Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> شاہد آفریدی نے بین الاقوامی کرکٹ توں ریٹائرمنٹ دا اعلان کر دتا

شاہد آفریدی نے بین الاقوامی کرکٹ توں ریٹائرمنٹ دا اعلان کر دتا

وچار ڈیسک
May 31st, 2011

پاکستان کرکٹ ٹیم دے گذریل کپتان تے آل راؤنڈر شاہد آفریدی نے انٹرنیشنل کرکٹ توں ریٹائرمنٹ دا اعلان کر دتا ہے۔ اوہ آکھدے نیں پئی اوہناں ایہہ فیصلہ پاکستان کرکٹ بورڈ دے مندے ورتارے توں دکھی ہو کے کیتا ہے۔

شاہد آفریدی دا کہڻا ہے جو اوہ اجوکے کرکٹ بورڈ وچ اپنی کرکٹ جاری نہیں رکھ سکدے۔ اوہناں دا کہڻا ہے پئی اوہناں انج دی کوئی غلط گل نہیں کیتی جیہدے تے بورڈ نے اوہناں نوں کپتانی توں ہٹا دتا۔

ویسٹ انڈیز دے خلاف ون ڈے سیریز جتڻ دے مگروں اوہناں نوں ایسے پاروں کپتانی توں ہٹا دتا گیا سی پئی اوہناں نے وطن واپسی تے ٹیم منیجمنٹ نال جھیڑے بارے میڈیا وچ گل کیتی سی۔ شاہد آفریدی نوں پاکستان کرکٹ بورڈ نے اظہار وجوہ دا نوٹس وی جاری کیتا سی جیہدا اوہناں نے جواب وی دے دتا سی۔

شاہد آفریدی نوں آئر لینڈ دے خلاف ون ڈے میچاں دی سیریز لئی پاکستانی ٹیم وچ عام کھڈاری دی پکھوں رلایا گیا سی جدوں کہ اگوائی مصباح الحق نوں دے دتی گئی سی۔ آفریدی نے ایہہ آکھ کے پئی اوہ اپنے بمار پیو نوں سانبھڻ لئی امریکہ نیں آئر لینڈ دے خلاف سیریز وچ حصہ نہیں لیا پر اوہناں دے نہ کھیڈڻ دا اصلی کارن کپتانی توں ہٹائے جاڻ تے اوہناں دا غصہ سی۔

شاہد آفریدی نے دو ہزار چھ وچ ٹیسٹ کرکٹ توں ریٹائرمنٹ دا اعلان کیتا سی پر پچھلے سال انگلینڈ دے دورے وچ اوہ پاکستان دی ٹیسٹ ٹیم دے کپتان وی بڻائے گئے سی پر آسٹریلیا دے خلاف لارڈز ٹیسٹ دی ہار دے مگروں اوہناں اک واری فیر ٹیسٹ کرکٹ نوں خیرباد آکھڻ دا فیصلہ کر لیا سی۔

اوہناں دا ٹیسٹ کیرئیر صرف ستائی ٹیسٹ میچاں دا ہے جیہدے وچ اوہناں نے پنج سنچریاں تے اٹھ ادھیاں سنچریاں دی مدد نال ستاراں سو سولاں دوڑاں بنائیاں تے اڑتالی وکٹاں لئیاں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels