Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> گوجر خان: راجیاں دی تحصیل

گوجر خان: راجیاں دی تحصیل

عنبر شمسی
June 26th, 2013

گرینڈ ٹرنگ روڈ یاں جی ٹی روڈ اُتے واقع گوجر خان بظاہر صوبہ پنجاب دا اک عام جہیا شہر لگدا اے۔
جدوں میں ایتھوں دے گورنمنٹ شہید سرور کالج اپڑی تاں اوتھے فلسفے دے اک استاد کالج وچ ہون والے تعمیراتی کم دا جائزہ لے رہے سن۔
سطح مرتفع پوٹھوہار دی ناہموار زمین اُتے واقع ایس کالج دی کدی حد بندی نہیں ہو سکی تے پروفیسر صاحب دے بقول اکثر کالج گراؤنڈ وچ مال مویشی پھردے رہندے سن۔
میں اوہناں توں پُچھیا کہ کالج دے پڑھیار تعلیم مکمل کرن دے بعد کیہ کرنا چاہندے نیں تاں جواب کُجھ انج آیا
’’ایتھوں دے سارے لوک انگلینڈیے نیں‘‘
’’اوہ کیہ ہوندے نیں؟‘‘ میرے ایس سوال اُتے پروفیسر صاحب بولے ’ایہناں وچوں زیادہ تر کسے نہ کسے دا رشتے دار برطانیہ وچ مقیم اے تے کوئی ٹیکسی ڈرائیور اے‘ کسے دا کاروبار اے تے پڑھائی دے بعد سارے ای نکا موٹا کم کرن دی تیاری پھڑدے نیں۔‘
گوجر خان پنجاب دے علاقیاں دی پٹی وچ شامل اے جتھوں دے لوکاں دی اک وڈی تعداد بیرون ملک مقیم اے۔ شہر وچ ایس رحجان دی علامت‘ سائن بورڈ دی شکل وچ نظر آندی اے جیہدے اُتے برطانیہ دے ویزے وچ مدد دے اشتہار بیوٹی پارلرز دے اشتہارات دے ناں نمایاں نیں۔
تاں گوجر خان وچ اجیہیا کیہ اے‘ جیہدی وجہ توں لوک ایہنوں چھڈنا چاہندے نیں؟
انتظامی طور تے ایہہ ضلع راولپنڈی وچ شامل اے تے ایہدی ابادی تقریباً اٹھ لکھ اے۔ شاید ایسے لئی گوجر خان دے لوکاں دا اک وڈا مطالبہ ایہہ اے کہ ایہنوں الگ ضلعے دا درجا دتا جاوے۔
پچھلے وزیراعظم راجا رپرویز اشرف دو واری گوجر خان توں منتخب ہوئے نیں پر اک عام رکن اسمبلی دے مقابلے وچ ایس واری ایہناں دے وزیراعظم بنن نال گوجر خان دے لوکاں دا خیال سی کہ تحصیل دی قسمت چمک گئی اے۔
بطور وزیر پانی تے بجلی تے وزیراعظم‘ راجا پرویز اشرف نے کئی ترقیاتی منصوبیاں دا آغاز کیتا‘ جیہناں وچوں اک متوا دا گیس جنکشن اے‘ جیہدے نال گوجر خان نوں گیس دی فراہمی اسانی نال ہووے گی۔
’’انگلینڈیاں‘‘ دے شہر وچ پاسپورٹ دا دفتر نہیں سی تے وزیراعظم نے اپنے اہل حلقہ نوں ایہہ سہولت وی دوا دتی۔
ایس توں وکھ وزیراعظم دا عہدہ سنبھالن توں فوراً بعد‘ اوہناں نے گوجر خان توں جاون والی مندرا توں چکوال تے سوہاوہ توں چکوال تیک دیاں سڑکاں دی منظوری دتی۔
جدوں میں مندرا توں چکوال جاون والی سڑک اُتے ہون والے کم دا جائزہ لین گئی تاں اوتھے میری ملاقات راولپنڈی دے سابق کونسلر‘ راجا احمد سلیم نال ہوئی۔
اوہناں دا کہنا سی کہ ایہناں وڈیاں سڑکاں توں صرف گوجر خان نوں وی فائدہ نہیں اپڑے گا۔ ’ایس سڑک نال ایہناں پینڈوواں نوں وی فائدہ ہووے گا جیہناں دی ہسپتال تے فصل دی وٹک کرن لئی بازاراں تیک رسائی نہیں سی۔‘
جے تہاڈے حلقے توں منتخب رکن وزیراعظم بنے تاں مسئلا کیہ اے؟
اخیر سابق وزیراعظم یوسف رضا گیلانی نے ملتان وچ وڈے وڈے فلائی اوور بنوائے تے شہر دی شکل بدل دتی۔ لاہور وچ وزیراعلیٰ پنجاب شہباز شریف میٹرو بس دا نظام لیائے۔ ایہہ ترقیاتی منصوبے سبھ پاکستان وچ حلقے دی سیاست دا حصہ اے۔ حساب اسان اے‘ جنے کم‘ اونے ووٹ۔
تاہم پاکستان دے ذرائع ابلاغ وچ تے الیکشن کمیشن آف پاکستان ولوں اجیہے ترقیای منصوبیاں اُتے کھُل کے تنقید ہوئی۔
الیکشن کمیشن نے وی ایس خبر دا نوٹس لیا تے ترقیاتی فنڈز دی منتقلی نوں پری پول رگنگ یعنی انتخابات توں پہلاں دھاندلی قرار دیندے ہوئے پابندی لا دتی۔
حکومت دا موقف اے کہ جدوں تیک چوناں دی تاریخ دا اعلان نہیں ہوندا‘ الیکشن کمیشن اجیہیاں پابندیاں عائد نہیں کر سکدا۔
پیپلز پارٹی دے رہنما تے پبلک اکاؤنٹس کمیٹی دے سربراہ ندیم افضل چن نے بی بی سی نال گل کردے ہوئے کہیا کہ ’اسیں چاہندے آں کہ الیکشن کمیشن ازاد ہووے تے اسیں ای ایہنوں تشکیل دتا اے تاہم ایہہ الیکشن کمیشن دے دائرہ اختیار وچ نہیں اے۔‘
شاید ایس لئی الیکشن کمیشن دے احکامات دے باوجود گوجر خان وچ ایہناں دوہاں سڑکاں لئی مزید فنڈز منظور کیتے گئے نیں۔ ایدھر سرور شہید کالج دی کندھ‘جہدے تے پرنسپل دے مطابق چھے کروڑ رُپئے دی لاگت آئی اے تقریباً مکمل ہو گئی اے۔
وزیراعظم نے کالج نوں دو بساں وی دتیاں نیں‘ جو ڈرائیور نہ ہون دی وجہ توں ورتیاں نہیں گئیاں۔ پروفیسر صاحب نے دسیا کہ ڈرائیور دی تنخواہ حکومت پنجاب ولوں آوے گی‘ ایسے لئی تاخیر اے۔
جیہڑے دن میں کالج گئی تاں ادھا کالج خالی سی۔ پتا لگیا کہ سارے لوک گوجر خان دی ورچوئل یونیورسٹی دی افتتاحی تقریب وچ شرکت لئی اسلام اباد گئے نیں تے ایس تقریب دے مہمان خصوصی تے کوئی ہور نہیں سگوں ایہناں دے اپنے رُکن قومی اسمبلی وزیراعظم راجا پرویز اشرف نیں۔
ہُن جے نسبتاً پسماندہ تحصیل وچ چھیتی توں چھیتی سڑکاں‘ گیس دے کنکشن تے کالج قائم کیتے جا رہے نیں تاں حرج کیہ اے؟


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels