Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> ہندوستان وچ مرد شاہی دی وار۔۔۔۔۔۳

ہندوستان وچ مرد شاہی دی وار۔۔۔۔۔۳

October 3rd, 2013

استری راج اتے عورتاں دے بول بالے نوں مردشاہی نے کس طرحاں ختم کیتا اس بارے ہندوستان وچ کوئی خاص کھوج نہیں ہوئی ہے۔پر کجھ ودواناں اتے دانشوراں دا خیال ہے کہ ایہہ تبدیلی اک وڈے خون خرابے اتے زور نال ہی ہوئی جاپدی ہے۔ اوہناں مطابق تن رسماں جہڑیاں کہ ہندتان وچ برقرار ہن اس جبر اتے خون خرابے دیاں ہی رہند کھند ہن:

ستی
بیوہ عورتاں نال برا سلوک اتے اوہناں تے پابندیاں
کڑیاں نوں جمدے ہی مار دینا

ستی:

ستی کدوں تے کس وقت شرُوع ہوئی اوسدا کجھ پکا پتہ نہیں چلدا۔رگوید دے دسویں سکت وچ ستی دا ذکر دسدا ہے:

ایما ناریرودھوا سپتنی رانجنین سپرشانم سنوشنتُ
انشرووہ انمیوا سرتنا آ روہنتُ جنیویونئگرے ۔۔(رگوید 10-18-7)

(اوہ بیوہ عورتاں جہڑیاں کہ چنگیاں پتنیاں ہن اوہناں نوں ہر طرحاں دا شگار کرکے اپنے گھر/اگّ وچ بیٹھنا چاہیدا ہے)

کجھ ودوان اس سکت دے شلوک نوں ستی دی حمائت کردا دسدے ہن اتے کجھ ودوان اس سکت نوں ستی دے خلاف دسدے ہن۔ جہڑے ودوان اس نوں حمائت کردا دسدے ہن اوہ کہندے ہن کہ شلوک وچ لفظ گرے ہے اگنے نہیں۔ پر سائناچاریا اس نوں اگنے دسدا ہے۔ بھانوے ایہہ حمائت کردا ہے جاں اس دے خلاف ہے، اس توں ایہہ گلّ صاف ہندی ہے کہ رگوید دے سماج وچ ستی ہندی سی اتے کافی ودوان اس گلّ دے قائل ہن کہ ایہہ رسم بہت ہی پراتن ہے۔

ستی بارے جہڑی کہانی شاستراں اتے پراناں وچ ملدی ہے اس مطابق پاروتی دے باپ دکش نے اک بہت وڈا جگّ کیتا جس وچ اوسنے سارے ہی دیوتیاں نوں سدیا پر پاروتی دے گھروالے شو نوں نہیں سدیا۔ اپنے خاوند دی اس بے عزتی نوں پاروتی برداشت نہیں کر سکی اتے اسنے اپنے آپنوں جگّ دی اگّ وچ جلا کے ستی کر لیا۔اس لئی
اوہ ستی ساری ہی پتی ورتا یعنی کہ اپنے خاوند نوں پیار کرن والی ہر عورت لئی اوہ اک مثال ہو گئی اتے گھروالے دی موت دے بعد اس دا ایہہ فرض بن جاندا ہے کہ اوہ اگّ وچ اپنے پتی دی چکھا نال ہی اپنے آپ نوں ساڑ لوے۔

شاستراں،سمریاں اتے پراناں وچ ستی چڑن بارے بہت ہی وستار پروک ویروے ملدے ہن۔ ستی نوں اک دلہن جاں لاڑی وانگ سجایا جاندا سی اتے ہر طرحاں دا شنگار کرکے اسنوں چکھا دی اگّ وچ بٹھایا جاندا سی۔ گرڑ پران دے دسویں حصے وچ ستی چڑن لئی بہت ہی باریکی نال حکم دتے گئے ہن۔ایہہ ستی دی رسم بہت دیر تک چلدی رہی۔ مغلاں نے اس نوں بند کرن لئی زور لایا سی۔ اکبر اتے اورنگزیب نے اس تے پابندی لا دتی سی۔ پر ایہہ رسم ختم نہیں ہوئی۔ دسیا جاندا ہے کہ رنجیت سنگھ دی موت دے بعد اسدی کئی رانیاں اسدی چکھا وچ ستی ہو گئیاں سن۔راجستھان وچ رپ کنوار 1987 وچ ستی ہوئی سی۔

ہندوستان وچ بہت علاقیاں وچ ستی مندر وی قایم ہن جہڑے کہ بہت ہی پرانے اتے پراچین ہن۔ اس توں ایہہ پتہ چلدا ہے کہ ایہہ رسم بہت ہی پرانی ہے۔

بیوہ اتے ودھوا عورتاں تے پابندیاں:

شاستراں، سمرتیاں اتے پراناں وچ دسیا گیا ہے کہ جس عورت دا گھروالا مر گیا ہے جے اوہ ستی نہیں ہو سکدی تاں اس نوں پریوار توں الگ رہِ کے اپنا گزارا کرنا چاہیدا ہے۔بیوہ عورت نوں اپنے گھروالے دی موت لئی ذمے وار دسکے اپنے پتی نوں کھان والی دسیا گیا۔ اسدا گھر وچ حقہ پانی بند کر دتا جاندا سی اتے اس نوں گھر دے کسے وی کار وہار، ویاہ شادی وغیرہ وچ شامل ہون تے پابندی لا دتی گئی۔ اس نوں الگ کوٹھڑی وچ رکھن دا حکم سی اتے اس نال کلام وی بھیڑا سمجھیا جاندا سی۔ اس دے بھانڈے اتے برتن وی الگّ ہی ہندے سن۔

ودھوا اتے بیوہ عورتاں نوں دوبارہ ویاہ کرن دی اجازت نہیں سی اتے سماج وچ ودھوا نال کلام کرن والے بندے نوں وی ماڑا سمجھیا جان دا حکم اتے رواج سی۔اوہ مکمل اکلاپے دی زندگی بسر کرن لئی مجبور سن۔ اوہناں نوں اپنے مرد دی موت دی ایہہ سزا دتی جاندی سی۔

بیوہ عورتاں اتے ودھوا عورتاں خلاف اجے وی سماج وچ بہت ہی وحشی خیال اتے روائتاں قایم ہن۔

کڑیاں نوں جمدے ہی مارنا:

ہندوستان وچ اج وی کڑیاں نوں جمن توں پہلاں ختم کرن دا رواج ہے۔ اک کھوج وچ دسیا گیا ہے کہ پچھلے کجھ سالاں وچ تقریباً 6 کروڑ کڑیاں نوں جمن توں پہلاں ہی بھرن ہتیا کرکے ختم کیتا جا چکا ہے۔ اس کرکے پنجاب اتے ہورناں حصیاں وچ مرداں دے ماںبلے کڑیاں دی گنتی گھٹدی جا رہی ہے۔

کڑیاں نوں مارن دا سلسلہ بہت ہی پرانا ہے اتے اس بارے بہت ہی پرانیاں کہانیاں دسدیاں ہن۔

ایہہ ساریاں رسماں اتے روائتاں نوں دیکھدے ہوئے دانشور اتے ودوان سوچدے ہن کہ استری راج نوں ختم کرن وچ اتے مردشاہی نوں قایم کرن لئی بہت ہی جبر اتے تشدد دا سہارا لیا گیا ہونا ایہہ ساریاں ہی رسماں مردشاہی دی تاناشاہی دا ہی ثبوت ہن اتے بناں زور دے کدے وی قایم نہیں ہو سکدیاں سن۔اک لمے سمیں بعد سماج اوسنوں قدرتی اتے غیبی حکم تسلیم کرن لگّ پیا جس طرحاں کہ ہن مردشاہی نوں قدرتی اتے کائنات دے نیم دا حصہ سمجھیا جاندا ہے۔

استری راج دے جہڑے وی ذکر سانوں مہابھارت اتے ہورناں کتاباں وچ ملدے ہن اوہناں وچ ایہناں تناں رسماں دا کوئی ذکر نہیں۔ ہندوستان دے اوہناں حصیاں وچ جنہاں وچ اجے وی عورت پردھان سماج قایم ہن اوہناں وچ ایہہ رسماں نہیں ملدیاں۔ایہہ رسماں مردشاہی دیاں ہی دین ہن اتے عورتاں تے زبردستی ہی ٹھوسیاں گئیاں ہونیاں جہڑیاں کہ بعد وچ اک روائیت بن گئیاں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels