Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> روسی پٹی دی کہانی

روسی پٹی دی کہانی

جمیل اختر
December 24th, 2014

بوہت پہلاں دی گل اے، میں اک روسی لکھاری دی کہانی پڑھی سی۔ اوہنے لکھیا سی کہ میں اک اخبار دا میگزین ایڈیٹر آں۔ اک دن میں اپنے میگزین وچ اک لطیفہ چھاپیا کہ اک بندے دے پیر تے پٹی بنی ہوئی سی۔ اوہدا اک دوست اوہنوں ملن لئی آیاتےپٹی ویکھ کے پچھیا کہ پیر تے کیہ ہوئیا اے۔ اوبولیا کجھ نیئں ہویا۔ سر تے سٹ لگی سی۔ دوست نے حیرانی نال پچھیا کہ جے سٹ سر تے لگی اے تے پٹی پیر تے کیوں بنی ہے۔ اوہ بولیا کہ بنی تے سر تے ای سی پر پیرتیکر اپڑ گئی اے۔

لکھاری نے لکھیا کہ لطیفہ چھپن توں کچھ گھنٹیاں بعد ایک بندے دا ٹیلی فون آیا تو اوبولیا کہ میں کافی چر تو تہانوں پڑ رہیاں آں۔ پر پٹی آلی گل میری سمجھ وچ نیئں آئی۔ میں آکھیا کہ بھرا جی ایہہ اک لطیفہ اے۔ او پھکا جیا ہس کے بولیا ۔ اچھا تے ایہہ لطیفہ اے، میں سمجھیا کہ سچا واقعہ اے۔

اوہناں لکھیا کہ میں سمجھیا کہ گل مک گئی اے۔ پر شام نوں اوسے بندے دا فیر ٹیلی فون آیا تے وہ ہولی جئی بولیا۔ تہاڈا لطیفہ تے چنگا اے ، پر اک گل میرے دماغ وچ پھس گئی اے۔ میں پچھیا کہ کیہڑی گل؟ او بولیا۔ کیہ پٹی ڈھلی بنی ہوئی سی جے سر تو کھسک کے پیر تیکر اپڑ گئی؟ میں ہسدیاں ہوئیاں آکھیا۔ بھرا جی میں تہانوں پہلاں وی دسیا سی کہ ایہہ اک لطیفہ اے۔ اوہ پھکا جیا ہس کے بولیا۔ بڑا عجیب تے مزے آلہ لطیفہ اے۔

اپنی کہانی وچ اگے ٹر کے اوہنا ں لکھیا کہ جد رات چوکھی ہوگئی تے میں دفتر توں نکلن لگیا تے ٹیلی فون دی گھنٹی وجی۔ میں ریسور چکیا تے دوجے پاسے اوہو بندہ سی۔اوہ بولیا ۔ رات دے ویلے فون کرن دی معافی چاہنداں آں ۔ پر ہن تیکر میرا دماغ تہاڈی کہانی وچ پھسیا ہوئیا اے۔ تسیں مینوں ایہہ دسو کیہ اوس بندے دا سر اوہدے دھٹر تو وڈا سی؟ میں پچھیا کیہ مطلب؟ اوہ بولیا جے اوہدا سر وڈا نہ ہوندا تو پٹی گردن وچ پھس جاندی ، پیر تیکر نہ جاندی۔ تہانوں ایہہ تے پتا اے کہ بندے دے موندھے سر توں چوڑے ہوندے نیں۔ میں اپنے غصے تے قابو پاندیاں ہوئیاں بولیا۔ بھرا جی میں تہانوں پہلاں وی دس چکیا آں کہ ایہ سچی کہانی نیئں اے۔ صرف لطیفہ اے۔ اوہ اک واری فیر پھکا جیا ہسیا تے اک واری فیر معافی منگدیاں ہوئیاں فون بند کردتا۔

روسی لکھاری نے اپنی کہانی وچ اگے لکھیا اے کہ رات دے ڈھائی تن وجے ٹیلی فون دیاں گھنٹیاں دے نال میری اکھ کھل گئی ۔ میں ریسور چکیا تے ہیلو سن کے میریاں اکھاں وچ خون اتر آیا تے میں ڈاڈھی مشکل دے نال اپنے غصے تے قابوپایا۔ دوجے پاسے اوہو بندہ سی تے معافی منگدیاں ہوئیاں بولیا۔ میں سوچ سوچ کے پاگل ہوگیاآں۔ مینوں نیندر نیئں آندی پئی ۔ مہربانی کر کے مینوں اک گل دا جواب دیو۔ میں پچھیا کیہڑی گل ؟ بولیا۔ کیہ اوس بندے نیں اپنے جسے تے تیل ملیا ہویا سی؟ میں پوچھیا کیہ مطلب؟ اوہ بولیا جد تیکر جسا چیکنا نہ ہووے پٹی سر توں کھسک کے تھلے نئیں آسکدی۔ میں ٹھیک آکھدا پیاں آں ؟ میں غصے دے نال بولیا۔ میں تہانوں کنی واری دس چکیا آں کہ ایہ اک لطیفہ اے۔ اوہنے اک واری فیر معافی منگی تے فون بند کردتا۔


لکھاری دا کہنا اے کہ سویرے میں دفتر جان لئی تیاری کردا پیاں ساں کہ ٹیلی فون دی گھنٹی وجی۔ میں کافی دا کپ میز تے رکھ کے ریسور چکیا تے دوجے پاسے اوہو بندا سی تے اوہدی اواز ڈری ہوئی لگدی پئی سی۔ اوہ بولیا۔ تہاڈی کہانی پاروں میں ساری رات سو نیئں سکیا۔ مینوں بس ایس گل دا جواب دے دیو کہ کیہ اوس بندے دی اک ٹنگ کٹی ہوئی سی۔ میں پچھیا کیہ مطلب؟ او بولیا۔ جے بندے دیاں دویں ٹنگاں ہوندیاں تے پٹی اک ٹنگ تے نہ ہوندی۔ میں اچی اواز وچ غصے دے نال بولیا کہ تیری سمجھ وچ ایہہ گل کیوں نیئں آندی کہ ایہ اک لطیفہ اے۔ صرف لطیفہ اے ہور کجھ نیئں اے۔ اوہنے کجھ آکھیاں بغیر فون بند کردتا۔

روسی لکھاری نے اگے ٹر کے لکھیا اے کہ دفتر آن توں بعد میری ملاقات اپنے چیف ایڈیٹر نال ہوئی تے میں اوہنوں اپنے لطیفے تے فون کرن آلے بندے دی کہانی سنائی ۔ اوکافی چر ہسدا رہیا تے مینوں تھپکی دیندیاں ہویاں بولیا کہ توں بوہت چنگا لکھدا ایں ۔ مینوں خوشی اے کہ توں اساڈے اخبار وچ ایں۔ میں اپنی سیٹ تے واپس آ گیا۔ دوپہر نوں جد لنچ دی میز تے سارا عملہ اکھٹا ہوئیا تے چیف ایڈیٹر نیں سب توں پٹی دی کہانی سنائی تے سارے لوکی رل کے دیر تیکر ہسدے رہے۔ لنچ بریک ختم ہوئی تے سارے لوکی اپنیاں اپنیاں سیٹاں تے واپس ٹر گئے پر چیف ایڈیٹر نے میرا ہتھ پکڑ کے روک لیاتے آسے پاسے ویکھدیاں ہوئیاں ہولی جئی پچھیا۔ یار ایہ تے دس کہ پٹی دا اصل قصہ کیہ اے۔

روسی لکھاری دی کہانی ایتھے مک جاندی اے پر میری کہانی ہور اگے ٹردی اے۔ ہویا ایہ کہ دو دن پہلاں میں ایہ لطیفہ اپنے اک امریکی دوست ٹم نوں سنایا ۔ اوہ ویھ اونس کافی دا کپ ڈیسک تے رکھ کے دیر تیکر ہسدا رہیا تے فیر مسکاندیاں ہوئیاں بولیا۔ مینوں ایس پٹی دی اصل دا پہلاں ای پتا اے۔ میں حیران ہوکے پوچھیا کیہ تسیں ایہ لطیفہ سنیا ہویا سی ۔ اوہ ونا ں وچ دھون ہلا کے بولیا میں لطیفہ تے نیئں سنیا پر مینو ں روسی پٹی دا پتا اے۔ میں ہور حیران ہوکے پچھیا ۔ تہانوں کیہ پتا اے؟ اوہ بولیا کہ روس دیاں دوجیاں شیواں وانگوں ایس پٹی دا معیار وی بوہت گھٹیا اے۔

میرا خیال سی کہ ٹم دے امریکی مزاج دے ایس تبصرے توں بعد ایہ کہانی مک گئی اے پر اج جد اوہدا ٹیلی فون آیا تے پتا لگیا کہ ایس کہانی وچ اک نواں کردار ہیری وی داخل ہوگیا اے۔ او ٹم دا دوست اے۔ ٹم نے مینوں دسیا کہ میں پٹی دا لطیفہ ہیری نوں سنایا تے او بولیا کہ روسیاں نے سبھ کجھ الٹ پلٹ کردتا اے۔ اصل پٹی ٹنگ تے بنی گئی جیہڑی سر تیکر اپڑ گئی ۔ میں حیرانی دے نال پچھیا کہ ٹنگ دی پٹی سر تے کیویں اپڑی ؟ او بولیا ہیری کہندا اے کہ جدوں میرے پیر تے سٹ لگدی اے تے اگلے دن میرے سر وچ ڈاڈھی پیڑ ہوندی اے تے مینوں سر تے پٹی بننی پیندی اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels