Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے 11: طارق علی تے اولیور سٹون گل بات

وار بارے 11: طارق علی تے اولیور سٹون گل بات

پنجابی رُوپ:زبیر احمد
August 3rd, 2012
5 / 5 (3 Votes)

(ایس لکھت وچ وار دا مطلب تواریخ ، ہسٹری اے)
(لڑی جوڑن لئی پچھلیاں لڑیاں ویکھو)
دوجا انگ : دوجی جگت لام مگروں دا اَوڈر
سٹون: تُساں وکھایا اے پئی انگلینڈ افریکا نوں کالونی گیری ہیٹھ لیاون لئی غلامی ورودھ چبوترا ورتن وچ چنگی چترائی ورتی۔
طارق: ایہ بڑی کھچویں گل اے پئی جو دلیل برطانیہ نے افریکا دی کالونی گیری تے فوجاں گھلن لئی دتی، اوہ ایہہ سی پئی ایہو راہ اے جس راہیں اسیں غلامی مُکا سکنے آں۔ ایس حقیقت نوں بُھلدے ہوئے پئی برطانیہ نے کئی دھاکے پہلاں غلاماں دے وپار راہیں آپنی قسمت بنائی سی۔ پر ایہہ دلیل جو اوہناں نے دتی تے میں ایس دلیل دا امریکا دی دلیل نال ٹکرا کرنا آں کہ اسیں ایس مُلک نوں یاں اوس مُلک نوں انسانی حقاں دی راکھی پاروں لئے رہے آں(قبضہ کردے پئے آں)۔ ایہہ اوہ وڈھے وچاری بہانے سن جیہڑے اوہ لوکاں نوں آپنے ملکاں وچ دنیدے نیں، تاں جے اوس شے نوں منن جوگ بنایا جا سکے جو نہ منن جوگ اے۔
سٹون: کیہ غلامی نے پھیر وی مُک جانا سی، یاں برطانیہ نے اصلوں ایس نوں مُکایا۔
طارق: نہیں غلامی کسی نہ کسی طراں مُکن اُتے سی۔ ایہہ عمل اُنہویں صدی وچ امریکی گھروکی جنگ وچ دکھن دی بھاج نال چھوہ پیا سی۔ اتے یورپ وچ ایہہ مُکدا پیا سی۔ فرانسی اُتھل نے ایس نوں مُکا دتا سی۔ کیروبین دے ہیئتی (Haitian ) نابر ہو گئے سن۔ ایس لئی برطانیہ نے جو آکھیا ایہہ آکھن انگریز شاہی اوہناں دی خاص صفت اے ، بوہتا کوڑ تے دوغلا۔ جویں اوہناں افریکا اُتے راج کیتا اوہ اُکا نسل واہ سی۔ میرے آکھن دا مطلب اے ویکھو جیویں اوہناں افریکا اُتے راج کیتا، اوہناں نسلی وتکرے دا نظام ملک اُتے لاگو کیتا۔ اوہناں نرے گوریاں لئی کلب تے نرے گوریاں لئی علاقے بنائے۔ لوک کہندے نیں افریکیاں نے ایہہ نرا دکھنی افریکا وچ کیتا، پر برطانیہ نے ایہہ سارے جگ وچ کیتا، ہندوستان وچ، تے افریکا وچ وی۔
سٹون: مینوں ذری ٹوہ رہندی اے تہاڈا ڈاکٹر لوینگسٹن، سکاٹی مشنری باری کیہ وچار اے؟
طارق: اک واری جے تُسیں شاہی(سامراجی) ملک دے ہوو، شاہی نسل توں، تُسیں خیالدے اوہ جگ تہاڈا اے۔ اتے چنگے لوک وی، تہانوں پتہ اے، اوہ متھدے نیں پئی اوہ جا سکدے نیں تے دُنیا دی کھوج کر سکدے نیں، تے شیواں لبھ سکدے نیں۔ اوہناں دے دماغ وچ ایہہ گل پھسی اے اسیں شاہی آں، تے جو کجھ وی میں کردا پیا آں،شاہی لئی اے۔ تے ڈاکٹر لوینگسٹن ایس توں بچیا ہویا نہیں سی۔ سکاٹی ہن انگلینڈ دے بہوں ویری نیں۔ پر برطانوی شاہی دے پکھوں، سکاٹی اک ویلے شاہی لئی جاناں وارن نوں پھردے سن۔ اوہناں برطانوی شاہی نوں اُسارن تے مُڑ ایس دے پربندھ وچ اُچیچا کم کیتا۔
اتے ایس وچ اک مذہبی انگ وی سی۔جیہڑا ایس دا ہمیش حصہ سی۔ اسیں وسیب تے عیسائی دھرم کافراں تیک لے جا رہے آں۔ اسیں اوہناں دا ہتھ ونڈواں گے پر ایس دے بدلے اوہناں نوں عیسائی ہونا پووسی۔ چوکھے مشنری ایس نوں مندے سن تے اوہ ایس نوں سچا مندے سن،کسے بھیڑے کارن توں بناں۔ ایہناں روحاں نوں بچاون لئی ،سانوں ایہناں دے سریراں دے جیوندے ہوون دا پک وی کرنا پووسی۔ برطانیہ نے ایہہ آسٹرےلیا وچ کسی حد تیک کیتا، تھلوچیاں نوں عیسائی کیتا، تے آپنے وانگر بناون دا آہر کیتو نیں۔ اتے ایہہ وی سچ اے پئی بوہتیاں دا صفایا کردتا گیا۔
سٹون: کیہ سر رچرڈ برٹن وی تہاڈی بھیڑیاں دی گنتری وچ اے؟
طارق: جی، برٹن بڑا مزے دار جی سی، اتے میری بھیڑے جیاں دی گنتری کوئی لمی چوکھی نہیں، میرے آکھن دا مطلب اے، چوکھے برطانوی پنڈت جیہڑے جگ دی کھوج وچ گئے جیہناں چنگے کم وی کیتے، بولیاں لبھیاں، اوہناں بارے لکھیا۔ ایہناں وچوں کجھ جی جگ وچ کسے حوالے نال شاندار محققین علوم شرقیہ سن، اتے اوہ 'مشرقی' رہتل بارے جاننا چاہندے سن، بولیاں سکھنا چاہندے سن تے اوس دا اُلتھا انگریزی وچ کرنا چاہندے سن۔ اتے میرے لئی، ایہہ ہمیش بڑی چنگی گل اے جد تُسیں ایہہ سکھنا چھوہندے اوہ پئی دوجے لوک کیہ پئی سوچدے نیں۔ پوند دے متشرقین جو چین گے اوہناں سانوں اوس نثر دی دس پائی جیہڑی اوس ویلے یارہویں صدی وچ چین وچ لکھی جاندی پئی سی ،ایس لئی مثال وجہوں جس دا سانوں مُڑکدی پتہ نہ چلدا ۔ایس لئی میرے لئی ایہہ کھوجی چنگے لوک سن۔


















Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels