Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> عالمی کپ: ہندوستان سری لنکا دی کارکردگی تے حساب کتاب دی جادوگری

عالمی کپ: ہندوستان سری لنکا دی کارکردگی تے حساب کتاب دی جادوگری

وچار ڈیسک
April 2nd, 2011

کرکٹ دے شیدائیاں دی اُڈیک مُکڻ والی ہے تے اج ہفتے نوں ایہہ فیصلہ ہو جاوے گا پئی عالمی کرکٹ تے اگلے چار سالاں تیکر حکمرانی لئی تاج ہندوستان دے سر تے سجدا ہے یاں سری لنکا دے۔ دوہاں ٹیماں وچ بھرواں مقابلہ ہوڻ دی آس کیتی جا رہی ہے۔ دوہاں ٹیماں دی بیٹنگ لائن بہت مضبوط ہے پر باؤلنگ وچ سری لنکن بالرز ہندوستانی گیند بازاں توں ودھ نیں۔

بیٹنگ وچ تقابلی جائزہ

ہندوستان نے عالمی کپ وچ ہڻ تیکر 2194 دوڑاں بنائیاں۔ یعنی ہر میچ وچ اوسطاً 274 دوڑاں جدوں کہ سری لنکا ولوں بڻائے گئے سکورز دی گڻتی 1933 ہے یعنی ہر میچ وچ اوسطاً 242 دوڑاں۔ دوجے لفظاں وچ ایتھے وی دوہاں وچکار چنگا مقابلہ ہے۔ ہڻ تیکر دے مقابلیاں وچ ہندوستان نے اک اوور وچ 5.80 دوڑاں بڻائیاں جدوں کہ سری لنکا دی اوسط 5.70 ہے۔ جیویں ایتھے وی دوہاں وچ تھوڑا جہیا فرق ہے۔ کل سکور بڻاؤندیاں ہوئیاں ہندوستان نے 58 وکٹ گوائے جدوں کہ سری لنکا نے 40 وکٹ دتے۔ ایہہ گل سری لنکا دے حق وچ جاندی ہے۔

حساب نال ظاہر ہوندا ہے جو ہندوستان دے مقابلے وچ سری لنکا دے اوپنرز بہتے کامیاب رہے۔ سری لنکا دے اوپنر نے اک میچ وچ اوسطاً 97.9 دوڑاں بڻائیاں جدوں کہ ہندوستانی اوپنرز دا 53.9 اوسط رہیا۔ پر ہندوستانی اوپنر سری لنکا دے مقابلے وچ بہتے تیز ثابت ہوئے نیں۔

ہندوستان دا اسٹرائیک ریٹ 102.6 ہے جدوں کہ سری لنکا دا اسٹرائیک ریٹ 96.1 ہے۔ مڈل آرڈر یعنی تن، چار تے پنجویں نمبر دے بلے بازاں وچ سری لنکا دے کھڈاری چنگے رہے کیوں جو اوہناں دیاں وکٹاں ڈگڻ دی اوسط 56.2 ہے جدوں کہ ہندوستانی مڈل آرڈرز دیاں وکٹاں ڈگن دی اوسط 41.6 رہی۔ پر سوادی گل ایہہ ہے جو دوہاں ٹیماں دے مڈل آڑڈر بلے بازاں دیاں دوڑاں بناؤڻ دی اوسط86.5 ہے۔ ہندوستانی مڈل آرڈرز نے سری لنکا دے مقابلے وچ بہتیاں دوڑاں بڻائیاں۔ جیہناں دی کل گڻتی 874 ہے۔ اوہناں نے ایہہ اسکور 1010 گینداں تے کیتا جدوں کہ سری لنکن مڈل آرڈرز نے 845 گینداں تے 731 دوڑاں بڻائیاں۔

لوئر مڈل آرڈر یعنی چھ ، ست تے اٹھویں نمبر تے آؤڻ والے بلے باز ہندوستان دے چنگے رہے جیہناں نے 390 گینداں تے 304 دوڑاں بنائیاں جدوں کہ سری لنکن نے 205 گینداں تے 172 دوڑاں بڻائیاں۔

پاور پلے دی گل کیتی جاوے تے بھاویں ایس مرحلے وچ ہندوستانی بلے بازاں نے بہتیاں دوڑاں بڻائیاں پر ایس وچکار سری لنکا دے مقابلے وچ اوہناں دیاں بہتیاں وکٹاں وی ڈگیاں۔ ہندوستان نے پاور پلے وچ چھ اعشاریہ چار دی اوسط نال دوڑاں بڻائیاں جدوں کہ سری لنکا دی اوسط چھ اعشاریہ اک ہے۔ ہندوستان نے پاور پلے وچ ترتالی اعشاریہ پنج دی اوسط نال وکٹاں گوائیاں جدوں کہ سری لنکا دے کھڈاری 61 اعشاریہ دو دے اوسط تے آؤٹ ہوئے۔

دوجے پاسے سری لنکن اوپنرز تے مڈل آرڈر بہت مضبوط نظر آ رہیا ہے تے جاندار کاکردگی پاروں سری لنکا خطرناک بیٹنگ رکھڻ والی ٹیم دی شکل پھڑ چکی ہے پر ایہدے نال نال لوئر آرڈر نوں وی آپڻی ذمے واری محسوس کرنی ہووے گی تاں جو اوکھے ویلے وچ اوہ ٹیم نوں آسرا دے سکے۔

بالنگ دا تقابلی جائزہ

سری لنکا پیسرز نے عالمی کپ وچ 113 اوورز کرائے نیں جیہڑے ہندوستانی فاسٹ بالرز دے 157 دے مقابلے وچ گھٹ نیں جیہناں وچ سری لنکا نے 23 جدوں کہ ہندوستان نے 33 وکٹاں لئیاں۔ دوہاں ٹیماں دے پیسرز دی اوسط کوئی برابر ہی نظر آرہی ہے۔ ہندوستانی فاسٹ بالراں دا اوسط 24.9 ہے جدوں کہ سری لنکا دے بالراں دی ایوریج 23.7 ہے۔ پر سری لنکن بالراں دا اکانومی ریٹ 4.83 ہے جیہڑا ہندوستان دے بالراں نالوں چنگا ہے جیہناں دا اکانومی ریٹ 5.23 ہے۔

سری لنکن اسپنرز وی ہندوستانی اسپنرز تے پلہ بھاری ہے۔ سری لنکا دے اسپنرز نے اک اوور وچ 3 اعشاریہ 79 دی اوسط نال رنز دتے جدوں کہ ہندوستانی اسپنرز نے 4.86 دی اوسط نال رنز دتے۔ سری لنکن اسپنرز نے 20.4 رنز دی اوسط نال وکٹ لئے جدوں کہ ہندوستان نوں وکٹ ڈیگڻ لئی 37.9 رنز دی اوسط نال رنز دیڻے پئے۔

پاور پلے وچ وی سری لنکا دے بالراں نے ہندوستان دے مقابلے وچ گھٹ رنز دتے۔ سری لنکا نے پاور پلے دے اک اوور وچ چار اعشاریہ پنج دی اوسط نال رنز دتے تے 26.7 دی اوسط نال وکٹ لئی جدوں کہ ہندوستان دے اک اوور وچ پنج اعشاریہ چار دی اوسط نال دوڑاں لئیاں تے اوہناں دی وکٹ لیڻ دی اوسط 33.1 ہے۔

ایس کارکردگی نوں ویکھدیاں ہوئیاں ایہہ کہیا جاسکدا ہے پئی سری لنکن باؤلنگ لائن ہندوستان دے مقابلے وچ بہت چنگی ہے تے 2 اپریل دے مقابلے وچ ہندوستان دی باؤلنگ لائن نوں بہت محنت توں کم لیڻا ہووے گا۔

دوجے پاسے بھاویں سری لنکن باؤلنگ حکمت عملی ہڻ تیکر بہت فیدے مند تے کامیاب رہی ہے پر اوہناں نوں ایہہ پکھ وی ویکھڻا ہووے گا پئی جے کسے موقعے تے ہندوستانی بلے بازاں دا پلڑا بھاری ہو جاوے تے اوہ آپڻے پلان بی راہیں ایہدے تے قابو پا سکڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels