Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> بیگم پورہ لہور:ابدالی، مجذوب،شاہنواز خان تے شہریاں دی کمبختیاں

بیگم پورہ لہور:ابدالی، مجذوب،شاہنواز خان تے شہریاں دی کمبختیاں

January 2nd, 2017

صابر شاہ لہور دا اک نیم مجذوب درویش سی۔ کسے زمانے مشہد وچ اس دی ملاقات احمدشاہ درانی (ابدالی)نال ہوئی۔ صابر شاہ نے احمد شاہ نوں بادشاہت دی بشارت دتی جیہڑی اتفاق نال صحیح ثابت ہوئی۔ ہن احمد شاہ درانی ہر ویلے صابر شاہ نوں آپدے نال نال رکھدے تے اوہناں دا احترام کردے۔جدوں صابر شاہ لہور پہنچیا تے کجھ لوکاں نے ایہہ گل مشہور کردتی کہ احمد شاہ درانی نے آپدا اک جادوگر لہور کھلیا جے کیونجے اپنے جادو تے زور تے لہوردے ناظم شاہنواز خان دا توپ خانہ بے کار کردے۔
ناظم لہور نے درویش صابر شاہ نوں آپدے دربار وچ طلب کیتا تے اس توں پچھ گچھ کیتی۔ صابر شاہ نے شاہنواز خان نال قلندرانہ شاناں نال گل بات کیتی جس نوں شاہنواز خان نے اپنی گستاخی قراردتا اتے آکھیا پئی دوریش دے گل وچ پگھلی چاندی پا دتی جائے۔ گرم سیال چاندی دے گلے وچ اُتر تے ہی صابر شاہ دا دم نکل گیا۔ شاہنواز خان دا ایس تے وی غصہ گھٹ نہ ہویا تے اس نے صابر شاہ دی لاش نوں دفناون دی تھاں باہر سٹوادتا جس نوں بعد چوں درویش دے مریداں بادشاہی مسیت دے مگر دفن کردتا۔
احمد شاہے نوں صابر شاہ دی موت دا پتہ لگیا تے اوہ غم تے غصے نال دیوانہ ہوگیا۔ اس نے شاہنواز خان نوں مزہ چکھان دی ٹھان لتی ۔اوہ لہور تے لشکر کشیاں کردا 8 جنوری 1748 نوں شاہدرہ پہنچیا تے شمال ول ودھ کے دریا پار کیتا اتے شالامارباغ دے لاگے خیمہ لایا۔ شاہنواز نوں خبر ملی تے اس نے مقابلے لئی بیگم پورہ دی فصیل تے توپاں چڑھا دتیاں تے لڑن مرن لئی تیا ہو گیا۔
11 جنوری 1748 نوں مزار شاہِ بلاول دے نیڑے جتھے دریائے راوی دی پرانی گذرگاہ سی، دوناں دی فوجاں وچ رن پیا۔ ناظم لہور دی فوج تتر بتر ہوکے شہر دے فرق فرق محلیاں ول دوڑ گئی۔ شاہنواز خان بیگم پورہ دے باسیاں نوں تقدیر دے حوالے کرکے آپدے ساتھیاں سنے سارا خزانہ دلی دوڑ گیا۔ احمد شاہ (ابدالی) 12 جنوری 1748 نوں بیگم وچ داخل ہویا تے ایتھے بہوں لوٹ مار تے قتل عام دا حکم جاری کیتا۔
ویروا: واقعات لہور وچ چھپے ایس وقوعے نوں پڑھ کے بہوں ساریاں پرانی متھاں ترٹ جاندیاں نیں۔ذراغور کرو دونوں، ابدالی اتے شاہنواز خان، پٹھان سن پر برباد لہور نوں کر رہے سن۔انہاں چوں کون باہرلا سی تے کون ایتھے دا، دونوں پٹھان وی سن تے مسلمان وی۔اجہے وقوعے دسدے نیں پئی انہاں وچوں پختون قوم پرستیاں اتے اسلامی جہاداں دی کہانیاں بنانا اکا اک کوڑ کم جے۔اجہے وقوعیاں نوں پنجابی پٹھان جھیڑیاں وچ وی ورتیا جاندا ہے اتے ایہہ سب لوکائی نون کراہے پاون دا گھجل پروگرام جے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels