Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> کیہڑا سکندر، کیہڑا پورس

کیہڑا سکندر، کیہڑا پورس

زبیر احمد
September 30th, 2013
5 / 5 (2 Votes)


پاکستان دی لوک وار (تورایخ) نوں کدی گھاہ نہیں پائی گی۔ پاکستان دی جیہڑی وار سانوں پڑھائی جاندی اے اوہ اوہناں علاقیاں دی اے جیہڑے ہن پاکستان دا حصہ نہیں نیں۔ ایہہ وار اِنج دی اے جیویں مسلم لیگ دی وار ۔ مسلم لیگ بنگال وچ بنی جیہڑا ہن پاکستان دا حصہ نہیں اے۔پھیر مسلماناں دی گھٹ گنتری دے علاقے جیہڑے مرکزی یاں دکھنی ہندوستان دے علاقے سن جیویں یوپی سی پی اوہ وی پاکستان دا حصہ نہیں نیں۔اجوکے پاکستان دے بہتے صوبے پاکستان دے حامی نہیں سن جیویں پنجاب اندر 47 تیک یونیسٹ پارٹی دی سرکار سی تے اخیر ویلے مر کے مسلم لیگ ایتھے پیر جمان جوگ ہوئی۔ پھیر خیبر پختون خواہ وچ سرحدی گاندھی غفار خان سی جیہڑا پاکستان دے حق وچ نہیں سی۔ بلوچستان بُہتا اک آزاد علاقہ سی جیہڑا خان قلات دے ہیٹھ سی۔ ایس گل نوں مخول دے رنگ وچ اُردو شاعر جان ایلیا نے کیہا سی ،’’ پاکستان علی گڑھ کے چند لڑکوں کی شرارت تھی۔‘‘ جے اوہ’ لڑکوں‘ دی تھاں لونڈے کہندے تاں گل ہور سوادلی ہو جانی سی۔ ایس لئی پاکستان دی لہر دے سارے ہیرو ہندوستان وچ ای رہ گئے نیں جیہناں نوں اسیں نصاب دیاں کتاباں وچ پڑھدے آں جیہناں دے نہ مہاندرے ساڈے نال ملدے نیں نہ رہتل۔ تے جیہڑے ساڈے دیس دے ہیرو نیں جیویں بھگت سنگھ، دھرتی جائے اوہناں دی گل دو بندے وی کرن تاں ملوانیاں نوں ڈر پے جاندا اے۔
ایس پاروں ساڈی دھرتی پنجاب دی وار کدی وی نہیں پڑھائی گئی کدی ایس دا ذکر نہیں ہویا۔ بھانویں پنجاب تاں ایتھے ای سی۔ ہور تاں ہور نجم حُسین سیدّ نے سولہویں صدی دے نابر دُلا بھٹی بارے ’’تخت لہور‘‘ وچ جیہڑی کھیڈ لکھی اے کُجھ سُوجھوان آکھدے نیں پئی دُلا بھٹی تاں ہویا نہیں تُسیں کھیڈ کتھوں لکھ لئی۔ کوئی ایہناں نے کیویں دسے پئی شاہیاں اپنی ای وار لکھدیاں نیں تے لوک وار یاں لکھی نہیں جاندی یاں اوس نوں مٹا دتا جاندا اے۔ جے دُلا بھٹی ہویا وی تاں اکبر نے اوس دا ذکر ہون دینا سی یاں سرکاری وار نے اوس دی دس پانی سی۔ ایس لئی گورا راس والی (سرمایہ داری) شاہی دا وارا مُکن اُتے جد تریجی جگ دے لوک آزاد ہوونے چھوہے تاں لوک وار دی وی گل ہلی۔نویں وار لکھن دا آہر چھوہیا۔ لوک وار دے ایس نویں وار لکھن دے آہر وچ ای ’’تخت لہور تے اک رات راوی دی ‘‘ وی لکھیاں گیاں۔
اپنی وار نوں نہ مانن تے نہ لبھن تے نہ لکھن پاروں اسیں اجے وی پرانیاں شاہیاں دی واراں چوں نکلے نہیں۔ ہور تے ہور ساڈے اگانہہ ودھو(ترقی پسند) لکھاری وی ایس بارے سچیت نہ ہو سکے۔ منے پرمنے وار کار مبارک علی نے خورے سو توں ودھ کتاباں لکھیاں نیں۔اوہناں نوں دعوی وی اے اپنے مارکسی وار کار ہوون دا پر اوہناں دیاں کتاباں وچ وی ایتھے لوکاں دی وار دا ذکر گھٹ ملدا اے۔ ونگی وجہوں اسیں اوہناں دے اک کالم دا ذکر کراں گے جیہڑا روزوار ڈان وچ 1ستمبر2013 وچ چھپیا سی۔ اتے ایہہ کالم اے سکندر اعظم بارے ، الیگزینڈر دے گریٹ۔ بہوں ای پھوکا تے پیتلا کالم اے ۔جس وچ سکندر بارے مُڈھلیاں گلاں دی جانکار دتی گئی اے۔ اوہ یونیاں دا قومی ہیرو سی تے اپنی نسل نوں تے گوریاں دی نسل نوں اُچیرا سمجھن والیاں لئی اوہ دوجیاں نسلاں توں اُچیرا سی۔ اوہ آپوں وی اپنے آپ نوں دیوتاواں دی اولاد سمجھدا سی۔ اوس نوں اُچا جرنل سمجھیا جاندا سی جیہڑا اوس ویلے دی موجود دُنیا نوں جتن لئی تُر پیا سی۔ مصر نوں جتن پُچھوں اوہ فرعون آکھوایا تے مصری اوس نوں دیوتا ای سمجھدے سن۔ ایہہ وی آکھیا جاندا اے پئی اوہ اپنی مہانتا بارے بُھلیکھیاں دا ماریا ہوئیا سی۔تے اوہ خورے شراب دی ہلت دا ماریا ہویا وی سی تے طاقت دے نشے دا وی ماریا ہویا سی تے اوس نوں بڑے بُھلیکھے سن۔ مبارک علی دا کالم ایتھے مُک جاندا اے۔اوہناں جان بُجھ کے یاں بُھلیکھے پاروں سکندر دے ہندوستان تے پنجاب اُتے دھاڑے بارے اک اکھر نہیں لکھیا۔ سکندر دی وار راجہ پورس دے ذکر بناں پوری نہیں ہوندی تے اوس نوں جیہڑے بُھلیکھے سن اوہ وی پنجابیاں نے کڈھے سن۔جد پنجاب دی دھرتی اُتے اوس نوں پہلی وار تیر وجھا تے اوس دا لہو نکلیا تے اوس نوں پتہ لگیا اوہ وی انسان ای اے دیوتاواں دی اولاد نہیں۔ سکندر نوں ہار وی ایتھے پنجاب وچ ای ہوئی سی۔
ساڈی لوک وار نے سکندر دا رج دُھوں کڈھیا اے۔سعید بھٹا دی جوڑی کتاب ’کمال کہانیاں‘ وچ اک کہانی سکندر بارے وچ وی اے اوس کہانی وچ سکندر دی اک بہن وی اے۔ایہہ وار کہانیاں پورس نوں اُچا کر وکھاندیاں نیں تے ساڈے وسیب دے چج،رہتل تے لوک دا آدر بناندیاں نیں۔ سکندر دی کہانی نوں مُڑ کھیڈ کے مُڑگھڑکے، پورس دی جت وکھاندیاں نیں۔پر مبارک علی اجے وی سکندر توں اگانہہ نہیں ٹپے تے اوہناں نوں سار نہیں ساڈے لوک کہانی نے سکندر توں کیویں بدلہ لیا اے تے کیویں اوس دی جت نوں ہار تے پورس نوں جتایا اے۔
مزے دی گل اے ایسے دِن ای ایس اخبار وچ ای اک ہور کالم وی چھپیا اے تے ایہہ کالم اے مجید شیخ ہوراں دا اے ۔اوہناں دا کالم وی وار بارے ہوندا اے۔بُہتا لہور بارے تے اوہ مبارک علی توں اُکا اُلٹ کم کردے نیں اوہ گواچی وار نوں لبھدے نیں، تھاواں تے بندیاں نوں چیتے کردے نیں۔ اپنے 1 ستمبر 2013 دے لکھے کالم وچ اوہناں رشی پاننی دی کہانی کیتی اے جس نے سنسکرت دی پہلی گرائمر دی کتاب اشٹادھیا ئے لکھی سی ۔
اپنے ایس کالم وچ اوہ لکھدے نیں۔
’’اپنی ایس لکھت وچ میں ویلے وچ واپس پرتنا چاہنا واں۔ ایہہ اوس ویلے توں پہلاں دی گل اے جد اسلام وی نہیں ایتھے اپڑیا سی، عیسائیت وی نہیں آئی سی، سکندر مقدونی دے آون توں وی پہلاں دی گل اے، جیہڑا مار کھا کے پچھاں دھرو یا گیا تے 33 ورھیاں دی عمر وچ ملیریا پاروں سکندریہ وچ مرگیا۔ مشہور وار وچ اوس نوں کدے نہ ہارن آلا لڑاکا دسیا جاندا اے۔ ایس توں وڈا جھوٹھ جگ دے سانجھے اچیت وچ نہیں ہو سکدا ۔ بھیرے دا پورو ، کالا، سوہنا سُنَکھّا تے ست فٹ لما جس نوں اوس دے لاطینی ناں پاروں پورس دے ناں توں جانیا جاندا اے، اوس سکندر نوں بھاج دتی سی تے پھیر اوس نال مل کے لہور دے پورو نوں بھاج دین دا آہر کیتا سی۔ لہور دا حاکم سیانا سی کیوں جے اوہ پنترا مار کے پچھاں ہٹ گیا، دوجے راجپوت حاکماں نال مل گیا تے بیاس توں پار اک چنگی چوکھی فوج دی وکھالی نال اُڈیکن لگ پیا۔ یونانی طاقت دا اِنج دا وکھالا ویکھ بھج گے۔ بھیرے دا پورو وی گھر پرت آیا تے او ہ لہور توں لانبے ہو لنگھ گیا۔‘‘
ساڈی وار اِنج دی لکھن دی لوڑ اے۔ سکندر دی جنج دی وار مبارک علی لکھی اے اوس دا ساڈی لوک وار نال کوئی سانگا نہیں اے۔
لکھاری دا ای میلkitab.trinjan@gmail.com


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels