Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> ہندوستان وچ مرد شاہی دی وار (۲

ہندوستان وچ مرد شاہی دی وار (۲

September 21st, 2013

استری راج دے دوران ہی اک پڑا تے پہنچن بعد اک سماں آیا جدوں کہ کھیتی باڑی وڈے پیمانے تے ہون لگّ پئی اتے کھیتی باڑی دا کم مرداں دے حوالے ہو گیا۔ عورتاں دا کم بچیاں اتے اؤلاد دی سانبھ سبھا ل بن گیا۔اس طرحاں لنگ (جنس) دے آدھار تے ایہہ کتیاں دی ونڈ ہوند وچ آ گئی۔ناں اجے وی ماں دے ناں اتے خون دے آدھار تے چلدے سن۔مرد دے مر جان بعد اوسدی جائداد عورت نوں اتے اوسدے رشتے داراں نوں ملدی سی۔اس سمیں جائداد دا وکاس (ترقی) ایناں نہیں سی ہویا پر کھیتی دے اوزار وغیرہ عورت دے بھراواں جاں ہور رشتے داراں کول چلے جاندے سی۔

پیداوار دے ودھن نال اتے لوڑ نالو ں زیادہ اناج اتے بھوجن پیدا ہون نال دولت اکٹھی ہون لگ پئی۔ پر ایہہ دولت موت دے بعد عورت دے خون دے رشتے داراں وچ ونڈی جاندی سی۔عورت دا رشتہ اپنے گھروالے نال خون دا نہیں سی۔ اک سماں اوہ آیا کہ مرداں نے عورتاں دے اس حق نوں الٹ دتا اتے نسل اتے اولاد دا ناں مرداں توں جانیا جان لگا۔ہن خون دا رشتہ باپ دے خون توں جانیا جان لگیا۔ایہہ کس وقت ہویا اتے کس طرحاں ہویا؟ اس دا سانوں کوئی اینا پکا پتہ نہیں لگدا۔ ایہہ بنیادی تبدیلی تاریخ دی دھندھ وچ چھپی ہوئی ہے۔ ہندوستان وچ اس وشے تے زیادہ کھوج نہیں ہوئی ہے پر ہورناں تھانواں تے ودواناں نے اس بارے کافی کھوج بین اتے تفتیش کیتی ہے۔ہندوستان وچ اجے وی کئی قوماں اتے قبیلے مووجود ہن جتھے کہ عورتاں دی سرداری قائم ہے اتے استری راج دے رشتے برقرار ہن۔

رگوید ہندوستان دا ساریاں نالوں پرانا گرنتھ ہے۔ اس گرنتھ وچ زندگی دے جو طور طریقے دسدے ہن اوہناں وچ مرد پردھان ہی ہن۔ رگوید دے سمیں وچ عورتاں دی سرداری ختم ہو چکی سی اتے مردشاہی قائم ہو چکی سی۔ رگوید دے پہلے سکت دے پہلے شلوک وچ اگّ جو کہ پہلاں اک دیوی ہندی سی ہن اک مرد اتے دیوتا بن چکیا ہے۔اس سماج وچ ربّ دا تصور اتے خیال اک مرد دے روپ وچ بن چکیا ہے۔قیاس لائے جاندے ہن کہ سارے مرد دیوتا اک ویلے دیویاں ہی ہندیاں سن۔مردشاہی دی سرداری بعد ایہناں نوں مرد بنا دتا گیا۔پہلے سکت وچ ہی کیہا گیا ہے کہ جس طرحاں اک باپ اپنے بیٹے نوں تلیم دیندا ہے، آئے اگّ توں سانوں تعلیم دے۔

حالانکہ ایہہ سماج مرد پردھان بن چکیا سی پر استری راج اتے پرانے رشتیاں دی یاد اتے رہند کھوہند اجے وی قایم سی۔ استری راج دے کئی رشتے قائم دکھدے ہن۔مثال دے طور تے پشان جو کہ اک دیوتا ہے اوہ اپنی کڑی نال سمبھوگ (جنسی میل) کر کے اولاد پیدا کردا ہے۔رگوید دے پہلے منڈل دے 31ویں شلوک وچ کیہا ہے-

جس طرحاں پیو اپنی بیٹی دی بھگّ (عورت دی شرم تھاں) وچ بیج پاکے پتّ پیدا کردا ہے اسے طرحاں سورج اوشا دی بھگّ وچ بیج پاکے دن روپ پتر پیدا کردا ہے

اسے طرحاں برہما وی اپنی کڑی توں ہی اؤلاد پیدا کردا ہے۔اسے طرحاں رگوید دے دسویں منڈل وچ اسیں یم اتے یمی دی آپسی گلّ بات وچ دیکھدے ہاں کہ اس ویلے پرانے رشتے جنہاں وچ بھائی اتے بھین وی اک دوجے نال سمبھوگ کرکے اولاد پیدا کردے سی اوہناں نوں یاد ہن۔

رگوید دا سماج مرد پردھان بن چکیا سی پر عورتاں نوں کافی حد تکّ آزادی سی اتے اوہناں نوں پرانے دن یاد سی۔رگوید وچ عورتاں دی تعلیم اتے اوہناں دی سرداری دے وی ذکر ملدے ہن۔رگوید دے 1028 سکتاں وچوں تقریباً 30 عورتاں دے ہی رچے ہوئے دسے جاندے ہن۔مہابھارت دے دور وچ وی سانوں پرانے وقتاں دا ذکر ملدا ہے۔ جس وچ دسیا جاندا ہے کہ اوہناں پرانے دناں وچ عورتاں پوری طرحاں آزاد سن اتے اوہ جہدے نال جدوں مرضی سمبھوگ کردیاں سن۔ رگوید وچ آوندا ہے-

لاڑیئے! اپنے سہرے دے آسرے راج کر، اپنی سسّ دے آسرے رانی بن، اپنی ننان دے ہیٹھ رانی بن، اپنے دیور دے آسرے رانی بن

اندر ورگے شکتی شالی ویرج نال بھرپور لاڑیا! توں سوہنی ککھ والی اس عورت نوں گبھن کر، اس توں دس پتر لے اتے توں ایہدا گیارواں پت بن۔

جنہاں نوں گیان دا بھرپور تجربہ ہووے تے جنہاں دا کیتا ردّ نہ کیتا جا سکدا ہووے، جنہاں نوں رکھیا دی جانکاری ہووے، اوہ ساڈیاں پتنیاں بنن جو ساڈے وانگ ہی قابل ہون۔
ایتھے عورتاں کھرل وچ اناج پاؤن تے پیہن دی کلا سکھدیاں ہن۔ ایہہ کلا ترتیب تے ترک نال سکھا۔

شلاگھایوگ (تعیریف لائق) اتے بہت سارے گھوڑیاں والا، بہت ساریاں گٔوآں والا، ساریاں چیزاں دا گیان رکھن والا، سوہنی گلّ کرن والا، لہر بحر لیاؤن والا سویرا باالکل عورت ورگا ہندا ہے۔

پہلے منڈل دا 48واں تے 49واں سوکتا سویرے دی تلنا سورج دی بیٹی عورت نال کردا ہے جو مانکھتا نوںخوشحالی تے آنند بخشدی ہے--

جوان عورتاں نوں اپنی سیانپ، گیان اتےقابلیت نال، جویں کہ دریا سمندر وچ جا رلدا ہے، ایسا پتی لبھنا چاہیدا ہے جو اپنے کھیتر وچ گیان وان اتے تکڑا ہووے۔

پراتن ویلے توں ہی اتے ہن وی، زمین اوہناں نوں دندی ہے جو گیان نال کم کردے ہن۔ اسے طرحاں ہزاراں شہراں نوں پیدا کرن والے بندے اپنیاں عقلمند پتنیاں اتے دیانتدار بھینا بھائیاں دے سہارے محفوظ رہندے ہن تے خوشی حاصل کردے ہن۔

برہمنڈی قانون (رتم) دی امیری نوں سمجھدے ہوئے، روشنی دے گنا نوں جانن دے امک رجھان نال الم پا کے نوجوان عورتاں خوشی ہاسل کردیاں ہن جویں اک ویش دولت اکٹھی کردا ہے۔

جہڑی عورت سورج وانگ ہے، سائنس اتے ہر کلا وچ نپن ہے، جو اپنیاں کرناں نال خوشی ونڈدی ہے، جو گرجدار بدلاں وانگ آکرشک ہے جو مینہہ راہیں پانی بخشدے ہن، اجیہی عورت توں کہڑی خوشی ہے جو بندے نوں نہیں مل سکدی۔

جویں روشنی نال بھرپور، لوکاں نوں سیدھ دین والی، اتے اناج تے ہور دولتاں دین والی سورج دی دھی پربھات دا لوکی گن گاؤندے ہن جو سانوں تکڑے گھوڑے دیندی ہے اتے گاواں دے چرن لئی گھاہ دے میدان دیندی ہے تے رات دے ہنیرے نوں ختم کردی ہے، جوان عورتاں وی اسے طرحاں دیاں ہی ہونیاں چاہیدیاں ہن۔

جویں اک مٹیار اک پتی لبھّ کے خوشی حاصل کردی ہے (جو حاصل کرن دے قابل ہے) سانوں پتہ ہونا چاہیدا ہے کہ (بجلی) ودھیا توں ودھیا چیز ہے جو فصلاں دا جھاڑ ودھاؤندی ہے تے دولتاں پیدا کرکے دکھاں نوں دور بھجاؤندی ہے۔ (بجلی تے اسمانی بجلی نوں قابو کرکے بندے نوں خوشی تے دولت ملدی ہے جویں کسے مٹیار نوں اپنا منبھاؤندا خاوند ملن تے خوشی ملدی ہے)۔

بندے دیاں کئی پتناں ہون تاں اس طرحاں تکلیف ہندی ہے جویں سریر وچ کئی تیر کھبھے ہوئے ہون۔

پتنی ایسی ہووے جو خوشی دیوے تے گیان وان ہووے۔

مرد نوں پیار نال قابو کرن والیئے نارے توں گربھ وتی ہوویں۔ گیان والیئے نارے توں گربھ وتی ہوویں۔ تیرے دل دے کنول نوں چھوہن والا اشون تینوں گربھ وتی کرے۔

سورج ادے ہو رہا ہے، میری بھگ وی ادے ہو رہی ہے۔ پتی میرے کول ہے۔ میں دشمناں نوں ہراؤن دے سمرتھّ ہو سکاں۔

ایہناں حوالیاں تو اسیں دیکھدے ہاں کہ رگوید دے سماج وچ عورتاں اک حد تک آزاد سن اتے اوہناں نوں کافی ُکھل حاصل سی جہڑی کہ بعد دے سمیں وچ ختم ہو گئی سی۔
چنکِ نسل اتے ناں باپ توں اگے ودھدا سی اتے دولت پیو توں پتّ نوں جاندی سی۔ اس لئی اس سماج وچ ایہہ بہت ضروری ن گیا کہ پیو کون ہے اس گلّ دا پکا پتہ ہووے۔سماج وچ ماں دا تاں آسانی نال پتہ چل جاندا ہے پر پیو دا پکا پتہ لاؤنا مشکل ہے۔ اس لئی مردشاہی نے عورتاں دے جسم، یونی اتے سمبھوگ نوں اپنے وسّ وچ کر لیا اتے عورتاں تے بہت زیادہ بندشاں لا دتیاں۔ اوہناں دا جسم اوہناں دے ہتھ وچ نہیں رہیا۔اوہناں دی ہر حرکت تے کنٹرول رکھن دے طریقے اتے رسماں قایم کر دتیاں گئیاں اتے اس طرحاں عورتاں دی غلامی دا دور شرُوع ہو گیا جو اجے وی قایم ہے۔عورتاں دی ایہہ غلامی ہزاراں سال پرانی ہے۔ کیہا جاندا ہے عورتاں غلامی توں پہلاں دیاں غلام بنا دتیاں گئیاں سن۔اس دور وچ ہی عورت دا ویاہ صرف اک بندے نال کرن دی رسم تر پئی۔ اس توں پہلاں اک عورت کئی مرداں نال رہِ سکدی سی اتے بچے پیدا کردی سی۔ مہابھارت وچ وی اسیں دروپدی دے پنج گھروالے دیکھدے ہاں۔

کتیاں دی ونڈ کرکے ذات پات دا نظام قایم ہویا۔ہراک ذات اس سماج وچ اپنا اک خاص تھاں رکھدی سی۔ ہر ذات دا اپنا اک خاص پیشہ سی۔ذات دے رشتے وی پیو دے خن دی بنیاد تے ہی ہندے سن۔ اس لئی ذات پات دے نظام نے وی عورتاں دی غلامی نوں ہور پکا کیتا۔ اک ذات دے خن دی شدھتا بہت ضروری سی اتے دوسری ذات نال رلت منع سی۔ اس لئی ذات پات نے عورتاں تے پابندیاں ہور وی پکیاں کر دتیاں اتے اوہناں دے شکنجے کس دتے گئے۔گیتا وچ شری کرشن کہندے ہن کہ جدوں اک ذات دیاں عورتاں دوسری ذات دے بندیاں نال سمبھوگ کردیاں ہن تاں پورے سماج دی بنیاد ختم ہو جاندی ہے اتے سماج نرک بن جاندا ہے۔

عورتاں دی اس غلامی نوں مذہب،پروہتاں اتے ریاست نے قانونی بنا دتا۔قانون اتے مذہب دے گرنتھاں وچ اوسنوں ربی حکم اتے قدرت دا نیم کہہ کے عورتاں تے ٹھوس دتا گیا۔اسنوں ریت اتے رسم بنا دتا گیا۔ مثال دے طور تے منُ سمریتی وچ کیہا گیا ہے کہ عورتاں نوں بچپن وچ باپ دے، جوانی وچ کھاوند دے ادھین اتے بڑھاپے وچ پتر دے ادھین رکھنا چاہیدا ہے۔ سماج دی ہوند اتے بنتر لئی ایہہ بہت ضروری دسّیا گیا ہے۔ عورتاں اتے مرد ایہناں ریتاں، رسماں اتے قنوناں نوں اک پیڑی توں دوسری پیڑی تائیں پریوار، پنڈ، سماج اتے ریاست راہیں اگے توردے رہے جوحال تیک جاری ہے۔اس طرحاں مردشاہی نے عورتاں نوں مکمل طور تے غلام بنا دتا۔

عورتاں دی غلامی اتے مردشاہی دی چڑت لئی وچاردھارا دے اک وڈے بھنڈار دی وی لوڑ سی جس نال عورتاں اتے مرد دونوں ہی مردشاہی دے اس ڈھانچے نوں قدرتی اتے ربی دین قبول کر لین۔سماج دے ہر ادارے وچ ایہہ سوچ اتے وچاردھارا بھارُو سی اتے برقرار ہے۔رشیاں منیاں،گیانیاں، ودواناں اتے دانشوراں نے مردشاہی نوں پکا کرن لئی گرنتھ، شاستر،سمریتیاں اتے ہورناں کتاباں وچ مردشاہی دی وچاردھارا نوںمضبوط کیتا۔عورتاں دیاں کیتی کتری اتے تاریخ نوں ختم کر دتا۔’ ”


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels