Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> مشرقی پاکستان:دو اخباری سرخیاں کنج کوڑ ماریا، ایڈیٹر آپوں گل کھول دتی

مشرقی پاکستان:دو اخباری سرخیاں کنج کوڑ ماریا، ایڈیٹر آپوں گل کھول دتی

کاشف بخاری
January 3rd, 2017

عباس اطہرہوراں دا ناں پاکستانی سیاست وچ اک گُنی تے کاریگر اخبار نویس دے طور تے پہچان رکھدا ہے۔ سرخیاں بناکے لانا اتے وقوعیاں تے گل باتاں وچوں خبراں کڈنا تے اوہنوں اپنے رنگ وچ رنگ کے اخباراں دے متھے تے سجانا اوہناں توں ودھ کوئی نہیں سی جاندا۔ اوہناں دی بنائی ہوئی اک سرخی پاکستان وچ سب توں وادھو بخثاں کھلاریاں اتے ایس سرخی دے نال پاکستان دی تریخ دا اک سب توں اہم پر افسوس ناک باب جڑیا ہے۔ ایہہ سرخی روزنامہ ’’آزاد‘‘ دے متھے تے لگی اتے بھٹو صاحب دی اک تقریر چوں اخذ کیتی گئی سی۔ سرخی سی ’’اُدھرتم اِدھر ہم‘‘۔ اک اجیہی سرخی جس دی گونج اج تیک ساڈی تاریخ وچ سنائی دیندی اے کہ خاص کر دسمبر وچ جد پاکستان ٹٹن دا دیہاڑ نیڑے آوندا اے تے اخباراں، ٹی وی پروگراماں تے سوشل میڈیا وچ ایس تے بہوں تگڑا وچار ہوندا اے۔ ایسے سرخی دی بناں تے بھٹو صاحب خلاف پاکستان توڑن دا کیس پکا کیتا جاندا ہے۔ بھٹو مخالف سیاستدان اتے دوسرے ڈونگی پڑچول کیتے بنا ای ڈانگاں سوٹے لے کے بھٹو صاحب تے چڑھائی کے اپنے پرانے ویر کڈن دا آہر کردے نیں۔ ایہدے وچ اجیہے لوکی وی نیں جہیڑے سب کج جاندے ہوئے وی سچ لکاندے نیں تے پھوکے الزام لاندے نیں اتے اجیہے وی جیہڑے نرے، اک سرخی نوں تاریخ سمجھ کے اپنا تھیس اسار دے نیں۔ بہوں سارے لوکاں نوں تے اے دی نہیں پتہ پئی روزنامہ آزاد جہدے وچ اے سرخی لگی مجلس احرار دے نامور لیڈر شیخ حسام الدین امرتسری دے پتر شیخ ریاض الدین ہوراں دا اخبار سی اتے رائل پارک ایس دا دفتر سی۔ عباس اطہر،آئی اے رحمن،عبداللہ ملک تے حمید اختر ہوراں ایہہ اخبار کرائے تے لتا سی۔ عباس اطہر ہوراں جولائی 2008 وچ مجیب الرحمان شامی دے ماہوار رسالے ’’قومی ڈائجسٹ‘‘ لہور نوں اک انٹرویو دیندیاں اپنی حیاتی دے بہوں سارے رنگاں تے گل بات کیتی اوتھے اپنی ایس مشہورِ زمانہ یا بدنامِ زمانہ سرخی بارے دی گل کیتی آؤ دیکھئے شاہ جی کی آکھدے نیں۔
س: ’’ادھر تم اِدھر ہم‘‘ والی سرخی لاندیاں تہاڈے چیتے کی گل سی ؟ کی اے شاعری سی؟
ج: اے سرخی بھٹو صاحب دی تقریر وچوں کڈی سی، اے جملہ اوہناں دانہیں سی۔ گل اے پئی میں، عبداللہ ملک، حمید اختر اتے آئی اے رحمن روزنامہ آزاد وچ کام کردے ساں۔ 70 دیاں چوناں مگروں بھٹو صاحب نے لہور وچ جشنِ فتح دا جلسہ اتے جلوس کیتا۔ میں وی ایس جلوچ وچ رلتی ہویا۔ جیہڑی گل توں میں سرخی کڈی اوہ بھٹو صاحب دا اے جملہ سی’’ بنگالیاں مغربی پاکستان دی غلامی کیتی ہے مگر اسی بنگالیاں دی غلامی نہیں قبولاں گے سگوں اوہناں نال برابری دی پدھر تے رہواں گے۔‘‘ میں سرخی لائی۔ ’’ہم مشرقی پاکستان کی غلامی قبول نہیں کریں گے‘‘۔ سویرے عبداللہ ملک ہوری جیہڑے میرے نال بہوں پیار کردے سن، ملے تے بہوں غصے ہوے۔ مینوں کہن لگے اے توں کی کررہیا ایں، توں پاکستان توڑنا چاہندا ایں۔ میں آکھیا کہ میں جو کج سنیا اتے اخذ کیتا او لکھیا تے بھٹو ہوراں دی گل بڑی اہم اے۔ ایہاں چوناں پاروں مینوں ملک ٹڈا دِسدا اے۔ تسی جو مرضی تجزیہ کرو مینوں تے انج اے جاپدا اے۔ خیر ایسے اخبار وچ سرخی لگی۔ ’’مشرقی پاکستان کو آزاد کردو‘‘ بھاشانی اتے مجیب الرحمان دے بیان اجیہے ہی سن۔ مینوں چنگی طرحاں یاد نہیں بھٹو ہوراں دے لفظ کی سن مگر اوہناں دا موقف سی، اُدھر تم ہو اور اِدھر میں ہوں۔ اگلے دیہاڑے ای اوہناں گل واضح کرن لئی بیان دتا اتے میں سرخی لائی۔’’نہ میں نہ تم‘‘۔ میں دونوں اور ایک پاکستان۔‘‘
س: تسی سمجھدے او پئی ایس سرخی کارن ملک ٹٹیا؟
ج: جے کرتے فوج ایس ’’سرخی‘‘ دے کول سی تے ٹھیک اے اتے جے کر بنگالی زنانیاں نال زیادتی تے شہراں وچ توپ خانے دا استعمال ایس سرخی کارن ہویا تے فیر میں ہی ذمہ دار ہاں۔ گل اے پئی ملک ٹٹن مگروں جیہڑے لوگ ایس دے ذمہ دار سن تے فوج دا ناں نہیں سی لینا چاہندے اوہناں بھٹو صاحب نوں قربانی دا بکرا بنا لیا تے ایس سرخی نوں اگے کردِتا۔اوہناں ایہو تاثر دتا پئی بھٹوآکھیا اے ملک توڑ دیو حالانکہ اوس ویلے بھٹو دی حیثیت کی سی فوج سامنے۔ اخیرلی واری جدوں مجیب نال مذاکرات کرن (بھٹو ہوری)مشرقی پاکستان گئے سن تے او مذاکرات ناکام ہوگئے سن۔ جرنیلاں اک پلان دے تحت بھٹو نوں ہوٹل دی اخیری منزل ٹھہرایا جس دی کھڑکی دھان منڈی ول کھلدی سی۔ یحیٰ خان آپ تے واپس آگیا پر بھٹو نوں اوتھے ہی چڈ آیا۔ بھٹو نے ساری راتیں لوکاں تے ٹینک چڑھاون، گولہ باری کرن اتے بندیاں نوں کیڑیاں وانگوں مارن دا منظر اپنی اکھیں ڈٹھا۔ بھٹو صاحب واپسی تے کراچی ائیرپورٹ لتھے تے سرکاری خبر ایجنسی نے خبر لائی کہ بھٹو نے آکھیا۔ ’’خدا کا شکر ہے پاکستان بچ گیا۔‘‘ پر اصل جملہ مساوات وچ چھپیا اوہ کجھ انج سی ’’خدا پاکستان کو بچائے۔‘‘ اے جملہ ساڈے رپورٹر نے سنیا سی جیہڑا اوس ویلے ائر پورٹ موجود سی۔ اودے پاروں بھٹو صاحب بہوں نروس سن اتے اوہناں دیاں لتاں کنب رئیاں سن۔ او اکوں جملہ بول کے گڈی وچ بہہ گئے۔ گھر پہنچدیاں اوہناں سب توں پہلوں شیخ رشید نوں فون کیتا۔ اوس زمانے وچ شیخ رشید رتے مختار رانا وغیرہ لائل پور وچ جلاؤ گھیراؤ دی تحریک چلارہے سن تے اوہنا دا نعرہ سی’’ کرخنہ مزدور دا، پہلی واہی وان دی‘‘۔ مختار راناایہہ نعرہ وی لوایااسی’’ مختار رانا، قبضہ کرانا‘‘۔ اے لوکی اوہناں دناں ایس پکھ دی انتہا پسند کاروائیاں وچ رجھے ہوئے سن۔ بھٹو صاحب نے شیخ رشید نو فون کرکے آکھیا جناب اے انقلاب بند کردیو میں اکھیں ڈٹھا ہے پئی فوج کس طرح دی وحشیانہ کاروائیاں کرسکدی اے۔ چنگا اے تسی اے انقلاب بند کرو تے گھریں جاؤ بھٹو صاحب نے ایہہ سب بند کرادتا۔
س: سقوطِ ڈھاکہ تے کیہ ردِعمل سی؟
ج: میری چھٹی حِس نے بہوں پہلوں دس پائی سی پئی اے ہو جانا اے۔ سارے دوست بہوں پریشاں سن ،اساں اخبار کڈیا تے چپ چپیتے گھروں گھری ٹر پئے۔ پورے لہور وچ سناٹا سی ۔
س: تسی سرخی کی لائی؟
ج: قائداعظم دا اک اکھان لایا اتے لکھا۔‘‘ بھارتی فوج ڈھاکہ میں داخل ہوگی۔‘‘
س: نویں پاکستان بارے کی آساں اتے ڈر سَن؟
ج: کوئی خاص نہیں۔ تسی پاویں مینوں پنجابی شاونسٹ سمجھو لوو پر میں جد گول باغ مجیب نوں سنیا تے میرا خیال سی دویں پاسے اک کمزور جیہی فیڈریشن بنا کے نہیں رہ سکدے اساں۔ اک غیر منطقی وجود سے جیہڑا بہوں دیرنہیں سی چل سکدا۔ ایہوں ہویا۔
س: ایوب، یحیٰی، بھٹو تن مارشل لا ایڈمنسٹریٹر سن۔ اک سویلین نال مارشل لا ایڈمنسٹریٹر دی پوشل کیسا لگا تہانوں؟
ج: اصل گل اے پئی ایتھے، آرمی چیف دا اک ان لکھ قنون ہے۔ جد اوہ چاہندا ہے ملک تے قبضہ کرن لیندا ہے تے جو دل وچ آوندا اے کرداہے۔ ایوب خان ایس دا موڈھی ہے۔ اوس اقتدار تے قبضہ کیتا تے جاندا یحیٰ دے حوالے کرگیا۔ یحیٰ نیں چوناں کرو ایاں تے اوس نوں پک سی پئی مینڈیٹ تقسیم ہووئے گا۔ ایجنسیاں اوس ایہی دسیا سی۔ اوہندا خیال سی پئی سیاسی پارٹیاں نال سودے بازی کرکے صدارت دی گدلی تے بیٹھا رہوے گا۔ اوتے ڈھاکہ ڈگن مگروں وی صدر رہنا چاہندا سی۔ اوس ٹی وی تے اک تقریر وی کروائی کہ ہار توں دل چھوٹا نہیں کریدا تے غزوات دا حوالہ دتا گیا۔ دوجی گل اے سی پئی جنرل حمید نوں اقتدار دے دتا جاوے۔ بھٹو صاحب اوس ویلے نیویارک وچ سن۔ ایتھے جنرل گل حسن، ائر مارشل رحیم تے دوجے کجھ جرنیلاں بغاوت کیتی، تے یحیٰ کولوں استعفیٰ لے لتا۔ جسطراں اوہناں 88ء وچ بے نظیر بھٹو نوں اقتدار دتا اودوں لوکائی دے غصّے توں بچن اتے فوج دا مورال بحال کران لئی بھٹو نوں اقتدار دتا۔ کیوں جے اوہناں دے 90ہزار فوج بندی سن نے مغربی پاکستان دے وڈے رقبے تے بھارتی قابض سن، سو اوہناں نوں لوڑ سی کہ کوئی سویلین آکے ما ملا سانبھے، گل بات کرے تے فوج نوں ذلت توں کڈے ۔ بھٹو ہی اک اجیہا بندا سی جیہڑا اپنی بدھی اتے حکمت عملی نال اے کرسکدا سی۔ ایس لئی جرنیلاں یحییٰ نوں راضی کیتا تے بھٹو صاحب نوں نیویارک توں سددیا گیا۔ بھٹو ہوری واپس تے آ رہے سن پر وچوں کچھ ڈرے وی ہوئے سن۔ اوہناں نو ڈر سی پئی اوہناں نوں پھڑلیتا جاوے گا۔ مصطفی کھر کیندا اے پئی اوہناں راہ وچ کئی وار ایس گل دا ذکر کیتا۔ کھر آکھیا پئی حالات تہاڈی حمیت وچ ہن۔ اوس ویلے قنون صرف مارشل لا ہی سی۔ اوہناں حالات وچ فوج اتے بھٹو کول ہور کوئی راہ وی نہیں سی سوائے ایس دے کہ اوہ سویلیں مارشل لاء ایڈمنسٹریٹر بن کے اقتدار سانبھن۔ نہ کوئی آئین سی تے نہ کوئی قنون ایس توں علاوہ کوئی طریقہ ہے سی تے مینوں دسوں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels