Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے 8:: طارق علی تے اولیور سٹون گل بات

وار بارے 8:: طارق علی تے اولیور سٹون گل بات

طارق علی تے اولیور سٹون گل بات
June 23rd, 2012
5 / 5 (1 Votes)

(ایس لکھت وچ وار دا مطلب تواریخ ، ہسٹری اے
(لڑی جوڑن لئی پچھلیاں لڑیاں ویکھو)
دوجا انگ : دوجی جگت لام مگروں دا اَوڈر

سٹون: تُساں لکھیا اے پئی امریکا کول مُڈھلے خام مال وچ چوکھا ہوون جو اوس دا خاصا سی دوجی لام مگروں مُک گیا سی۔ امریکا نوں پتہ لگا ایس نوں لوڑ اے باہروں منگاون دی تیل ، خاص لوہا، باکسائٹ،تانبا، میگنیز(لوہا) تے نِکل دی۔ کیہ تُسیں امریکا دی دوجی لام پچھوں خام مال دی لوڑ تے امریکا دی جگ دے سبھ توں امیر ملکھ بنن دی گل کر سکدے اوہ؟

طارق: لام مگروں لوکاں دی آساں اوس توں بہوںاُچیریاں سن جنیاں اوہ پہلوں رکھدے سن۔مثال وجہوں کاراں دا بناون تے مُڑ اوس صنعت دا دھماکہ، فوجی صنعتی کمپلس دا دھماکہ، ایہہ سبھ کجھ ایہنی وڈھی پدھر اُتے سی کہ کسے امریکی آگو نوں ایس دا پہلی وڈی لام توں پہلاں خیال وی نہیں آیا ہونا۔ ایس لئی اوہ پک کردے پئے سن پئی ملکھ چلاون لئی مال دی تھوڑ نہیں آونی چاہیدی، خاص کر تیل دی تاں جو امریکا شاہی دی راکھی تے سنبھال ہو سکے۔ آئزن ہاور نے اصلوں اک واری ویت نام دی امریکا نوں لوڑنیدے خام مال پاروں گل وی کیتی سی۔ اتے سعودی عرب نال تیل دے معاملے دا پکا ہونا ، جو مگروں اکویں صدی تیک اوہناں لئی اک ڈروانا پچھا اے، ایہہ معاملہ بڑا کھچ پاوندا اے جو دسدا اے اک شاہی توں دوجی شاہی دی بدلی، جد کے پہلی بادشاہی اجے سرکاری پکھوں مُکی وی نہیں سی۔ امریکا نے سعودی شاہی ٹبر دی راکھی تے اوہناں دے سارے نفعیاں کنفیاں دی راکھی دوجی لام ویلے برطانیہ توں لے لئی سی۔ جس اکٹھ وچ ایہہ متھیا گیا اوہ اک بیڑی وچ ہویا، نہر سویز وچ۔ ایتھے ای ایہہ معاملہ متھیا گیا۔

سٹون: کیہدے توں ٹبر دی راکھی کرنی سوں نیں؟

طارق: ٹبر دی آپنے لوکاں توں راکھی۔

سٹون: تاں پھیر وی

طارق: تاں پھیر۔ سعودی شاہی ٹبر، خاص کر اوہناں دے مذہب دا فرقہ، وہابی عقیدہ، ایہہ فرقہ ملکھ وچ بہوں تھوڑا سی۔ ایس لئی سعودی شاہی نے پہلاں برطانوی شاہی نال آپنے معاملے نبیڑ کے جو طاقت لئی تے مُڑ ایہو طاقت امریکا توں ،اوہ سی لوکاں اُتے آپنا راج تگڑا کرن دی، تے سعودی عرب اُتے مذہب دا اوہ رنگ لاگو کرن دا جس دی لوکاں نال سانجھ نہیں سی۔ ایس لئی کہانی مُڑ دوجی لام ول پرتدی اے۔ پر امریکا کاہلی کاہلی ایہہ سوچیندا پیا سی، بھاویں اجے لام مُکی نہیں سی، فرانسی ڈھیہ پئے نیں ایہناں دیاں کالونیاں دا کیہ بنسی؟ ڈچاں نےں لڑائی نہیں کیتی، اوہناں اُتے جرمناں دا قبضہ اے۔ انڈونشیا وچ کیہ ہون جا رہیا اے؟ ہند چینی وچ کیہ ہوونا اے؟ ہندوستان وچ کیہ ہوونا اے؟ کیہ اسیں جاپانیاں نوں ہندوستان لین دئیے؟ کیوں جے اک ویلے ایس دا اصلوں ڈر سی۔

سٹون: کیہ تُسیں ایس بارے تھوڑا جیہا دس سکدے اوہ؟

طارق: 1942وچ سنگاپور دے ڈھین پچھوں، ہندوستانی قوم پُجاری ، خاص کر گاندھی تے نہرو، ایہ محسوسیا پئی بھاویں ہندوستان دی آزادی دی گل بات کتھے برطانیہ دی تھاں جاپانیاں نال نہ مُکانی پووے۔ ایس لئی پہلی وار گاندھی نے غلط چال چلی یاں غلط پینتڑا ۔ اوس آکھیا آؤ برطانیہ نوں کہیے پئی ہندوستان چھڈ جاون۔ اتے برطانیہ نے اوس نوں آکھیا تھوڑا اُڈیکو تاں جو لام مُک جاوے۔ اساں جانا تاں ہے ای۔ اوس آکھیا نہیں تُسیں ہنے جاؤ۔ ایس لئی اوہناں سرکار چوں ہندوستانی صوبیاں چوں آپنے سارے بندے کڈھ لئے تے ' سول نافرمانی دی لہر چھوئی جس دا ناں سی 'ہندوستان چھوڑ دو' ۔ اج لوکیں ایس نوں نری قومی لہر سمجھدے نیں، جیہڑی ایہہ سی وی، پر ایس دا تعلق اوس وڈے جاپانی دھاوے نال سی جو سنگاپور دے ڈھین پچھوں ہویا، اتے جس نوں ایشیا وچ برطانیہ دی سبھ توں وڈی فوجی ہار آکھیا گیا ۔ اتے برطانیہ نے وچاریا جاپانی اگانہہ ودھدے پئے نیں، اوہ برما اپڑدے پئے نیں۔ چھیتی اوہناں بنگال مَل لینا اے۔ ہلا تے مُڑ بنگال مَلن پچھوں، کہنوں سار اے؟ بھاویں اوہ دہلی مَل لین۔ ایس لئی برطانوی سرکار، خاص کر چرچل دا تاں تراہ نکل گیا اتے اوس کھبے پکھی سیاست کار برطانیہ توں گاندھی نوں ملن لئی گھلے تاں جو اوہ اوس نوں کہن، ویکھ ، اسیں تینوں اوہ سبھے کجھ دے دیواں گے جو توں چاہنا ایں، پر تھوڑی جیہی اُڈیک کر لے۔اسیں تینوں خالی چیک دینے پئے آں۔اتے گاندھی نے جواب دتا، اوس بنک دے چیک دا کیہ کریئے جو مُکدا پیا اے؟ اوس اصلوں سوچیا برطانوی مُک گئے نیں۔ بہر حال جاپانی کدی دہلی نہ اپڑے، پر ایہ چیتے رکھن دی گل اے کہ بہوں گنتری دے ہندوستانی سپاہی جو جاپانیاں ہتھ آئے، اوہناں سپاہیاں دی انڈین نیشنل فوج بنا دتی گئی۔ اتے انڈین نیشنل کانگرس پارٹی دا اک آگو سی ، سبھاس چندر بوس، جیہڑا قومی نعرے اُتے ٹوکیو تے برلن گیا ' ساڈے ویری دا ویری ساڈا دوست اے' اتے اوس ہٹلر تے جاپانیاں نال معاملے جوڑے تاں جو ہندوستان اندر برطانیہ ورودھ دھاوے کیتے جان۔ ایہ انڈین نیشنل آرمی سی جیہدی بڑی دُھم سی۔

سٹون :پھیر کیہ ہویا؟

طارق: اوہ بوہتی دور تیک نہیں گئے۔ اوہناں برطانیہ ورودھ لڑائی لڑی۔کئی پھڑے گئے۔ اتے لام مگروں اوہناں اُتے مقدمے تورے گئے، اُچے ہندوستانی سیاست کاراں، نہرو سنے، وکیلاں دے بھانے پائے، اتے اوہناں دا دفاع کیتا تے ایہ کہیا ایہ قوم پیارے نیں۔ اسیں ایہناں نال سہمت نہیں آں پر ایہناں جو کیتا اوس ملکھ ورودھ کیتا جیہڑا وہناں دے ملکھ اُتے مَل ماری بیٹھا اے۔

سٹون: جاپانیاں کول برما تاں ہے سی، اوہناں ہندوستان ہور فوج کیوں نہ گھلی؟

طارق: ایہ وی اک ہور بھیت اے پئی اوہناں ہندوستان کیوں چھڈ دتا، اوہناں سویٹ یونین اُتے دھاوا کیوں نہ کیتا۔ اوہناں اک ویلے سبھو چھڈ دتا اتے محسوسیا پئی اوہناں نوں سارا زور کتھے ہور لاونا چاہیدا اے۔ میرا خیال اے خورے اوہناں ایہہ سوچیا اساں لام لئی لوڑنیدی رسد اُتے بوہتا اے بھار پا دتا اے۔

سٹون:کیہ ہندوستان کول جاپان لئی کوئی دولت سی؟

طارق: بلکل، ہندوستان کول چوکھی، تگڑی دولت سی۔

سٹون: تگڑی، پر اوس ویلے نہیں۔

طارق: اوس ویلے نہیں۔ ایہ اوہ دولت سی جیہڑی کڈھنی پینی سی، پر اوہناں کول ڈاڈھے چوکھے کمیریاں دی طاقت اے۔

سٹون: ہاں، پر اوہناں نوں کھوانا وی پینا سی تے جاپانیاں نوں خوراک دے مسلے سن۔ 

(چلدا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels