تے کجھ نوں غدار آکھ دے گا۔

آج 5 جنوری دے دن 1928 دے ورہے شاہنواز تے خورشید دے گھر جنمے ذلفی بھٹو بارے اوہناں دے ٹبّر دے کسے وی جی نوں ایہہ اندازہ نہیں سی پئی اوہناں دے خاندان دا ناں ایسے بال توں پچھانیا جاے گا۔ اونج تے شاہنواز بھٹو ہوری وی بڑے گنی تے گیانی بندے سن تے اپنی قابلیت دا لوہا منوا چکے سن۔ اوہناں سندھ نوں بمبئی توں وکھ کرن لئی جدوجہداں کیتیاں تے جوناگڑھ نوں پاکستان وچ شامل کرن دا کاغذ وی اوہناں دی ڈونگی سیاسی بصیرتاں ول دس پاندا ہے۔ شاہنواز نوں سندھی تے پاکستانی سیاست وچ کنج کھجل کیتا گیا ایہہ وی سب تواریخ دا حصہ ہے اتے ایس سب پچھوکڑ نوں ذلفی جاندا سی اتے اوس ضرور آپدے ایس پچھوکڑ توں سبق سکھے ہوسن۔ ایہو گل ہے پئی ذلفی بھٹو دا ناں کجھ ایس طراں پاکستانی سیاست وچ وجیا کہ اوس دی گونج آج وی سنائی دیندی ہے۔ اوہناں اقتدار چھڈ کے دو فوجی جرنیلاں نال متھا لایا تے پاکستان وچ پہلی واری لوکائی دی سیاست تے عام بندے دی گل کجھ انج کیتی پئی سیاست نوں وڈے لوکاں دے ڈرائنگ روماں وچوں کڈھ کے گلیاں محلیاں تے پنڈاں وچ لے گئے۔ مگر اوہناں دی اے ’’غلطی‘‘ کدی معاف نہیں کیتی گئی تے ایس نابری کارن اوہناں نوں سولی کھچ دتا گیا۔ ایہہ اینج ہی سی جنج دیومالائی کردار پرومی تھیوس دیوتاواں دی طاقتاں چوری کر عوام دے حوالے کر دتیاں سن۔ عوام نال اوہناں دی سانجھ تے پیار نسلااں وچ منتقل ہویا تے اوہناں دی دھی اوہو پرچم چک ’باہرلیاں‘ نال ٹکر پئی۔ بھٹوز دی موت نال ایہہ رومانس آج وی جاری۔ بھٹو ہوری صرف مجمع گرمان والے مقرر ہی نہیں سن سگوں ڈونگے سیاسی ماملیاں تے اوہناں دیاں لکھتاں،انٹرویو تے تقریراں آج وی گیان دے دیوے بالدیاں نیں۔ اوہناں دیاں کجھ چونویاں گلاں تہاڈے نال سانجھیاں کر رہیا واں، پئی تسی وی پڑھو۔جے تہاڈی اوس ویلے دی سیاستاں تے سیاسی کرداراں تے نظر ہو سی جس دور وچ بھٹو ہوراں ایہہ گلاں کیتیاں سن تاں تہانوں اوس کوڑ اتے گمراہیاں والے پروپیگنڈا دی خبر وی ہو جا سی جہیڑہ ایتھے پھیلایا جاندا رہیا۔تاں مارے انہاں چونوی گلاں دے نال سال تے ڈیٹاں وی لکھیاں نیں۔
گلاں بھٹو ہوراں دیاں
’’اسیں پاکستان دی لوکائی ہاں، لوکی ہی میری گول میز کانفرنس ہن۔ ایوب خان دی گول میز نری کجھ لوکاں دی گول میز ہے جیہڑے اندر وڑ کے لوکاں خلاف سازشاں کردے نیں۔ ایسے لئی اسی ایس کانفرنس وچ نہیں گئے۔ ساڈی سیاست لوکائی دی سیاست ہے اتے ایہہ کھلی سیاست ہے۔ ایوب خان لوکاں دی جہدوجہد نوں کھجل کرنا چاہندا ہے۔ اوہ چاہندا ہے پئی اوہدے خلاف تحریک ہولی ہولی مک جاوے۔ گول میز بلاون دا ایہو مقصد ہے۔ اوہ اقتدار چھڈنا نہیں چاہندا۔ اوہدے مگر ریاست ہے، سرمایہ دار، جاگیردار، فوج تے پلس ہے، پر لوکی نہیں۔ اوہ لوکاں نوں بیوقوف بنانا چاہندا ہے۔ ایس کانفرنس وچوں کجھ حاصل نہیں ہونا، نہ چوناں ا تے نہ ہی ووٹ دا حق۔ باقی سارے لیڈر چاہندے نے کہ میں تحریک مکا دیاں۔ ایوب خان شکاری ہے مگر میں اوس توں چنگا شکاری آں۔ اوہ سب نوں پھسا سکدا ہے پر مینوں نہیں۔ میں اوس دے جال وچ نہیں آیا اتے میں نہیں چاہندا پئی لوکی اوس دے جال وچ پھس جاون۔ میں ہمیش لوکاں دے نال رہساں۔‘‘(4 جنوری 1970،نشتر پارک کراچی، الیکشن دا پہلا جلسہ)
’’آکھیا جاندا ہے کہ پاکستان وچ کجھ اسلام پسند پارٹیاں نیں۔ مینوں ایس دا بڑا افسوس ہے، کیہہ دُوجے اسلام دے خلاف نیں؟ پاکستان وچ کوئی کس طراں اسلام دے خلاف ہو سکدا ہے؟ پاکستان بنن دی مخالفتاں کرن والے نواب زادے آج سانوں دسدے نیں کہ سماجی برابری اسلام دے خلاف ہے؟ اسلام وچ برابری بارے وی دس پائی گئی ہے جس طراں جمہوریت بارے گل کیتی گئی ہے۔ ایہہ لوک برابری دی اصولاں نوں غیر اسلامی کس طراں آکھ سکدے نیں؟ برابری اسلام دی بنیاد ہے۔ جے جمہوریت اسلام دے خلاف نہیں تے برابری کس طراں اسلام دے خلاف ہوسی؟ انگریزی وچ برابری ہی سوشلزم ہے تے ایہہ اسلام دے خلاف کس طراں ہو گئی؟‘‘ (4جنوری 1770، نشتر پارک)
’’لیگل فریم ورک آرڈر 28مارچ 1970 نوں لاگو کیتا گیاسی۔ اسی اپنی پوزیش ایس دی روشنی وچ طے کراں گے۔ایس بارے ڈونگے وچار دی لوڑ ہے۔ سانوں چوناں لڑن دا فیصلہ فیر توں ویکھنا پوے گا۔ اسی چوناں اک مکمل خود مختار اسمبلی لئی لڑنا چاہندے ہاں۔ سانوں ویکھنا پوے گا اسی ایہوں جہی اسمبلی وچ بیٹھدے ہاں یا نہیں۔ پاکستان نوں تبدیلی دی لوڑ ہے، اک بنیادی تبدیلی دی۔ ایس توں بناں اسی لوکاں تے ملک دی خدمت نہیں کر سکدے۔‘‘(25اپریل 1970 کوہاٹ جلسہ)
’’اساں یحییٰ خان نوں دسیا سی پئی تیرے وزیر چوناں دوران نیوٹرل نہیں رہن لگے۔ اوس آکھیا کہ میں تے میرے وزیر نیوٹرل رہن گے۔ سانوں پتہ سی پئی وزیر چوناں وچ مداخلت کر سن۔ یحییٰ خان اوہناں نوں روکن دا کیہہ پربندھ کیتا؟ اوہناں وچوں اک وزیر تے سرمایہ داراں نوں اک پارٹی دی حمیت لئی آکھدا رہیا ہے۔ اک پاسے تے چھ نکات نوں پاکستان دے خلاف دسیا جا رہیا ہے، اسی وی ایہو کہندے ہاں مگر فیر کراچی دے رہن والے اک وزیر دا اخبار چھ نکات نوں چک رہیا جے۔‘‘(5 اگست1970 ملیر کراچی وچ جلسہ)
’’اسی ایف سی آر ورگے کالے قنون مکا کے ہائی کورٹ دی رٹ گلگت بلتستان وچ لے کے جاواں گے۔ اجیہی ریاستاں جہڑیاں اجے پاکستان وچ شامل نہیں ہویاں اسی اوتھے دی لوکائی نوں برابری دے حق دیاں گے۔‘‘(18نومبر 1970 ٹی وی،ریڈیو تے خطاب)
’’میں شیخ مجیب نوں مبارکباد دیناں۔ اسی اکثریت دی عزت کردے ہاں۔ مشرقی تے مغربی پاکستان دی برابری دا اصول ہن مک گیا ہے۔ اسی اکثریت دے اصول نوں جمہوری پکھ تے منیندے ہاں۔ مگر سانوں کجھ ہور گلاں وی ویکھنیاں پین گیاں۔ سندھ تے پنجاب طاقت دے تھم نیں۔ اسی مرکز وچ حکومت بنائیے یا نہ بنائیے پر پنجاب اسمبلی دی چابیاں میرے بوجے وچ نیں۔ میرے اک بوجے وچ پنجاب تے دوجے وچ سندھ اسمبلی دیاں چابیاں نیں۔‘‘ (12دسمبر 1970, لہور اسمبلی باہر تقریر کردیاں)
ٹائم میگزین نوں انٹرویو دیندیاں صدر بھٹو نے آکھیا کہ بنگلہ دیش نوں منن دا ماملہ پاکستانی جنگی قیدیاں دی رہائی مگروں ہی آئے گا۔ اوہناں کہیا کہ بنگلہ دیش وچ چوناں تے پاکستان وچ نواں آئین بنن مگروں موجودہ ڈیڈ لاک ضرور مکے گا۔ ’’میرے دل وچ انڈیا خلاف کوئی گل نہیں۔ میں دکھ دی حالت وچ گل کردا ہاں۔ ویکھو بھارتی سوچدے نیں کہ اوہ مشرقی پاکستان وچ جت گئے نیں، مگر اوہ نہیں جاندے اوہناں بنگال دی اگ وچ ہتھ پایا ہے تے اوہناں دیاں انگلاں سڑ جان گیاں۔‘‘۔۔۔۔’’بّرِ صغیر وچ امریکی رول بارے بھٹو صاحب آکھیا، ’’جے امریکی فوری فیدے توں ہٹ کے صدر ولسن دی سجھداری والی پالیسی اپنائی تے میں امریکہ دا اک وڈا رول ویکھنا ہاں۔ روس وی پورا فیدا چکے گا پر موجودہ ویلے وچ چین کوئی وڈا کردار نہیں ادا کر سکن لگا۔‘‘ 5مارچ1973
لندن ویک اینڈ ٹی وی نال گال بات کردیاں بھٹو صاحب آکھیا شیخ مجیب اک نسل پرست ملک چاہندا ہے تے اوہ غیر بنگالیاں دے لہو دا پیاسا جے۔ ’’کل نوں اوہ بدھاں نوں کڈ دے گا کیوں جے اوہ چٹاگانگ وسن والے چکمہ قبائل دے وی خلاف ہے۔ ایس طراں اوتھے نرے بنگالی ہی رہ جاسن۔ فیر اوہ بنگالیاں وچوں وی آپدے مخالفاں نوں چنے گا تے کجھ نوں غدار آکھ دے گا۔ انج ایہہ مسلہ بہوں آگے ودھ جاسی۔‘‘25مارچ 1973
ایہہ ٹوٹے جس کتاب توں لتے گئے نیں اوس دا ناں ’’ذالفقار علی بھٹو دی تقریراں تے بیانات‘‘(انگریزی) ہیگا اتے ایس نوں مڑ چھاپے ’’کلاسیک‘‘ لہور نے چڑھایا سی۔ایہہ کتاب انٹر نیٹ تے وی پئی ہوئی جے۔




Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels