Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> ورلڈ کپ دے نال ہی جوئے بازی ودھ گئی

ورلڈ کپ دے نال ہی جوئے بازی ودھ گئی

وچار ڈیسک
March 7th, 2011

پاکستان دے صوبہ پنجاب دے دارالحکومت لہور دے اک سنگھڻی وسوں والے علاقے دے اک عام جہے گھر وچ وڑدیاں ہی خفیہ کاروائیاں دا گویڑ ہو جاندا ہے۔ اک راہداری توں لنگھڻ مگروں مرکزی ہال وچ اک لائن وچ کمپیوٹر، ٹی وی تے فون سیٹ پئے نیں تے اوہناں دے ساہمڻے دس دے نیڑے جوان منڈے آپڻے گاہکاں یاں جوا کھیڈڻ والیاں نوں میچ دے ریٹ دسدے نظر آؤندے نیں۔ جے ریٹ گاہک نوں منظور ہوندا ہے تے ایہدا رجسٹر تے اندراج تے نال ہی کمپیوٹر تے ڈیٹا درج تے ایس کال نوں ٹیپ ریکارڈ تے ریکارڈ کیتا جاندا ہے۔

پہلی نظر وچ ایہہ کسے سٹاک ایکسچینج دا منظر لگدا ہے پر ایتھے کرکٹ میچ تے جوا کھیڈیا جا رہیا سی تے ایہنوں کھیڈڻ والے بک میکرز دی بولی وچ ایس تھاں نوں 'بک' کہندے نیں۔

ایس بک نوں چلاؤڻ والے مسٹر اے ( اوہناں نے ناں ظاہر نہ کرن دی شرط تے بی بی سی نال گل کیتی) دے دفتر وچ صرف کاروائیاں نوں کنٹرول کردے نظر آؤندے نیں تے آپوں وی ریٹ دیڻ تے اندراج کرن وچ رُجھے نیں۔

ایس ویلے لہور وچ صرف اک میچ وچ کروڑاں روپئے دا جوا کھیڈیا جاندا ہے تے شہر وچ 'بک ' دی گڻتی ہزاراں نہیں تے سینکڑیاں وچ ضرور ہے '۔

مسٹر اے نے دسیا ' پاکستان وچ بک میکرز دے رابطے ممبئی، دوبئی، انگلینڈ اتے دکھڻی افریقہ دے بک میکرز نال ہوندے نیں جدوں کہ وڈے ٹورنامنٹ دا ریٹ ممبئی نال کھلدا ہے تے پہلوں کراچی تے مگروں ملک دے ہور شہراں وچ اپڑ جاندا ہے تے انٹرنیٹ تے ریٹ مسلسل اپ ڈیٹ ہو رہے ہوندے نیں اوہ آپڻا منافع رکھ کے جو کجھ پیسیاں وچ ہوندا ہے، جوا کھیڈڻ والیاں نوں ریٹ دیندے نیں تے فیر انج ہی منافعے دی رقم واپس، ہنڈی، آن لائن بینکنگ راہیں واپس جاندی ہے۔'

اوہناں نے دسیا پئی پہلوں اوہ آپوں جوا کھیڈ دے سی تے جدوں ایس کم دی سمجھ آئی تے کوئی چھ سال پہلوں آپڻا کم شروع کر دتا تے ایس ویلے اوہناں دے کول اک میچ وچ 40 توں 50 لکھ دا جواء ہوندا ہے جدوں کہ وڈے بک میکرز دا کم تے کروڑاں روپئے وچ جاندا ہے۔

مسٹر اے موجب کرکٹ وچ جوا پورے میچ تے ہوندا ہی ہے پر ٹاس توں لے کے ہر گیند، وکٹ، چوکے، چھکے، سنچری، نو بال وغیرہ تے وی کھیڈیا جاندا ہے۔ جیہنوں سپاٹ فکسنگ وی کہیا جاندا ہے۔

ایس توں اڈ جوئے وچ اک اصطلاح جیہنوں فینسی کہندے نیں ایہدے تے وی وڈا جوا کھیڈیا جاندا ہے۔ انج دے میچاں دا باقاعدہ ریٹ نہیں نکلدا ہے پر اک مضبوط ٹیم دا پہلے دس اوور وچ کنا سکور، وکٹاں دی گڻتی وغیرہ تے جوا کھیڈیا جاندا ہے۔

اوہناں نے دسیا پئی جیویں اجوکے ورلڈ کپ وچ آسٹریلیا دا مقابلہ زمبابوے نال سی پر ایس میچ وچ آسٹریلیا نے آس توں الٹ گھٹ سکور کیتا کیوں جو میچ وچ جوئے دے وڈے مرکز وچ فینسی جوا کھیڈیا جا رہیا سی۔

حالی تیکر کوئی انج دا میچ جیہدا نتیجہ آس دے الٹ نکلے جاڻ دے سوال تے اوہناں دا کہڻا سی 'ہندوستان تے انگلینڈ دے وچکار کھیڈے جاڻ والے میچ دا نتیجہ میچ وچ بدلیا گیا۔'

مسٹر اے موجب 'انگلینڈ دی اننگز جدوں شروع ہوئی تے انگلینڈ دی جت تے بہت گھٹ رقم لگ چکی سی تے جیہڑے جیہڑے ملکاں وچ جوا کھیڈیا جا رہیا سی اوتھے بک میکرز مائنس یاں نقصان وچ چلے گئے سی۔ ایسے ویلے پتہ لگ گیا سی پئی انگلینڈ ہڻ کسے صورت میچ نہیں جتے گا کیوں جو بک میکرز کدی وی آپڻا نقصان نہیں چاہوے گا'۔

اک میچ وچ نتیجے کیویں بدل سکدے نیں تے ایہدے تے مسٹر اے مسکاؤندیاں کہندے نیں ' ایہہ مافیا اینا وڈا ہے جیہڑی ٹیم نوں چاہے جتوا یاں ہرا سکدا ہے تے اوہناں دے سانگے ٹیم پربندھیاں تے کھڈاریاں نال ہوندے نیں۔ ظاہری گل ہے جو کوئی بک میکر آپوں کمرے وچ اکلا بیٹھ کے میچ دا نتیجہ نہیں بدلوا سکدا۔'

اوہناں موجب ورلڈ کپ دی فیورٹ ٹیماں وچ ہندوستان، سری لنکا، دکھڻی افریقہ تے انگلینڈ ہے ۔' ایس ویلے سب توں گھٹ ریٹ ہندوستان دا ہے کیوں جو اوہ سب توں بہتا فیورٹ ہے'۔ پاکستان بارے اوہناں نے کہیا حالی ٹیم جے سیمی فائنل تیکر اپڑ دی ہے تے ایہدا فیورٹ دا ریٹ آوے گا۔

اک سوال دے جواب وچ اوہناں کہیا ' جوئے دے کاروبار وچ غیر معمولی وادھا ہو رہیا ہے تے وڈے ٹورنامنٹس وچ تے گلی محلیاں، پان شاب، سنوکر کلب وغیرہ دی پدھر تے جوئے دا کاروبار شروع ہوجاندا ہے تے آؤڻ والے دناں وچ ایہدے وچ وادھا ہی ہووے گا'۔

جے حکومت ایس کاروبار نوں قانونی طور تے اجازت دے دیندی ہے تے ایہدے نال حکومت نوں وی فیدا ہووے گا تے گلی محلیاں وچ کھیڈڻ والی بکس وچ وی کمی آسکے گی کیوں جو جوا اوتھے ہووے گا جیہدے کول لائسنس ہے '۔

مسٹر اے موجب لہور وچ ایس کاروبار نال جڑے بہتے بندیاں دا سانگا جوان نسل نال ہے تے بک میکرز لئی کم کرن والے ایہناں جواناں نوں ' پنٹر' کہیا جاندا ہے۔

لہور دے ہی اک کاروباری علاقے وچ انج دے اک پنٹر مسٹر بی ( ناں نہ ظاہر کرن دی شرط تے بی بی سی نال گل بات کیتی) دا کہڻا ہے ' بے روزگاری توں اَک کے ایس کاروبار وچ آئے تے ہڻ واہوا رقم کما رہے نیں'۔

مسٹر بی دا کہڻا سی 'اوہناں دے مالک یعنی بک میکر اک وڈی کاروباری ہستی تے لینڈ لارڈ نیں۔ اوہناں لئی کروڑاں روپئے دا لیڻ دیڻ اک عام گل ہے تے انج دے ہی بندے وڈی پدھر تے کاروبار کر سکدے نیں کیوں جو اک دو کروڑ روپئے دا نقصان اوہناں لئی بھرنا بڑی معمولی گل ہے۔ ایس ویلے اوہناں دا مالک میچ وچ دس کروڑ روپئے تیکر کاروبار کردا ہے'۔

مسٹر بی دا کہڻا ہے جوا کھیڈڻ والیاں وچ نوکریاں کرن والیاں توں لے کے کاروباری لوک تے سارے طبقیاں دے لوک رلتی ہوندے نیں۔ مسٹر بی اک لکھ دے پچھے تن ہزار روپئے تیکر کما لیندے نیں تے کدی کدائیں کمائی کئی لکھاں وچ ہوندی ہے۔

ملک وچ معاشی حالات پاروں جوا کھیڈڻ والے بندیاں وچ کمی ہوئی یاں وادھا ہویا تے ایہدے تے اوہناں نے کہیا معاشی حالات دا اوہناں دے کاروبار تے کوئی اثر نہیں پیا کیوں جو جیہنے جوا کھیڈڻا ہے تے اوہنے کھیڈڻا ہی ہے۔

مسٹر بی موجب ' لوکاں دے کول جے کرن دا کجھ نہیں ہووے گا تے انج دے کماں وچ بہتے توں بہتے لوک آؤڻ گے۔' اوہناں نے کہیا کجھ مہینے پہلوں اوہناں دے اک جوان سنگی نوں کم دی لوڑ سی تے اوہناں نے ایہنوں پنٹر دا کم دوا دتا۔ ہڻ اوہ گلی محلے وچ آپڻے کول باس یعنی بک میکر لئی کم کردا ہے تے میچ کھیڈ دا ہے تے کسے ٹورنامنٹ وچ ہزاراں روپئے کما لیندا ہے۔

پولیس دے چھاپے یاں پھڑے جان دا ڈر ہوندا ہے تے ایہدے تے اوہناں نے کہیا 'جیہڑے لوک نویں نویں بک کھولدے نیں اوہناں نوں ڈر ہوندا ہے پر پراڻے لوکاں دی پولیس دے نال پہلوں توں لائن سیٹ یعنی لیڻ دیڻ ہوندا ہے ایسے لئی اوہناں نوں پولیس دا کوئی ڈر خطرہ ہوندا۔'

اوہناں موجب اوہ نویں گاہکاں یاں شرط لاؤن والیاں توں ولاؤندے نیں تے پراڻے گاہکاں یاں اوہناں دے کسے جانڻ والیاں نال ڈیل کردے نیں۔

پاکستان وچ سٹے دا غیر قانونی کاروبار کرن والیاں نال گل بات کرن نال گویڑ ہوندا ہے پئی ایہہ غیر قانونی کاروبار کنا کھلردا جا رہیا ہے جدوں کہ ایہدے وچ آؤڻ والے بہتے لوک جوان نیں۔ ماہراں دا کہڻا ہے پئی جے ایہدے تے قابو نہیں پایا جاندا تے ایہہ مرض اک وباء دی شکل پھڑ سکدا ہے۔

بی بی سی دے شکریئے نال


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels