Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے:15: طارق علی تے اولیور سٹون گل بات

وار بارے:15: طارق علی تے اولیور سٹون گل بات

January 19th, 2013
0 / 5 (1 Votes)

پنجابی رُوپ:زبیر احمد
(ایس لکھت وچ وار دا مطلب تواریخ ، ہسٹری اے)
(لڑی جوڑن لئی پچھلیاں لڑیاں ویکھو)
دوجا انگ : دوجی جگت لام مگروں دا اَوڈر

سٹون: پاکستان سیٹو(Southeast Asia Treaty organisation )دا اک مُڈھلا انگ بن گیا۔
طارق: ہاں جی تے پاکستانی فوج تدوکی امریکا لئی اک بہوں لاہے وند اثاثہ بنی پئی اے تے جس دے سدھے سانگے پینٹاگون نال نیں۔ چوکھی گنتری دے پاکستانی فوجی افسر سکھلائی لئی فورٹ برِیگ تے دوجیاں امریکی اکیڈمیاں وچ گھلے جاندے نیں ۔تے جوڑ جوڑے جاندے نیں پاکستان دی فوج تے امریکا وچکار تاں جو پاکستان دی فوج اندر اک اُچیچا کمانڈو یونٹ بنایا جائے جو بھاجڑ ویلے بوڑھے۔اتے بھارتی ایس توں جانو نیں۔
سٹون: ایس ویلے پاکستان نوں کس توں سیاسی ڈراوا سی؟
طارق: اوس ویلے کسے سیاسی آگو دا تاں ڈراوا نہیں سی پر لہندے تے چڑھدے پاکستان وچ سیاسی پاڑٹیاں سن جیہناں دا ایہہ آکھن سی پئی اوہ پاکستان نُوں امریکی راکھویں سمجھوتیاں توں باہر کڈھ لین گےاں جے اوہ اپریل 1958 دیاں چوناں جت گیاں۔ سانوں بھارت وانگ اک نرپکھ ملک ہونا چاہیدا اے۔ اتے ایہو ڈر سی۔ اک اُکا بھونتلیا ڈر پر ایہہ ڈر سی۔
سٹون: تہاڈی آپنی حیاتی وچ 1958 دا فوجی راج پلٹا ہویا، کیوں جی ؟ تُسی اوس ویلے پندراں ورھیاں دے سُو۔ کیہ تُسیں اوس ویلے تیک پاکستان وچ سُو؟
طارق: جی
سٹون: تہاڈی حیاتی مُڑ اُنج دی نہ رہی؟
طارق: ایہہ اُنج دی نہ رہی۔ ایہہ بدل گئی۔اسیں بڑے نراض ساں۔ اتے میں فوجی آگواں دے ورودھ بہوں اُدمی ساں۔ اسیں کیمپس وچ سٹدی سرکل تے جُٹ جوڑدے پئے ساں۔ میں اوس ویلے پہلے وکھالے نوں وی جتھے بند کیتا۔ جد فوجی آندے نیں تے ساریاں سیاسی پاڑٹیاں تے کامیاں دیاں جُڑتلاں(یوینز) اُتے ہٹک لا دنیدے نیں، لوکائی دے سارے وکھالے، چار تُوں ودھ بندیاں دے اکٹھے ہوون دی منائی ہو جاندی اے۔ اتے جد ساڈے تیک خبراں اپڑیاں، میرا خیال اے ایہہ 1961 سی، پئی پیٹرس لوممبا، کانگو دے آگو نُوں مار دتا گیا اے، بلجیم نے یاں امریکا نے یاں دواں نےں، سانوں نہیں پتہ سی، ۔۔۔نہرو نے بھارت وچ آکھیا ایہہ سبھ توں وڈا جرم اے، لہندے نوں ایس دا مُل تارنا پووسی،اوہناں اک آزاد آگو نُوں ماریا اے۔ پر ساڈی سرکار چُپ وٹی رکھی۔ایس لئی آپنی یونیورسٹی وچ میں آکھیا سانوں کیمپس وچ اک اکٹھ کرنا چاہیدا اے لوممبا دے حق وچ تے کجھ منگ کرنی چاہیدی اے۔ ایس لئی اساں سارے کیمپس وچ ایس دے اشتہار لا دتے کہ پیٹرس لوممبا مار دتا گیا اے۔ ادھے پڑھیاراں نُوں ایہہ سُرت نہیں سی پئی اوہ کون سی،پر اسیں اوہناں نُوں دسیا اتے اسیں پنج سو پڑھیار ساں جیہڑے ایس وڈھے ہال وچ اکٹھے ہوئے۔ میں گل کیتی تے آکھیا، ویکھو، کانگو نے آپنا پہلا آزاد آگو جمیا اے، اتے اوہناں اوس نوں مار دتا اے کیوں جے اوہناں نوں اوس توں ڈر سی۔ اسیں اِنج نہیں بہہ سکدے ایس لئی آؤ باہر گلیاں وچ نکلئےے۔ پھیر اوہناں آکھیا ہاں جی نکلئےے۔ ایس لئی اساں مارچ کیتا، اساں یونیورسٹی تُوں امریکی کونصلیٹ جرنل تیک مارچ کیتا تے آکھیا،تہانوں پتہ اے، کیہنے لوممبا نوں ماریا اے؟ سانوں جواب چاہیدا اے۔ ' لوممبا سدا جیوے'۔ پُلس تاں اُکا اچنبے نوں پھڑی گئی۔ ایہہ پہلا لوکائی دا وکھالا سی جس سارے فوجی قنوناں دی اُلنگھنا کیتی سی۔ اتے پھیر جد اسیں لہور وچ امریکی کونصلیٹ توں پرتدے پئے ساں، جد اسیں آپنے کالج کول اپڑے، پہلے نعرے جیہڑے اساں لائے ، ' فوجی آمریت مردہ باد، فوجی سرکار ہا ئے ہا ئے'۔۔۔ پر سانوں کجھ نہ ہویا۔ ایس لئی لوممبا دے قتل پاروں ملک وچ پہلی وڈی پڑھیار لہر چھڑ پئی۔
سٹون:تُساںکد پاکستان چھڈیا؟ تُسیں ہن تاں بن واسی ہو؟
طارق: میں لندن وچ رہنا آں۔ میں 1963وچ آکسفورڈ پڑھن لئی آیا تے پھیر مینوں پاکستان دے دو فوجی آمراں آون نہ دتا۔ میں بن واسی بن گیا۔
تے اِنج1965 1958-دا ویلا تہاڈی حیاتی نوں متھن ہار ویلا اے تے تُسیں آپنیاں جڑاں تُوں ترٹے ہوئے اوہ۔
طارق: میں 19 ورھیاں دا ساں جد میں آکسفورڈ پڑھن لئی آیا۔
سٹون: میں وی لگ بھگ 16ورھیاں دا سی جد 1963وچ کینڈی نُوں ماریا گیا۔ میرا حیاتی دا وی اوہ اک موڑواں ویلا سی کیوں جے میں نہیں خیالدا پئی میں ویت نام جاندا جے کینڈی صدر ہوندا۔
طارق: پھیر بھاویں لام ایس حد تیک نہ جاندی۔
سٹون: مینوں نہیں لگدا اِنج ہوندا۔
طارق: ایہہ بناوان ہار ویلا سی۔
سٹون: اتے ایس سمجھ نال پئی میں نہیں سوچدا کہ روزولٹ نے ہیروشیما تے ناگاساکی اُتے بمب مارنے سن پرایہہ خیال ای اے۔ پکی گل اے والس نے ایہہ نہیں کرنا سی۔
طارق: والس نے پکی گل اے بمب نہیں سُٹنے سن۔ ایس لئی ایہہ جو وقوعے ہوندے نیں لوکاں دا جیون بدل دنیدے نیں۔ ایہناں ساڈے جیون بدلے نیں تے لکھاں دے جیون بدلے نیں۔
سٹون: میں تاں کالونی گیری دی جیہڑی شکل سی اوس وچ کالونی گیراں ول ساں۔ میں نیویارک شہر وچ ساں۔ مینوں کوئی خیال نہیں سی اسیں تہاڈے دیس پاکستان وچ کئی پئے کرنے آں۔ اسیں ایہناں سارے ملکاں وچ پنگے لیندے پئے ساں اتے تہاڈی حیاتی۔۔۔ایہہ تہاڈی حیاتی اے جیہڑی ہور ہو جاسی۔ خورے ایہہ گڑبڑ تے بن واس پاروں بہتر ہو گئی ہووے اتے وسیبی لہر وی بنی۔ پر جے تُسیں انڈونیشا وچ جمدے پھیر وی ایہو تگادے ہونے سن۔ تہاڈی حیاتی اک بھونچال وانگر ای ہونی سی۔
طارق: بہر حال جے میں انڈونیشا وچ جمدا تے جے میرے ایہو سیاسی وچار ہوندے تاں میں مر جانا سی۔
سٹون: اک پوری پیڑھی امریکی پالسی پاروں ہل کے رہ گئی۔
طارق: امریکی شہریاں سنے۔ اسیں ویت نام دی لام ول پرتنے آں۔ ایہہ خورے کسی وی پیڑھی دی اُساری دا اُسارواں ویلا سی۔ ایس نے لوکاں نوں بدل دتا اوہناں نوں وی جیہڑے لام دے حق وچ سن اتے جیہڑے لڑے ایس لام وچ،اوہناں نوں ہمیش لئی بدل دتا۔ اوہ ہن پہلاں وانگر دے نہیں ہو سکدے سن۔ میرا آکھن دا مطلب اے ایس اوہناں نوں سوچن تے لا دتا۔ اتے ایس نے امریکا وچ ایہہ بدلی دتی پئی امریکا ہن جبری بھرتی دی لام لڑن جوگا نہ ہوسی، کیوں جے تُسیں لوکاں نوں جبری بھرتی کردے اوہ تاں ایس نال پورے ملک وچ اثر ہوندا اے۔ ایس لئی عراق وچ جنگ اک رضاکار تے کرائے دی فوج لڑی جیہڑے باہروں بھرتی کیتے گئے نیں۔
سٹون: ایہہ بڑی کاٹویں گل اے۔ برطانوی شاہی خورے رہتل دے کھیتر وچ پاکستان وچ سبھ توں بھرواں اثر پایا سی۔ تُسیں انگریزی لہجے نال بولدے اوہ۔ پر حقیقت وچ امریکی شاہی نے تہاڈی حیاتی بدل دتی ، تہاڈے ملک وچ سیاست نوں متھ کے۔
طارق: ایہہ بلکل سچ اے۔ مینوں ایہہ سوچن وچ اوکھت ہوندی اے پئی پاکستان وچ کنج دی حیاتی ہونی سی جے فوجی راج دا پلٹا نہ ہوندا، جے پہلیاں چوناں ہو جاندیاں۔ پھیر کئی پاکستان نے 1971وچ ٹٹنا سی؟ ایہہ اوہ کھچویاں اُلٹ حقیقتاں نیں جیہڑیاں ساڈے نال سدا رہسن۔میرا مطلب اے تہانوں پتہ اے مینوں ایہہ اُلٹ حقیقتاں گُپت سوچاں ول ودھ توں ودھ دھکدیاں ہن۔ جیویں جیویں تُسی بُڈھے ہوندے او ایویں ایویں تہانوں لگدا اے پئی وار دے ایہناں پلاں نے کیویں تہاڈی تے دوجیاں دی حیاتی بدل دتی۔
سٹون: اسیں اِنج ایہدے بارے سوچیا نہیں سی جد اسیں جوان ساں۔
طارق: نہیں، جد اسیں جوان ساں اسیں ایہناں چیزاں بارے نہیں سوچیا سی۔ تہانوں پتہ اے تُسیں کجھ وی کرن لئی تیار او۔ مینوں چیتے اے جد میں لام ویلے لہندے ویت نام وچ ساں تے تے روز ساڈے اُتے بمب ڈگدے سن تے میں اک وار ویت نامیاں نوں آکھیا، 'سانوں بہوں بھیڑا لگدا اے۔ تہانوں پتہ اے میں ویہاں وچ آں۔ کیہہ اسیں تہاڈی کوئی مدد نہیں کرسکدے؟ کیہہ اسیں اینٹی ائیرکرافٹ بیٹری دے بندے دا ہتھ نہیں ونڈا سکدے۔ تے ویت نامی جرنیل پآم وین ڈنگ مینوں اک پاسے کھڑ کے آکھیا:' میرے دل اُتے تیری گل دا بہوں اثر ہویا اے، پر ایہہ سپین دی گھروکی لڑائی) سیپنش سول وار) نہیں، جتھے لوک باہروں آ کے لڑ سکدے سن تے مر سکدے سن۔ ایہہ لام لڑی جاندی پئی اے ساڈے تے جگ دے سبھ توں ٹیکنلوجی وچ سبھ توں ودھ اگونہوے ملک وچکار۔ پردیساں نوں نال لے جو ساڈے نال رل کے لڑسن ،ایہدے لئی سانوں چوکھا آہر کرنا پوسی تہانوں جیوندا رکھن لئی، جو سانوں لام توں کراہے پا دیسی۔ ایس لئی تہاڈی بہوں مہربانی ساہیں ساتھوں ایہہ درخواست نہ کرو۔
(چلدا)



















































(چلدا)






Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels