Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> ۱۔ دِلی بُوہا

۱۔ دِلی بُوہا

مدثر بشیر
March 17th, 2014

بیتے دِناں دے روپ دِی لالی نہ سِم پئے
اینے وِی دل دے زخم نہ کھرچو گھڑوڑ کے
شارب
ایس بُوہے دا ناں ایہدے رُخ دا شہردِلی ولے ہونا اے۔ ایس بوہے نال ہی اِک وڈی سڑک دِلی ولے جاندی اے‘ لہور دے پورب توں آون والے لوک زیادہ تر ایس بُوہے راہیں شہر وچ وڑدے سَن اے ایہوای بُوہا جس دے کھبے پاسے وڈی بوجھن منڈی اے‘ جیہڑی اکبر دے ویلے اکبر دے ناں لا دتی گئی سی۔ اَج کئی سو ورھے لنگھ جاون مگروں وی ایہہ اکبری منڈی ہن تیکر اُنج ای ہسدی وسدی پئی اے ۔اِک اطالوی سیلانی جدوں مغلاں دِی حکومت وِچ ایس بُوہیوں شہر وِچ وڑیا تاں اوہئے ایس منڈی وچ سامان چُکن واسطے جیہڑے جناور ویکھے اوہناں وچ اونٹھ تے ہاتھی سبھ توں بہتے نظر آوندے سَن۔ پر ہُن اوہناں دے بارے سوچناں وِی اِک خاب لگدا اے‘ ایس ویلے دا دِلی بُوہا لہور شہر دے اوہناں بُوہیاں وچوں اِک اے جیہناں دِی نویں سریوں اُساری کیتی گئی اے۔ انگریز سرکار دے دور وِچ کجھ بُوہیاں دیاں مرمتاں لائیاں گئیاں تے کجھ بالکل نویں سِریوں اُسارے گئے۔ ایہہ بُوہااوہناں بُوہیاں وچوں اِک اے۔ مغلاں دا بنایا ہویا بُوہا اَج وِی آپنی ٹُٹی بجھی حالت وِچ ہے ۔ شہر دے لوک ایہنوں ’’چٹے بُوہے‘‘ دے ناں توں جاندے نیں۔ ایس دے نالدی ساری عمارت انگریز سرکار دے ویلے وچ ڈھا دِتی گئی سی۔ نویں بُوہے دِی اُساری محمد سلطان ٹھیکیدار نے کیتی سی۔ ایس ٹھیکے دار دِی بنائی ہوئی سراں‘’’ سلطان دِی سراں‘‘ دے ناں توں مشہور اے‘ جیہدیاں کجھ ٹٹیاں کندھاں تے بُوہے باریاں اَج وِی لنڈے بزار وچ لبھدے نیں۔ دِلی بُوہے دِی ایس عمارت دِی اُتلی منزل سرکاری افسراں تے پلس ملازماں واسطے کر دِتی گئی سی۔
بُوہے دے اندر اِک ویلے تیکر وڈے وڈے لکڑ دے بھت ہوندے سَن‘ جیہناں دا واویرا سانوں پُرانیاں کتاباں دے نال نال وڈیری عمراں دے لوکاں دِے ذہن دِیاں کتاباں وِچ وِی لبھدا اے۔ لکڑ دے بنے ہوے او بھت ڈاڈھے پکے سَن۔ جیہناں وِچ لوہے دِے کِلاں دا تگڑی ورتوں سی۔ ایہو جیہے بھت اَسیں لہاری بُوہے دے نال ہن وِی ویکھ سکنے آں۔ اجیہے بُوہیاں نوں بھنن واسطے دُشمن ہاتھیاں نوں ورتدے سَن۔ونڈ مگروں کجھ ویلے تیکر ایس بُوہے دِی عمارت سرکاری ملازماں دی ورتوں وِچ رہی۔ اوہناں مگروں کئی ورھیاں تیکر ایسے بُوہے دِی عمارت تے ایہدے نال جڑی ہوئی شاہی حمام دِی عمارت اِک سرکاری سکول واسطے ورتیاں گئیاں تے نالو نال شہر دے معزز لوک ایہناں دوواں عمارتاں نوں شادی ویاہواں تے اسلامی تہواراں تے ورتدے رہے‘ پر ہُن شاہی حمام دِی عمارت محکمہ آثارِ قدیمہ دی ورتوں وِچ اے پر بُوہے دِی عمارت ہن وی کڑیاں دے سکول واسطے ورتی جاندی اے۔ ایس دے نال نال اکثر موسمی‘ سیاسی تے ثقافتی تہواراں واسطے ایہناں دوواں عمارتاں نوں نوں اکٹھیاں ورتیا جاندا اے۔ بُوہے دی اندرلی عمارت چھت ولوں گنبد دِی شکل ورگی اے۔ جد کہ اُتوں ایہدا کوٹھا بالکل سِدھا اے بُوہے دے اندرلے راہ دے چار چوفیرے بُوہے تے باریاں بنیاں ہوئیاں نیں۔ باریاں دے اُتے سانوں جنگلی کبوتراں دے آہلنے وکھرے نظر آوندے نیں۔ ہیٹھلی منزل تے پہلی منزل دے کمرے چوکیداراں دے گھر تے کجھ کمرے محکمہ صحت دے ملازماں دے ورتوں وچ نیں۔ بُوہے دے اندر وڑنوں پہلاں بُوہے دے ساہمنے سانوں نکیاں نکیاں ہٹیاں تے ریڑھیاں نظر آوندیاں نیں‘ جیہناں وچ بہتیاں ہٹیاں سبزیاں ‘ صابن‘ چاء‘ گھیو تے کھنڈ دیاں نیں۔ بُوہے دے اندر وِی بتھیریاں ریڑھیاں نظر آوندیاں نیں‘جیہناں وِچ چوڑیاں‘ دھاتی زیور تے گھر دی سجاوٹ دیاں شیواں وِکدیاں نیں۔ دِلی بُوہے توں چٹے بُوہے تیکر سارا رستہ دِلی بُوہے دا بزاراکھواندا اے‘ جیہدے اَگے جا کے رنگ محل بزار شروع ہوندا اے۔ چٹے بُوہے دے ہیٹھ ہُن وِی سائیکلاں تے ٹوپیاں تے تسبیاں ویچیاں جاندیاں نیں۔ کئی سو ورے لنگھ جاون بعد ہُن وِی سامان چُکن دے واسطے نویاں چجاں دے نال نال پرانے طریقے وی ورتے جاندے نیں جیہناں وِچ گڈاں‘ کھوتی ریڑھیاں تے ہتھ ریڑھیاں ہن وی ورتیاں جاندیاں نیں ۔ ایہناں توں وکھ مزدور وِی لبھ جاندے نیں جینہاں نوں پانڈی کہیا جاندا اے۔
***


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels