Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> تاریخ دے پنے >> وار بارے 3: طارق علی تے اولیور سٹون گل بات

وار بارے 3: طارق علی تے اولیور سٹون گل بات

پنجابی رُوپ:زبیر احمد
April 28th, 2012

           (ایس لکھت وچ وار دا مطلب تواریخ ، ہسٹری اے)

سٹون: کیہ تُسی ایہہ آکھسو پئی امریکا پہلی وڈی لام وچ روسی اُتھل نوں مُکھ رکھدیاں آیا، یاں اوس آنا ای آنا سی۔جے روسی ایس لام توں پچھاں ہٹ جاندے پھیر فرانس تے برطانیہ اُتے جرمن فوج نے چھا جانا سی۔
طارق: ہاں ایہہ کم رلیا ملیا سی۔ بالشویکاں نے زویں، روٹی تے امن دی منگ کیتی سی۔ اوہناں ایس لام وچ لڑنا نہیں سی۔ اتے ایس گل وچ کوئی شک نہیں پئی جرمناں فرانس نوں ہرا دینا سی۔
سٹون: ایس وچ کوئی شک نہیں سی؟
طارق: اتے برطانیہ نوں وی۔ ایس وچ کوئی شک نہیں پئی جے امریکا لام وچ نہ آندا،جرمناں نوں وڈی فتح ہونی سی۔ پر آپنے بھانے ایہہ ضروری نہیں پئی ایہہ امریکا دی چنتا سی۔ کیوں جے اوہ جرمناں نال اک وڈی طاقت پاروں نجھٹ سکدے سن۔ پر میرا وچار اے پئی اوہناں ایس پاروں دخل دتا کیوں جے اوہناں نے پہلی وڈی لام توں اگدوں اجوکے تے بھلک دے امریکی لابھاں دی سانبھ کرنی سی۔امریکا دا وڈا لابھ آپنے علاقے وچ سی تے دکھنی امریکا وچ جس نوں اوہ 'پچھلا ویہڑھا' آکھدا سی۔
سٹون: امریکا نے برطانیہ نوں پہلی جگت لام وچ چنگی رقم وی اُدھار دتی۔ اوس ویلے ایہہ رقم میرا خیال اے کئی بلین ڈالر سی۔جے جرمنی ایہہ لام جت جاندا برطانیہ توں ایہہ تاری نہیں جانی سی۔کیہ جرمنی نال معاملے متھے جا سکدے سن؟
طارق: میرا وچار اے معاملے متھن دے راہ سن۔ پر روسی اُتھل دماغاں نوں چوکھا نپی بیٹھدی سی۔ وڈرو ولسن، جو امریکا دا پردھان سی ،اوس مسوسیا کوئی ہور راہ وی دینا پووسی۔ اتے اوس دا ایہہ راہ سی، قومی آزادی، خوداختیاری پر وارسیلزدا معاہدہ وی۔ ایس لئی وارسیلز دا معاہدہ ولسن نے زوریں کیتا تے جرمنی نوں سزا پاروں ای فاشزم دی چڑھتل ہوئی۔ مینوں نہیں لگدا ایس بارے کوئی ہور راء ہو سکدی اے۔ جیویں جرمناں نال سلوک کیتا گیا اوس پاروں تگڑی قومی جرمن لہر چڑھی، جس نوں مگروں تیسری رِائخ (Third Reich ) دا ناں دتا گیا۔پوند وچ نازیاں دا سارا پرچار ایہہ سی جرمناں نال بھیڑا کیتا گیا اے،جرمن لوکاں نوں سزا دتی جاندی پئی اے،جرمن قوم نوں سزا دتی جا رہی اے،جرمن نسل نوں سزا دتی جاندی پئی اے تے ایہہ امریکن نیں،یہودی مہاجن نیویارک دے، اتے اوہناں دے جرمنی وچ دوجے دوست ساڈے ورودھ اکٹھے ہو رہے نیں۔
ایس نے ہی سبھ متھیا۔جے وارسیلز دا معاہدہ کجھ ساواں ہوندا، یاں ایہہ وچارو پئی جے امریکا یورپ وچ پہلی وڈی لام مگروں اوہ کردا جو اوس نے دوجی وڈی لام پچھوں کیتا ، کہن دا مطلب اے پئی اسیں تہاڈے نال وپار کرن لئی تیار آں تے تہاڈی مدد لئی پئی تُسی نقصان پورا کر لؤ، کسے نوں کیہ پتہ اے پئی پھیر کنج دا ہوندا۔
اتے جے وارسیلز دے معاہدہ پاروں نازی راج وچ آئے تے پھیر دوجا پکھ بناں شک دے بالشویکاں دا بھو سی۔ پئی جرمن کارپویشناں اتے جرمن اشرافیہ دی وڈی گنتری دا ایہہ متھن، جس دی بوہتی سیہان نہیں کیتی جاندی پئی اوہناں ہٹلر دی حمایت دا متھیا اتے اوس نوں راج گدی لا بہایا ایہہ اوہناں دے ایس ڈر پاروں سی پئی جے اسیں ہٹلر نال نہیں رلدے تاں جرمنی وچ اُتھل آسی۔
ویکھو اوہناں روس وچ کیہہ کیتا اے اتے اسیں تاں ڈُب جاواں گئے، ایس لئی چنگا اے اسیں ایس بندے نال رل جائےے جیہڑا سانوں بالشویکاںتوں بچا لیسی۔ روسی اُتھل دا سدھااثر جرمن مزدوراں دی وڈی چڑھت سی۔ جرمنی دی مزدور لہر اندر پُھٹ پاروں اک دھڑا بالشویکاں دا حامی سی تے دوجا رتیل سوشل ڈیموکریٹ دھڑا سی۔ اتے جے تُسیں جرمن قوم پُوجا تے فاشسٹاں دے پرچار نوں ویکھوکہ ہمیش یہودی بالشویک متے دا ڈراوا دتا جاندا سی۔ ایس لئی یہودی دوطراں دے سن۔ اوہ اُچ میل دے سن یاں بالشویک سن۔ سارے پمفلٹ تے لکھتاں ایہہ دس پاندیاں سن پئی جرمن، یہودی بالشویک متے دے ورودھ لڑدے پئے نیںاتے ایہہ گل مُڑ سدھی دوجی لام وچ جا وڑی۔
سٹون: کیہ ہٹلر کسی حد تیک انگلینڈ وچ مشہور نہیں سی؟ اتے کیہہ مسولینی دی امریکا وچ دُھم نہیں سی؟ اتے بنک آف انگلینڈ اتے بنک آف انٹرنیشنل سیٹلمنٹ ہٹلر دے حمایتی سن۔
طارق: بکل صیح اے۔ میں اگلے دیہاڑے مسولینی دی برطانیہ وچ 1926 دی چھپی ہٹھ بیتی ویکھدا پیا ساں۔ ایس کتاب دا مُکھ بند اٹلی وچ امریکا دے سفیر نے لکھیا سی، جس لکھیا پئی مسولینی یورپ دا مہان آگو اے تے ایہہ راہ اے بھلک ول جان دا، اتے ایہہ ایس پاروں سی پئی اوس نوں ہٹلر وانگ بالشویکاں تے اُتھل دے مُڈھ ورودھی خیال کیتا جاندا پیا سی۔ونسٹن چرچل نوں مسولینی بڑا پیارا سی۔ اتے ایس ہٹھ بیتی وچ تہانوںچرچل دے اِنج دیاں گلاں دے حوالے ملن گئے؛مسولینی بڑا اُچیچا بندہ اے، اسیں اوس دے نال آں اتے اوس دی لوڑ اے۔چرچل ہمیش گل نوں کھول کے کردا سی۔جے بالشویک ہیڑ نوں سمندر کنڈھے ڈکنا اے تاں سانوں بنیٹو مسولینی ورگیاں دی لوڑ اے۔ اتے مگروں دوجی وڈی لام وچ مسولینی نے ایہہ حوالے چرچل اُتے ای وگا مارے ایہہ کہندیاں پئی اک ویلا سی جد برطانیہ دا آگو مینوں پسند کردا سی۔کیہہ ہویا؟ اتے ایہہ ای ہٹلر نال وی۔ برطانیہ دے حاکم میل وچ اک تگڑا دھڑا سی جو ہٹلر نال مُکنا چاہندا سی۔ برطانیہ دا باشاہ راج کاج تیاگن توں پہلاں، ایڈورڈ اٹھ نازیاں دی کھلم کُھلا سلاہنا کردا سی،اتے راج تیاگن پچھوں اوہ جرمنی گیا تے ہٹلر نوں ملیا۔اوس دےاں تے اوس دی تیویں دیاں ہٹلر نال تصویراں نیں۔ اتے ایس دا کارن ایہو سی۔اوہ کہندے سن پئی ساڈا ویری جس نال ساڈی لڑائی اے اوہ بالشویک تے اُتھل اے۔ ایس لئی کوئی شے جو ایہناں نوں کنڈھے رکھے سانوں مدد دنیدی اے۔
برطانوی پتیاون ہارے(مناونا)، جویں اوہناں نوں آکھیا جاندا اے،اوہ انتاں دے سجے پکھی سیاستدان سن،پر اوہ عقلوں وانجھے نہیں سن۔اوہناں آکھیا جے ہٹلر نوں روسیاں ورودھ کیتا جا سکدا اے تاں ایہہ بڑا شاندار ہووے گا۔آؤ سبھ توں پہلاں اوس نوں سویٹ یونین ورودھ ورتےے اتے پھیر اسیں گل کراں گئے۔ میرا کہنا اے پئی اوہناں نوں اندازہ نہیں سی پئی جے ایہہ ہوندا تے پھیر سویت یونین نے ڈیہہ پینا سی تے پھیر ایس نے ہٹلر نوں ایناں تگڑا کردنیا سی پئی اوس راتورات یورپ اُتے مَل مار لینی سی۔
جے تُسی فرانس نوں تکو، جد نازی مارچ کردے آئے،آرکائیو وچ ہٹلر دی اوہ فلم ہے جد اوہ فرانس گیا جس ویلے اوس اُتے قبضہ ہو گیا سی، تُسیں تالیاں ماردے لوکاں دے ہڑھ تکدے اوہ فرانس دے اوہناں علاقیاں وچ۔ ایس چیز لئی ڈیگال نوں تے کیمونسٹاں نوں کجھ ویلا لگیا پئی اوہ کجھ جوڑ جاڑ کے نازیاں ورودھ لہر شروع کر سکن۔پر فرانس دی ریتل یہود ورودھ مت اتے اوہناں دی قوم پُوجا وچی سرکار دا مُڈھ سی اتے اوہناں دی میل ورتن جس اُتے بوہتا فرانس خُشی خُشی ہٹلر نال چلدا رہیا۔ایہہ اوہ سچ اے جس اُتے بوہتی گل نہیں ہوندی پر جس نوں سمجھنا بوہت لوڑیندا اے۔
(چلدا)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels