Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> کرکٹ دے جنون ساہمڻے کئی مسئلے ہیڻے ہو گئے

کرکٹ دے جنون ساہمڻے کئی مسئلے ہیڻے ہو گئے

وچار ڈیسک
March 30th, 2011

پاکستان وچ ات واد، لاقانونیت، بے روزگاری، غریبی، لوڈ شیڈنگ، بے ایمانی، لسانیت، علاقائیت سڻے کئی مسئلے کرکٹ دے جنون ساہمڻے ہیڻے ہو گئے نیں یاں فیر مر گئے نیں۔ بھاویں ورلڈ کپ دی چمک ہڻ کجھ دناں دی ہی گل ہے پر کجھ گھنٹیاں لئی ہی سہی کئی خوشی والے پہلو اُگڑے نیں۔ جیویں جیویں سیمی فائنل دا ویلا نیڑے آؤندا جا رہیا ہے قوم دے دل دیاں دھڑکناں تے پاک ٹیم دی فتح لئی دعاواں دا سلسلہ تیز ہوندا جا رہیا ہے۔ جیویں سارے اک نیں، ساریاں دیاں سدھراں اک نیں۔

سیاست دے ایوان ہوڻ یاں جیلاں وچ بند قیدی، مسیتاں مدرسے ہوڻ یاں مندر، ٹی وی تے سیاسی بحث کرن والیاں ہستیاں ہوڻ یاں پڑھیار، سفر جہاز وچ ہووے یاں بس دا، فائیو سٹار ہوٹل ہوڻ یاں چھپر ہوٹل، واہگہ بارڈر ہووے یاں کراچی دا ساحل، بازاراں دی روڻق ہووے یاں کسے پنڈ دا اکلاپا۔ پر پاسے ماحول نوں پاک بھارت میچ نے کیلیا ہویا ہے۔

بھاویں ماہر تے تگڑے لوک قوم نوں کرکٹ نوں کھیڈسمجھڻ دی نصیحت کر رہے نیں پر محسوس ہو رہیا ہے جو گل بہت اگے ودھ گئی ہے تے قوم ہر صورت گرین شرٹس نوں نوں جت دا ویکھڻا چاہوندی ہے۔ حد تے ایہہ ہے جو دوہاں ملکاں دے سیاستدان وچ ایہناں جذبیاں وچ رُڑھدے نظر آؤندے نیں۔ ویلے دی حکومت نے عوامی سدھراں نوں ویکھدیاں ہوئیاں سارے ملک دے سرکاری اداریاں وچ ادھے دن دی چھٹی دا اعلان کیتا ہے تے سندھ حکومت تے پوری چھٹی دا جدوں کہ بجلی دیڻ والے اداریاں نے وی لوڈ شیڈنگ نہ کرن دا اعلان کیتا ہے۔

پاک بھارت سیمی فائنل دے ملکی تے غیر ملکی سیاست تے ڈوہنگے اثر وی ویکھے جا رہے نیں۔ ہندوستانی وزیر اعظم منموہن سنگھ دی صدر آصف علی زرداری تے وزیر اعظم سید یوسف رضا گیلانی نوں سیمی فائنل ویکھڻ دے سدّے توں مگروں سیاستدان وی بڑے تتے نظر آ رہے نیں۔ اک پاسے تے پاک بھارت کرکٹ ڈپلومیسی دیاں گلاں کیتیاں جا رہیاں نیں تے دوجے پاسے پاکستان دی حکمران جماعت پیپلز پارٹی نوں رُسیاں ہوئیاں سیاسی جماعتاں نوں مناؤڻ دا موقع وی مل گیا ہے۔ وزیر اعظم جتھے ساریاں سیاسی جماعتاں دی اگوائی نوں دورہ بھارت بارے اعتماد وچ لے رہے نیں اوتھے اوہناں نوں آپڻے نال ہندوستان وچ میچ ویکھڻ دا وی سدّا دے رہے نیں۔

سیاستدان وی ایس موقعے توں بھرواں فیدا چکدیاں ہوئیاں لوکاں دیاں ہمدردیاں لئی کئی طریقیاں نال کوششاں کر رہے نیں۔ مسلم لیگ نون دے آگو شہباز شریف نے اعلان کیتا ہے جے پاکستان سیمی فائنل جتیا تے کھڈاریاں نوں اک، اک مربع زمین انعام دے طور تے دتی جاوے گی جدوں کہ ایم کیو ایم دے آگو الطاف حسین نے سارے ملک وچ چٹھی دی منگ کیتی ہے۔

مسیتاں وچ دعاواں لئی کہیا گیا ہے۔ پاکستان دے اک ٹی وی چینل تے تے باقاعدہ گذریل مذہبی پربندھاں دے وزیر عامر لیاقت حسین نے رقت طاری کرن والی دعا وی کروائی جدوں کہ جمعے دی نماز وچ کئی مسیتاں وچ پاکستان دی فتح لئی دعاواں کیتیاں گئیاں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels