Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے 6: طارق علی تے اولیور سٹون گل بات

وار بارے 6: طارق علی تے اولیور سٹون گل بات

پنجابی رُوپ:زبیر احمد
May 22nd, 2012

طارق: چلو ہن پرل ہاربر دی گل کرنے آں۔پرل ہاربر دے وقوعے نے، میرا وچار اے سویلے یاں کویلے تاں ہوونا ای سی، کیوں جے جاپانی مسوسدے سن پئی امریکا اوہناں اُتے ہٹکاں لا وندا پیا اے، دبا پاوندا پیا اے تے اوہناں نوں جواب دینا پوسی۔ اتے تہانوں پتہ اے بھاویں ایس دا ٹُھکواں ویروا امریکا کول سی یاں نہ ، مینوں نہیں پتہ پر میرا وچار اے پئی کجھ دھراں نے سُکھ دا ساہ لیا ہونا اے پئی مساں ملکھ نوں وکھرپ توں نکلن دا راہ ملیا اے۔ کیوں جے وکھرپ دا پاسا امریکا وچ ہمیش بہوں تگڑا اے تے ایہ پہلی وڈی لام مگروں ہور ہو گیا سی۔ اتے ایس وچ اک آدر والا پکھ وی اے جو ایہ کہندا اے پئی ایہ ساڈا کم نہیں اے کہ اسیں جگت دیاں تھاواں اُتے خاہ مخاہ پنگے لیندے رہیے۔ اسیں کیوں لیئے؟ پر ایس توں اُلٹ، اجے لوک وی سن جیہڑے ایہ کہندے سن پئی امریکادی راکھی باہر جاون نال ای ہونی اے۔ اوہ ایس توں باہر نہیں رہ سکدا۔ اتے میرا وچار اے پئی ایس وچ کوئی شک نہیں پئی روزولٹ تے کجھ لوک جیہڑے اوس دے نیڑے سن، لام وچ وڑنا چاہندے سن۔ ہن ایس گل دا ساریاں نوں پتہ اے۔
ایس لئی میرا نُکتہ پرل ہاربر بارے ایہ ہے پئی ایہ بڑا سوکھا سی۔ اتے جد ایہ ہو گیا تاں کُل امریکا لام نال پکا ہوگیا۔ اتے امریکا وچ کئی چیزاں اجیہاں کیتاں گئیاںجیہناں نوں اصلوں نہیں ہونا چاہیدا سی جویں امریکا وچ جاپانی آبادی دی کمیپ بندی، جس نوں مُڑ امریکیاں نے پرل ہاربر دے سٹے پاروں قبول کر لیا۔ مینوں ہمیش حرانی ہوندی اے پئی ایویں ایتھے گل کردا پیا آں پئی جے امریکا نے 9/11 دے وقوعے پچھوں ایہ متھ لیا ہوندا ساریاں امریکی مسلماناں نوں ان متھے ویلے لئی کیمپاں وچ ڈک دتا جاوے تاں ایس دا کئی پرتاوا آندا؟ مینوں ڈر اے ایس دا کوئی پرتاوا نہیں سی آونا۔ میرا ڈر اے۔ میرا خیال اے پئی کجھ چنگے لوک بھاویں آپنی واج چُکدے ، بہرحال ، دوجی لام ول پرتدے آں، اوہناں ایہ کیتا تے پرل ہارپر ہویا، میرا آکھن دا مطلب اے اچن چیت نہیں تے امریکا نوں لام وچ وڑن لئی اک کارن مل گیا۔ نُکتہ اےہ وے پئی جد امریکہ نے جاپان دی سطلنت دے ورودھ لام دا ہوکا دتا، تاں طاقت دے دوجے دُھریاں ،اٹلی تے جرمنی نے امریکا ورودھ لام دا ہوکا دے دتا۔ اوہناں نوں ایہ کرن دی لوڑ نہیں سی۔ ہٹلر نوں پرل ہاربر اُتے دھاڑے بارے نہیں دسیا گیا سی۔ اوہ ایہ آکھ سکدا سیں ایس دا حصہ نہیں آں، اسیں امریکاورودھ لام دا ہوکا نہیں دا ں گئے۔ پر اوس نے ایہ کیتا۔ اتے میرا خیال اے ایہ اک کاہلی دا کم سی، کیوں جے کجھ لوکاں امریکا وچ کہنا سی ، سانوں ہن جاپان نوں مُکاون دا آہر کرنا چاہیدا اے، آؤ سدھے شانت مہا ساگر (پیسفک) ول چلئیے، سانوں جرمناں نال لڑن دی کیہ لوڑ اے۔
سٹون: کیہ ایہ گل شاندار نہیں پئی نومبر 1940وچ، روزولٹ ایس گل اُتے چُنیا جاندا اے کہ اوہ لام نہیں لڑئے گا۔ ایہ گل اودوں دی اے جد انگلینڈ اُتے گھمبیر دھاڑے ہوندے پئے نیں تے ایہ دھڑکُو اے پئی اوہ ڈھیہہ پوسی۔ کئی بندیاں دس پائی اے پئی روزولٹ مسوسدا سی کہ انگلینڈ ڈھیہہ پوسی۔
طارق:ہاں

سٹون: ہلا تاں مُڑ اوہ دیو سی۔۔۔
طارق: انگلینڈ
سٹون: یورپ؟
طارق: میر ا وی ایہو خیال اے۔تے اوہ اکلا نہیں سی۔ روزولٹ نال نیاں کردیاں، اسیں ایہو آکھاں گے بوہتے بندیاں دا وچار سی انگلینڈ نہ بچسی۔
سٹون: جے ایہ معاملہ اے تاں کیہ روزولٹ اک اجیہے جگت دی بھلک بارے سوچدا پیا سی جیہڑا انگلینڈ توں بناں ہوسی تے نہ اوہدیاں کالونیاں اوہدی طاقت ہیٹھ ہوسن۔ تے پھیر کیہ ایہ کالونیاں روزولٹ نوں مل جاسن؟
طارق:بُلکل صیح۔ میرا خیال اے امریکا دے اُچ میل وچ گل بات دا ایہ اک وڈا نُکتہ سی:برطانوی شاہی ڈھیندی پئی اے تے سانوں ایس دی تھاں لینی پوسی، جنی وی ہوسکدی اے تاں جو اسیں آپنے جگت لابھاں دی راکھی کر سکئیے۔ چرچل نوں اک سینہے وچ، روزولٹ نے آکھیا ایہ بڑا دُکھانت ہوسی جے برطانوی سمندری فوج جرمناں دے ہتھیں ڈھیہہ پئی ایس لئی میں صلاح دیساں پئی تُسیں آپنی ساری سمندری فوج ساڈے سمندر کنڈھیاں اُتے گل دیو تاں جو اسیں تہاڈے لئی ایہناں دی راکھی کر سکئیے۔ تے ایس اُتے چرچل نوں کمنبنی چھڑ پئی کیوں جے ہار دا خیال اوس نوں کدی نہیں آیا سی۔
سٹون: ایس لئی اٹلانک چاٹر، نوِفونڈلینڈ دے اکٹھ، ایتھے اک گھمبیر کم پایا کیوں جے 1941 دی پوند وچ چرچل ایتھے آیا، معاملہ متھن لئی ، کہنا چاہیدا اے، روزولٹ نال، اوس دی راکھی کرن لئی جس نوں اوہناں چار آزادیاں دی راکھی آکھیا۔
طارق: میر وچار اے اوس ویلے تیک برطانیہ دا بچا ہو گیا سی۔ ایہ 1944 وچ صاف ہو گیا سی پئی اوہ لڑیسن۔ برطانیہ دے بچا دی لڑائی ہوا وچ لڑی گئی سی تے ایہ انگلینڈ اُتے جرمنی دے مَل توں نہیں چھوہی سی۔ ایہ اک ہور کھچویں گل اے۔ جرمنی اصلوں اوہدوں پچھے ہٹ گیا جد انگلینڈ جواب دین لئی تیار سی۔
سٹون :اتے اوہدی تھاں روس تر گیا۔
طارق:ہٹلر نے روس دے ورودھ جاون دا متھیا،اتے اوہناں اُپوریشن باربروسا بنایا، ایہ ہور وڈی جرمناں دی غلط چال۔ جے اسیں اوہناں دی اکھ توں تکئےے، یاں تاں تُسیں پوند وچ ای روس نال نجھٹ لیندے تے ایس گل دی مت اوہناں دے کجھ جرنل دیندے پئے سن یاں پھیر جے تُساںبرطانیہ نوں پہینا چھوہ دتا اے کیوں جے تُسی برطانوی شاہی چاہندے اوہ، پھیر تُسیں ایہ کرو۔ پر اخیری ویلے اوہناں آپنا دماغ بدل دتا۔ ایس لئی پئی اوہناں دی چنگی مت ماری ہوئی سی۔
روزولٹ ول پرتئےے، میرا وچار اے پئی اک واری جد برطانیہ جرمن دی دھاڑ توں بچ گیا، اوس سوچیا ایہ تاں کجھ کُرو نیں، تے سانوں کجھ کرنا چاہیدا اے۔ پر پھیر ایہ پئی روزولٹ دا امن دے ناں اُتے راج وچ آیا سی ، ایہ کہندے اسیں کسی جنگ وچ نہیں رلنا، تے ایہ گل دسدی اے پئی امریکا اندر اوس امن دے پاروں وکھرپ ہوون دا کنا ڈوہنگا احساس سی۔
سٹون: آؤ پہلے پیسے دی گل کر لئےے۔ سانوں پتہ اے پئی کئی امریکے آپنے جمن بھوئیں پاروں جرمنی نال جڑئے ہوئے نیں، اتے سانوں پتہ اے جرمنی وچ بڑا پیسہ اے۔ سانوں پتہ اے اسیں جرمنی نال اجیہا معاملہ کرسکنے آں جو بہوں لاہے وند ہوسی۔ بونڈاں تے سٹاکاں دا لین دین ہو سکدا اے جرمنی نال، امریکا وچ برطانیہ ورودھ ڈاڈھی تگڑی سوچ وی اے۔
طارق: ہاں ہے تے میں سمجھنا آں، ہنری فورڈ ، تہانوں پتہ ہے جو امریکا دا مہان صعنت کار سی جرمن مُکھی سی، تے اوہناں نال معاملے کردا سی تے دوجے وی کردے سن۔
(چلدا)






Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels