Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے :12 طارق علی تے اولیور سٹون گل بات

وار بارے :12 طارق علی تے اولیور سٹون گل بات

August 18th, 2012

(ایس لکھت وچ وار دا مطلب تواریخ ، ہسٹری اے)
(لڑی جوڑن لئی پچھلیاں لڑیاں ویکھو)
دوجا انگ : دوجی جگت لام مگروں دا اَوڈر

سٹون: کیہ تُسیں فرنیکلن ڈلینو روزویلٹ بارے آپڻے وچار دسو گے؟

طارق: روزویلٹ بارے میرا وچار اے پئی اوہ ویہویں صدی وچ امریکا دا سبھ توں سیاڻا صدر سی جو امریکیاں جمیا۔ جد اوہ متھ لیندا سی پئی ایہہ کرن دی لوڑ اے اوہ کر کے چھڈدا سی۔ اوس آپڻے آل دوالے چنگے بندے جوڑ لئے سن، تگڑے دماغ دے بندے، کجھ اُتے اوہدا وساہ سی کجھ اُتے نہیں، پر اسیں کہہ سکنے آں جد اوہ متھ لیندا سی اوہ کرچھڈدا سی۔ بھاویں تُسیں اوس دے متھے فیصلیاں نال راضی نہ ہوو پر اوہ اِنج ای کردا سی۔ اوس نوں ایس توں وی مدد ملی پئی جد امریکا سبھ توں مہان مند وارے( depression Great ) وچوں لنگھدا پیا سی اوس ویلے تگڑی کامیاں دی لہر وی سی۔ اج ایہہ سوچڻا اوکھا اے پئی ٹریڈ یونینز قومی لوک حیاتی وچ کوئی وڈا کم پاوڻ پر اوس ویلے ایہناں یونیناں نے ایہہ کیتا سی۔ فلنٹ تے مِشیگن وچ کرخانیاں اُتے مَل مارے جاندے پئے سن، جتھے آٹو ورکر آپڻے کرخانیاں نوں مَلی بیٹھے سن، اتے زنانیاں، سواڻی ہتھ ونڈائی مرکز کھولدیاں پئیاں سن، مرداں دی مدد لئی ہڑتالاں وچ، خوراک لے کے جاندیاں سن تے پکیائی دا وکھالا کردیاں پئیاں سن۔ اتے ہیٹھوں آؤندے ایس دباء پاروں روزویلٹ ایس جوگا ہویا پئی اوہ وڈیاں کارپوریشناں نوں ہتھ پا سکے اتے جد اوس ایہہ کیتا تے نواں سودا کیتا جیہڑا اصلوں امریکا دا سماجی، جمہوری پروگرام سی۔ ایس توں اوکھا ویلا ہور کد ہوڻا سی۔ اوس کول گُڻ سی لوکاں نال وائرلس راہیں گل اپڑان دا، جیہڑا ٹی وی دے آوڻ توں پہلاں دی گل اے، تے مُڑ اوہ جنگ دا اثردار آگو بڻ پڑ وچ اُتریا۔

سٹون: ہاورڈ زِن روزویلٹ بارے اینے چنگے وچار نہیں رکھدا، اوس نوں اوہ راس والی(سرمایہ داری) دا مہرہ خیال کردا اے، جیہڑا اک گلے سڑے ویہار نوں بچاوڻ دے آہر وچ سی۔

طارق: اک پدھر تے ایہہ ٹھیک گل اے پر فیر ایہہ گل لہندے دے ہر سیاست کار بارے آکھی جا سکدی اے۔ کئی واری لوک میتھوں اوباما بارے سوال کردے نیں، اتے میں آہناں پئی جے تُسیں سیرز(روم دا بادشاہ) دے کپڑے پاؤ گے، تے تُسیں سیرز دے تخت تے بیٹھو گے، پھیر تہانوں سیرز وانگ ای ورتارا کرنا پووسی۔ پر پھیر وی سیزز بنڻ وچ وی تُسیں چوناں کرسکدے اوہ۔ تُسیں کیِلگولا وی بڻ سکدے اوہ تے کلاڈِیس وی۔ تُسیں کنسٹنین وی ہو تے جولین وی۔ ایہہ تُسیں سارے سیاست کاراں بارے آکھ سکدے او۔ جیہڑے راس والی نیں اوہ راس والاں دا پکھ پورسن تے ایہہ ای سچ اے۔ پر جے کوئی دوجا راہ نہ ہووے فیر تُسیں پھس جاندے اوہ۔ سو سوال اے کیہ روزویلٹ لئی کیہ کوئی ہور اڈ راہ سی؟ اوس ویلے دی ویہویں صدی نوں ویکھدے ہوئے،روزویلٹ خورے سبھ توں ودھیا صدر سی جو امریکا نوں مل سکدا سی۔ اتے ایس دا نائب صدر ، ہنری والس، اصلوں سچی اگانہہ ودھو روح سی، جس دے آپڻے ترکھے، تتے وچار سن۔ اتے روزویلٹ اوس اُتے آسرا کردا رہیا پر اخیر اوہ ول نہ رہیا تے آپڻی پارٹی دے اوہناں لوکاں نال لڑدا سوڑا پے گیا جیہڑے والس توں پچھا چھڈاڻا چاہندے سن۔ تے فیر ڈیموکریٹ ہیری ٹرومین نوں لے آئے۔ میرا مطلب اے پئی کیہ ہوندا جے روزویلٹ دے مرن پچھوں والس صدر بڻ جاندا۔ کس نوں خبر اے فیر ٹھنڈی لام نے کنج ساہمڻے آوڻا سی، ایس نے اوس پاسے اوس خاص ڈھنگ نال جاڻا سی کہ نہ ، یاں کیہ والس نے جاپان دے ورودھ اٹیمی رچھ ورتڻے سن کہ نہ۔

سٹون: کیہ روزویلٹ نے اٹیمی ہتھیار ورتڻے سن؟
طارق: ایہہ مزے دار سوال اے۔ میرا خیال اے اوس وچ اک پاسا سی جیہڑا امریکا دی جاپان بارے سانجھی سوچ نوں دسدا سی۔ جاپان اوس دا تگڑا نُکتہ نہیں سی۔
سٹون: اِنج لگدا اے اوس ڈراؤڻی بمباری نوں من لیا سی۔
طارق: اوس من لیا۔ تہانوں پتہ اے جیہڑی ڈراؤڻی بمباری جرمنی دے شہراں اُتے ہوئی، ڈریسڈن، تے دوجے ہور، کیہ ایہہ فوجی پکھوں لوڑیندی وی سی؟ میرا نہیں خیال۔ پر جد تُسیں ایہہ اک واری من لیندے او، فیر ڈریسڈن تے ہیمبرگ دی ڈراؤڻی بمباری توں، جاپان وچ ورتیندے جاچ لئی نویں ہتھیاراں دی ورتوں ول چھال مارنا اوکھا نہیں اے۔ کُھلی گل کرنے آں مینوں ہمیش حیرانی رہندی اے پئی کیہ ایہہ ہتھیار جاچن لئی کدی گوریاں دی نسل اُتے وی ورہے نیں۔ فیر جاپانیاں نوں اینا شیطانی بڻا دتا گیا سی کہ اوہناں دے دو شہراں نوں ملیا میٹ کرن دا کوئی مطلب نہیں سی۔ پر ایس تے ہر کوئی راضی سی۔ ایہہ نرے امریکی نہیں سن۔ برطانوی منی بیٹھے سن تے روسی وی۔ کھبے پکھی ۔۔۔
سٹون: تُسیں کہہ رہے اوہ روسی ایس اُتے من گئے سن۔
طارق: روسی منی بیٹھے سن۔
سٹون: ہیروشیما اُتے بمب؟
طارق: سٹالن من گیا سی۔ بھاویں ایہہ بمب اوہناں دی کمان توں لنگھ کے جاڻا سی، روسیاں نوں دسیا گیا سی ایہہ ہتھیار جاچڻ لئی ورتے جاندے پئے نیں اتے اوہناں کوئی وکھالا نہ کیتا۔

(چلدا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels