Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> کرکٹ دا میدان، پاک بھارت نیڑتا دا کارن!!

کرکٹ دا میدان، پاک بھارت نیڑتا دا کارن!!

وچار ڈیسک
April 9th, 2011

ورلڈکپ کرکٹ 2011 بھاویں مک گیا ہے پر جاندیاں جاندیاں ایہہ دکھڻی ایشیائی علاقے لئی آس دی کرن پیدا کر گیا ہے جیہدے نال کوئی ڈیڈھ ارب دی آبادی تے چنگے اثر پے سکدے نیں۔ عالمی کپ دے سیمی فائنل وچ کرکٹ راہیں دوہاں پاسیاں دے آگواں نے جیہڑے جوش دا وکھالا کیتا اوہدے وچ امن دی آس نوں ہور ہلا شیری ملدی ہے پر مبصراں دا کہڻا ہے جو دوہاں ملکاں نوں مذاکرات دی بحالی لئی تیجی طاقت یعنی امن دشمن عناصر توں ہوشیار رہڻا پوے گا۔

ہندوستانی وزیر اعظم ولوں سیمی فائنل ویکھڻ لئی پاکستانی آگواں نوں سدڻ تے پاکستانی حکمراناں دا لبیک کہڻا ایس گل دی نشانی ہے پئی دوویں ملک اک دوجے نال چنگے سانگے چاہوندے نیں تے سارے مسئلیاں نوں آپوں نبیڑن لئی تیار نیں۔ انج تے پاکستان تے ہندوستان دیاں کئی ثقافتاں تے ریتاں سانجھیاں نیں پر اک شے جیہڑی دوہاں ملکاں وچ سب توں بہتی سانجھی ہے اوہ کرکٹ دا جنون ہے ایس لئی ایہدا فیدا چکدیاں ہوئیاں دوہاں ملکاں نے کرکٹ دے نال نال مذاکرات دی میز وی سجاؤڻ دا فیصلہ کیتا ہے۔

موہالی وچ دوہاں ملکاں دے آگواں دے سر جوڑن دے کوئی اک ہفتے دے مگروں ہندوستانی سیکرٹری خارجہ نروپما راؤ نے بیان دتا ہے جو ہندوستانی کرکٹ ٹیم پاکستان دا دورہ کرن لئی تیار ہے تے کرکٹ ہی اوہ وسیلہ ہے جیہدے پاروں دوہاں ملکاں دے لوک نیڑے آئے نیں۔ مبصراں موجب اوہناں دا ایہہ بیان بہت ہی چنگا تے سلاہوڻ جوگ ہے جے انج ہوندا ہے تے پاکستان دے ویران میدان ہی اک واری فیر آباد نہیں ہو جاڻ گے سگوں دوہاں ملکاں دے لوکاں نوں وی نیڑے آؤڻ دا موقع ملے گا جیہدے نال آگو بھروسے نال چنگے فیصلے کرن دی پوزیشن وچ آ سکدے ہیڻ۔

کرکٹ توں اڈ دوہاں ملکاں دے قومی کھیڈ ہاکی راہیں وی لوکاں نوں نیڑے لیاؤڻ دی کوشش کیتی جا رہی ہے۔ ایس حوالے نال پاکستانی ہاکی فیڈریشن دے سیکرٹری جنرل آصف باجوہ دا کہڻا ہے جو انڈین ہاکی فیڈریشن دے سیکرٹری نریندر بترا نال رابطہ ہویا ہے پر اوہناں دا کہڻا سی پئی ایس سیریز دے شیڈول دا اعلان دوہاں ملکاں دیاں حکومتاں توں اجازت دے مگروں جاری کیتا جاوے گا۔

مبصراں موجب کھیڈاں دے مگروں حکومتی سانگے وی بحال ہوڻ دی آس ہے تے آؤڻ والا ویلا دوہاں ملکاں وچ پاڑ دی تھاں سنگت دا سنیہا لیا سکدا ہے۔ پر ایتھے ایہہ گل دسڻ جوگ ہے پئی جدوں وی دوہاں ملکاں دے آگو مسئلیاں دے حل لئی سر جوڑدے ہیڻ تے تیجی طاقت اوہناں وچکار انج دے بھلیکھے پیدا کر دیندی ہے جیہدے نال دوریاں ہی نہیں ودھ جاندیاں سگوں لوک وی اک دوجے توں دور ہو جاندے نیں۔

نومبر 2008 وچ جدوں ہندوستانی شہر ممبئی تے ات واد دھاڑے وجے تے اوس ویلے دے پاکستانی وزیر خارجہ شاہ محمود قریشی وی ہندوستان دے دورے تے سڻ۔ ایہناں شر پسند عناصر دے دھاڑیاں دے مگروں ایہہ سلسلہ مک گیا تے دوہاں ملکاں دے ہتھ کجھ نہ آیا۔ ہڻ جدوں کہ اک واری فیر برف پگھل رہی ہے تے دوہاں ملکاں نوں ایہدے توں بھرواں فیدا چکڻا چاہیدا ہے۔

دوہاں ملکاں دے سانگیاں تے نظر رکھڻ والے ماہراں دا کہڻا ہے جے دوویں ملک علاقے وچ واقعی پائیدار امن چاہوندے نیں تے اوہناں نوں تقریباً ڈیڈھ ارب دی عوام لئی چنگی نیت نال اک دوجے دے ساہمڻے بیٹھڻا ہووے گا تے اک دوجے تے بھروسہ کرنا ہووے گا تاں جو تیجی طاقت آپڻیاں سازشاں وچ ناکام ہوسکے۔ دوہاں ملکاں دا اصلی ٹیچا چنگے سانگے نہیں سگوں تیجی طاقت مکاؤڻی چاہیدی ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels