Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے 7: طارق علی تے اولیور سٹون گل بات

وار بارے 7: طارق علی تے اولیور سٹون گل بات

پنجابی رُوپ:زبیر احمد
June 7th, 2012

(ایس لکھت وچ وار دا مطلب تواریخ ، ہسٹری اے)
(لڑی جوڑن لئی پچھلیاں لڑیاں ویکھو)
سٹون :اتے چارلس لنڈبرگ
طارق: اتے لنڈ برگ۔ ہور تہانوں پتہ اے، ایہہ شے اوہناں لئی میں کہنا ایہہ چاہنا آں، آپنے آپ نوں صنعت دے پورے کپتان سمجھدے ہوئے، راس وال(سرمایہ دار) اصلوں رنگ انّھا اے تے جنس انّھا اے۔ ایہہ گھول اے نرا نفع لئی۔ ایس لئی برطانیہ نوں کیوں جرمنی دی تھاں فیدہ دتا جاوے؟ اِنج اوہناں سوچیا۔ اتے ایہہ حقیقت پئی جرمنی دی اگوائی کیمونسٹ ورودھیاں کول سی ہور وی اچھا سی۔ اصلوں ایہہ ہور چنگا سی۔
 
سٹون۔ جے پیسے دی گل کرئےے تاں مینوں پرل ہاربر بارے حرانی ہوندی اے۔ جے تُسیں جاپانی دھنگان نوں 1933 توں اگدوں چین تیک ویکھو ، جاپان شاہی لئی مررہیا اے، ایشیائی اثر لئی، گورے نوں باہر کڈھ سُٹدا پیا اے، غیر ملکیاں نوں سُٹدا پیا اے۔ جاپان گھمبیر تا نال دولت پچھے اے، چین دے ٹوٹے کرد اپیا اے، تھائی لینڈ تے ہند چینی ول جاندا پیا اے، انڈونشیا، دکھنی ایشیاء دا تیل دا نواں چن۔ جاپان بڑا امیر ہوندا پیا اے۔ ٹھیک؟ ایس لئی امریکا کیوں ایس موقعے اُتے جاپان اُتے ہٹک لاندا پیا اے۔ اوہ کیوں جاپانیاں نوں اوس ویلے امیر بنن توں ڈکدے پئے نیں جد اوہ آپ دکھنی ایشیاء وچ برطانوی تے فرانسی شاہیاں دے نفے کنفے دے راکھے ہن؟

طارق: میرا وچار اے امریکا دے بہوں چوکھے اگواں دا ایہہ خیال سی پئی برطانیہ توں جگت گیر ی دا کم لے لینا سوکھا اے جناں کے فرانسیاں یاں جاپانیاں توں کالونیاں لیناں۔ میر ا آکھن دا مطلب اے ایہہ ریت سی۔ پئی جے ایہہ برطانوی نیں، جے ایہہ جاپانیاں ہتھوں ڈیہہ پیندے نیں، پھیر ایہہ ساتھوں وی ہمیش لئی کُھس جان گئے یاں آون والے لمے چر لئی۔ جد کے جے ایہہ برطانیہ یاں فرانس دے ہتھ رہن۔۔۔۔
یاں جرمناں دے۔۔۔
طارق: یاں ڈچ دے، پھیر ایہہ بہوں سوکھا اے۔
سٹون: ایس لئی امریکی جاپانیاں نالوں جرمناں دا وساہ بوہتا کھاندے سن نسل دی سانجھ کر کے۔
طارق: نسل دا وتکرا ایہناں تگڑا سی کے میر ا خیال اے پئی جوان پیڑھی نوں ڈاڈھی سٹ وجے گئی جد اوہ پچھاں پرت کے جاپان ورودھ وچار دے رُوپ ویکھن گئے۔ ایس گل نوں لانبھے کردیاں پئی جاپانیاں کئی کیتا ، ایویں ناں لیوے دا پیلا بھو، جاپانیاں دا پاپی مہاندرا جیویں امریکیاں نے پرچاریا ، جویں 'پیلے شیطان' ایہہ بڑا ڈوہنگا کم ہو گیا سی۔ اتے سانوں پتہ اے نسل وتکرے نے امریکاوچ تگڑا کم وکھایا اے۔ لوکی کئی وار بُھل جاندے نیں پئی کو کلس کلان
) kkk ) چتواں دی نکی ڈھانی نہیں سی جیہڑے چٹے پہراوے پا پھردے سن، کالیاں نوں وڈھدے سن، سگوں ایہہ خورے ایس دیس دی اک وڈی سیاسی لہر سی جس دے لکھواں ممبر سن۔ ایس اصلوں غریب گوریاں دی لوک لہر سی۔ ایہہ سچ اے۔ ایس لئی امریکاوچ اجیہے سُنیراں نال کھیڈنا سوکھا سی۔ تے ایہہ وی صیح اے پئی چینی کامیاں دے امریکا وچ آون تے کئی روکاں سن۔ ایس لئی ساری گل بہوں ڈوہنگی سی۔
سٹون: ناکہ بندی گھمبیر گل سی۔ اک امریکی ناکہ بندی دا مطلب جنگ دا ہوکا سی، کہنا ایہہ چاہیدا اے۔
طارق: ایہہ سی۔
سٹون :جیویں ساڈی کیوبن ناکہ بندی سی۔
طارق: ہاں ایہہ بہوں گھمبیر سی۔
سٹون: اتے جاپانیاں ایہہ خیال کیتا پئی جے اوہ ہن امریکا نال نہ نجھٹے تاں پھیر کدی وی نہیں ۔
طارق: تُسیں ٹھیک آکھدے پئے اوہ۔ دوجی چون جیہڑی اوہناں کول سی جے اوہ کوئی چال سوچدے پئے سن تاں اوہ ایہہ سی پئی اوہ روس اُتے دھاوا کر دین، جیہڑی اوہناں دے بھانے بہوں صیح سی، اتے پھیر اوہ آپنے جرمن دوستاں نال ادھ راہ وچ مل سکدے سن تے روس اُتے مل مار سکدے سن۔ایس دے اُلٹ اوہناں امریکا نوں سٹ مارن دا سوچیا،جس پاروں امریکا لام وچ وڑ آیا، اتے ایہہ سی ایہدا انت۔
سٹون: جاپان تے جرمنی وچ جڑت دا گھاٹا جاپدا اے۔ کئی پکھوں ایہہ حرانی آلی گل سی۔
طارق: ہاں ایہہ سی۔
سٹون: خاص کر روس دی رولے وچ کیوں جے جاپانی سائبریا توں 1940 وچ پچھاں ہٹ گئے سن۔ تے اوہناں روسی جرنل زوکوف نوں سائبریا توں سٹالن گراڈ گھل دتا سی۔
طارق: اک واری جد روسی جسوساں نے ایہہ متھ لیا پئی جاپان سویٹ یونین اُتے دھاوا نہیں کرے گا ،اوہ آپنیاں فوجاں اکٹھیاں کر کے جرمناں دے ورودھ لڑائی وچ پا سکدے سن۔ اک بہوں اُچا روسی جسوس ، بڑا سیانپی پرانا بالشویک سونہا ، رچرڈ زورگا ، جرمناں دی پرانی بالشویک ٹبر توں سی تے روس نٹ گیا سی۔ اوہ سچل جرمن بولدا سی تے سچل آریائی سی۔ اوہ جاپان وچ بیٹھا ہویا سی تے ٹوکیو وچ جرمن ایمبسی توں اینا نیڑے سی پئی جد سفیر برلن پرتیا، زورگا اصلوں ایمبسی چلاوے پیا۔ اوس نے ساریاں روپوٹاں تکیاں۔ اتے اوس روسیاں، سٹالن نوں خبردار کیتا پئی جرمن روس اُتے دھاوا کُرو نیں۔ اوس نے اوہناں نوں 'اپوریشن بارباروسا ' دا منصوبہ وی گھلیا(بھاویں سٹالن اوس دا یقین نہ کیتا)۔ ایس لئی روس دی جاپان بارے سُوہ بڑی چنگی سی۔ اتے جس چھن اوہناں نوں ایہہ تھوہ لگا جاپان ساڈے اُتے ہلہ نہ کرو اے اوہناں ساریاں فوجاں جرمناں نال لڑن لئی گھل دتیاں۔
سٹون: کیہ اسیں ایہہ آکھ سکنے آں پئی ہٹلر نوں پک سی پئی روس اوس دا اے اتے اوہ ایہہ نہیں چاہندا سی کے جاپانی پچھلے بوہے توں وڑ اوس دے خزانے وچ حصہ پان؟
طارق: ہاں اِنج ہو سکدا اے۔
سٹون: اتے کئی جرمنی نے جاپانیاں نوں تباہ کر دینا سی جے اوہ جت جاندے؟
طارق: میرا خیال اے اوہناں سودا کر لینا سی۔ پئی تُسیں مہاں جاپانی شاہی نوں کول رکھو ، پر ایس نوں لہندے تیک رکھو، تے اسیں یورپ تے مہاں روس نوں رکھاں گے۔
سٹون: جرمن ایس بارے امریکا نوں کیویں لیندے پئے سن، کیہ سانوں پتہ اے؟
طارق: اوہناں سوچیا اسیں امریکا نال سودا کر لاں گے۔ اوہناں نوں ایس دا چنگا پک سی، اوس کارن جو یں تُساں وڈی جرمن امریکی آبادی بارے دسیا اے۔ایس لئی امریکا نال ویر ایناں تگڑا نہیں سی۔ ایس لئی جرمناں دی تیجی رائخ نے امریکا ورودھ جو پرچاریا اوس وچ اوہ کہندے سن امریکا وچ پُونجی پتی راج اے، یہودیاں دا پُونجی پتی دھڑا امریکا نوں ایس لام وچ دھروئے گا، کہ روزولٹ ایس یہودی پونجی واد دا قیدی اے، کیوں جے اوہ اک اجیہے ملک اُتے دھاوا نہیں کرسکدے جس دی چوکھی آبادی جرمن اے۔
(چلدا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels