Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے 10: طارق علی تے اولیور سٹون گل بات

وار بارے 10: طارق علی تے اولیور سٹون گل بات

پنجابی رُوپ:زبیر احمد
July 20th, 2012
5 / 5 (3 Votes)

(ایس لکھت وچ وار دا مطلب تواریخ ، ہسٹری اے)
(لڑی جوڑن لئی پچھلیاں لڑیاں ویکھو)
دوجا انگ : دوجی جگت لام مگروں دا اَوڈر
سٹون: تُساں دسیا اے برطانیہ نے نرے 30 ہزار سپاہیاں نال ہندوستان اُتے راج کیتا۔
طارق: ہاں ایہ بڑی حریانی آلی گل اے۔ ہندوستان اُتے برطانوی راج دے سکھر ویلے ، نرے 36 ہزار گورے سپاہی سن۔ پر کیوں جے برطانیہ نے اوتھائیں ٹکن دا متھ لیا سی ایس لئی اوہناں ملک دیاں وکھو وکھ تھاواں تے راج کردے میلاں نال معاملے متھے اتے اک 'نویں ماڈل دی فوج' دی برطانوی ہندوستانی فوج بنائی، جس وچ ہندوستان دیاں ماڑیاں تھاواں توں بندے بھرتی کیتے گئے۔ اوہناں قصبیاں چوں بندے نہیں لئے، سگوں ماڑے واہک بھرتی کیتے، یاں پہاڑی لوک جیویں گورکھے سن، جیہناں نوں تنخاہ وی دتی گئی تے جیہناں دا خیال وی رکھیا گیا۔ ایہ اک طراں دی پیو پردھان فوج سی۔ فوجی دستیاں نوں اوہناں دے حالیں نہیں سُٹ دتا جاندا سی، اتے فوجاں کمیں لگیاں رہندیاں سن، اتے ایہ چیز کوئی ہور باشاہی طاقت نہیں دُہرا سکدی سی۔
سٹون: اتے اوہناں نے جاگیردار میل وی اُساریا۔
طارق: اوہناں ایہ وی کیتا۔ پہلے ملکاں وچ، مُغلاں دے وارے وچ، جاگیرداری نوں ہلہ شیری نہیں دتی گئی سی۔ ریاست د ا ہتھ اُچا سی۔ برطانیہ نے اوہناں نواباں نوں جیہڑے پہلے ای ایہناں تھاواں اُتے تگڑے سن تے آپنی طاقت ٹیکس دی اُگرائی لئی ورتدے سن تے اوہناں کول مالکی نہیں سی، اوہناں نوں ہور جاگیراں دے کے جاگیرداراں دا میل اُساریا، بھاویں کجھ معاملیاں وچ ایہ جاگیردار ہولی ہولی جاگیراں دی مالکی سانبھن لگے پئے سن۔ ایس لئی برطانیہ نے ایہناں ساریاں دے ادارے بنا دتے تے ایہناں لوکاں نوں آکھیا ، تُسیں ایہناں زمیناں دی مالک اوہ، ایہ علاقے تہاڈے ہیٹھ نیں، اتے سانوں تہاڈی حمایت دی لوڑ اے۔ ایہناں مالکیاں تے ریاستاں دے کئی مزارے برطانوی فوج وچ ، چین، انڈوچین، تے ہور تھاواں تے جگ بھر وچ لڑے۔ کئی ہندوستانی سپاہی دوجی جگت لام وچ یورپ دے میداناں وچ موئے۔
سٹون: تُسیں ایہہ کہنا چاہندے اوہ امریکا نوں ایہ کالونی ورثہ وارثت وچ ملیا، کجھ خاص مثالاں چھڈ کے۔
طارق: اوہناں نوں ایہ کالونی ورثہ برطانیہ توں ملیا پر اوہناں اُنج عمل نہ کیتا جیویں برطانوی کردے سن۔ جد برطانیہ نے افریکا اُتے مَل ماریا ، برطانوی نوکر شاہی نوں ملک وچ لایا گیا۔ ملکہ ملک دی پردھان سی۔ میرے آکھن دا مطلب اے ایہ اک رتیل، پرانے فیشن دی کالونی گیری سی۔ جے تُسیں افریکاوچ فرانسی کالونی سو، پھیر تُسیں فرانس دے سانجھ ستھ ملکاں دا حصہ سو۔ سارے ویروے اصلوں پیرس وچ کیتے جاندے سن۔ امریکا نے ایہ رُوٹ نہیں ملیا۔ اک کارن ایہ رُوٹ نہ مَلن دا ایہ سی پئی پوند وچ امریکا دی وچار دھارا ایہ سی اسیں کالونی ویری ملک آں، کیوں جے سانوں وی اک کالونی گیر ملک توں چُھٹکارا کرنا پیا سی یعنی برطانیہ توں۔ اتے ایس گل دی بڑا اُچیچی تھاں سی پئی کیویں امریکا نے آپنی شاہی بارے سوچ نوں بنایا۔ اوہ ایہ تاں کدی وی نہیں من سکدے سن پئی اوہ شاہی سن۔ ایہ تاں ہن ای، سویٹ یونین دے ڈھیہ پچھوں، اوہناں ایہ کرنا چھوہیا اے۔ اتے ایس چیز نے وی کجھ حصہ پایا تے ایس نے اوہناں نوں تھاپڑا نہ دتا پئی الف یاں بے ملک وچ کسٹمز دی اُگرائی لئی عملہ گھل دین۔ ایس بارے اوہ ہمیش نا خُش رہے ہن جدوں اوہناں نوں کرنا پیندا اے جیویں عراق وچ۔ ایس لئی اوہناں دی بادشاہی وکھری ٹائپ دی سی۔ اصل وچ برطانیہ نے اسدھے ہتھ ارجنٹائن بوہتا مال کمایا جناں اوہناں افریکا اُتے مَل مار کے کمایا۔ اتے امریکا لئی ایہ مالی پکھ اے جیہڑا ات اُچیچ اے جتھے تک اوس دے لابھ دا تعلق اے۔۔اوہدیاں کارپوریشناں کیہ کرسکدیاں ہن، اوہناں لئی کم کرن دا سبھ توں چنگا آل دوال کیہ اے۔ ایہ امریکی سوچ اک لمے ویلے تیک بھاری رہی اے۔
سٹون: نواں لبرل، آزاد منڈی دا فلسفہ؟
طارق: ایس توں ودھ، ایہناں اکھراں دے ہوند وچ آون توں اگدوں۔ اِنج ای امریکا نے کم پایا اے۔ میرے آکھن دا مطلب اے پئی اوہناں کنج سعودی تیل کمپنی اُساری۔ آرمکُو گئی تے اوس نے تیل دی صعنت سعودی عرب وچ اُساری، جیہڑی مُڑ سعودیاں چنگا چوکھا بھا تار کے سانبھ لئی تے جیہڑا واشنگٹن نوں نت دا سلام اے۔ امریکا دیاں کمپنیاں جاندیاں نیں، اوہناں نال جڑیا عملہ فیلہ جاندا اے، سونہے جاندے نیں تاں جو واشنگٹن نوں سوہ رہے کیہ پیا ہوندا اے؟ پر اوہ سدے ہتھ مَل نہیں ماردے، یاں فوجاں نہیں گھلدے جد تیک ایس دی بہوں لوڑ نہ پے جاوے۔

(چلدا)







Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels