Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے 9:: طارق علی تے اولیور سٹون گل بات

وار بارے 9:: طارق علی تے اولیور سٹون گل بات

طارق علی تے اولیور سٹون گل بات
July 9th, 2012
5 / 5 (1 Votes)

(لڑی جوڑن لئی پچھلیاں لڑیاں ویکھو)
دوجا انگ : دوجی جگت لام مگروں دا اَوڈر
سٹون: تُساں لکھیا اے دوجی لام پچھوں، اصلوں امریکا جاپان نال سودا کر لیا پئی اک پارٹی دی ریاستی سرکار ہووسی۔ کیہ میں ٹھیک آں؟

طارق: لوک بڑیاں گلاں کردے نیں پئی جرنل میک آرتھر نے جاپان دا ستور لکھیا سی۔ جد امریکا نے عراق اُتے 2003 وچ دھاوا کیتا، لوکاں ایہہ صلاح دتی عراق اُتے "جاپان وانگ" مَل ماریا جاوے۔ پر جاپان اُتے مَل کوئی اگانہہ ودُھو کم نہیں سی۔ پہلی گل ایہہ سی جاپان وچ کیوں شاہی نوں رکھیا جاوے۔ عمومی پکھوں امریکا کول ایہناں چیزاں لئی بوہتا ویلا کوئی نہیں سی تے ناں سی فرانسیاں کول، کیوں جے اوہناں دی رپبلک ریت سی۔ باشاہاں راہیں راج کرن دی ریت برطانیہ دی اے۔ پر جاپان دے معاملے وچ میرا وچار اے، میک آرتھر اتے امریکا دی سرکار نے متھیا پئی بادشاہ نوں تخت توں لاہوڻ نال تے جاپان نوں اک رپبلک بناؤڻ نال خورے ملک وچ اجیہاں سماجی تے سیاسی طاقتاں جاگ پوون جیہناں نوں مُڑ نپڻا اوکھا ہو جاوے۔ اوہناں نوں ہمیش اجیہے لوکاں دی لوڑ ہوندی سی جو اوہناں لئی ایہناں ملکاں نوں نپ کے رکھڻ اتے اوہناں دا خیال سی پئی اوہناں دی بادشاہ نال چنگی بڻی رہے گی۔

حقیقت ایہہ اے پئی بادشاہ پہلوں ای آپڻی اوہ تقریر تیار کیتی کھڑا سی جو اوس جنگی مجرم ہووڻ دے مقدمے اُتے کرنی سی، کیوں جے اوس لام وچ پورا پورا حصہ پایا سی۔ اتے جد میک آرتھر اوس نوں ملن گیا ،بادشاہ ایہہ خیالی بیٹھا سی بس مُک گیا سب ۔ اصلوں میک آرتھر آکھیا ، ذری ٹھہرو ، اسیں تہانوں رکھاں گے، تُسیں محفوظ اوہ۔

اگلی گل دماغ وچ رکھڻ دی لوڑ اے پئی دوجی لام توں پچھوں، ایہناں دُھرے دے ملکاں وچ ، جاپان، جرمنی تے اٹلی وچ، ایہناں ملکاں دی فوجی بڻتر اویں ای رہڻ دتی گئی اتے اوہی لوک جیہڑے امریکا ورودھ لڑے سن اوہناں مُڑ اُگھیاں تھاواں بڻائی رکھیاں۔ جاپان وچ اوہناں بہوں گھٹ لوک چھیڑی۔ اوہناں جنگی جُرماں دا ٹربیونل بڻایا تاں جو ٹوجو تے دوجیاں نوں سزاواں دتیاں جا سکڻ پر گھٹ ودھ اوہناں فوج نوں سگواں رکھیا۔ اٹلی وچ 60 توں5 فیصدی مسولینی دا اُسرگاّ(ڈھانچہ) عدلیہ ، فوج تے پُلس وچ سگواں رکھیا گیا۔ جرمنی وچ بھاویں سبھ توں ودھ جھاڑو پھریا پھیر وی کنے ای پچھلے نازیاں کرسچن ڈیموکریٹ پارٹی وچ رلت کر لئی اتے پُلس اتے عدلیہ وچ کم کیتا کیوں جے اوس ویلے تائیں ویری کیمونزم سی۔ اتے کوئی وی شے جو کیمونسٹاں ورودھ ورتی جا سکدی سی ورتی گئی۔

سٹون: کیہ دوجی جگت لام وچ اجیہا ویلا وی آیا سی جد امریکا ایڈی وڈھی شاہی بڻ گیا سی پئی اوہ برطانوی ورگی طاقت دا وارث ہو سکے؟

طارق: جد توں ایہہ لام چھوہی سی کجھ ناں کجھ تاں دیڻا پونا سی۔ جے پہلی وڈھی جگت لام ایہہ متھدی پئی سی کہ امریکا جگت طاقت اے، ایس نوں جگت چونترے تے لیاندی پئی سی تے پھیر دوجی جگت لام ایہہ متھدی پئی سی کہ امریکا ا ک شاہی طاقت اے، جس دا مطلب ایہہ سی پئی ایس نوں آپڻی جگت شاہی دی راکھی لئی جنگاں لڑنیاں پوسن۔ ایتھے پھیر چھیتی ای کوریاتے ویت نام تے ہور تھاواں وچ پنگے چھوہڻے پئے۔ سانوں پتہ اے امریکا اُتر امریکا وچ ہمیش اک شاہی سی تے ایہہ آپڻے علاقے نوں میکسیکو دی تھاں مار کے ہور پسردا پیا سی۔ فرانس توں لوزینا خرید کے، برطانیہ نوں باہر کڈھ کے۔ دکھڻی امریکا نوں اسدھے ہتھ قابو کردیاں، نکا موٹا آہر کردیاں، بھاویں فوجاں مُڑ آوندیاں جاندیاں سن،جویں جرنل سمیڈلے بُٹلر آپنی شاندار کتاب War is Racket وچ سانوں دسدا اے۔ عمومی پکھوں امریکا جگت اُتے راج کرن لئی اَتھاویں گھوڑیاں نوں لبھدا سی جو اوس دے آکھے لگڻ۔ جتھے اوہناں سدھا پنگا لیا اوس دا سٹا ہمیش چنگا نہیں سی، جیویں اسیں فلپائن وچ تکیا۔
(چلدا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels