Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> قسط نمبر7: انگریزاں پنجاب تے قبضہ کیوں کیتا؟

قسط نمبر7: انگریزاں پنجاب تے قبضہ کیوں کیتا؟

April 29th, 2012

دوجی کراہے پاؤڻ والی گال ہے لفظ ''انگریز''۔ ''خان'' وانگ ایس لفظ دے وی بہوں مطلب نیں۔ کجھ تے سارے یورپیاں نوں انگریز آکھدے نیں، کچھ ایس وچ امریکیاں تے آسٹریلویاں نوں وی رلا دیندے نیں۔ انگریز مخالف لہراں وچ وی ایہہ کم ہویا تے دوجی وڈی لام توں بعد کولڈ وار سکالر شپ وی ایس بھلیکے نوں ودھایا۔ اج کل 9/11 توں بعد جہیڑی مزاحمتی سکالر شپ پیدا ہو رہی ہے ایس وچ ایس بھلیکے نوں خوب ورتیا جا رہیا ہے۔ بس گوری چمڑی والا انگریز ہی ہو سی۔

بئی گوری چمڑی والے تے ساڈے ایتھے وی سن۔ اوہناں نوں کس انگریز آکھیا؟ سارے یورپی گورے نہیں فیر؟ ویسے ذرا سوچو، ڈچاں، جرمناں، فرانسیسیاں تے پرتگالیاں نال تے انگریز یعنی English آپ لڑدا رہیا سی۔ تھاں تھاں توں اوہناں نوں کٹ کٹ کڈھیا پر ہڻ سب نوں بڑی ہشیاری نال آپڻے فولڈ وچ رکھ لیا ہے۔ جتھے کسی وڈیائی دا ذکر کرنا ہوئے اودوں انگلینڈ دی پادشاہی دا ذکر کریندے نیں تے جتھے جتیاں پیڻ اوتھے بڑی ہشیاری نال ایہہ English انگریز دا مطلب سارے یورپیاں نوں قرار دوا دیندے نیں۔ پئی20 ویں صدی تیک تسیں انگریز یعنی English سب یورپی قوماں نال لڑدے رہے۔ امریکہ تہاڈی کالونی سی تے امریکیاں دی کپاہ اوڻے پوڻے چک لیاندے سو۔ باقی یورپی قوماں دیاں پادشاہواں تروڑ کے نکی وڈیاں قومی ریاستاں بڻا چھڈیاں۔ اوہناں ریاستاں وچ کامن زبان تے تھاں دا خیال نہیں رکھیا سگوں امپریل مفادات دی پادشاہی سی۔ آپ تسیں ہر تھاں پسار دے گئے تے دوجی یورپی قوماں سکڑدیاں گئیاں۔ اوہ تے تہانوں امریکیاں 14 اگست 1941 نوں تھلے لا دتا تے تسیں کینڈے وچ آ گئے۔ پر آپڻے مخالفاں نوں تسیں اج تیک اجہی پھرکی دتی ہوئی ہے پئی اوہ ''انگریز مخالفت'' وچ دوجیاں یورپی قوماں نوں وی رگیدن وچ رجھے ہوئے نیں۔

''خان'' تے ''انگریز'' دے بھلیکیاں نوں وادھا دیڻ وچ کیہڑے امپریل فیدے سن ایس بارے کجھ تہانوں اندازے ہو گئے نیں اتے کجھ چلدے چلدے ہو جاوڻ گے۔

ایسے طرحاں دے بھلیکھیاں وچ اک بھلیکھا ایہہ اے پئی فارسی نوں ایرانیاں دے کھاتے پا دتا جاندا ہے۔ ایہہ گل اک پاسے ایرانی قوم پرستاں پھیلائی ہے تے دوجے پاسے ایرانیاں دے مخالفاں وی فارسی نوں دیس نکالا دیڻ لئی ورتی ہے۔ جے تسیں فارسی زبان دی تواریخ ویکھو تاں بہوں سارے بھلیکھے دور ہو جاندے نیں۔ عربی، پنجابی وانگ فارسی دی وی بہوں ساری ٹہاڻیاں نیں۔ فارسی وچ اوہناں نوں ''سبک'' آکھیا جاندا ہے۔ فارسی توں ترجمہ کیتی گئی اک کتاب ''فارسی زبان کی مختصر تاریخ'' دا مصنف وڈی فارسی ٹہاڻیاں وچ سبک عراقی، سبک ہندی، سبک خراسانی اور سبک ہیراتی دے ناں لکھدا ہے۔ پنجاب وچ فارسی دا چلن Achaemenid پادشاہی ویلے توں شروع ہویا جہیڑی حضرت مسیح توں 550 سال پہلاں توں شروع ہوئی اتے 330 بی سی وچ مک گئی۔ ایہہ پارسیاں دی پادشاہی سی اتے آہندے نیں پارسیاں دا تعلق ''پارسا'' قبیلہ توں سی جہیڑا وسط ایشیا توں آیا سی۔ اوہناں نوں پارسی آکھیا گیا اتے اوہناں دی زبان نوں فارسی آکھیا گیا۔ ایس پادشاہی دا راج پنجاب، کشمیر وچ وی رہیا۔ پارسیاں دا وڈا ٹھکاڻا بلخ سی جس نوں یونانیاں بیکٹریا یا بکتریا وی لکھیا ہے۔ ایس پادشاہی دے مشہور پادشاہ وی بلخی سن۔ ویسے آپڻے بابا فرید وی بلخ توں ہی آئے سن۔ اس ویلے ایہہ بلخ دی پادشاہی، عثمانیاں وانگ بہوں علاقیاں وچ پھیلی ہوئی سی۔ تریخی بھلیکھیاں بارے گل ہوندی رہ سی۔ پر ہڻ ایہناں گلاں دے بعد اس آپڻے وچلے سوال ول آؤندے ہاں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels