Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> پاکستان اتے بھارت دا میچ 'فائنل توں ودھ کے'

پاکستان اتے بھارت دا میچ 'فائنل توں ودھ کے'

وچار ڈیسک
March 26th, 2011

آسٹریلیا دے ٹورنامنٹ توں باہر ہوڻ تے کرکٹ ورلڈ کپ ہور وی سوادی ہو گیا ہے۔ ہڻ کرکٹ دی دنیا سیمی فائنل وچ روائتی مخالف دھراں پاکستان اتے بھارت وچکار مقابلے نوں اڈیک رہیاں ہیڻ اتے ہندوستانی میڈیا وچ ایہدیاں بڑیاں دھماں پئیاں ہیڻ۔

ہندوستانی اخباراں نے جمعے دے دیہاڑے آسٹریلیا اتے ہندوستان دے کوارٹر فائنل تے بھرویں تبصرے کیتے ہیڻ۔ ظاہر گل ہے پئی ایس میچ وچ ہندوستان دی جت کوئی اینی سوکھی وی نہیں سی۔ ایس توں وی وڈی گل ایہہ ہے پئی آسٹریلیاں نوں کوارٹر فائنل وچ ہراؤڻ نال کرکٹ ورلڈ کپ تے ایہدی 12 ورھیاں دی حکمرانی وی مکا دتی گئی ہے۔

جمعرات دے دیہاڑے ایہہ میچ بھارتی شہر احمد آباد دے سردار پٹیل سٹیڈیم وچ کھیڈیا گیا۔ بھارتی ٹیم کجھ دباء وچ تے کھیڈی پر اخیر 5 وکٹاں توں جت گئی۔ آسٹریلوی کپتان رکی پونٹنگ دی ودھیا سینچری وی اوہدی ٹیم نوں ہرڻ توں نہ بچا سکی۔

ہندوستان وچ ایس جت دا دوہرا چس ماڻیا جا رہیا ہے۔ اک پاسے پچھلے چیمپیئن آسٹریلیا نوں ٹورنامنٹ چوں باہر کڈھڻ دا جشن ہے تے دوجے پاسے اگلے مقابلے وچ پاکستان نال کھیڈڻ دی خوشی وی۔ روزوار 'میل ٹوڈے' نے جمعے نوں پہلے صفحے تے ایہہ وڈی سُرخی لائی، 'پاکستان نوں لیاؤ'۔

جمعے نوں ہندوستان دیاں ساریاں اخباراں نے ہندوستان دی ایس جت دی گل پہلے صفحے تے کیتی اتے ایس میچ دی نکی توں نکی گل وی چھاپی۔ 'ٹائمز آف انڈیا' نے لکھیا پئی سارے دیس وچ کرکٹ دے شوقین آپڻے ہر من پیارے کھڈاری سچن ٹنڈولکر نوں 2 اپریل دے فائنل وچ ہوم گراؤنڈ تے سینچری سکور کردیاں دیکھڻا چاہوندے ہیڻ۔ اخبار لکھدا ہے پئی موہالی وچ پاکستان اتے ہندوستان وچکار ہوڻ والا سیمی فائنل ایہو جیہا ہے جیویں کوئی سوادی کھاڻا جیہنوں دیکھ کے ای منہ وچ پاڻی آ جاندا ہے، جدوں کہ ایس میچ وچ جتڻ نال بھارت دے فائنل وچ اپڑن دی وی آس ہے۔

ٹائمز آف انڈیا نے ہور لکھیا ہے پئی ایہہ اک ایہو جہیا سچ ہے جیہدا سفنا ہر کوئی دیکھ رہیا سی۔ کرکٹ دے شوقین، پربندھی اتے اشتہاری کمپنیاں، سارے ایس گل نوں اڈیک رہے سڻ۔ ممبئی دھاڑیاں مگروں ہندوستان دی دھرتی تے پاکستان دا ایہہ پہلا میچ ہوئے گا اتے ایہہ پکھ ایہنوں ہور وی اچیچا بڻا دیندا ہے۔

'ہندوستان ٹائمز' نے پہلے صفحے تے لکھیا ہے پئی 1999 مگروں ورلڈ کپ چوں آسٹریلیا پہلی واری باہر ہویا ہے اتے ہڻ کرکٹ نوں اک نواں ورلڈ چیمپیئن ملے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels